بوقتها ردت أي شغلة احسن بيها وضعي، چنت مدرس و عندي مبدأ، المبدأ غلط حسب رأي الاغلبية، يگولولي درس خصوصي حالك حال ست فلانة و استاذ فلان، اني اعرف التدريس الخصوصي معناها انطي استحقاق لطالب بس هو مو حقه، اغلب المدرسين يصير بينهم و بين نفسهم صراع نفسي، يعني هو يدرس طلاب بالصفوف الي يدرسهم و يجي بالامتحان يشوف اجاباتهم مخربطة رغم ما همه يدرسون يمه ..
زين .. شيسوي بهل الحالة اذا رسبهم معناها راح اهل الطلبه يگولوله لعد انته مو دتدرس ولدنه؟ شلون يرسب؟ و من باب ثاني يحس انو تدريسه غلط لذلك لازم ينجحه و ينطي درجات عاليه و هالطالب ميستحقها، اني هيچ چانت فكرتي و ما چنت اقبل على روحي ادرس احد و انطي درجات مو درجاته اذا جاوب غلط، علمود هالشي گمت ادور شغلة اضافية احسن بيها دخلي المادي ...
عندي عائلة مكونة من ٣ بنات و امهم، زوجتي متعرف تقرا و تكتب و ربة بيت ممتازة و بنت عائلة كلش طيب و محترمة بالمنطقة و اهلها جوارين العمر وي بيت اهلي و على هالاساس اني تزوجتها، والدي و والدتي توفو و اني الوحيد الهم، عملي مدرس رياضيات، اصلي من بغداد و مولود ببغداد بمنطقة شعبية بسيطة مواليدي ١٩٦٣ ...
احب التدريس و احب اشوف الطالب يفتهم شرحي و بداخلي افرح من اشوفه يجاوب على كل سؤال من ضمن المادة الي ادرسها، للأسف زوجتي توفت بسبب مرض عضال بعمر صغير و عافتلي مسؤولية ٣ بنات، الف رحمه على روحها وراها متزوجت و اكون كاذب و منافق اذا ما فكرت بهل الشي بس خفت على بناتي ...
مسؤولية البنات و مصرفهم بمرور الزمن اكبر بهواي من مصرف الشباب لان الشباب يگدرون وره عمر معين يعتمدون على نفسهم و يساعدوني
اني صرت الاب و الام بنفس الوقت چنت اخاف على بناتي يعني اذا يتاخرون بالدوام واني اكون بالبيت اتخبل اطلع بره اوگف انتظرهم، بمرور الوقت المصاريف زادت وبيوم من الايام جتني بنتي الوسطانية و گالت بابا سهام چانت يمنه الصبح و طرحت عليه فكره .. گلتلها شنو؟
گالت نسوي قراصات و طوگ مال شعر و سوارات و اكسسوارات بس عمل يد (بهل وكت يصيحولها هاند ميد) گلتلها حلو، و بدو بناتي يشتغلون هالشغلة بس اني وياهم و اساعدهم، و گلتلهم لا تگولون گبال سهام بابا يساعدنه لان بوقتها استحيت ...
چان احلى وقت عندي من اگعد وياهم بالصالة ع الزولية و نحط صينية چبيرة بيها الغراض و السيلكون الي نلزگ بي و نلزم شغلة شغلة نسويها و نسولف و نضحك ...
چنت اعرف اسامي صديقاتهم كلهم و من يحچون گبالي ولا عبالك اني ابوهم عبالك صديقتهم و بعمرهم و اني اتشاقه وياهم و همه كل شوية يبوسوني ..
و من ينامون من وكت چنت اسهر اكمل شغلهم خصوصاً من عندي دوام ظهري بوقتها چان يدخلنه فلوس على هالشغلة بس مو هواي و الحمدلله شوية تحسنت الحاله ...
و بعدين بنتي الچبيرة گالت بابا اني اسوي بورگ و هواي اكو ناس تحب تشتري اكل بيت شنو رايك اسوي بورگ و اجمده و ابيعه للناس، و هم قبلت و گمت اساعدها بالشغل واساعدها بكل شي ...
