لو سألتي الورد وهو ما بين ايدك اقطعك للكاتبة ضحكة قهر

13

مدخل:/ أنا أكثر انسان درس الصبر حافظ له
لكني أضيق لين يضيق بي لبسي..
ماني بحاجة احد بـ الشوق افضفض له
علمني الليل كيف افضفض لنفسي..

احمد يناظرها : كيف النفسية.
وعد : ويش تتوقع بكون وحده بتسوي قسطرة الظهر ويش بتكون حالتها.؟
احمد : ما تخوف.. ما انتِ مكلمة أبوي قبل لا نروح المستشفى..
وعد : لا .. طلعت من غرفتها لغرفة نهى : قومي.
نهى : ويش تبين.
وعد : مو أنا اختك شقيقتك.
نهى : اللي وراه.
وعد : ما ابي ادخل المستشفى لحالي ولا ابي احد منهم يروح معاي.
نهى جلست : تبيني اروح معاك.
وعد : ايه ابيك انتِ تروحين ما ابي احد غيرك.
نهى : و أبوي بيوافق.
وعد : ماله حق يرفض.
نهى : طيب البس شيء مريح وعبايتي وانزل لكم.
..
منيره : هاه ويش قلت.؟
أبو سعود يناظر بناتة : كلكن بتسجلن.؟
جود : هذا اللي قلناه البارح عاد كلام الليل يأكله النهار.
منيره : لازم ترسين على بر بندفع رسوم الدورات.
خالد : نهى و وعد معاكن.؟
أبو سعود : وعد لا حتى لو تبي تحتاج ترتاح بعد القسطرة مو تهيت يمين وشمال... اما نهى بكيفها.
مشعل : عن ايش هالدورات.؟
منيره : مواضيع مفيدة يعني ادارة الوقت تطوير الذات اشياء زي كذا.
سها : ادارة الوقت لا خلاص ما ابي اسجل اما بتجي وحده تقرق فوق راسي و اكثر شيء بتردده لا تؤجل عمل اليوم إلى الغد.
جود : من جد والله احنا شلون بنسجل تلاقينهم يحفظون من هالكتب و يجون يسمعون عندنا لا خلاص هونت أنا ما ابي.
منيره : ويش اللي قلبكن كذا.؟
سها : حسيتها سخيفة خسارة فلوس.. والا ويش رايك وعد.
وعد : صباح الخير.
: صباح النور.. ما سلمت على احد فيهم جلست مكانها دايركت : رأيي بشنو.؟
جود : دورات عن ادارة الوقت و الاشياء هاذي.
وعد : عندك وقت طولة بال احضري ما عندك انطقي بالبيت.
جود : بنطق بالبيت اجل.
أبو سعود : ما تعرفين تقولين كلمة عدلة.
ندى : تموت إذا قالت شيء فيه خير.
وعد : انتِ بالذات لا تكلميني لسانك لا يجي على لساني.
أبو سعود بحدة : خيـــر ست وعد.
وعد : لا خير ولا شر .. هاذي ما ابيها تكلمني في شيء.
أبو سعود : هاذي لها اسم و اختك الكبيرة غصباً عنك تحترمينها.
وعد : لا احد يطالبني باحترام شخص ما يحترمني.
احمد : وعد لا تنسين انك بتسوين قسطرة ويش ذا الانفعال.؟ يبه رووق الموضوع مو مستاهل ما هن أول خوات يتهاوشن عادي.
نهى : صباح الخير.
: صباح النور.
أبو سعود : على وين يا هانم.؟
نهى : بروح مع وعد والا تبونها تنام لحالها.
أم ندى : أنا بروح معاها.
نهى : لا شكراً كفيتي و وفيتي ما انتِ ملزومة فينا احنا ندبر امورنا.
أبو سعود شوي ويهفها كف على وجهه : قسماً إن ما عدلتي اسلوبك انتِ و اختك لا أربيكن من جديد.
نهى : وانا ايش قلت أنا صادقة كفت و وفت أن كانت مريم تخلت عنا ما يعني إن حريمك ملزومات فينا أنا بنام مع وعد مو احد غيري.
أبو سعود : لا صار بكيفك قولي بنام معاها.
وعد : وانا ما ابي احد غير نهى والا ماني مسوية القسطرة.
أبو سعود : تحديني.؟!
وعد : لا اتحداك ولا تتحداني.. أنا ما ابي إلا نهى.
