جلالتك

PærT 15♕

جاز شوية وقت و هوما ساكتين واحد فيهم ما تحرك...
حتى حست به قعد قدامها على الحيط..طلعت راسها لقاتو قاعد قدامها في لرض و متكي راسو على الحيط و يغزر للفوق...

آزر بصوت حنين...:" ماشي قصدي نجبرك.. أعتذر...

تفاجأت من إعتذارو...بصح طمئنت بزاف..غزر فيها بنص عين متردد وقال:" ما تبكيش...(عاود غزر قبالة وقال): " امسحي دموعك...
ما حملش يشوف دموعها يطيحو بسبتو

مسحت  و ما قالت والو...

آزر تنهد و هي عاود دارت تشوف قدامها ..كان كتفو قريب لكتفها ...هبطت راسها تغزر في لرض و تكالمي في روحها.. حتى نطق

آزر:" استدعيتك الليلة لاني....راح نغادر القصر لايام...

شافت فيه ماشي فاهمة...هو حب يشوفها لاطول مدة ممكنة عليها جابها لجناحو..
إيرينا:" تغادر؟ لوين!!  (سقسات بخوف): "حرب؟؟

آزر بلا ما شاف فيها كمل يهدر:" زيارة لاحد القرى...

إيرينا:" زيارة لي خبرتني عليها في المكتبة؟؟  و لازم تروح..؟؟ 

غزر فيها لثواني أمبعد قال:" أنا إمبرطور لازم نشوف شعبي واش يحتاج..و هذو الزيارات نروح شخصيا لانعدام ثقتي في من حولي...

إيرينا:" وقتاش تروح؟

آزر:" من المفروض غدوة صباح نروح.. لكن راح نأخر حتى يغادر الاميرين...

إيرينا:" شحال دوم زيارتك؟

آزر عاود تكى راسو و شاف للفوق:" على حساب الاوضاع لتم....

حزنت يعني راه خارج.... يبقى القصر فارغ بلا بيه... صح  ما كانتش تتلاقاه بزاف بصح منداك تشوفو لتم و هذا يكفيها.....و دوك راح يخرج ڨاع ...

إيرينا بحزن:"  فهمت!!...

آزر:" واشبيك؟..نبرة صوتك تغيرت؟..

إيرينا:" لا...فقط..انتبه لروحك جل...آزر...

غمض عينيه و تبسم و هي هبطت راسها...حشمت...

إيرينا دنات و بدات تنحي المساسك من شعرها ديرونجاها..شاف فيها تضارب مع لمساسك..

آزر:" علاه مطولة شعر لهذا الحد؟

إيرينا:" أمي كان شعرها بهذا الطول والا كثر..حابة نكون كما هي..

طلقت شعرها حست بالراحة..غطاها ڨاع...عاودت تكات على الحيط..و ثاوبت..

إيرينا و تثاوب..:" يعنيلي بزاف.....صح يتعب بصح مستحيل نتخلى على شعري.... نحسو يربطني بأمي...كانت أجمل مرا شفتها في حياتي..كان مولاي يحبها بزااف عليها حب يجيب بزااااف أمراء و أميرات باه غير يشوفها في كل واحد منا...و نجح..أوس و ليث و أشرف و انا ورثنا عينيها و لون شعرها الذهبي كنت دائما نحلم نعيش نفس قصة حبهم ....نهار مرضت تبدل بزاف و حزن و نهار توفاات القصر والا بارد و كئيب...الأمراء كانوا قويين ونجحوا يرجعوا لحياة للقصر..و أنا تبعتهم و زدت فيها شوية تهور...