و بالمنطقة الكل يحب بناتي و يحترمهم حباً بيه و بأمهم الله يرحمها، طبعا هواي جوي خطابه عليهم بعمر صغير بس اني چنت ارفض لان اريدهم يكملون دراستهم بس هالشي وره ما اسألهم لان ما احب اجبرهم على شي ...
و الله رزقني بشغلة قريبه بالمنطقة بمكتبه، ابو المكتبة چنت اتسوگ منه شغلات قرطاسية الي و للبنات بيوم من الايام سألني و طبعا هو يدري بيه مدرس گالي استاذ اني ماعندي وكت للمكتبة بسبب عملي الثاني شنو رأيك تلزم المكتبة؟
كيفت و خصوصا المكتبة بمنطقتنه و قريبه من بيتنه ع الشارع العام و الله ماشها للسنين و بناتي دخلو كليات و تخرجو و توظفو و عندي الچبيره الحمد من الله دكتورة اسنان و الوسطانية مهندسة و الصغيرونه اداب انگليزي...
حالياً اني جد و اني المسؤول عن تدريس احفادي كل ما اتذكر العوائق الي صادفتني بتربية بناتي اگول معقولة گدرت اوصلهم للي همه بي حاليا ع الرغم من ضعف الحاله المادية بذاك الوقت مرات اصفن على نفسي و اگول اني ما چنت مدلل بناتي لدرجة كل الي يريدوه يلگوه گبالهم و چنت اجيبلهم هالاگدر عليه ...
ما فد يوم تذمرو على ملابس و لا شكو من شي چانو قنوعات زين ليش ما صادقو بناتي مع العلم اني لهذا عمري ما مديت ايدي عليهم و منطيهم الحريه و چان عدنا تلفون بالبيت ليش ما تعاركو وي صديقاتهم؟ ما اتذكر بيوم تعاركو؟
زين امهم توفت وهمه صغار يعني المفروض يكونون حزينات دائما بالعكس همه الي چانو يصبروني و يضحكوني و يضحكون وياي، اني الله رزقني بجواهر ..
و من امشي بالمنطقة ماكو واحد ميوگفني يسألني عن صحتي و يسألني عن بناتي هم بالاسماء حافظين اسماء بناتي الكل يدعيلهم، الكل يحبهم، طبعا هسه اني عايش وحدي و همه ما قابلات هالشي لازم بالاسبوع افتر يمهم ابات يم كل وحده يومين اقل شي، و بنهاية الاسبوع يجون تلاثتهم وي جهالهم يمي بالبيت...
و هالحچي التلفونات مشتغلة اسده من وحده و تخابر الثانية يتعاملون وياي على انو اني امهم و ابوهم و صديقتهم و اختهم و اخوهم و ابوهم وعلى نيتي و على نيتهم الله رزقهم برياجيل محترمين و ولد عوائل ...
هسه اجي للنقطة المهمة من تزوجت اني چنت متفق وي زوجتي نسوي طفلين بس، ولد و بنية فقط، و چنت بيني و بين نفسي اتمنى يجوني ولد ثنين بس و اگلها لزوجتي خلي منسوي بعد جهال و هالشي ابد ما حچيته گبال زوجتي و چنت ضامه بگلبي ...
و من جوني ثنين بنات گلتلها نسوي بعد طفل بلكي يجي ولد، هي ضحكت الله يرحمها گالت مو گلت بس ثنين، گلتلها لا نجيبلهم اخ يساعدهم و يساعدني من اكبر و قبلت الله يرحمها و هم جتني بنية ...
اليوم وره هالعمر سألت نفسي سؤال معقولة اني چنت اريد بس ولد معقولة اكو ناس تضوج من خلفة البنات؟
بناتي جيشي الي احارب بي الدنيا و اصلا حاربت بي قبل و انتصرت، انتصرت بوجودهم حبيباتي، اللهم احفظلياهم و احفظلي عوائلهم و انطيني العمر بس اشوف خلفة بنتي الصغيرة لان شوية متعطلة و وراها اخذ امانتك ... هاي امنيتي بالدنيا ... وبس ..
(بناتي جيشي)
انتهى
أنت تقرأ
『قٌصص ﺑٱرۅد』
Short Storyلم أرَا نظرات الحُب الحقيقية إلا على عتبات المقابر ، والمستشفيات ، نحن أُناسٌ لا نتذكر من نحبهم إلا في النهاية.
