لو سألتي الورد وهو ما بين ايدك اقطعك للكاتبة ضحكة قهر

البارت الثاني عشر

مدخل :/ يعني لو عطره تلاشى ..
كيف اشمه !!
يعني لو صدفة لقيته !!
اتصدد ؟!
و اتحاشى ؟!
أو اجي طاير و اضمه ؟؟

وطن عمري..

: يمــــــــــــــــه يمــــــــــــــــــــــه.. وصوت بكاء طفل. يمـــــــــــــــــــــــه.
فزت من نومها تصرخ : ولـــــــــــدي.
فز من صرختها : بسم الله نوال.
ناظرته بعيون باكية : يناديني.
: تعوذي من ابليس يا نوال هالشيطان يوسوس فيك وانتِ تضعفين له هاذي كوابيس.
: والله يا ابراهيم احس فيه والله احس فيه.
: شدها له وحط يده على راسها يقرأ عليها كوابيسها بولدها ما زالت تراودها كل ليلة تحلم فيه كل ليلة تسمع صوتة وتحس فيه : بسم الله عليك بسم الله عليك رددي لا اله إلا الله .. اعوذ بالله من الشيطان الرجيم.
: لا اله إلا الله اعوذ بالله من الشيطان الرجيم.. ابراهيم.. أنا احس فيه احسه محتاجني.
: بكره بنتصدق عنه وعن اخوانه الله يرحمهم جميع.
..
..
: رغد تكفين قولي له يصبر... اهلي ما يدرون للحين اني متزوجة وعلى ذمة رجال.. رغد مستحيل أنا ابي تركي مستحيل اكون حليلة لغيرة.. ما ابي اتطلق ما طلبت الطلاق لو اني بغيته كنت تطلقت من ثلاث سنين مو الحين.. ما ابيه كيفي أنا حره بقراراتي.. رغد كلمي عمي الله يخليك إلا الطلاق ما ابيه ما ابي اكون إلا لتركي.
..
..
أبو عمر : حذرتك من قبل قلت لك لازم يدرن لكنك قلت لا ما ابيهن خلهن عايشين حياتهن كذا عندهم أم ما ابيهن يحسن إن امهن تخلت عنهن.
أم عبدالرحمن : ويش فيك من جلس اخوك وقال إن بناته درن وأنت هاب في وجهه.
أبو عمر : لانه غلط يا يمه ولو انه علم بناته الحين ما سكرن على انفسهن بغرفهن.
أبو سعود : تراني سامع لي كلام لين قايل بس خلاص يا سعد ما ابي احد يعاتبني زود.
أبو عمر : ليش عشان ما تبي تعترف بغلطك يا ابراهيم.؟
أبو سعود : أنا ما غلطت يا سعد بناتي ما كان لازم يعرفن و إن كان فيها معرفة يعرفن من الغريب ولا يعرفن مني باي وجه ادخل عليهن واقولهن امكن خلتكن علمني وشلون بصدمهن فيها عندي يدرن من الناس ويرمن كل كلامهن في وجهي ولا اني أنا اقولهن.
أبو عساف : أبو عمر خلاص ابراهيم ماهو ناقص عشان تزيدها عليه.
أم عساف : يدرن إن امهن رجعت السعودية.؟
أبو سعود : ايه يدرن.
أم عبدالرحمن : الله يستر ما يطلبن يشوفنها الله العالم ويش رجعت فيه بعد ما عاشت ببلاد الكفار سنين عمرها إن كان يومها هنا رمت بناتها الله العالم ويش مسوية بعمرها هالحين.
أم سعود : ما يبنها يا خاله ما يرددن إلا إن امهن ماتت.
أم عبدالرحمن : ازين بعد.
أبو سعود يتنهد : استغفر الله العظيم.
أبو عبدالرحمن : ويش بلاك تنهد.
أبو سعود : ما ادري يبه من وين احصلها منهن كل وحده حابسة نفسها بغرفتها من درن خايف لا يسون بانفسهن شيء, والا من تعب وعد خفت لا تطيح علي, والا من جود و اهمالها لصحتها و إلا من أم ندى هالايام تعبانة. هذا غير مشاكل الشركة.
أم عبدالرحمن : ليش ويش بلاها ويش منه تشكي.
أبو سعود : افكارها القديمة يمه للحين تفكر بولدها.
