لو سألتي الورد وهو ما بين ايدك اقطعك للكاتبة ضحكة قهر

63

ياللي فتحتي للحزن داخلك باب
دخيل حزنك .. ممكن تفسرينه ؟

انتي حزينة مثلي لنفس الاسباب
والّا على حزني وحالي حزينة ؟!

لـ أحمد المطيري..

المستشفى..
الدكتور : كويس لحقتوا عليه بـ أخر لحظة و الا كان راح من يدينا.. احنا اعطيناة مصل مضاد و مضادات حيوية و ان شاء الله خير.. بس اكيد راح ترتفع حرارتة بالفترة الجاية..
راكان يحركـ يده بـ توتر : افهم من كلامكـ يا دكتور انه بـ يبقى عندكم..!؟
الدكتور : اكيد لازم يكون ع المضاد الحيوي..
يوسف : طيب يعني حالتة الحين كيف.. احنا حاولنا يعني ننقذة بس الطريق طويل شوي..!!
الدكتور : للحين حالتة مستقرة لكن اكيد يتألم من اللدغة مهما كان هذا سم و دخل جسمة..
يوسف يناظر العيال : طيب و الحل..!؟
راكان : ويش عرفني انا كل ما افكر ان ابراهيم ما يدري انه طالع مخي يوقف..!!
سعد : كلم مشاري..
راكان ناظر الدكتور : طيب ما ينفع نطلعة.. اخوانة دكاترة و اكيد بـ يكون عندهم خبرة بـ ذا الموضوع..
الدكتور : ما انصحكـم جسمة يحارب السم و اكيد هالشيء متعب له وهو جالس هنا كيف و انت بـ تطلعة لـ البيت..!؟
راكان : طيب نقدر نشوفة..!!؟
الدكتور : اكيد تفضلوا..
دخلوا الشباب الأربعة لـ غرفة مشعل.. مشعل لما شافهم جلس..
راكان : ما تشوف شر..
مشعل : الشر ما يجيكـ .. عقاب من ربي على اللي سويتة..
سعد : هونها و تهون بس تقابل ابوكـ و تبوس راسة و تستسمح منه كل شيء يروح..
مشعل : الدكتور يقول انه زين اللي لدغتني في رجلي ممكن لو مكان ثاني اموت..
خالد : تلقاه بس بـ يوسوس فيكـ ..
مشعل : و ليش يوسوس فيني هو صادق لو جات في بطني و الا وجهي يمديني ما وصلت المستشفى و انا طالع من وراء اهلي و ادري انه ما يرضي ابوي..!!
راكان : و الحل الحين..!؟ الدكتور يقول لازم تبقى هنا على مضادات الحيوية و ما ادري ويش حكي ويش كثرة..
مشعل اخذ نفس وهو يصر على اسنانة : الفجر بـ اتصل على احمد و قولة.. هو بـ يتصرف..
راكان : توجع..!؟ ليش ما يعطونكـ مُسكن..!؟
مشعل : ما ادري.. بـ احاول اتصبر..
..
بيت ابو سعود .. الفجر..
وليد يحوس بـ غرفة مشعل و لا لقاه..
أحمد على الباب : كنت تدري انه طالع..؟!
وليد : لا.. ادق عليه جوالة مقفل..!!
أحمد : و كذبت على ابوي تقولة ماخذ بنادول نايت و صحتة و ما رضى يصحى..!!
وليد متنرفز : ويش تبيني اقولة..!! و الله مشعل ماهو بـ غرفتة..!؟
أحمد : الحين انت بـ تنزل له و تقوله انكـ تكذب..
وليد حط يده على خصرة : نعم!!! خير ان شاء الله ما سمعت..!؟
أحمد : نعامة ترفسكـ .. انت ما تستحي رجال طول بـ عرض تكذب على ابوي..!!
وليد : أحمد لا تنرفزني.. يكفي مشيعل ما يرد..
خالد : خير ايش فيكـم..!؟
أحمد التفت لـ خالد بـ لبس الطيران : الأخ ابوي نشده عن وليد ليش ما نزل يصلي معنا و قالة انه نايف مأخذ بنادول نايت و ما رضي يصحى معاه.. و الأخ مشعل بالمستشفى..