أم سعود : ما عليه يا أبو سعود خل اخيتها تنام عندها.
أبو سعود بحدة : لاااا كلامي هو اللي يمشي نهى ما تعتب باب البيت..
وعد : وانا مو مسوية القسطرة.
أبو سعود : لا صارت بكيفك قولي ماني مسويتها.
وعد بعناد وهي تدري إن كلام أبوها هو اللي بيمشي : قلبي وانا حرة فيه.
أبو سعود وقف : تبوني اعاملكن باسلوب زفت عشان تأدبن صح.
احمد وقف جنب ابوه : يبه روووق الموضوع مو مستاهل خلاص نهى ما راح تروح معنا أنا باخذ وعد.
وعد : دام نهى ما راح تروح اجل ما ابي احد يروح معاي عادي بروح لحالي.
أبو سعود ببرود : الله معاك.
أم احمد : الله يهديك وشلون تنوم لحالها.
أبو سعود : هي اللي جابته لنفسها.
احمد : يالله وعد .. طلعت معاه مقهورة من أبوها..
..
..
أبو عمر : ويش الحل بظنكم.؟
أبو سعود : اللي قاهرني شيء واحد ليش هي من بد بناتي اللي يبون يلوون ذارعي فيها بالاولة صلاح والحين عامر ليش وعد ما غيرها من خواتها.
أبو عساف : استغفر الله العظيم بنتك هاذي وراها بلوه والا ويش قصتها.؟
أبو عمر : لا تظن فيها ظن سيء صلاح طاردها عشان سعود و وحده من زميلاتها هي اللي كانت توصل له معلوماتها.. اما سالفة عامر مالها إلا تفسير واحد.
أبو سعود : اللي هو.؟
أبو عمر : مريم.. تدري إن مريم اخت عامر من امه .. يعني وعد بنت اخته .. ويمكن يدرون إن نهى مخطوبة لفيصل عشان كذا اختاروا وعد.
أبو عساف : تفكيرك منطقي.
أبو سعود : والحين ويش الحل اعطيهم بنتي لولد عامر بن سلامة عاد.
أبو عمر : قرار بنتك بيدك.
أبو سعود : إن ما عطيته بينهي الشركات و يدمر كل شيء على الاقل أنا يمكن اسلك بمجالي الثاني و احاول اوقف على رجولي لكن انتم وشركة العيلة بتنتهي ولو نحفي سنين ما وصلناها للي هي عليه الحين.
أبو عساف : اللي ربك كاتبه بيصير.
أبو سعود : بستخير و يصير خير.
..
..
ياسر : والله عندي شغل كثر شعر راسي.
مشعل : ما احد قالك استلم طلبيات كثيرة.
ياسر : على أساس كان معاي الاثنين اللي يشتغلون معاي لكنهم تركوني وراحوا.
مشعل : من كثر ما تأمر عليهم أنا بغيت اطق وانا اشتغلت معاك يوم.
ياسر : المهم ابيك تراني بعازتك.
مشعل : تراني باجازة يا هوه.
وليد : أنا اجي معاك بس كم تعطيني.
ياسر : اللي فيه النصيب.
وليد : لا أي شيء تقبضة النص بالنص.
ياسر : ويش النص بالنص تدري ويش اللي تسوي تجيب الاغراض و أنا اللي ارتب كل شيء واركبة تبي النص على ذا الشغلة.
مشعل : وكل شوي يمسك لك شيء.
ياسر : طبيعي ترى كل اللي عندي يدين بس ماهو اخطبوط. يتعاونوني والا ادور غيركم.
مشعل : حزنتني كم بتعطيني.
ياسر : قلت لك اللي فيه النصيب الله اعلم عاد كم يطلع.
وليد : طيب تعطينا أنا ومشعل النص يعني أنا لي الربع وهو الربع وأنت النص.
أم احمد : استغلالين.
وليد : هههههههههه قدري إننا باجازة يمه وبنطلع نكرف مع ولدك.
ياسر : غصب ما وراك شغل الشيب بيترس راسي من وراء هالشغل ولا عاد الاتصالات اللي تعصب بالواحد.
مشعل : ههههههههههههه وتسعة وتسعين بالمية منها بنات ما ادري ليش ما خق قلبك للحين.
ياسر : شايفني مخفة اخق من صوت والا عاد مايع يجيب اللوعة ودي اهفها بالجوال من القهر.
