لو سألتي الورد وهو ما بين ايدك اقطعك للكاتبة ضحكة قهر

48

ليه تقتل كل ذكرى في حياتي
وليه وسط الذاكرة زاد اتّساعك ؟!

كل ماحاولت أشاهد ذكرياتي
وقفّ المشهد على لحظة وداعك !

لـ أحمد المطيري..

بيت ابو سعود.. الصالة اللي اعتادوا يجلسون فيها.. خالد جالس مع ولدة على الأرض يكمل له كتبة.. و جود و وعد على الأرض يتقهون جنبهم..
ام سعود تناظر زوجها : جاء الظهر و نام.. و طلع العصر و للحين ما رجع.. و الله قلبي ماكلني عليه..
ابو سعود : ماهو بزر.. انتِ عارفة انه مشغول بـ دوامة لا تنقين عليه.. بتخلينه يشيل همك.. خليك مع اللي جنبك لا هي راضية تاكل و لا تحكي..!!
ام سعود ناظرت ميار و كأنها تعيش بـ عالم ثاني.. بــعيد عن عالمهم.. حتى نظرات عيونها فااارغة من كل شــيء.. يمكن حتى حزنها ما تحس فيــه..!!
: السلام عليكم..
: وعليكم السلام..
جلس عند رجول امه على الأرض و رجع راسة على وراء يسند راسة عليها : همزي لي يمه..
ام سعود : ويش بلاك..
سعود يضغط على عيونة بـ أصابع يدة اليسار السبابة و الإبهام : راسي مصدع..
ام سعود تهمز له راسة بيديها الثنتين : غصب لا تنام و لا تأكل.. تهاوش خواتك و انت ما تشوف نفسك..
سعود يصر على اسنانة و غمض عيونة : شغل و لازم اقضية .. وعيد ابيك بعدين..
وعد : انت فك نفسك من الصداع و بعدين يصير خير..
سعود رفع راسة و ناظرها : لا تنامين هذاني انبهك.. و الله ان نمتي لا اصحيك..
رفعت حواجبها : خير ويش عندك ..؟! قول اللي تبيه الحين..
سعود : ماني رايق لك الحين.. بس اصبري علي لو يطلع الكلام صدق بـ أوريك..
رجع راسة و هي تناظرة مستغربة.. أي كلام يقصد..؟! ما بقى شيء ما قالتة..؟! معقولة يكون سعود مكلم عماد و عماد قايل له شيء عني..؟! بس انا ما سويت شيء خله يقول اللي يبي..
ابو سعود يناظر وعد ثم سعود : ويش فيه يا سعود..؟!
سعود : بعدين يبه.. و الله راسي بـ ينفجر..
ابو سعود اخذ نفس و ناظر وعد.. اللي بادرت بـ دفاع وهي تناظر ابوها : و الله ما سويت شيء..
ابو سعود : ما قلت شيء طيب..
جود : هههههههههههه خبلة خليتيهم يشكون فيك..شكل الحمل أثر على عقلك.. ما كنتِ كذا..
وعد انقهرت .. ردت على جود و عيونها جوالها تناظر الرقم يتصل عليها : انتِ الخبلة.. ما سويت.. خليهم يشكون.. (ردت) الو.. وعليكم السلام.. ايه انا وعد مين معاي..؟!
عند هالجملة كلهم التفتوا يناظرونها.. وعد : اهــا.. ايوه.. اوكِ انا موجودة هالحين بالبيت.. العنوان....
قفلت الجوال.. جود : مين..!؟
وعد : شركة الشحن.. وصلت الشحنة بيوصلونها للبيت..
ياسر : لا و الله.. (يقلد صوتها) ايوه انا وعد مين معاي..؟!هبلة انتِ .؟! يعني أي احد يتصل عليك تقولين له كل شيء قبل لا تعرفين مين هو.؟! ما تبتي من وراء اللي صار لك من صلاح للحين..!؟
وعد : ما صار شيء يستاهل عشان تعصب علي..
ابو سعود يكلم ياسر : خلاص ياسر حصل خيــر..
ياسر : يبه نسيت كل شيء صار و عشناه..!؟
ابو سعود : ما نسيت.. و وعد تعلمت من اللي صار و لا عاد بـ تخبي علينا شيء.. لو صار شيء بتقولنا..
سعود رفع راسة من على رجل امه : ما ظنتي يبه انها تعلمت..
وعد تناظر سعود معصبة منه : انت قول اللي عندك.. لا تجلس تتكلم من تحت لـ تحت.. انا ما خبيت شيء قلت لكم كل شيء.. اذا عماد ملفق علي شيء مو مسؤوليتي تجي و تجلس تنغز بالحكي..