أبو عبدالرحمن : ما تنلام يا أبوي هذا عشانها شافتة لو انك دفنتة ولا طاوعتها وخليتها تشوفه ما كان ما يطري عليها هالحين.
سعود : أنا اتوقع انها تأثرت من خواتي و انهيارهن كل عمرها تعاملهن مثل سها و ندى و زعلت على زعلهن هالحين.
عساف : عمي أنت دفنت ولدك بيدك.؟
أبو سعود : والله لو ما دفنتة بيدي كنت صدقت كلامها كل يوم تفزع من نومها تناديه اخذت فترة تصحى وهي تصيح تقول ماهو بخير ولدي فيه شيء غير احمد يعطيها مهدئ عشان تنام مره ثانية وهالايام ما تحكي إلا فيه.
..
..
: السلام عليكم.
انصدموا من نزلتها : وعليكم السلام.
جلست من غير لا تسلم على احد لا أبوها ولا خالاتها : يااااتي هاتي القهوة.
أبو سعود : من متى تجين وتجلسين من غير لا تسلمين علي.
وعد : من اليوم وما ظنتي بيهمك إن سلمت عليك والا لا لان اساساً مشاعرنا ما همتك.
: السلام عليكم.
: وعليكم السلام.
سوت نفس حركة أختها وجلست جنبها : قلتِ لياتي تجيب القهوة.
وعد : ايه.
نهى : ويش رايك نسوي اكشن دام اجازتي بدت.
وعد : ماهو اكشنك.؟
نهى : ما ادري بس نغير جو نروح لعرس عندك عرس نروح له.؟
وعد : لا.. إذا لقيتي علميني اروح معاك.
جود : فيه عرس هاذيك بنت نايفة امي بتروح خلونا نروح احنا بعد.
أم احمد : ايه يمه إذا أبوكن موافق روحوا غيروا جو وانبسطوا.
وعد : متى.؟
جود بحماس : بكررره وناااسه طقاقــة وردح وفلة.
وعد : خلاص أنا بروح.
نهى : وانا بعد.. إلا بسالك يا بابا.. ويش اسم زوج امي اللـــــــه يرحمها.؟
أبو سعود ماسك نفسة لا يعصب عليهن : ويش بيفيدك إن عرفتي.؟
نهى : ما ادري ليش حبيت اعرف من اخذت وسافرت معاه. ويش اسمه.؟
أبو سعود : طلال.
وعد : مبين الانسجام بالموضوع طلال ومريم يمديك على كذا.؟
نهى تتكي على فخذ وعد بكوعها وتناظر ياتي اللي تنزل القهوة على الطاولة مع صواني الحلى : لا ما يمديني ابدا كمية جاذبية بس من الاسماء.
وعد : تهقين عاد امك غيرت اسمها يوم صارت فرنسية.؟
نهى : لا تقولين امك.. وبعدين إذا غيرت جنسيتها جات على اسمها أكيد بتغيره يمكن صار جوليت والا جولي.
وعد : يمكن كل شيء جايز وبناتها بعد تلقينهن ماريا و الكسندرا و ولدها جون.
نهى سحبت الصينية تصب قهوة لها ولاختها : صح أكيد هاذي اسمائهم اجل فرنسيين.
وعد تأخذ الفنجال من يد نهى : ايه تلقينهم ما يتكلمون عربي.
أبو سعود : استحن على وجيهكن هاذي امكن.
وعد : أنا ما دليتها أم ولا اعرفها ولو تمشي من جنبي الحين ما اعرفها.. أنا احمد ربي كل شوي إن كلهم يقولون اني اشبه لك لو اني اشبه لها صار فيني شيء.
نهى شرقت : الادمية هاذيك قالت اني اشبه لها.
وعد : من جدك..! ويه الله يعينك على ما بلاك يا خيييه كانك كل ما شفتي وجهك بالمراية بتشوفين امك... عفواً اقصد إلا ويش اسمها نسيته.؟
نهى : مريم بنت محمد... ويش رايك اشوه وجهي والا اسوي عملية تجميل.؟
وعد : اممم الاختيار صعب صراحة.
منيره تهمس لام احمد : ويش فيهن كذا.؟
أم أحمد : والله ما ادري ياخيه.
منيره : شكلهن معصبات بس ما يبن يبينن.