مشعل : كله ولا اللي جات ذاك اليوم هههههههههههههههههه.
وليد : ويش علمنا والله يا ياسر من ورانا.
ياسر : لا وراكم ولا قدامكم بس معروف البنات هن اللي يحبن يغيرن بالديكورات ويهتمن فيها اكثر من الشباب. مير بكره عندي زواج في .... شكلي بطلع من الصباح.
سود : الله يعينك طيب ليش ما تسوي لك سستم معين يعني حد معين وبعده ما تستقبل طلبات.
ياسر : وانا مسوي كذا بس عشان اللي عندي راحوا توهقت الحين.
أبو سعود : تبيني اعطيك اثنين من موظفيني تدربهم.؟
ياسر : لا يبه ماني جالس اعلم ماني فايق اجلس اعلم ذا وذاك واخر شيء يتركوني ويروحون يفتحون محل لهم والا يشتغلون عند غيري لا ابي ادور واحد متعلم.
خالد : طيب ليش ما تترك ذا الشغلة والله ما ادري ويش عاجبك فيها.؟
ياسر : احب التصميم والشغل عليه و من ضمن التصميم الديكورات وتصاميمها.
أم ندى : مو كن احمد تأخر ما اتصل.
أبو سعود : إن شاء الله خير.
نهى متوترة : لو صار لها شيء أنت أول واحد بتندم.
أبو سعود استغرب من كلمتها : أنا..
نهى : ايه أنت .. ليش ما خليتني اروح معاها حرام تروح لحالها وكنها مقطوعة من شجرة مالها احد ما كن عندها أم واب واخوان وخوات.
أبو سعود : خليها تحس انها ما تقدر تطلع عنهم مهما حاولت تتمرد يضل لها حدود ما تخطاها.
نهى : يعني ما أنت ندمان.
أبو سعود : لا دامه بيربيها ماني ندمان .. رد على جواله : الوو.. وعليكم السلام.. هاه بشر.. الحمد لله .. الله يبشرك بالجنه .. ومتى بتصحى.. لا تخاف بنجي.. إن شاء الله مع السلامة.
أم ندى : هاه طمنا.
أبو سعود : قفلوا الثقب الحمد لله.
جود : يعني ما تحتاج عملية.؟
أبو سعود : لا الحمد لله.
أم سعود : اللهم لك الحمد الله يتمم عليها عافيتها.
: آميــــــــــــــــن.
ميار : بنروح لها بابا مو تقول لا.
أبو سعود : لسى بالافاقة الحين.
ميار : مالنا دخل ننتظرها بغرفتها.
ياسر وقف : أنا بروح اشتري كم شغلة لبكره بعدها بروح لوعد.
أم احمد : وين يا أبوي خلها بالليل ارتاح الحين.
ياسر : وراي كذا شغلة كل وحدة بمنطقة يا دوب يمديني.
أم احمد : انتبه لنفسك يا أبوي.
مشعل وقف : بروح معاك محزني.
ياسر ابتسم : امش يالله.
أم احمد : لا تسرع يا ياسر.
ياسر : إن شاء الله.
أبو سعود : إذا محتاج فلوس لا يردك شيء.
ياسر ابتسم : الله كافيها من عنده الحمد لله.
مشعل : لا تخاف عليه يبه ما تدري كم رصيدة.؟
أبو سعود : شقاه.
مشعل : الله يستر بس ما يروح ويتزوج من ورانا على ذا الشقا.
ياسر : هذا اللي ناقص بعد لو بتزوج بتزوج علنا وقدام الناس ماني مسوي لا شيء عيب ولا حرام.
منيره : اجل يالله تلحلح خلنا نخطب لك.
ياسر : في وقت لاحق إن شاء الله يالله مع السلامة.
..
..
صحت على اصواتهم عندها طنشت ولا عندها استعداد تواجه احد فيهم.
سها بهمس : والله صدق ما كذبت.
نهى : احد قال انك تكذبين.
سها : طيب كلهم يقولون طيبة ليش ما تقابلونها.
نهى : كيفنا هي ما جات تسال علينا احنا نروح نسال عليها.
ميار : بس هاذي امكن.
: السلام عليكم.
: وعليكم السلام.
جلس جنب بناته : ما صحت.
نهى : لا.
أم سعود : شكلها دايخة من المخدر.
أم ندى : اهم شيء انها بخير.
