『قٌصص ﺑٱرۅد』

⍅خطوط مشتركه⍆

قصه واقعيه ...
من صاحني بأسمي الي محد يعرفة بالجوارين انصدمت !
شلون يعرف اسمي و احنى جدد بالمنطقة !!

مصارلنا ست اشهر بالبيت گاعدين و ماعدنا أي اختلاط بالجوارين ، ابوية و امي ثنينهم موظفين يطلعون الصبح يرجعون العصريات و اني ستوني داومت بالمدرسة الجديدة حتى بعدني ممكونة علاقات وي الطالبات ..

وكفت و انداريت عليه: گلتله انت منين تعرف اسمي اصلا؟
گالي اني اعرف عليچ اشياء هواي .. گلتله منين؟

گالي اعرف وگبل و لاتسأليني منين .
گلتله شتعرف بالله؟

گالي اعرف انتي تحبين فلان اكله ، و تحبين فلان لون ، و قبل فترة رحتو لمهرجان بابل ، و قبلها بفترة رحتو لنادي الاطباء مال اسنان الي يم معرض بغداد الدولي بعرس مال دكتورة گرايب امچ ، و حتى بيومها امچ ضاعت جنطتها و المطرب بالقاعة ذاع السالفة و لگيتو الجنطة ..

گلتله اش كافي كافي و خفت كلش من حچالي هيچ و عرگت و صارت وياي صدمة ..

گلتله منين جبت هالمعلومات عني و شلون عرفت هاي الاشياء ..

-اني معجب بيچ .
-منو انته ؟
-اني بيتنه يمكم بنهاية شارعكم و اريدچ والله . -لو تروح منا لو تگلي انته منين عرفت هالمعلومات ؟

-الي راح اگلچياه متصدگي يمكن ..
-گول ؟
-اني شفتچ مرتين بس انتي منتبهتي عليه و گمت احلم بيچ و اشوف هاي الاشياء كلها ..

صدگت والله العظيم بيومها صدگت لان هاي الاشياء ما اعرف شلون عرفها عني ..

عفته ومشيت رجعت للبيت بس تفكيري كله مشغول بي .. بقيت افكر بي اكثر من اللازم ، و ثاني يوم هم لحگني بطريقي للمدرسة .

گالي ليش تتهربين مني و الله اني معجب بيچ واريدچ ، وگفت گلتله زين مو تگول احلم بيچ . بعد بشنو حلمت ؟

-گرايبج قبل فترة توفى بحادث سيارة بالراشدية على طريق الجزيرة السياحية و عندچ اخ مات هو وعمرة 3 اشهر .
-كافي و خفت والله .

-زين شلون تحلم بيه ؟
-ما اعرف اني من انام دائما احلم بيچ و اشوفچ و البارحة حلمت بيچ و چنتي بالحلم رايدة شي و كاتله نفسچ عليه .

-شنو هوه ؟
-الكوستم المخطط .
صفنت و فتحت حلگي و ضحكت گلتله: لا ممعقولة والله .. انت شنو بشر لو شنو ؟
گال اني معجب بيچ ورايدچ والله ..

و بدت علاقتي بي ، طيب و حباب و ابن اوادم و فوگ كل شي يعرف تقريبا كلشي عن حياتي وعن حياة اهلي .

چنت التقي بي بس بالطريق من بيتنه للمدرسة ، و بعدين اخذت رقمة و گمت اخابره من اهلي يروحون للدوام و اخوتي الصغار ينامون .

گمت احبه وهو اصلا يحبني ، و چان دائما يحچيلي على اشياء تصير بحياتي يخليني اصفن و ادوخ .

چنت اگله انت سحار يگلي لا والله ..

بقت علاقتي بي مستمرة لحد مداومت كليه وهو داوم كليه ، چان يجيني للكلية بين فترة و فترة و طلع يعرف طلاب اصدقائه يمنه بكليتنا .

تخرجنه و هو مگدر يتعين بس اني عن طريق معارف بابا تعينت ، و هو كام يشتغل وي اخوه الچبير بالشورجة .

و خلص وصلنا لمرحلة منگدر نعيش واحد بعيد عن الثاني .

قررنا نتزوج اني وياه ، بس قبل منتزوج گالي حچاية بقت براسي ..

گالي اكو شغلة وره منتزوج احچيلچياها ماشي !
گلتله شنو هي و طبعا الفضول موتني بس اريد اعرف حلفته الشغلة الها علاقة بالبنات؟
چان يگلي لا ..

گلتله اي شي اني قابله بس اهم شي السالفة مالها علاقة بالبنات و ما خايني ؟
گالي لا والله بعيد كلش تفكيرچ ..

و صدگ الله وفقنا و تزوجنا و بيوم العرس گالي شغلة .. صح اني ضجت من عنده بس هو يحبني صدگ و مشيتها بس مخليت احد من گرايبي لو گرايبة محچيتها الهم ..

طلع لا چان يحلم بيه و لا شي ههههههههههههههه ،
طلع خط تلفونه چان مشترك وي خطهم و يسمع حچي امي كله و امي جانت ممخليه شي متحچي لخالاتي لو لصديقاتها و هو يسمع ههههههههههههههههههه

گلتله لك انت شگد مشيطن منين جبت الفكرة و شلون جتي براسك .

گال باعي والله اني سالفة حبي كله صدك و الدليل هاي تزوجنا ، و انتي جنتي اول تجربة اليه و اخر تجربة ، السالفة و ما بيها ، فد يوم شلت التلفون الارضي ردت اخابر على صديقي ..

سمعتچ تحچين وي صديقتچ فلانه جوارينكم بالمنطقة القديمة ، و ما اعرف ليش بقيت اسمع حبيت صوتچ وحبيت سوالفچ بعدين كمت انتظرچ تحچين وي صاحبتچ و چانت امچ تحچي بالتلفون .

چنت ابقى انتظرچ تجين تحچين حتى بس اسمع صوتچ و بنفس الوقت بوقت انتظاري اسمع كلام امچ كله ، عرفت انتو الناس الجدد الي بشارعنه و رئسا تذكرت شكلچ .

و صدفة شفت فلم عربي لعادل امام صديقة يشتغل ببداله و يسمع حچي ويروح يبلغ بي الدولة ومن يسألو يگلهم هاي حلم وقويت گلبي و گلت الحگچ و اگلچ هيچ .

اذا صدگتي خير على خير و اكيد وره فترة راح اگلچ مثل ما هسة گلتلچ .
و اذا طرديتيني ابقى احاول وياچ و بلكي الله يلين گلبچ عليه و الحمدلله ، حبيبتني و حبيتچ
المهم چانت نيتي صافية وياچ والدليل ثنينه هسة متزوجين .

گلتله تدري لحد هذا اليوم اني عبالي صدگ انته چنت تحلم بيه و هسة اتذكرت شي من دتحچي وره فترة من گمنا نحچي ع التلفون گلتلي بطلت احلم بيچ ههههههههههه لان البدالة صلحو الاشتراك مووووووو ..
-اي ههههههههه ..

گلتله انت اكبر شيطان بالدنيا .
-لا والله مو شيطان بس ما اعرف شلون صارت بعد و الحمدلله و الشكر نهايتها تزوجنا .. ┈┉━❀❃❀━┅┈
( خطوط مشتركة )
انتهى

رأيكم بالقصه؟