أم أحمد : الاكيد انهن للحين زعلانات.
سعود : انتن صاحيات والا شاربات شيء اليوم.؟
وعد : احنا تونا صحينا تونا تونا.
سعود : مو باين هذا كلام بنات بكامل قواهن العقلية.
نهى : ليش ويش تبينا نقول إن شاء الله.؟
ميار : لو شفتوها ويش بتسون.؟
وعد : بنفرش الارض شوك ولا شفناها اقبلت غنينا هاللي بها الخافق يهلي.
نهى : بس شوك قليل.؟
سعود : اشك انكن تكلمن عن امكن كنكن تكلمن عن عدوتكن.
نهى : رجاءاً اللي ما هو عايش معنا الوضع لا يفتي من عنده ويسوي نفسه مثالي والموضوع عادي الواحد يتقبلة عادي أم تترك بناتها وحده عمرها سنتين والثانية بلفتها رمتها على أبوها هاذي اصلاً ما عندها قلب عندها حجر بدال قلبها.
أبو سعود : نهــــى وعــــد لا تقلن ادبكن أنا مقدر صدمتكن بس ادبكن لا تقلنه لا على امكن ولا غيرها تفهمن.
وعد : ما اقدر للاسف اللي تطلبه مني شيء مره كبير مثل كبر الموضوع اللي خبيته علينا ما اعرف إذا ما شفيت غليلي فيها ما راح ارتاح خاطري اشوفها بس عشان اتاكد إذا كان عندها قلب ينبض زي باقي البشر والا لا.. خاطري أعرف ويش مفهومها للامومة و يش تعرف عن الدين والحياة.
نهى : يا حليلك لك خاطر تشوفينها بس ناظريني تشوفينها.
وعد : ترى بسمعك كم كلمة على أساس انك هي لذلك اسحبي كلمتك احسن لك.
نهى : لا وفريها لوقت شوفتها اجل.
أبو سعود : ليش ناويات تشوفنها..؟
نهى : ما تدري يمكن تكتب لنا الاقدار إن نلتقي مثل ما كتبت لنا إننا ندري من الناس.
أبو سعود : متى ناويات تتركن طوالة اللسان ما تحسن اني معطيكن وجه.
وعد : معطينا وجه ..! ليش ويش سوينا عشان تكلمنا نبي نفرغ عن قهرنا واللي نحس فيه زعلت منا.. و حسيت نفسك معطينا وجه .. أنت مطنشنا ولا عبرتنا ولا فكرت تقولنا عن امنا. الناس كلها تدري مو بعيد كل اخواني يدرون واحنا مثل الاطرش بالزفة .. الحين تزعل منا و احنا مالنا حق نزعل منك.
نهى : من حقنا نعرف مو من حق الناس يعرفون احنا اللي من حقنا مو تعيشنا عند زوجتك وتقولنا هاذي امكم .. أنا احس اني مغفلة وغبية وتافهة مين ما يعرف امه إلا ابن الـحـ ـ ـ ـ ـ ـ ـ سكتت لان كلمتها قوية ولو قالتها بتنقتل على حسابها.
أبو سعود : ليش قايلكم اني ضافكن من الشارع ما انتن معترفات اني ابوكن وراء ما تبرن مني بعد.؟
وعد : لا تاخذ اسلوب الهجوم.. أنت غلطت باخفائك الموضوع علينا احنا من حقنا نعرف مين امنا مثل ما نعرف مين ابونا.. من حقنا نعرف ويش سبب طلاقكم من حقنا نعيش باسرة طبيعية بين أم و اب.
أبو سعود : سبب الطلاق امك.. وأنتِ عايشة باسرة طبيعية بين امك نوال و عندي.
وعد : ماهي امي .. خالتي..
أبو سعود : نادنها خالتي عادي اهم شيء ما تقللن من احترامكن لها.
نهى : ما احنا ناكرات جميل.. ولا احنا قليلات تربية.. بس نبي نفهم من حقنا نفهم منك ومن اللي تتسمى مريم.
أبو سعود : ويش تبيني اسوي اجيبها لك لحدك والا اكلم زوجها يجيبها.
وعد : لا تجيبها ولا نجيها هي ما بغتنا و احنا ما نبيها.
نهى : دامها ما نشدت علينا ما احنا ناشدين عليها.