خالد : خير ايش فيه..؟!
وليد اقترب منهم .. أحمد : راكان يقول لدغتة حية البارح و نقلوة المستشفى..
وليد : و من اليوم تشوفني هنا احوس ما فكرت تقولي.!.!
أحمد : لأن ماهو مهم انت تدري.. ابوي بس عاد شلون بـ نقولة ان مشعل ماهو هنا..!!
وليد : قولة كل شيء خلاص عاد الفاس طاح بالراس..
أحمد : اجل قدامي انت قولة..
مشى وليد من بينهم فعلاً شيء مرعب انهم يقولون لأبوهم بس ما راح يتغير شيء لو ما درى الحين بـيدري بـعد شوي.. نزل الدور الأرضي بالمصعد معاه خالد و احمد..
خالد : وليد لا تفجع ابوي شوي شوي.. ماهو ناقص..
وليد : صباح الخير..
: صباح النور..
وليد : دايم مجمع بناتكـ حواليكـ و احنا مالنا نصيب..
ابو سعود : تعال اجلس في حضني ازين..
وليد هذا اكثر وقت ما يبي قرب ابوه فيه لأنه كذب عليه من شوي.. جلس على الكنب بعيد عنه.. وهو جالس على الأرض و وعد وميار و سها حوالية.. و ياسر يقهوية و جنبة سعود..
ام احمد تناظر خالد : عندكـ رحلة يا ابوي..!؟
خالد : ايه يمه ان شاء الله مو مطول المغرب بـ اكون هنا..
ام احمد : الله ييسر لكـ انتبة لـ نفسكـ و لا تنسى دعاء السفر..
خالد جلس جنب وليد : ان شاء الله..
وليد : يبه.. (ابو سعود التفت عليه يناظرة.. و وليد اخذ نفس) تراني كذبت عليكـ يوم نشدتني عن مشعل.. مشعل ماهو بـ غرفتة..
ابو سعود ميل راسة : نعم..!!
ام احمد ويدها على صدرها : و غبني وين هو غادي..؟!
وليد : ما ادري بالضبط وين راح لكن..المهم انه هو الحين.. بالمستشفى..
سعود عقد حواجبة : مستشفى..!! ليش..!؟!
وليد : لدغتة حية..
اتسعت عيون ام احمد من الصدمة ماهي متخيلة ان ولدها طالع من البيت و توجع هالوجع وهي ما تدري.. لو كانوا يدرون انه طالع اهون لكن من وراهم..!!
أحمد تداركـ الوضع بعد هبال وليد اللي ما يعرف يحكي شيء : ان شاء الله بسيطة يمه .. هو كلمني.. اسعفوه اخوياه..
ابو سعود رمى فنجالة اللي باقي فيه شوية قهوة على الأرض وهو يناظر عيالة : مين فيكم كان يدري انه طالع مع اخوياه..؟!
ما احد فيه رد عليه.. ابو سعود صرخ فيهم : ما تكلمون..؟!
وليد : ما كنّا ندري هو طلع على اساس بـ ينام.. و الفجر ما لقيتة بـ غرفتة..
ابو سعود وقف : حسابكـ على كذبكـ علي بـعدين بـ تشوف.. بـأي مستشفى..!؟
أحمد : مستشفى......
ام احمد وقفت مفزوعة : خذوني معكم ابي اشوفة و اتطمن عليه..
سعود وقف وباس خالتة : احنا بـ نطمنكـ عليه يا خالة.. بـ نخلية يكلمكـ بـ نشوف وضعة و نخبركـ ..
ام احمد : لا .. لا قلبي ماهو متطمن.. لازم اشوفة..
ياسر : البسي عبايتكـ يمه..
بـ ظرف دقايق كل الشباب ما كانوا موجودين في البيت مع ابوهم و ام احمد..
دانه : يا حياتي مشغل اكيد متعور..
ام حاتم : لدغة حية ماهو شيء هين الله يستر عليه.. وين جود ما تبي تنزل تفطر..؟!
