『قٌصص ﺑٱرۅد』

⍅طفولتي و الحاضر⍆

مساء الخير
-قد يختبِر الله صبرك حتى في فوضى مشاعِرك، ادع الله كثيرًا بترتيبها وكُن من الصّابرين🌸"

من صغري و لان اني الجبيرة چنت احس بالمسؤلية ... امي من چانت تدز اخوتي الجدد للمدرسة ... تگلي اخذيهم و ديربالچ عليهم بالطريق ... چنت بصف ثالث ابتدائي و اختي بصف اول ... بالطريق للمدرسة ابقى لازمه ايد اختي قوي ... و ابد ما اهدها لباب الصف مالتها ... و مرات چنت من اهدها هي تباوع على ايدها تشوفها صايرة حمره و طبع اصابيعي عليها شوية ...

اني من خوفي عليها چنت هيچ الزمها ... و بالفرصة اعوف الطالبات وياي و اركض على صف اختي ... اطلع الاكل من جنطتها و الاكل من جنطتي و نگعد ناكل قريب من المكان الي بي بوري المي ... حتى اذا كملنا المي مال مطاره گبل اروح اترسلها مي ... و بقيت اسوي هـ الشي وياها و بعدين بصف السادس دخل اخوية الجديد هم لنفس الابتدائية ... و همسه كبرت شوية ... گمت الزم ايد همسة و همسة تلزم ايد حازم ... و نمشي سوه ... و گمت بكل فرصه اروح لحازم بالبداية اخذه و نرجع لهمسة نلگاها تنتظرنا و نروح تلاثتنا ناكل لفاتنا هناك يم القاعة القريبة من المي ...

و من عرفت اني راح اروح للمتوسطة چنت يوميا اعلم همسة تسوي هـ الاشياء وي حازم .. وهي چانت تگول أي ... و رحت للمتوسطة و طبعا المتوسطة و الابتدائية بنفس المنطقة بس كل وحده مكان ...

چنت مرات اذا يطلعونا من وكت لو اخر درس شاغر كبل اروح لمدرستي القديمة انتظر اختي و اخوية حتى نرجع سوه للبيت ... بالمنطقة الجهال كلهم يصيحون لأخوية و أختي مو باساميهم ... يصحولهم همسة اخت ايه و حازم اخو ايه ... ليش؟ .. لان شحده الي يضرب اخوية لو اختي ... ارجعله الضربه بعشره ... و كل الجهال چانو يخافون يضربوهم لو يغلطون عليهم من ورايه ...

حتى مره اجاني حازم يبچي يگول ديلعبون طوبه و ميقبلون يلعبوني ... طلعت وياه و بقيت واگفه بنص الشارع الي ديلعبون بي .. گلتلهم لو تلعبون حازم لو ابقى واگفه ... و لعبوه وياهم ... چنت يوم وره يوم احس اني امهم مو اختهم ... صح امي عايشه و موجوده بس امي چانت دائما تخليني بمكانها من تطلع تتسوك لو تروح للجوارين ..

حتى بالدراسة تگلي انتي راقبيهم ... چنت حنينه عليهم بمكانات و قاسية عليهم بمكانات ... يعني الي يتمرض منهم ابقى اداري للصبح وما اعوفه الا وهو زين ... و الي يحزن من شغلة ما اعوفه اذا ما اضحكه .. و محد يجوع بيهم واني موجوده حتى لو امي طالعه ..

بس بمكانات ثانية چنت قاسية خصوصا اذا شي يخص مستقبلهم ... الدراسة چنت ما اتهاون بيها ... ما اقبل يعوفون الشي ع النص .. القصيدة اذا سطر محافظي زين ابقى للصبح وياهم لحد ميحفظوه .. جدول الضرب خبلوني ثنينهم يلاا حفظته الهم .. اسامي المضايق بالجغرافية و الفرق بين الثديات و الزواحف بالاحياء و و و وو و ....

و كبرنا كلنا .... دخلنا كليات و تخرجنا ... و بقيت مثل ما اني وياهم ... حتى وهمه كبار ... و تزوجت همسة .. و تزوج حازم ... بس اني ما حصلي نصيب و مچنت اعتبر هالشي مو زين ...