أم سعود : يا امي ما يصير هاذي اميتكن والله اني اتمنى امي ترجع لهالدنيا لو ساعة ما اقوم من عند رجولها.
وعد : هذا لانها ما تخلت عنك يا خالة لكن لو تخلت ما راح تفكرين فيها إذا رمتك بلفتك ما فكرت مين بيرعاك ما راح تتمنين انك تسلمين عليها.
نهى : شلون طاوعها قلبها.
وعد : ما عندها قلب اصلاً عشان يطاوعها والا يعصاها.
..
..
: اخوانك برا طال عمرك.
استغرب وجودهم : خلهم يدخلون.
ثواني وادخلوا الاثنين سلم عليهم وجلسوا : خير أول مره تجوني الشركة مع بعض.
أبو عساف : دريت بالمصيبة الجديدة.
أبو سعود : أي مصيبة.؟
أبو عساف : شركة العائلة راح تنهار.
أبو سعود : ليش محتاجين سيولة والا شنو.؟
أبو عمر : يا ليتها على السيولة كنا دعمانها من شركاتنا بس الشركة بتموت موت نهائي على يد عامر بن سلامة.
أبو سعود بعصبية مكبوتة : هذا ما يتوب ما يترك حركاتة.؟
أبو عساف : راح ياخذ جميع الصفقات من الشركة و يدمرها .. هذا غير انه بدا ياخذ الموظفين اللي لهم سنين وفاهمين الشغل وعارفين داهاليزة.
أبو سعود : استغفر الله العظيم.
أبو عمر : عاد إلا هالشركة ما راح نسمح له يدمرها إلا شركة العيلة.
أبو سعود : يخسى يدمرها بتضل قايمة لين اخر يوم في حياتي.
أبو عساف : أنا اقول نبيعها خلاص ما عاد فيها رجا.
أبو سعود : نبيعه هو وشركاتة.
أبو عمر : أنت تدري من عامر بن سلامة عدوك اللدود شلون تبي تنهيه عامر ما ينتهي.
أبو سعود : و احنا بعد ما ننتهي.
ارتفعت صوت الطرقات على الباب وانفتح : طال عمرك لك ضيف برا.
أبو سعود : شايفني باجتماع مع اخواني تستقبل ضيوف ليش ..؟ عنده موعد.؟
: لا ما عنده.. بس هذا شخص مهم.؟
أبو سعود : مين هو.؟
بحده : أنا..
ناظروه الثلاثة مع بعض .. وقفوا الاصول اصول سلم عليهم وجلس : كنت متوقع انكم مجتمعين هنا.
أبو سعود : طول عمرك ذكي يا عامر.
عامر : بعض مما عندكم.. اعتقد تدرون إن نهاية شركتكم المشتركة بينكم على يدي.
أبو سعود : تبطي عظم.
أبو عساف : أنت ما مليت من هالاسلوب ترى طفشنا يا نقصفك يا تقصفنا.
أبو عبدالله : مليت بس لكل شيء ثمن .. الحرب بيننا ابتدت من الاراضي.
أبو سعود : وأنت تدري إن الاراضي ماهي لك ولا لك حق فيها.
أبو عبدالله : و الارض اللي ............... بعد ماهي لي.؟
أبو سعود : لا مين اللي شراها أنا ماهوب أنت حتى لو كانت مثل ما تزعم لك ما عندك عليها صك يعني هي لي.
أبو عمر : أبو سعود .. أبو عبدالله إلى متى بتجلسون تهاوشون بهالشكل.. إلى متى كل واحد فيكم يحاول ينهي الثاني من الدنيا متى ناوي تصالحون و تفكون انفسكم من هالمشاكل.
أبو عبدالله : وانا جاي عشان كذا.. عشان نتصالح ونصير اهل وحبايب وبيننا انفس.
أبو عساف : وضح قصدك.
أبو عبدالله : تبون ننهي كل ذا اللعب والكلام بشرط.
أبو عمر : اشرط.
أبو عبدالله : بنتكم وعد تكون حليلة لولدي عماد.
أبو سعود : هه ضحكتني يا شيخ هذا اللي ناقص اعطي بنتي لولدك.
أبو عبدالله : بنتك بتكون بالحفظ والصون وتصير حرمة ولدي ما احد يحكي فيها.. واللي ابيه من هالزواجة تهدأ النفوس بيننا.