وعد رفعت حواجبها : مسوية اضراب..
ام حاتم : اضراب عن الأكل..؟!
وعد هزت رأسها بـ تأييد.. ام سعود : وشو اضرابة..؟!
ام حاتم : يعني ما تبي تأكل..!! هاذي صاحية..!؟ لا يكون تسوي كذا عشان ابوها يوافق ع الطب..!؟
وعد تفرقع اصابعها السبابة و الوسطى : يب لقطيتها..
ام حاتم : خليها تقنع بس .. ابو سعود ما تنفع معاه ذا الحركات..
ميار : حتى لو فيها السكر.. و يدري انها ممكن تدخل غيبوبة.!؟
ام حاتم : ماهي صعبة عليه يغصبها على الأكل بأي طريقة كانت.. لو حلف عليها بـ تأكل غصباً عنها.. لو زعل منها بـ تأكل عشان ترضية..
ام سعود : الله يهديها ياليتها ما تضايقة هذا هو مشعل طالع من وراه و اكيد بـ يتضايق من سواتة و طاح مريض عشانة عصى ابوه.. تبي هي تكمل الناقص..
وعد : مو قصة تكميل الناقص بس جودي عندها امل ان بابا يوافق خصوصاً بعد ما عمي بندر تزوج هنادي و أثير تدرس طب.. يمكن لو هالشيئين ما صارت جود ما راح يكون عندها امل..
ام حاتم : كلميها قولي لها تعقل الجنون اللي براسها..
وعد : ما اقدر عليها عشان تكوش فيني .. بابا يتفاهم معاها ازين..
ام سعود ابتسمت : حتى انتِ ما انتِ مشتهية تحاكينها و الا قدرتي عليها..
وعد : خالتو بليز لا تحطوني بـ نص المشاكل ما حسبت افتكـ خلوني كذا مرتاحة بس ابي اتفرج عليكم..!!
..
بيت غازي
امال : معقولة..!؟
غازي : و ليش لا..!؟ يمكن فعلاً الأدمية فيها مرض روحي.. تعبها ماهو طبيعي..
امال : ما اتوقع.. يعني ممكن هي ماهي متقبلة الحمل نفسياً هالشيء صعب المرأة تتخيل انه بـ داخلها انسان و تتأقلم على هالشيء و ترعى نفسها عشان ترعاة.. هالشيء ممكن يكون هو السبب..
غازي : ممكن انا سألت و مدحوا لي شيخ على حدود المدينة بـ نروح له اليوم العصر..
لينا متعاطفة معاها : طيب اذا ظلت كذا ممكن يتأثر البيبي .. حرام يتعبون الإثنين..
غازي : اهم شيء صحتها الحين و الباقي ملحوق عليه..
ريما تمد لسانها لـ زاوية فمها : حتى لو كان ولد..!؟
غازي : حتى لو كان ولد.. ما قلتِ لي ويش بـ تقدمين تخصص..!؟
ريما سحبت الخدادية لـ حضنها بـ ملل : ما قررت احس ما براسي شيء..!! مالي ميول معين..
غازي : قرري قبل لا يروح عليكـ التقديم..
ريما : يصير ما ادرس..!!(تحكـ حواجبها بطرف اظافيرها من غير لا تناظر ابوها) خلاص مليت يعني 12 سنة دراسة دراسة ابي اريح ما احس لي نفس لـ الدوام و الحوسة و صحية الصباح.. و لا بعد اتجهز يعني تنورة و بلوزة و اكشخ مو مثل الثانوي لا لا ما ينفع مره مشوار..
امال : انتِ صاحية بـ تقعدين بالبيت ويش تسوين..!؟
ريما : اصبح و امسي عليكـم اتطمن على احوالكم و حياتكم وشلون هي قايلة..
غازي : بكره بس يمر شهر و تجربين قعدة البيت لا تجيني تقولين لي سجلني بأي تخصص.. تحملي نتيجة افعالكـ ..
امال انصدمت : من جدكـ بـ تطاوعها..؟! تراها بزر ما تعرف مصلحة نفسها..