ابو سعود : سعود قول اللي عندك.. ويش فيه..؟!
سعود قام بعد ما حس ان راسة خف عنه شوي و جلس على الكنب جهة امة و قدام وعد : مو عماد اللي قال.. رانيه و هيفاء..
احمد : مين هذولي..؟!
سعود : الحارسات اللي كانن معاها وقت ما جلست بالمزرعة مع عماد..
وعد : ويش قالوا..؟! ما اخبر شيء..!!
سعود : يعني انتِ حكيتي لنا كل شيء صار بينك و بين عماد..؟!
وعد بـ ثقة : ايه..
سعود : انا استدعيتهن اليوم مع الفريق غازي و سألنهم عن اللي صار بينك انتِ و عماد بالمزرعة..
وعد : ايه .. و بعدين..؟!
سعود : قالن انه ضربك..
كل الأنظار اتجهت لها.. نزلت عيونها على فنجال القهوة قدامها.. سعود يكمل : و انتِ ما جبتي هالطاري و لا قلتِ انه مد يده عليك.. رغم انك قلتي انه سبك و حكيتي كل شيء الا هالشيء ما جبتي طاريه..
خالد يناظر وعد اللي جالسة جنب ولدة مستغرب منها!! : من جدك..؟! ليش..؟! يعني ما وراك احد يأخذ لك حقك منه..؟!
احمد : معقولة وعد..؟! ضربك و سكتي..!؟ كل شيء و لا إنه يمد يده عليك..
ابو سعود غمض عيونة بـ قوة : استغفر الله العظيم..
وعد تدارك الوضع قبل لا ابوها يعصب و يفهم شيء ثاني عن قصدها : لحظة.. اصبروا.. مو قصة خبيت.. هو ما ضربني ضربني.. يعني بس شد شعري و هذا ما اعتبرة ضرب..
خالد : اجل ويش يعتبر يا حظي..!؟ بس شد شعرك ما سوا شيء..؟!
وعد : اففففف يعني لازم اقول..؟!
ابو سعود بـ حدة: لا تتأففين بـ وجهــــي..!!
وعد دنقت : آسفة..
ابو سعود يكمل بـ نفس النبرة الحادة : وعد و بعدين معاك..؟! قلتِ اشياء اقوى من انه ضربك.. عجزتي لا تقولين مد يده علي..؟! الى متى بتتعبين اسلوب انك تخبين علينا و كأنك بـ تقدرين تحلين كل شيء بنفسك..!؟
وعد ناظرتة : مو قصة اخبي.. بس لما رجعت معاه بعد ما غبت شهر عند عمي مشاري كنت ناوية انسى كل شيء صار صح هو اخطى علي مره و ثنتين و عشر بس انا بعد اخطيت عليه مره يعني يوم شد شعري انا كنت معصبة فيه لأنه يبي الجوال اللي جابة وليد.. انا ما كنت فاهمة شيء بالقضية.. لأني شفت صلاح و صاحب عماد وعماد و كل شيء مع بعض ما خلاني افكر بـ شيء.. لما مد يده علي.. انــا.. مديت يدي عليه..
: ايـــــــش!!!
مصدوميــــن!! مدت يدها عليه..؟! ضربت عماد..؟!
ام ندى مصدومة : انتِ ضربتي الرجال..؟!!
وعد صدت لـ لجهة الثانية ما تشوف غير جود اللي جالسة جنبها : .........
ياسر : وعيــــد.. انتِ مديتي يدك عليه..؟! صاحية انتِ..؟! تمدين يدك على رجال طول بـ عرض قدامك زين اللي ما ذبحك.. و الله مالنا وجه نطالب بدمك منه..
ام احمد : يا حيـــف يا وعــــد يا حيـــف..
وعد : ما سويت شيء غلط يا خالة قهرني.. مستفز لأبعد حد.. يجي عشان يتأمر علي و يذلف.. حتى من الجناح ما يخليني اطلع.. و يسمعني كلام زي السم.. و فوقها يفكر يمد يده علي.. قهرني محبوسة و مأكلة تبن حتى بالحكي اللي يقولة لي.. عصبت منه يوم مد يده علي و رميت الفازة على كتفة.. اوكِ انا ما قلت هالشيء بس هو ما كفخني و علّم علي.. انا ما همني انه شد لي شعري اللي يهمني الحكي اللي قالة لي و اللي انا قلتة لكم.. عماد ما تزوجني الا عشان ابوه يقهر بابا.. و جات القضية و تورط معاي..
جود تبوس خد وعد و تصفق بـ حماس : انتِ كفــــو .. ما فيه احد زيك ابد.. اعطيني دروس عندك..
ابو سعود يناظر جود : احمدي ربك اللي هي مغطية عليك و الا صكيت فنجالي بجبهتك..
