جلالتك

PærT 16 ♕

اونفان انطلقت القافلة.. عربات بداو يمشوا بلعقل...
إيرينا فرحت خطتها بدات تمشي كما كانت حابة... حوست على ثقبة باه تشوف وين راهم... لقات عربتها هي آخر عربة في القافلة كامل موراها ثلاثة حراس فوق لعواد يعسوا في العربات ملور..

إيرينا: " يعني الحراس راهم دايرين بالقافلة كامل.. كي يحبسوا يرجعوا للقدام لازم نهبط غير يحبسوا والا نحصل هنا...

بدا يطيح الليل و العربات مازالهم يتحركوا... أصلا خرجوا روطار.. و ما كانوش ناويين يحبسوا..

آزر كان متصدر القافلة و قدامو ريكو...

آزر: " راح نلحقوا للقرية الجبلية.. متأخرين...

ريكو: " إذا كملنا هاك  نلحقوا العصر...

آزر سكت شوية وقال: " ريكو راح نرتاحوا هنا.. حبس القافلة..

ريكو باستغراب: " بصح جلالتك.. مالحقناش لنص الطريق  ميمبا...

آزر: " علابالي... كاين تغيير في الخطة...

ريكو: " حاضر جلالتك...

جبد ريكو  واحد البوق صغير و  بيض من جيبو و نفخ فيه صوتو قاوي بزاف... انتبه الجميع... و تلموا للقدام...

ريكو: ".. استراحة...!!

ايرينا سمعت صوت البوق  طلت من الثقبة... شافت الحراس مكاش... ثواني و بدات العربة تاعها تخفف في سرعتها حتى حبست كامل...

إيرينا:"  هذي فرصتي...

حلت باب العربة بلعقل و طلت.. مكان حتى واحد.. سوطات من العربة و شافت.. حارس ما يسعى.. تبسمت و سڨمت قلمونتها...
كانو في طريق معمرة شجر باينة دخلو للغابة طريقها واسعة و بعيدة على السكان..

دارت جهة العربة طل على الحراس وين راهم اكزاكت باه تتحرك.. حتى يقابلها بدر متكي على العربة و مربع يديه... تخلعت و رجعت للور...

بدر  غزر فيها.. وقال: " حسيت فضولك ما راحش يخليك بعيدة على القافلة...

قلبها بدا يخبط فوور من الخلعة...

إيرينا تراجعت لمور العربة باه ما يشوفها حتى واحد وقالت بصوت مهموس باع ما يسمعها حتى واحد : " واش راك دير هنا بدر؟!

تبعها بدر و قال: " نقوم بواجبي... حمايتك...

إيرينا نحات قلمونتها و غزرت فيه ماشي فاهمة : " ماشي قلت عندك مهمة و راح تغادر...؟