أبو عساف : ويش معنى تخيرت وعد من بد البنات.؟
أبو عبدالله : عشان خالة عيالي مريم طلبت وعد و اظنكم تعرفون مين مريم.
أبو سعود : و أنت تحسبني مهبول اعطي بنتي لولدك لو نظل بحرب أنا وأنت كل العمر ما عطيتك اياها.
أبو عبدالله : لا تهور يا أبو سعود أنت تدري باللي بيني وبينك وبين اخوانك.. بنتك و ولدي هم الحل لكل هالمشاكل.
أبو عمر : حلك ماهوب منطقي يا أبو عبدالله احنا ما قد تصافينا معاك في شيء تبينا الحين نسلمكم بنتنا.؟
أبو عبدالله وقف : بنتكم بنتنا و اظن خابرين هالشيء .. أنا ابيها حليلة لولدي على سنة الله و رسولة وما طلبت شيء ثاني..
أبو عبدالرحمن : بس البنت مخطوبة.
أبو عبدالله : عندي علم و أنا اكلم سلطان بن منصور و اخذ موافقتة وبكذا ما احد له حق.
أبو سعود : لا تسوي شيء ما أنت قده إلا بنتي يا عامر والله ما ارحمك لا أنت ولا ولدك.
أبو عبدالله : قلت لك بنتك بتكون بالحفظ والصون .. و اخر كلامي لا تنسون إن حياتكم بيدي عندي اوراق ممكن توديكم انتم وشركاتكم وراء الشمس و تفضحكم بين العرب.
وقف أبو سعود بعصبية : تهددنا.؟!
أبو عبدالله : ما اهددكم بس أنت تخبر ويش صار من سنين تذكر شركة بن حمد ويش اللي صار ايامه وكيف نهبتوها أنت و اخوانك.
أبو سعود : كذاب و ستين كذاب أنت تدري إننا شريناها منه.
أبو عبدالله : ايه ادري انكم شريتوها منه و عندي اوراق تثبت انكم سرقتوها هذا غير الشيكات اللي بقيمة 100 مليون عليكم.
أبو عبدالرحمن : ناوي تلوي ذراعنا باوراق كذابة.؟
أبو عبدالله : ما قلت كذا.. قلت لكم اللي ابيه تبوني اسلمكم كل شيء بنتكم تكون حليلة لولدي ونهاية الاسبوع ملكتهم .. فمان الله يا عيال مساعد.. و طلع.
أبو سعود : يخسي و يعقب.
أبو عمر : 100 مليون ماهو هين المبلغ.
أبو عبدالرحمن : و أنت تدري إن الشيكات كلها كذب و سددناها من سنين.
أبو عمر : بس عنده عنده يا عبدالرحمن ما خذيناها من ولد حمد وطاحت بيد عامر و عامر لا قال نفذ.
أبو سعود : إلا في بنتي إلا وعد.
أبو عمر : هذا غير الشركة لو اشهر اوراقه اللي عنده بتطيح الشركات حقتنا كلها ولا عاد احد بيلفي علينا.
أبو عبدالرحمن : بس هو يدري انه كذب ما سرقنا شركة ولد حمد.
أبو عمر : ايه يدري بس ما يهمه يقدم الاوراق عشان ينهينا من قدامه حتى لو كانت الاوراق كذب.. ومع وجود الشيكات علينا الكل بيصدق إننا سرقنا الشركة عشان نتخلص من الشيكات.
أبو سعود : ويش تبي توصله اعطيه بنتي.؟
أبو عمر : لا .. بس لازم نفكر بحل للمشكلة لان عامر راسة و الف سيف دامه قرر بيصير اللي براسة يا ينهينا يا ياخذ وعد لولده.
..
..
جود : تكفون خلونا نسوي رفرش لنفسياتنا ويش ذا ما كأننا باجازة.
دانه : ويش تبينا نسوي.؟
جود : قبل ما اقول ويش نسوي.. السيد عساف ما حدد الملكة للحين.؟
ندى بضيقة من ذا السيرة الغليظة : إن شاء الله ما يحددها.
ميار : ليش بالعكس حلوه فترة الملكة تتعرفون على بعض.
سها : مين يتعرفون..؟ عساف يعرف ندى وندى تعرف عساف.
ميار : لا ما تعرفه تعرفين ويش يحب ويش يكره اكلاته المفضلة الالوان اللي يحبها يعني اشياء كذا.