سعود : بس كان لازم تعلمينا.. حتى لو السالفة شد شعر.. يعني قلتِ كل شيء عجزتي لا تقولين هالكلمتين..
وعد : طيب ذاك اليوم بعد شد شعري.. يوم تهاوشنا.. و خنقني و مو اول مره يخنقني قد خنقني قبل يمكن مرتين ما ادري ثلاث.. اعتقد ما باقي شيء ما قلتة..
حاتم : بس عشان خايفين عليك.. مهما كان هذا زواج مبني على الإحترام و الضرب ما يدل على انه يحترمك..
ابو سعود : يا خوفي بس تطلعين بكره بـ شغلة يا وعد.. ما عدت اثق بحكيك.. لازم تنقصين بالحكي..
وعد : ما نقصت.. انا قلت كل شيء.. توقعت تهاوشوني على اللي سويتة.. بس.. بس انا مو معتبرة نفسي عشت معاه كا زوجة.. يعني.. لو بعد الأيام اللي عشتها خلال الفترة كلها هاذي من قبل رمضان لين اليوم ما تجي شهر على بعضة و كلها هواش.. هو ما عنده استعداد يتقبلني و انا ما عندي استعداد انهان..
ام احمد : يا يمه ما يصير هالحكي مهما كان هذا زوجك و بينكم بيصير ولد..
ام سعود : ابوك ينادية و يصلح اللي بينكم و ترجع المياة لمجاريها..
سعود : لا.. لا يمه.. ما ترجع لمجاريها.. ويش هي مجاريها ينومها و يصحيها على هواش..؟! و يهينها و يطعن فينا كلنا..
ام احمد تهدي سـعود : يا وليدي ما يصير لا تقطع رزق اختك..
وعد : ما ابيه.. انا ما ابي الا الطلاق.. ما ابي اعيش معاه.. بـ يتزوج علي.. راح و خطب.. جايني بكل قواة عيني يقولي نظفي الجناح لـ زوجتي.. و هذا هو سبب الهوشة الأخيرة هو قالي نظفي الجناح و انا رحت حستة زيادة..
منيره بإستهزاء : ويش تصرفات البزارين هاذي و إذا قالك نظفي الجناح مو بالضرورة انتِ تنظفينة قولي للخدامات و هم ينظفونة ليش تأخذين الموضوع بحزازية و تخلينه يمسك شيء عليك..؟! هالشيء بيكبر مقدارك مو مقللة..
جود ترد عليها بنفس الإستهزاء : لا و الله..؟! تأخذ الموضوع بحزازية..؟! و ليش هو ان شاء الله ما يقول لخواتة و الا الخدامات..؟! اختي ويش دخلها.؟! مو يكفي انه قاهرها حاط على راسها مره جعلهم يكسرون راسة..
نهى دخلت بالنقاش قبل لا تسلم : دايم اقول اللي ماله بالموضوع يحب المثالية و يجلس يتفلسف .. النار ما تحرق الا رجل واطيها..
نهى باست راس ابوها و خالاتها لما وصلت لـ منيره ما ودها تسلم لكنها ضغطت على نفسها عشان ابوها فقط.. و الا مو تقدير لها..
منيره : ما بغيت الا مصلحتها الحين عماد يشوفها بزر..
ابو سعود : اللي صار صار.. الزواجة من اولها خطأ..
وعد تترجاه على شفا حفرة من انها تصيح : بابا انت وعدتني البارح.. ما ابيه ما ابي اعيش معاه.. خله يطلقني..
ابو سعود : قلتيها وعدتك وما راح اخلف بـ وعدي.. ما عندي استعداد اجلس اتفرج على ولد عامر ويش يسوي فيك..
ابراهيم مد الدفتر على ابوه كلهم يتناقشون و ابراهيم على دفترة يكتب : خلصت..
سحب الدفتر خالد و عينة على ابوه : يبه انهي كل شيء بأسرع وقت.. ليش تجلس كذا.. بكره بس تولد يحطون لهم حقوق مالها اول من تالي..
ياسر : دام هي تبي الطلاق يجيها.. كلنا من الأساس ما كنا نبيها هالزواجة.. من وين بـ يحترمها وهم حسوا انهم قدروا يلون ذراعك فيها و يأخذونها.. الحين ما يهمهم ممكن يسوون شيء ثاني عشان عماد ما يطلقها..
ابو سعود : ماني مستغربها على عامر يسويها و الله بس و رب الكعبة ما انولة اللي يبيه..