لينا مسكت ضحكتها و ريما تناظرها مقهورة : الحين انا بزر..!؟
غازي : ليش ويش حاسبة.؟!
ريما : و الله..!! يعني لو يجيني عريس ما تزوجوني.؟!
غازي يستهزء فيها : هه من جدكـ ..!! مين اصلاً بيجي و يخطب طفلة.!!!
ريما عقدت حواجبها و تأشر على نفسها : الحين انا طفلة.!! وهاذي مو توأمي هذا هي متزوجة و حارمينها من طير شلوى..!!
لينا : انا مو مثلكـ يا حبيبتي .. عمراً انا اكبر منكـ بـ دقايق عقلاً انا اكبر منكـ بـ سنين لا تقرنين نفسكـ فيني.!!
ريما بـ قهر : تخســــين..
غازي : ريمـــا.. كم مره اكلمكـ عند طوالة اللسان..!!
ريما : يـــا ســــلام.. هي تكلمت علي ليش ما هاوشتها..!؟
غازي وقف : استغفر الله العظيم.. ما ابي اسمع هالحكي مره ثانية فاهمة.. حتى البزر لا انهيتة عن الشيء ما يسوية و انت تعيدين و تزيدين..
سندت كوعها على طرف الكنبة : شكراً يجي منكـ اكثر..
غازي ابتسم : اللي يسمع حكيكـ يقول العرسان على الباب واقفين ينتظرون موافقتي..!!
ريما : ايه طبعاً تمسخر على بنتكـ زوجت شوق و لينا و ريما بالطقاق خلها تقعد علة على كبدكـ ..
غازي جلس و يناظر ريما : فيه شيء ما ادري عنه..!؟
ريما استغربت : شيء مثل ايش..؟!
غازي : ما عمركـ جبتي لي طاري هالموضوع و تنرفزتي بـ هالشكل..!! مخبية شيء علينا..؟!
ريما اعتدلت بـ جلستها : ماني فاهمة شيء زي ايش..!؟ يعني الناس بـ تخطبني مني..!؟ و الا منكم..!؟
غازي : يمكن سامعة طراطيش حكي..!! يعني بنت تبيكـ لأخوها .. قالت لكـ بيزورونا ..! شيء من هالقبيل..!!
ريما : طبعاً لا.. بس انت تبي تسوي لي سالفة..!!
غازي يضغط على شفايفة بـ يدة اليسار و متقدم بـ جلستة و ساند كوعة على فخذة : اممم .. فيه احد في راسكـ ..؟!
توترت ريما : يعني انت تشكـ فيني..!؟
غازي : لا ما اشكـ فيكـ .. بس انا استفسر .. شايف ان انفعالكـ ماله مبرر..!!
ريما : ما انفعلت انت تشوفني بزر و تحكون علي..!! بس .. يعني كل الموضوع انت فهمتني غلط..!!
غازي وقف من جديد : اتمنى.. اذا فيه شيء بـ خاطركـ تعالي قوليه لي لا تغلطين.. يمكن اساعدكـ ..!!
ريما : ما فيه شيء.. يعني انا مو فاهمة اصراركـ على الموضوع..!!
غازي : ما ابيكـ تخطين .. اذا بـ خاطركـ مشاعر لأحد انا ماني معترض يا ريما.. بس انكـ تغلطين تكلمينة من وراي او تتصرفين أي تصرف غلط اكيد ما راح اسمح لكـ ..!!
ريما حطت يدها على رقبتها : يعني اذا جيت قلت لكـ انا احب واحد ويش بـ تسوي..!؟
غازي : بـ انادية و ازوجكـ اياه.. طبعاً اذا يستاهلكـ ..!!
ريما : لا اصلاً انا ما براسي احد بس كذا استفسر..
غازي : امال تراكـ شاهدة على هالكلام.. لو تغلط من وراي ما راح ارحمها..
ريما : صدق اني اخاف منكـ بعد اللي سويتة تيكـ المره.. بس اكيد خوفي من ربي اكبر.. ما راح اغضبة ثم اغضبكـ .. انا متربية الا ان كنت ما تثق بـ تربيتكـ لي..؟!
