جلالتك

PærT 13 ♕

فطنت إيرينا من الضوء تاع الشمس.. تقعدت و بدات تحك في عينيها...

إيرينا: " تالين.. حضريلي الحمام...

دخلت تالين و شرت للوصيفات يدخلوا يوجدوا...
وقفت تغزر في إيرينا لي كانت صفرة و عينيها منفخين من البكى...
تالين راحت ليها و قعدت قدامها..شافت فيها إيرينا و تبسمت...

تالين:" كشما صرا البارح..جيتي تباني حزينة بزاف ماشي كنتي حابة تخرجي و فرحانة...

إيرينا شدت يد تالين وقالت:" ما تقلقيش تالين..تعرفيني دوك نخرج نولي نضحك كما كنت.....لبارح عييت برك...

تالين حطت يدها في وجها إيرينا و تمسح تحت عينيها بلعقل..وقالت:" و كي تعياي تبكي جلالتك؟

إيرينا دنات و عنقت تالين..تشم فيها ريحة دارهم و أرضها ..مزيا عندها وحدة كما هي في حياتها
تالين ربتت على ظهرها بلعقل...شوية و جبدت روحها..

إيرينا ابتسمت :" دوك روحي قولي لبدر يوجد روحو ليوم نروحوا لهذيك البلاصة...راني متشوقة

تالين كي سمعت اسمو والات حمرة..هزت راسها بإيييه برك..إيرينا شمت ريحة حاجة غريبة ضيقت عينيها في تالين و قالت..:" امممم غريبة منك تالين..

تالين تلفتلها كامل:" ع.علاه جلالتك..

إيرينا:" حمرتي و هذي أول مرة نشوفك هاك بلا ما جريتك القصر كامل...

وقفت تالين تجري تكوف في روحها..إيرينا قالت:" أصبري ما تقوليليش عندها علاقة ببدر؟؟

تالين حلت عينيها مخلوعة تشوف فيها و إيرينا حطت يدها على فمها مشوكيا و تضحك ... وقفت موراها..

إيرينا:" يعني صح...تالين راكي طااايحة فييه...

تالين زادت حمارات كثر و بدا قلبها يخبط من الحشمة...:" م..مولاتي...ي..ي يسمعوك...

إيرينا قعدت تضحك...:" صحا...صحا روحي خبريه و بالاكي تحماري هاكا قدامو...

تالين قريب بكات من الحشمة علابالها إيرينا راح تشدهالها و دخل روحها...

تالين:" مولاتي تعيشي خلي هذا الأمر بيناتنا...

تبسمت إيرينا:" ما تخافيش..بصح راح نكون في قمة السعادة و أنا نراقبكم...

تالين جامي خافت من إيرينا كما دوك..بلعت ريقها انحنات و خرجت تبلغ بدر و والات تجري بلا ما تفهمو حتى حاجة....

كملت إيرينا حمامها و مشطت ضفيرة طويلة..و روبة في الغوز....كلات فطور الصباح....رفدت سيفها و خرجت...