منيره مستغربة : ايش فيكم تحكون على الطلاق و كنه شيء عادي.. اول شيء هي حامل.. ثاني شيء هو ولد خالها من دمها و لحمها.. و قالت هي بعظمة لسانها انها ما عاشت معاه حياة طبيعية.. اعطوهم الفرصة لأنهم يعيشون حياتهم.. لو ما بينهم ولد يضحون عشانه اوك كل واحد يروح بـ طريق لكن ولدهم..! فكروا لـ شوي قدام..
وعد تناظر منيره : اللي هاذي اولها ينعاف تاليها.. يعني اولها زي الزفت مع عماد متى بتتحسن لا جاني عشر عيال..؟! و اني ما عشت معاه حياة طبيعية اولاً هو اساساً مو متفرغ همه الأول وظيفتة ثانياً اهلة و بعدين باقي خلق الله و انا مو من ضمنهم.. يعني حتى هو ما حاول انه يعيش معاي.. لأنه اصلاً ما تزوجني لأنه يبيني و لا على قولتك دمه و لحمة لأني ما اعرف الدم اللي تقولين عنه.. تزوجني عشان انا بنت ابراهيم.. اخر شيء انا قلت ابي الطلاق يعني ابي الطلاق لا احد يجي يتفلسف على راسي وهو ما عاش اللي انا عشتة..
ابو سعود بـ حزم : خــــلاص يا وعد.. ابيك بس تستخيرين كم مره..
وعد : استخرت و الله استخرت و مرتاحة للموضوع ابي اتطلق..
ام احمد : يا وليدي ماهو زين لك.. توك صغيرة..
ياسر : بـ يجيها مين ينسيها طوايف عماد..
خالد يناظر الدفتر و عصب : ابراهيم و بعدين..!؟ ماني معيدك الصفحة..؟! ليش ما تكتب زين..؟! ما تبي تخلص ..؟!
ابراهيم باقي شوي و يصيح من صراخ ابوه .. سكت عشان ما يبكي عيونة بالأرض.. يضغط بكفة اليسار على كفة اليمين..
خالد قطع الورقة و رمى الدفتر على الأرض : عيدها و اكتب زي العالم و الناس و الا بنقعد للصبح انت تكتب و انا اقطع..
مد يده اليسار و اخذ الدفتر فتح صفحة جديدة و مسك المرسام باليسار يحاول يكتب..
خالد رفع حاجبة اليمين : من متى تكتب باليسار..؟!
بلع ريقة و رمى المرسام وقف من غير لا يناظر ابوه لأن دموعة نزلت : انا قلت لك يدي تعورني بس انت ما تسمعني.. يدي تعورني .. يدي تعورني.. مشى بـ يطلع من الصالة و تعدا من عند جده اللي مسكة بسرعة من عضدة و شده له ووقفة قدامة.. ابو سعود : تعــــــال..
ابراهيم وهو يضغط على كفة : يبه و الله تعورني..
ابو سعود باس راسة : مصدقك.. ما راح تكمل حل خلاص لا تبكي..
ابراهيم ما يناظرة : ما ابكي..
حاتم قام و جلس على الطاولة قبال ابوه : اجلس خليني اشوفها..
جلس ابراهيم جنب جده.. ومد كفة لـ عمه.. : لا تعورني..
حاتم : ما راح اعورك.. بـ شويش اذا حسيت بألم زيادة قولي و اوقف .. اتفقنا..
هز راسة ابراهيم بالموافقة.. مسك يد ابراهيم بيديه الثنتين, حرك حاتم يده بحركات دائرية على كفة بداية من المعصم على ظاهر يده و كل شوي يزيد بالضغط..
ابراهيم مد يده اليسار يمسك يده عمه وهو عافس وجهة من الألم بس يتصبر عشان ما يبكي قدامهم : تعوور..
حاتم رفع اصابعة : طيب .. نشوف الأصابع..اول ما مسك اصابعة السبابة و الوسطى شد ابراهيم يده مبعدها و دموعة اللي يحاول انها ما تنزل قدامهم نزلت..
حاتم ناظر ابوه : اعصاب يده مشدودة.. لأنه يضغط عليها.. هو بمـرحلة نمو المفروض ما يطول و هو يكتب لأن المرسام صغير و بيأثر على نمو الأصابع.. عشان كذا الأطفال الصغار بالروضات و المراحل الأولى المفروض يكتبون بمراسيم كبيرة و ما يطولون وهم يكتبون.. لأنه اذا استمر على هالحالة بيتأثر العظم و يصير له تشووة.. عدا ان مسكتة للمرسام غلط..
ابو سعود يناظر خالد.. يكلمة بـ حدة مقهور من اسلوب ولده : ارتحت و الا باقي للحين..!؟
حاتم لف يناظر خالد الجالس على الأرض مكانة.. و رجع يناظر ابراهيم : بروح الصيدلية اجيب لك مرهم عشان يخف الألم و شاش عشان نربط على يدك و ما تحركها و ان شاء الله ما تعورك.. اوكِ عمي..؟!