ميار : بابا ناد احمد يشوفها.
أبو سعود : بيجي شوي.
سها قبلت رأس وعد : يا شينة خايفين عليك وانتِ نايمة.
أبو سعود : سها لا تزعجينها.
سها : ابيها تصحى يبه ويش ذا كله نوم.
أم ندى : خليها يمه متى ما صحت صحت.
احمد : السلام عليكم.
: وعليكم السلام.
سها احمد صحيها.
احمد ناظر وعد كان يدري انها صاحية بس ما تبي تكلم احد : لا خليها نايمة.
سها : ترى اضربها على جرحها.
أم ندى : جربي و سويها ويش ذا جايبين بزران معانا.
احمد : بيفضحونا بالمستشفى.
جود : ياخي جايين نتطمن عليها الزيارة بنروح وهي ما صحت للحين.
أم ندى : لا صحت بخليها تكلمك لا تزعجينها الحين.
يعني بتنام عندي ما ابي احد منهم ينام عندي يكفي تخليهم عني فتحت عيونها التقت بعيون احمد ابتسم بوجهها وقبل راسها : الحمد لله على سلامتك.
بغصة : الله يسلمك.
أبو سعود قبل راسها : ما تشوفين شر.
: الشر ما يجيك.
أم سعود : الحمد لله يا امي اللي شفناك بعافيتك.
أم ندى : اجر وعافية.
: الله يعافيكم.
جود جالسة جنبها من جهة اليسار : شينة شوي وتنتهي الزيارة وانتِ توك تصحين.
سها : كنت بضربك على جرحك عشان تصحين.
احمد : ايش فيك تعبانة.
هزت رأسها بلا.. العبرة خانقتها تتذكر يوم دخلت العملية لحالها كيف كانت.
نهى : حبيبتي اهم شيء انك بخير.
: ابي انام.
سها : ماهو بكيفك توك صاحية.
: إن زين ابي اجلس لحالي ما ابي احد يجلس معاي.
يناظرونها كلهم .. ما تبي احد فيهم ..
احمد : انتِ تعبانة ومحتاجة راحة يعني لازم احد يكون عندك يباريك.
وعد : لو احتجت شيء بدق على الممرضات.
نهى : ماهو بكيفك ما راح اخليك لو تطقين.
أبو سعود حط ذراعة على كتف نهى : يالله.
نهى : بابا.
أبو سعود : من غير هذرة يالله.
أم ندى : بتخليها تنام هنا لحالها.
أبو سعود : ايه ما عليها شر.. واحمد مناوب هنا الليلة.
احمد : لا تخافون بس امر على المرضى راح اجي عندها ما عليها خوف.
نهى : ما ابي ما راح اخليها.
أبو سعود : نهى.
نهى : بابا الله يخليك خلني هنا الليلة الله يسعدك... وعد تكفين قولي له بقعد عندك.
..
..
أبو سعود : قلت اعلمك قبل لا تملك عليها عشان ما تقول إننا غشيناك.
عماد : مو تقول انها سوت قسطرة وتقفل الثقب يعني ما عاد فيها شيء الحمد لله .. وحتى لو فيها ابيها.
الشيخ : إذا اعطيني بطاقتك المدنية و بطاقات الشهود.
..
سعود : أبوي مين عنده.؟
خالد : ما ادري.
مشعل : حتى عمامي فيه.
وليد : الموضوع فيه إن أبوي له كم يوم متضايق.
ياسر : عاد ولا واحد فينا جالس عنده يقهوي ضيوفة.
سعود : اجل بروح اجلس تعال مشيعل.
..
أبو عبدالله مبتسم : مبروك علينا النسب الطيب.
أبو عساف : الله يبارك فيك.. اهم شيء بنتنا يحطها ولدك بعيونة.
عماد بهدوء : إن شاء الله انها بعيوني.
أبو سعود : والله إن زعلتها في شيء ما ارحمك يا عماد.
عماد : ما بيننا زعل إن شاء الله.
أبو عبدالله نزل الملف على الطاولة : وهذا الوعد اللي بيننا مقابل وعد.
أبو عمر سحب الملف يتصفحة : تمام.
أبو عبدالله : أنا اعلن الصلح بيني و بينكم دامنا صرنا اهل فا أنا ما راح اعلن نهاية حرب دامت سنوات بيني و بينك يا ابراهيم عشان خاطر بنتك و ولدي.