جود : يلعن أبو السخافة ويش ذا بكلمه اقوله حبيبي ويش تحب تاكل اصلا احس عساف يكره كل شيء حتى الالوان ما يحب إلا الابيض والاسود وبس.
دانه : عيب احترمي انه بيصير زوج اختك.
جود : بيصير زوج اختي هو ولد عمي قبل لا يصير زوج اختي بس صراحة معققققد درجة اولى.
ميار : ليش طيب.؟
جود : ما ادري عنه ما اعرف شلون عايش حياتة.
ندى : ممكن تسكرون ذا السيرة.!
جود : المفروض تفرحين جايبين سيرة البطل المغوار عساف بن عبدالرحمن.
ندى : جود كبري عقلك شوي ويش ذا متى بتكبرين و الا زي اختك مستحيل تكبرين.؟
جود : أي اخت فيهم.؟
ندى : مين غير وعد يعني.؟
جود : يا حي هالطاري هالبنت هي الوحيدة اللي تفهمني.
رمت نفسها على السرير بينهم : أكيد تقصديني.
جود : وفيه افهم واعقل و اجمل منك يا جميل.
وعد : لا ما فيه.
دانه : كيف نهاوي.؟
وعد : كيف تتوقعين بتكون وحده زعلانة من أمها وابوها ويش بتكون حالتها. على انها باردة ما توقعت الموضوع يأثر عليها هالكثر.
ندى : اشوفك جالسة بوسطنا ما قفلتي على نفسك مثلها والا ما تحسين.
وعد : قفلت على نفسي والا طلعت. الحقيقة ما يتغير منها شيء بنضل بنات اللي يقولون عنها مريم بنت محمد ما راح اكدر نفسي على حساب وحده ما عبرتني ولا اعتبرتني في حياتها شيء مهم وانا مريضة قلب ما لازم ازعل لازم اداري على خاطري دام ما احد همه خاطري. وانا زعلانة من بابا وبس لانها خبى علينا اما هي ما تعني لي شيء.
ندى : طول عمرك عديمة احساس مو شيء جديد عليك.
وعد : خليت لك الاحاسيس والمشاعر الجياشة.
ندى : قليلة ادب.
وعد : بعض مما عندكم.
دانه : صلوا على النبي ما تملون نقار انتم.
ندى : كلميها هي قليلة الادب ما تستحي على وجهها.
وعد : هووووه علينا ندى ترى ماني رايقة اتهاوش معاك و توصل السالفة لبابا.
ندى : خوفتيني أنا ابيها توصله خليه يشوف بنته اللي واثق فيها المحترمة ويش تسوي من وراه ما الوم صلاح يومه يلاحقك لو ما شاف منك شيء ما لاحقك.
وعد بعصبية : لا عاد زودتيها حيل يا ندى حيل قسما إن ما لميتي لسانك لا اقصه لك.
ندى : تعالي قصية يا بنت أبوي.
وعد تحاول تمسك اعصابها : شوفي ما ابي اتهاوش معاك لانك الكبيرة.
ندى : لا ماشاء الله تعرفين الادب والاحترام.
ميار : ندى خلاص الله يهديك ويش لازمة هالكلام.
ندى : هي تدري ويش لازمتة اللي جالسة تكلم شاب من وراء اهلها وحتى لو كان يقرب لها ما ينقال لها إلا قليلة ادب.
وعد وقفت وصرخت : أنا اكلم شباب أنا يا ندى تقولين لي هالكلام.
ندى : لا بنت الجيران.. ايه انتِ أنا شفتك بعيوني واقفة من كم سنة ولا نسيتها لك.
وعد : يا عل عيونك البط إن شاء الله قسماً بايات الله لا أدبك ولا بيهمني انتِ الكبيرة والا الصغيرة ما راح يهمني لا بابا ولا غيره.
ندى : عادي مو شيء جديد عليك قلة الادب.
وعد في محاولة لكبت نفسها من الانفجار ممكن توصل لضرب ندى : واحد .. اثنين .. ثلاثة .. اربعة.. خمسة .. كلامك مردود عليك ما راح ارد عليك بس صدقيني إن تكلمتي علي مره ثانية بهالشكل بوصلها للشيطان الرجيم و لا راح يهمني أي مخلوق بالدنيا.. طلعت من الغرفة ما تشوف قدامها من العصبية.