غازي اتجه لها ما تنكر ان الرعب دب في قلبها لكنه انحنى و باس راسها .. و طلع من بعدها..
..
المستشفى..
ام احمد تمسح على راس مشعل : بسم الله عليكـ يا ابوي ويش منقزكـ من فراشكـ تالي الليول..
مشعل : الشيطان..
راكان تنحنح .. مشعل يناظرة : و الله اذا حاسب نفسكـ شيطان شيء راجع لكـ ..
راكان بـ حدة : تعقـــب و انا ولد موضي..
مشعل : و النعم بـ موضي مو ولدها (ناظر وليد) وين ابوي..؟!
وليد : ما ادري دخلنا المستشفى مع بعض و راحوا هو وسعود لـ دكتوركـ بس كنهم توخروا..
ياسر : شلون انلدغت انت..؟! وين كنتوا قاعدين..!؟
مشعل : بـ إستراحة سلوم ما حسيت الا بالوجع وقتها..(اخذ نفس لأن المسكنات ضعيفة نوعاً ما) بعدها حسيت اني بـ غير دنيا..
انفتح الباب حتى يدخل ابو سعود و وراه سعود.. : السلام عليكم..
مشعل سند كفة على السرير و رفع ظهرة بـ ينزل عشان يسلم على ابوه .. لكن ابوه قاطعة : لا تنزل..
قرب ابو سعود له و باس راسة مشعل و كتفة و كفة : انا آسف..
ابو سعود اللي كان حمقان عليه لكن بعد كلام الدكتور عن حالة مشعل اشتعلت نار ثانية بـ قلبة على ولدة غير انه طلع من وراه .. يده على كتف مشعل : اذا ما عدتها يا مشعل.. بـ أقبل اسفكـ ..
مشعل من غير لا يناظر بـ أبوه : ما تتكرر ان شاء الله اوعدكـ ..
سعود : سلامتكـ ما تشوف شر..
مشعل : الشر ما يجيكـ ..
تراجع سعود .. اما ابو سعود سحب الكرسي و جلس جنب سرير مشعل..
ياسر وقف جنب سعود : ويش فيه وجهكـ مقلوب..؟!
سعود : و لا شيء..!!
ياسر : علينا..؟!!! الغبي يفهم ان فيه شيء.. وين كنتم انت و ابوي ذا الوقت كله .. احمد و حاتم جو و راحوا دواماتهم و انتم ما جيتوا..
سعود سحب ياسر و طلع برا.. ياسر تأكد انه في شيء ما يعرفونة..
ياسر : خير سعود ويش القصة.. غليت قلبي..!!
سعود : مشعل..
ياسر : ايش فيه..!؟
سعود : احتمال.. يعني مو اكيد.. تكون..
ياسر بـ حدة : تكون شنو.. تكلم..!!
سعود : رجلة تأثرت.. يعني شلل..
ياسر اتسعت عيونة من الصدمة : تمزح..!! (بحدة) قول انكـ تمزح..!!
سعود رد عليه بـ نفس اسلوبة الحاد : شايف هالمواضيع فيها مزح..!! ما استغربت ابوي اللي كان منقهر عليه بالسيارة شلون سكت و سلم عليه عادي..
ياسر جلس على الكرسي : يالله ..يارب رحمتكـ .. شلون يعني ما يمشي على رجولة..!
سعود : بـ عكازات.. الدكتور يقول مع العلاج الطبيعي ان شاء الله يكون فيه امل للـشفاء بس هذا يعتمد على نفسية المريض و حماسة للـعلاج..
ياسر : و برا..؟!
سعود جلس جنبة : نفس الشيء ما تفرق.. اكيد ابوي بـ يجرب يرسل اوراقة لـ مراكز علاج طبيعي برا و نشوف ..
قاطعهم صوت وليد : ويش فيكم..؟!
التفتوا له الإثنين .. سعود : ولا شيء.. قول لـ راكان يروح يرتاح و انت اقعد عنده انا بـ اروح المركز لازم نتناوب عليه..
وليد : لا انا بـ اقعد عنده انتم متزوجين ما يصير تتركون حريمكم (يستهزء فيهم) يخافون بلاكم..