أبو سعود باستهزاء : كثر خيرك تعرف تقدر.
: السلام عليكم.
: وعليكم السلام.
أبو سعود : هذا عامر بن سلامة وهذا ولده عماد.
أبو عبدالله وعماد : والنعم.
سعود و احمد : ما عليكم زود.
أبو سعود : سعود و احمد عيالي الكبار.
أبو عبدالله : نعرفهم إن شاء الله تشوفهم معاريس.
أبو سعود بهدوء : إن شاء الله.
..
..
عساف يدخل مكتبة بعد الاجازة اللي قضاها .. رمى سلاحة على مكتبة وجوالة ومفاتيح سيارتة : يا سلماااان.
سلمان بغضون ثواني وقف و ادى التحية العسكرية : سيدي.
: سعود جاء.؟
: ايه طال عمرك موجود في مكتبه.
: طيب قوله يجيني .. وروح جيب صلاح من الحجز.
بعد خمس دقايق دخل سعود : واقول المركز منور.
عساف : ههههههههههه يا شيخ منور بوجودك.
سعود سلم على عساف وجلس : شخبارك.؟
عساف : بخير ننشد عنك.
سعود : الحمد لله كنت بطلع بروح لوعد المستشفى بس دخل سلمان قال انك تبيني.
عساف : بحقق مع صلاح مو قلت بتكون موجود .. إلا كيف وعد.؟
سعود : ما كلمتها احمد قال انها بخير الحمدلله.. وابوي وامي كانوا عندها يقولون بخير الحمدلله.
عساف : شلون بتروح والزيارة منتهية.؟
سعود : احمد يدخلني وماني مطول بس اسلم عليها.
عساف : طيب والقسطرة كيف يعني طلعت بنتيجة والا.
سعود : إلا الحمد لله تقفل الثقب.
عساف : الحمد لله.
قطع حديثهم دخول سلمان بيده صلاح ابتسم باستفزار يوم شافهم ..: سعود بن ابراهيم.. وعساف بن عبدالرحمن طولتوا الغيبة اشتقنا لكم.
عساف : لا تتكلم واحنا ما امرناك.
صلاح : والله لا اوطي رووسكم بس خلوني اطلع من هنا ولا اجيب راسكم بوعد نفسها.
تقدم له سعود بخطوات غاضبة اعطاه ضربة على وجهه نزف انفه منها : لا تجيب طاري اختي على لسانك.
صلاح : اختك بتصير لي و تشوف يا سعود والله لا احرمها حتى شوفتكم.
عساف مسكه من كتوفه ورماه على الارض : تخسى وتعقب تلمح طرف شعرها.
صلاح : انتم فكوني وتشوفون ويش بسوي ماهو تسون انفسكم رجال وانتم مكلبشيني.
سعود : قالوا لك ما عندنا غيرك نهتم لامره وندور وراه هذا اللي ناقصنا.
وقف صلاح : بتشوف يا سعود إن ما اخذت اختك من بيتكم و وعد وبس غيرها ما ترضيني.
أي استفزاز يثيره صلاح في قلوب اثنين من اشد الرجال يثير غيرة عساف على معشوقتة و يثير غيرة سعود على اخته.
عساف اعطاه ضربة على صدرة : والله يا صلاح لا اذبحك برسل اوراقك للمحكمة هالحين ويصدرون فيك الحكم قريب ما راح يكون اقل من اعدام.
صلاح : اللي ما تطوله بيدك وصله برجولك.
عساف بعصبية هزت اركان المركز : لي أنا تقول هالكلام..! والله يا صلاح لا اشرف على شنقك قبل رمضان إن شاء الله.
صلاح : إذا قدرت لا تقصر..
سعود : مين اللي كانت توصلكم معلومات عن وعد..؟
صلاح : مالكم دخل.
سعود ضربه برجلها على بطنه : تكلم يا حقير.
صلاح منحني على بطنة : ما تهمكم معرفتها.
عساف : ما تبي تتكلم بالطيب بتتكلم بالغصب.
صلاح : ماني متكلم لا طيب ولا غصب,.. اقولكم لا اخذت وعد لبيتي.
سعود : سلماااان اقلعة للحجز ما ابي اشوف شكله.
عساف رجع لمكتبة وارسل تقرير للمحكمة عن قضايا صلاح وتهديداتة وطالب بسرعة اتخاذ العقاب المناسب.