هز راسة ابراهيم ..و حاتم وقف مد يده يحوس له شعرة : بطل..
ابراهيم رفع رجولة حتى يتخبى وراء جده.. مو عشان ابوه كثر انه ما يبي احد يشوف دموعة و هو يبكي.. خالد رباه ان دموع انت رجال و دموع الرجال عيب تنشاف.. مهما صار لك ما تبكي..
حاتم : تأمرون على شيء..
خالد وقف : اجلس قولي ويش هو المرهم و انا اجيبة..
حاتم : عادي انا بـ أجيبة..
خالد : لا انا بـ أروح بس قولي ويش هو المرهم اللي تبيه..
جود تهمس لـ وعد : اخوك ماهو مرتاح لين يعقد ولده..؟!
وعد : شوفية ندم.. يعني صح هو غلط.. بس خالد يبي ولده يكون ازين شخص بالعالم..
نهى : يجيب له امراض نفسية و تقولين يبي ولده ازين ولد بالعالم..
اخذ خالد الورقة الصغيرة اللي كتب فيها حاتم اسم المرهم و طلع..
ابو سعود لف يناظر ابراهيم مختبي وراه : ايش فيك..؟! تعورك..؟!
ابراهيم هز راسة و هو يمسح دموعة بـ كفة اليسار : ابي اكل انا جوعان..
ابو سعود : يخسى الجوع الحين نجيب لك تأكل..
جود رفعت يدها : احسبوني معاه..
ياسر يناظر جود بـ قوة : فزي جيبي أكل لك و له..
جود نزلت يدها و عفست وجهها : ما فحالي.. لو فيني حيل كنت قمت لـ نفسي ما عازة اقوم لولد اخوك..
ام احمد : يا غبني من هالبنية ما تبي تسوي شيء.!! تحركي بكرة تروحين لـ بيت رجلك و تفضحينا عنده..
جود بإستنكار : افضحكم عنده ليش..؟! يعني انشر غسيلكم (مدت لسانها وهي تضحك)..
ياسر : قص لسان ايه و الله قص لسان..
جود : هههههههههه ايش فيك عصبت..
ياسر : مادة لسانك على امي يا قليلة الحياء..
ام احمد : خلها تمزح..
ياسر ضرب جبهتة : و ما تبينها تفضحنا عز الله بيردها علينا رجلها قبل لا يصلي الفجر..
جود بـ غرور : وه وه نيالة اللي بيأخذ جود بنت ابراهيم بن مساعد بن سالم.. عز الله امه و ابوه و كل عيلتة و قبيلتة و جماعتة و السعوديين كبيرهم و صغيرهم داعين له بـ ليلة القدر..
حاتم : هههههههههههه لا يشق خشمك السقف بس..
جود تكمل بـ غرورها وهي رافعة رقبتها : مشكلتكم و الله ما تحبون احد يكون زين غيركم بس انا ازين منكم..
سعود : على ويش بالله ..؟! هاه..؟! انتِ حتى بيض ما تعرفين تسوين..؟! على أي اساس بيخليك عنده..؟!
جود : اوووف منكم ترى مو كل الرجال تفكيرهم بطنهم و بس مثلكم.. اعوذ بالله.. طيب لحظة لحظة.. انت شوق ما ادري يمكن تعرف تطبخ ليش اسفل بالبنية لكن انت (لفت على ياسر) بـ تفهمني ان صبا تعرف تسوي شاهي..؟!
ياسر عفــس وجهة من الطاري : ما ادري..
جود : حبيبي انت.. احمد ربك انكم بتعيشون هنا و الا كنت مت من الجوع..
ياسر بـ بساطة لأنه مستحيل يأكل من اكلها ما راح يثق ان ذيك المايعة يطلع منها شيء سنع يمكن يتسمم!! : الله يخلي المطاعم و النواشف..
جود : لا يا شيخ الحين صار الله يخليها و من شوي مسفل فيني على حساب العريس اللي ما طق الباب..
احمد : ما تدرين عن الرزق متى يجي..
جود تسكر الموضوع تخاف لا يتشعب و تفتح على نفسها مشاريع مسكرة : صح معاك حق..
دخل خالد : السلام عليكم..
: وعليكم السلام..
خالد مد الكيس لـ حاتم : شوف ذا ما لقيت اللي انت كتبت رحت لـ ثلاث صيدليات قالوا مو متوفر هالفترة و هذا بديل عنه لـه نفس المفعول..
فتح حاتم الكيس حتى يطلع المرهم : اه.. كويس ذا مو مشكلة..
وقف و جلس قدام ابوه على الطاولة: يالله ابراهيم اعطيني يدك..