ياسر وقف : سامج..
وليد يناظر ياسر اللي يدخل غرفة مشعل : هذا من جده..؟! الله يعين بنت العم عليه.. انا لو مكانها طالب الطلاق من زمان.. اما اتزوج واحد نفسية بـ دقيقة يقلب مزاجة..
سعود وقف : ما تدري يمكن اللي عندكـ نفسيات.. عاد اكثر نفسية تتغير و تمر بـ تقلبات المراهقين..
وليد يضغط على شفايفة بـ اسنانة منقهر منهم يقولون بزر الحين تطور الموضوع صار مراهقة : ماني راد عليكـ .. لكن يارب تبلغني بـ ولد لـ سعود مطلع عيونة..
سعود ابتسم : دامني مرضي والديني ما همتني داعواتكـ .. الدنيا سلف و دين يا اخوي.. مثل ما تعامل اهلكـ عيالكـ بـ يعاملونكـ ..
وليد اعطاه قفاة و دخل الغرفة وهو ما زال يكلمة : ماشاء الله محاضرات على الصبح..
سعود يسكر الباب : عاد ليتكـ تعتبر.. اذن طين و اذن عجين..
راكان يكلم ياسر : ماني رايح دخلت معاه بـ اطلع معاه..
ياسر يناظر ابوه : يبه تفاهم مع اخوكـ .. ماني قادر عليه..
راكان : قلت لكم ماني رايح.. بس العصر بـ اروح لـ مشواري و ارجع.. ما احد بـ ينام عنده غيري..
مشعل رجع راسة على المخدة و يده على جبهتة و يتنفس من فمة.. صوت تنفسة واضح لهم..
ام احمد حطت يدها على جبهتة : توجع..؟!
مشعل : اقدر اتحملة مو مهم..
ام احمد ناظرت ياسر : ناد الدكتور قولة يجي يعطيه شيء يهدية لين متى بـ يتوجع..
وليد : توه قال أي..!! سوير مشتطة..!!
ام احمد : ان ما لميت لسانكـ عني يا وليد لا احط حرة اخوكـ فيكـ ..
راكان : من شوي معطينة مسكن..
ام احمد : هذا هو ما فاد معاه قولهم يغيرونة..
ياسر : يمه الله يهديكـ هذولي دكاترة و عارفين شغلهم احنا نعلمهم اياه..
ام احمد سحبت عباتها اللي طاحت على كتفها و رفعتها ترجعها على راسها : لا ما يعرفون شغلهم.. دق على احمد قوله يجي يشوف اخوه ما اثق بـ غيرة ..
مشعل : يمه و الله اني بـخير هذا الألم يروح و يجي عادي..
ابو سعود : رجلكـ تعوركـ ..؟!
مشعل : احس جسمي كله يعورني.. حتى راسي مصدع..
ام احمد تناظر ياسر متنرفزة منه : لو ما انت رايح تنادية انا اقوم انادية..
ياسر وقف : ويش اللي تنادينة يمه من جدكـ..!!
وليد : ابو سعيدان هنا يمه نخاف عليكـ منه..
ام احمد تلفت تدور لها شيء تهف عيالها الإثنين فيه.. وليد نط عندها بسرعة و باس راسها : داخلن على الله ثم عليكـ .. جعلني فدا لـ مواطي رجليكـ السموحة يا الشيخة..
ام احمد سحبت يدها اللي ماسكها وليد : قم ناد الدكتور..
وليد وقف : و هاذي شغلتنا اليوم نخدم السيد مشعل.. (لف لـ راكان) ما قلت بـ تقعد عنده المفروض انت تشوف طلباتة .. يعني انت اللي تنادي الدكتور دامه محتاج مسكن..!!
راكان حط رجل على رجل : و الله انا عمكـ من العيب تقومني و انت واقف كنكـ نخلة..
وليد : نخلة اللي تضرب راسكـ ان شاء الله .. كل هالطول و الرزة و اصير نخلة..!!
ابو سعود بـ حدة : وليــــد ماني فايق لـ القرقرة الفاضية..