A Knight's Tale Vol. 0 [Tagalog Fantasy Anime]

Chapter 2 - Part 1.5

Part 1.5

Sa paglisan niya ng dining hall, kahit cool na cool pa ang mga linyang kanyang binitiwan sa mga dilag, isa lamang pagkukunwari ang lahat. Gusto lamang ni Winter lisanin nang mabilisan ang silid dahil ang totoo'y matagal na siyang tinatawag ng kalikasan.

Sa laki ng kastilyo, tila sa isang labirint ang paghahanap ng binata sa comfort room. Sa kanyang pagmamadali'y pabilis ng pabilis ang kanyang paglakad. Hanggang sa masulyapan niya ang isang pintuang may nakasabit na karatulang 'Men's Room'.

Pagpasok ng binata'y tumambad sa kanya ang isang malaking comfort room na kahawig ng mga palikurang matatagpuan sa mga malalaking mall.

Nanlaki naman bigla ang mata ni Winter.

"Hindi maaari..."

May nakalagay na mga karatula sa lahat ng urinal na nagsasabing ito'y 'Out of Order'. Kaya naman walang ibang nagawa ang binata kundi gamitin ang mga cubicle sa banyo.

Pero bago pumasok, tila natigilan si Winter. Nagdalawang-isip muna ito bago naglabas ng takot ang kanyang mga mata.

"Teka. Paano kung biglang bumukas ang sahig ng cubicle?"

Gumuhit sa isipan ng binata ang imahe ng isang higanteng sawa sa ilalim ng comfort room, na nakanganga at naghihintay sa susunod nitong biktima.

Ngunit hindi na kayang pigilan ni Winter ang tawag ng kalikasan. Kung hindi niya ito mailalabas agad ay kakailanganin niyang gumamit ng maraming sabon at downy sa susunod niyang paglalaba.

Kaya naman ang binata, binuksan ang pinto ng cubicle kasabay ng paggamit ng kanyang abilidad. Binalot niya ng yelo ang sahig ng cubicle.

"Genius ka talaga, Winter!" puri niya sa sarili. "Ngayon, kahit may mga taong gusto kang ipakain sa higanteng sawa, hindi bubukas ang sahig."

Masayang pumasok ang binata sa nagyeyelong cubicle at nagparaos. Matapos niyang lisanin ang comfort room, nakasalubong niya sa pinto ang isang lalaking may dayuhang mukhang at tila nagmamadali ring pumasok ng banyo.

Ilang segundo pa ang lumipas, may kalabog na narinig ang binata galing sa loob ng palikuran.

"Ahh! Ang binti ko...! Bwisit! Bakit nagyeyelo ang sahig dito?!"

Agad kumaripas ng takbo si Winter Faraon.