خالد جلس جنب ولدة .. ناظرة متخبي وراء ابوه.. عقد حواجبة : نايم..
ابو سعود لف و حط يده اليسار وراء ظهر ابراهيم حتى يجلسة وهو نايم : قال انه جعان..
خالد تنهد : استغفر الله..
حاتم : خلوه ازين عشان ما يحس بالألم.. لأنه ممكن يتوجع اول بس لامست اصابعة سحبها من يدي..
خالد : طيب اخذة المستشفى ازين..؟!
حاتم ماسك يد ابراهيم بـ يدة اليمين و ضغط على المرهم بـ يدة اليسار حتى ينزل شوي على يد ابراهيم و يحركة بحركات دائرية : لا ما يحتاج هو مو كسر و لا شعر.. بس اعصاب يدة انشدت من الضغط عليها.. بس يريح يده و المرهم ان شاء الله بيحيب نتيجة زينة.. و لا تثقل عليه مره ثانية.. اعطه وقت يستريح بين كل قطعة و الثانية.. مو تشد عليه هو يكتب و انت تقطع.. تغاضى عنه شوي ياخي..
ابو سعود يناظر خالد : لا تجنن الولد توه صغير.. سواتك فيه قشرا.. و ياليتة على شيء مهم واجبات قبل العيد..!!
خالد ماسك ولده راس ابراهيم على صدرة : يبه ما ابيه يتعود على الإهمال.. ماني معاه كل يوم شغلي يخليني اتركة بالأيام ابيه يذاكر حتى لو ماني عنده..
ابو سعود : سواتك بتخلية يذاكر قدامك و بس.. من وراك ما يفتح الكتاب..
حاتم يلف الشاش على يد ابراهيم : ازرع فيه حب الدراسة مو كرهها.. سواتك تكرهة ما تحببة حتى لو انه سمع كلامك و فتح الكتاب من وراك بـ يحس انه فرض و لازم يسوية عشانك ماهو عشانة..
خالد : يــــاتي.. هاتي لحاف لإبراهيم..
ام حاتم : وده غرفتة ليش تخليه بينا عشان ما يصحى..؟!
خالد : لا خالتي لو صحى وما لقاني موجود معاه بيزر عقلة..
سعود : ويش هالحكي ولدك ماهو بزر عشان يخاف ينام لحالة..؟!
احمد : تجية كوابيس دايم..
ياتي تمد اللحاف لـ خالد : خود بابا..
خالد سحبة من يدها : شكراً.. (ناظر حاتم اللي يربط الشاش) خلاص..؟!
حاتم : ايه..
ابو سعود : وين مشعل ما شفتة..؟!
ام احمد : طلع من قريب المغرب يقول بـ يروح لعمانة..و اذا خلص دوام خواتة بـ يجيبهن..
ابو سعود : هالولد اذن طين و اذن عجين ما يفهم الكلام..
سعود : و ندى وينها ما شفتها اليوم خير شر..؟!
ام حاتم : نايمة.. جلست مع خواتها البارح مشغلات المكيف و الدنيا برد.. و لوزت و سخنت..
احمد يناظر خواتة اللي يتقهون و لا هامهن شيء : من جدكن مشغلات المكيف..؟!
جود : ويش فيها حر..حر انتم تبردون كيفكم احنا مو بردانات..
احمد : ايه امرضن بهالبرد..
: السلام عليكم..
: وعليكم السلام..
تقدمهن مشعل يبوس راس ابوه و بعدها دانه ثم سها.. سلموا على خالاتهم و جلسوا..
ابو سعود يناظر مشعل : اخيراً ما بغينا نشوف سعادتك..؟!
مشعل يجلس على الأرض عند خواتة يبي يلهى بأي شيء عشان يقصر الإستجواب و الهواش اللي بيجية : ليش يبه تبي شيء..؟!
ابو سعود بـ حدة : و انت ويش دراك عني ابي شيء و الا لا .. من العصر للحين طايح لي ببيت ابوي..؟!
مشعل ابتسم حتى يمتص غضب ابوه : عماني كانوا كلهم فيه و تحمست للجلسة و الا كنت برجع من صلاة المغرب..
سعود يستهزء فيه :بسم الله عليك تواصل رحمك..!! ليش اول مره تشوف عماني..؟!
مشعل يستغل الوضع عشان ابوه ينسى انه يهاوشة : مو اول مره بس عندهم سالفة اكشــــن.. تهاوشوا هوووشة ماهي طبيعية..
ابو سعود : اكيد راكان و بندر..؟! هالإثنين ما يتوالفون يبي لهم دق رووس..
مشعل :لا مو زي دايم هالمرة جدي و عمي عبدالرحمن ضد عمي مشاري و عمي راكان..