دانه : ليش قلتِ لها كذا يا ندى.؟
ندى : عشان تعرف إن فيه احد يعرف ماضيها وحاضرها قليلة الادب.
دانه : ويش يعرف ويش تقصدين بكلامك.
ندى : بكره تطلع الشمس وتملى البلاد.
: السلام عليكم.
: وعليكم السلام.
جلست معاهن : ماشاء الله سهرانات.
دانه : ايه يا خالة اجازة ما ورانا شيء.
منيره : طيب ليش ما تستغلون الاجازة بشيء يسلي يعني أكيد تطفشون من الروتين نومة واكل خلونا نسوي شيء قبل رمضان ويش رايكم.؟
ميار : شيء زي ايش.
جود : أنا ما احب المثالية و اسوي نفسي اني اسوي كل شيء مفيد بالحياة واستغلة نو نو ما احب الاشياء اللي كذا.
منيره : بالعكس شيء يكون في صالحك حرام تضيعين وقتك على اشياء ما تفيدك لا دنيوياً ولا اخروياً.
جود : هوووهوووه علينا رجاءاً حصص دين ما نبي نعرف الدين وكل شيء بس خلاص عاد.
منيره : ليش ما تبين تسوين شيء لاخرتك.؟
جود تربعت : ويش وراء هالاسئلة السخيفة.؟
دانه : جووود عيب.
منيره : خليها عادي أنا مقدرة انكم للحين ما انتم متقبليني.
ندى : بابا ما اعطاهن العين الحمراء للحين والا علمهن شلون يردن.
جود : اشوفك حولتي علينا هانم ندى.؟
ندى : من وين بتجيبين الاحترام وانتِ تمشين وراء وعد.؟
جود : رجعنا لطاري وعد ويش هي مسببة لك وعد سارقة حلالك.؟
جود : وبعدين ليش ما تكلمين عليها إن كانت موجودة والا ما تعرفين تكلمين إلا من وراها.
ندى : قصدك اني اخاف منها هذا اللي ناقصني ما عاد إلا هي اخاف من وعيد.
منيره : ما عليش يا بنات اهدوو شوي الهوشات والاختلافات لازمة في الحياة وتغير الروتين بس عاد مو كذا.. وبعدين خلونا نتكلم بشيء مفيد.
ميار : شيء مفيد زي ايش.؟
منيره : ويش رايكم نسوي لنا جدول فيه بازر مسوينه في ..... خلونا يوم نروح له.؟ و ممكن نشترك في دورة مع بعض عادي أنا بشترك معاكم.. وممكن احنا مع بعض نسوي شيء خيري.. او ندخل تحفيظ او احنا مع بعض نسوي لنا حلقة تحفيظ ونسمع لبعض ايش رايكم..
دانه : ايه نسوي حلقة من جد خاطري احفظ القرآن.
ندى : أنا ما عندي مانع.
سها : اوكك بس خلال هالاسبوعين قبل رمضان يعني.؟
منيره : لاا التحفيظ بنكمله حتى برمضان نخليه بوقت العصر ما اتوقع انكن تدخلن المطبخ مو.؟ او بعد الفجر.؟
جود : أنا بدخل بالتحفيظ بس عشان الاجر.
منيره : الله يكتبه لنا اجمعين يارب.
ميار : طيب وغيره.؟
منيره : ممكن قبل رمضان نروح البازار و نحضر دورات تفيدنا بالحياة يعني فيه مؤسسة مسوين دورات حاليا عن ادارة الوقت و التعامل مع المشكلات و تطوير الذات و ممكن ندخلها كلها بس لازم نحجز قبل إذا موافقين اكلمهم بكره واحجز لنا ايش رايكم.
ميار : دااادي يمكن ما يوافق.
منيره : ابوكم علي أنا اكلمه وما راح يرفض إن شافنا مقضينة بشيء مفيد.
سها : اوكِ اجل كلنا ما عندنا مانع.
منيره : طيب بقي نهى و وعد تتوقعون يجون معنا.؟
دانه : ما ادري.
منيره : يمكن وعد ما توافق لان القسطرة بكره الله يقومها بالسلامة.
: آميــــــن..
..
..
بعصبية : ويش اللي اتزوجها يبه ويش شايفني بزر تغصبني.