مرت دقيقة دقيقتين اربع عشر ودخل سلمان على اثنين معصبين وهو متوتر ادى التحية العسكرية : سيدي.
عساف بحدة : خير يا سلمان.
: صلاح.
عساف : الله ياخذة ويش فيه.؟
: انحاش.
وقفوا الاثنين بصدمة : نــــعم.
سعود : وينكم عنه .؟
سلمان : سلمناه للحجز بس من شوي بلغونا انه انحاش.
عساف : ليش مشغلين ويش احنا..؟ غنم.
سعود : ارسل القوات هالحين تمشط المنطقة تمشيط ما يمدية ابعد... حطوا حظر على كل المداخل والمخارج.. سوو نقطة تفتيش في كل شارع رئيسي... راقبوا كل الجوالات اللي كان يتصل فيها الفترة الاخيرة يمكن يتصل على احد فيهم.
سلمان : عُلم.. خرج بعد ما ادى التحية العسكرية.
عساف : احنا ويش مشغلين عندنا والله لا احاسبهم كلهم هالبهايم.
سعود : أنا بشوف اخواني وينهم..
عساف : خلنا نروح أنا وأنت المستشفى وكلم اخوانك بالطريق اكد عليهم ما يخلون البيت كلهم دفعة وحده.
..
..
أبو سعود : يعني ايش.؟
سعود : يعني انحاش.
ياسر : شلون ينحاش منكم هاه..؟ وينكم عنه.؟
أبو سعود : عساف وينه.؟
سعود : برا بالحديقة يكلم الشباب.
أبو سعود : وسعود ناده... ياسر كلم احمد يجلس عند وعد.
شوي ودخل عساف : السلام عليكم.
: وعليكم السلام.
عساف : ادري انك زعلان بس أنا حمقان اكثر من زعلك.
أبو سعود : شلون يفلت من يدكم الحين وين بنلقاه.؟
عساف : بنلقاه وين بيروح يعني.. اهم شيء .. وعد اليوم تطلعونها من المستشفى لهنا والبيت يضل مراقب.
مشعل : ليش هو ناوي ياخذ وعد.؟
عساف : مهددنا يوصل لها من جديد يبي يخطفها هالمره.
ياسر بصراخ : من جدك يا احمد .. شوف طيب يمكن راحت لاي مكان.. التفت عليهم : يبه وعد ماهي بغرفتها.
لا إلا هاذي قدر ياخذها صار رهينة عنده..
سعود بعصبية وصراخ : الله ياخــــذه .. والله لا اذبـــحه و اشـــرب من دمــــة.
خالد : اهدأ خلونا نفكر بذكاء اول شي نشوف كاميرات المستشفى يمكن ما قدر يطلعها منه للحين او نقدر نعرف السيارة اللي كان راكبها.
..
أم ندى : الله يستر الله يستر لا يسوي فيها شيء.
أم احمد : ما كان بالسجن ويش اللي طلعه.
منيره : أبو سعود معصب الله يستر ما يرتفع ضغطة.
أم سعود : الله يحميها و يحرسها.
سها تصيح : هو كان بيذبحها المره اللي فاتت هذا ما بقلبه رحمه.
ندى : الله يستر الله يحفظها من شر كل من فيه شر.
جود : من قلبك هالدعوة.؟!
ندى : ايش رايك.؟
جود : ما ادري عنك بعد كلامك البارح معاها.
ندى : تضل اختي ولا ارضى عليها بالمضرة.
..
..

: تحسبينهم بينقذونك مني مثل المرة اللي طافت
: ويش تبي فيني حرام عليك أنا مسوية عملية اليوم.
: جعلها فيني ولا فيك.
: جعلك تموت ولا يصلون عليك.
: انطمي ولا ابي اسمع صوتك .. لازم نشوف لنا مكان نتخبى فيه.
: جعل الخير يتخبى عنك ولا تشوفه كل حياتك.
: مصره إني اسود عيشتك.
تحاول تفك يدينها اللي رابطها وراء ظهرها من غير لا يحس فيها راح ترمي نفسها بالشارع والسيارة تمشي ولا إن حقير مثل هذا يدنسها.
: تلقين اخوك وابوك و ولد عمك يناظرون السماء يشوفونك فيها.

لا اله الا انت سبحانك اني كنت من الظالمين.

لا أحلل نقل الرواية دون ذكر اسمي.

ضحكة قهر