ام سعود : الله يهديه راكان ماهو راكد ويش عنده..؟!
مشعل ابتسم : موضوع كبيـــر شوي تهاوشوا و اخر شيء جدتي قالت و الله ماهو حال الموضوع غير ابراهيم.. يبونك تجي عشان يكلمونك رغم ان جدي ما كلمك اليوم الصبح يقول ولبه بـ عيالة بس..
ياسر : و عمي بندر وين مكانة من الإعراب..؟!
مشعل : عمي بندر عليه يكلم عساف و فيصل لا يتدخلون.. عساف معصب من الموضوع و فيصل معصب من اسلوب راكان منرفزة..
خالد يعدل راس ولده على رجلة : طيب ما قلت لنا ذا كله ليش..؟!
مشعل لف و اعطى خواتة ظهرة يناظر ابوه و اخوانة.. ضربتة على ظهرة نهى : ما فيه احترام للي اكبر منك..؟!
مشعل لف عليها : هووه السالفة حماس تبيني افكر احترمك.. (ناظر ابوة) البارح جدي عرف ان عمتي اثير تدرس بالطب..
ابو سعود عقد حواجبة بـ قوة : نعـــم..؟!!
مشعل يكمل سيل المعلومات اهم شيء ابوه يلهى عنه مدقق عليه بشكل فضيع وكأنه يبي طول الوقت بـ وجهة!! يهاوشة انه يجلس مع عمانة فترة طويلة و يترك البيت يبيه يقابلة و بس : جدي مصمل انها تتركة.. و عمي مشاري و عمي راكان رافضين الموضوع بتاتاً..
ابو سعود بـ حدة الموضوع بالنسبة له منتهي : على كيفهم..؟! ما عاد الا هي..
وعد : بابا الله يخليك عمتي اثير صارت سنة رابعة.. مو توها عشان تسحبونها و تقعدونها بالبيت و تهدمون مستقبل هي من زمان تحلم فيه..
مشعل لف على وعد وراه : انتِ كنتِ تدرين انها تدرس طب..؟!
وعد : ايه ادري.. اوكِ انتم تشوفونة عيب.. بس ما احد له حق يمنعها.. حتى جدي تخلى عن هالحق..
سعود عصب على وعد : حلوه ذي تخلى عن هالحق وهو معصب الحين بسبة هالموضوع.. هذا انتِ ما دخلتي الطب و ابوي منعك يعني ابوي ماله حق..؟!
وعد : فيه فرق بيني و بينها.. انا بابا ما خلاني و منعني من الموضوع قبل لا تضيع سنة من حياتي ادرس فيه.. عمتي اثير جدي متخلي عنهم سنين و بنين.. انا لما عشت عندهم كنت اشوفهم يبنون احلام كبيرة.. يمكن لأنهم يبون يثبتون لـ جدي وجودهم في الحياة و كل واحد يكون شيء كبير.. عمي مشاري محامي و يفهم بالكومبيوترات و عمي راكان مجالة بالكيمياء و لو انه للحين يدرس لكنه ماشاء الله من الطلاب الأوائل على الدفعة و عمتي اثير دكتورة.. هو بـ تخليه عنهم ما اهتم لحياتهم كلها لا من وين يأكلون و لا وين ساكنين حرم نفسة من حق انه يتحكم بـ مستقبلهم.. بعد ما درست اربع سنوات و عماني موافقين و خالة موضي موافقة يجي جدي يحرمها منه..؟! انت بابا لو انا و نهى تخليت عنا و كنا عايشين عند ماما و جيتنا بعد هالسنين و لقيتنا ندرس بـ تخصصات ما تبيها.. بتخلينا نتركها..؟! بتحس ان لك حق تحرمنا منها..؟! الشيء اللي بـ يهمك اننا نكون راضيات و نتقبل ان انت ابونا و نتعامل طبيعي مثل أي عيلة ممكن اشياء كثيرة تغض الطرف عنها حتى لو هي ما ترضيك.. نفس الشيء جدي لازم لازم يغض الطرف عن دراسة أثير..
اخذ نفس ابو سعود : استغفر الله العظيم..
ياسر : حتى لو معاك حق و ما دخلت الا برضى عمي مشاري ما يعني تمحين حق جدي..
خالد : حق جدي لو مالها كم سنة تدرس.. انك تسحب ملفها يعني راح تقعد بالبيت او تعيدها الثانوي من جديد و تدرسها بـ تخصص ثاني بالجامعة..؟! ايش رايك انت..؟! هي ما اخطت يوم اختارت الطب.. لكن جدي اخطأ يوم تركهم..
احمد : انا ما اشوف فيها شيء.. فيه بنات كثير بالطب و محترمات و فيه اللي ما يدلون درب الإحترام.. و بنتنا متربية المفروض نغرس فيها الثقة مو نهدمها.. و هذا عمي بندر متزوج دكتورة ما احد قاله لا..
وعد : بابا تكفى انت مو راضي على الموضوع اوكِ لا تدخل.. لا تشارك بانك تظلمها و الله بتنقهر و بـ تسكت و تبلعها غصة بحلقها ما تنساها لكم كل حياتها.. خلك محايد بالموضوع لا توقف مع جدي و لا مع عمي مشاري..
حاتم : انا ماني شايف التخصص مشكلة عشان تحاربونة.. بالعكس احنا نحتاج كوادر نسائية سعودية في الطب.. فيه تخصصات الأفضل تكون للحرمة بسبب غيرة الرجال يعني يوم زوجتك تتعب او اختك مو تفضل انه يكشف عليها رجال مو شرط بمجال النساء و الولادة أي مجال ثاني لو الأسنان مثلاً مو افضل تكون حرمة مو رجال..؟! ليش نحارب شيء احنا نبيه..؟!
ياسر : لأن هاذي تربيتنا ما نرضى على بناتنا يدرسون الطب بين الرجال سبرها من سبرهم.. و شغلها معاهم رايحة رادة وهي وسطهم.. انت ما تدخل مستشفيات ما تشوف الضحك و قلة الحياء واصلة وين..؟!
حاتم : اسألك بالله كلهن كذا..؟!
ياسر : لا طبعاً.. فيه محترمات تستحي حتى ترفع عينك لها..
حاتم : و هذا مو سببة الطب.. سببة التربية اللي اهلها ما ربوها او اهلها تعبوا فيها و لا اثمرت.. حرام الحين تهدمون مستقبل البنية وهي سنة رابعة باقي لها ثلاث سنين.. يبه اذا ساعدتهم و خليتها تترك تخصصها بتكون ظالم البنية بتصير بشهادة ثانوي بعد ما وصلت لنص الطب..
وعد مبتسمة و هي تحس فيه احد جالس يضغط على ابوها تدري انه مستحيل يغير تفكيرة بإن الطب غلط للبنت بس ما ودها يظلم اثير اللي وصلت لـ نص الطريق : بابا تكفى لا تظلمها و تدعي عليكـ..
اتسعت عيونة اخته تدعي عليه!! : استغفر الله العظيم..
سعود بـ عدم اقتناع : يعني نترك عاداتنا و كل شيء و نرضى لها على اللي تسوية..؟!
خالد : لازم ترضى.. لو اسيل توها بـ تدرس طب اقولك نقدر نثنيها بس اثير صار لها سنين حرام تهدم مستقبلها خلاص ما عاد فيه رجعة.. و الا بتجيب لها وظيفة بشهادة ثانوي و هي طموحها دكتورة و تكسرة لها و تحرمها منه..؟! تضمن ما تصيبك دعوتها يومك ظلمتها لأنها يوم دخلتة كلنا ما كنا نعرفهم و دخلت برضا ولي امرها عمي مشاري الحين يوم عرفتنا نقوم نظلمها..؟!!
نهى تهمس لـ سها الجالسة على الكنب و شاقة ضحكتها : انتبهي لا يعلق فكك من الضحك..
سها نزلت جلست جنبهم : هههههه ويش حارك..
نهى : ويش عندك ماشاء الله فاردتها..؟!
سها تلم فمها : ولا شيء..
نهى : شفتية..؟!
سها ابتسمت من جديد فرحة تجتاحها لشوفتة بس :.............
نهى رافعة حواجبها و لسانها تمده لـ زاوية فمها تنتظر جواب من سها..
و جود مره مع ابوها و اخوانها السالفة حماس و بـ يصير اكشن عندها الحين بين نهى وسها..
ابو سعود : على قولتكم بوقف محايد لأني مع و لاضد.. انا ماني راضي ولو توها كنت حولتها و راح اجرب انشد اذا اقدر احولها بـ حولها من التخصص..
وعد : ما تقدر بابا اذا الطالب درس خمسين بالمية من مواد التخصص يمنع من التحويل بعدها..هذا نظام الجامعة..
ابو سعود : ماني عايز لاجرب..
وعد قلقت لعبوا على وتر انها لها اربع سنين متخرجة من الجامعة لو سحبوا ملفها ما راح تنقبل و بتكون انظلمت.. مشكلة لو ابوها جاب لها تحويل اخذت نفس شلون تقنعة!! المفروض يكونون شوي خف تعقيدهم لما دروا ان هنادي دكتورة.. لازم يلعبون على هالوتر بعد.. بس اذا عندوا ممكن يفركشون خطبة بندر منها..؟!! يسوونها و الله و لا يهمهم شيء..