أبو عبدالله : ما قلت انك بزر شواربك شيبت وأنت للحين ما تبي تزوج اخوانك اللي اصغر منك عيلوا وأنت للحين على خبري.
عماد : ما جيتك و رجيتك تزوجني.
عبدالله : عماد إلى متى بتظل تذكرها البنت راحت بحال سبيلها ما بغتك خلاص.
أبو عبدالله : بنت ابراهيم بتنسيك اياها.
عماد باستهزأ : واثقين اني بوافق عليها.
أبو عبدالله : خل أبوها يوافق عليك أول شيء.
عبدالله : يبه ما لقيت غير بنته عاد غير بنت ابراهيم بن مساعد البنات على قفا من يشيل.
أبو عبدالله : وانا ابي بنته حليلة لاخوك.
عهود : يبه والله انها تنرفز وشايفة نفسها.
عماد : بعد قولي شينة و تلوع الكبد.
عهود : لا بالله ما حزرت بذي تطيح الطير من السماء ماشاء الله.
أبو عبدالله : لو انها شينة أنا ابيها في بيتي.
عماد : ليش ما تزوجها لمحمد.؟
محمد : لا يا حبيبي قبل ما تزوج أنت ماني متزوج.
أبو عبدالله : على فكرة لا تزوجتها خلها تحمل على طول يا ويلك إن خليتها تاخذ موانع.
عماد يجلس بقهر : يبه ويش ذا .؟ ابي افهم ويش بتسفيد إن اخذت بنت ابراهيم بن مساعد وليش اخترتني أنا.
أبو عبدالله : ليش تاخذها عشان اقهر أبوها فيها ابيه ينقهر إن تهاوشنا على اراضي عادي قهر يوم شهر و يروح مو مثل ضنى..
عماد : تبيني اقهره ببنته ويش ذا الظلم يبه.؟
أبو عبدالله : ما قلت لك عاملها معاملة شينة بس انه يعطي بنته لولد عدوه هاذي بتقهره كل حياته.
ناصر : يبه ما تحس إن اللي تسويه غلط إن كان بينكم مشاكل بالسوق بنته مالها ذنب.
أبو عبدالله : ذنبها انه بنته وبعدين أنا بضفها واخلي ولدي يستر عليها ماقلت بعذبها.
عماد : شلون جات هالفكرة في بالك.. وليش هي اللي اخرتها ما عنده إلا بنت وحده.؟
أبو عبدالله : جات في بالي عشاني فكرت فيها.. وليش اخترتها لكذا السبب.. واحد انها تهاوشت مع اختك تدافع عن أبوها.. اثنين عشان مره أبوها تعزوى فيها عندي و عرفت انها تعني له الكثير .. ثلاثة هي انسب بناتة لك..
ناصر : وأنت ويش عرفك ببناتة.؟
أبو عبدالله : اعرفهن.. و السبب الاخير انها بنت عمتكم مريم هي و وحده من خواتها.
عبدالله : من جدك يبه.؟ عمتي مريم عاد كانت زوجته.؟
أبو عبدالله : ايه عمتك مريم كانت زوجته و جابت منه بنتين.
هنادي : عمرك ما جبت طاريهن يعني أنت خالهن.
أبو عبدالله : خالهن بس ابوهن ابراهيم بن مساعد.
عماد : وليش حددت لي هاذي.؟ ليش ماهو أختها.؟
أبو عبدالله : عشان الثانية معطينها لولد عمها من سنين مالك إلا وعد.
عماد : يبه ويش لي بالزواج أنا ما اتخيل نفسي مره بغرفتي لو اخذتها بظلمها معاي.
أبو عبدالله : ما راح تظلمها.. إلى متى بتفكر ب أنهار ما مليت منها المره جابت بدل الولد اثنين وان جالس على ذكراها .. بتأخذ وعد يا عماد غصباً عليك وعليها وعلى أبوها.
عبدالله : الله يهديك يبه كنك ضامن انهم بيعطونا اياها.
ابوعبدالله ابتسم : بيرضون ولو مو بالطيب بالغصب والله لا تكون حليلتك يوم الخميس غصباً عن الكل.
عماد : انسى اني تزوجها الحين.
أبو عبد الله : لا صار بكيفك وقتها احكي.. تزوجها بأقرب فرصة قلت لك ابيها عندي.
عماد : يبه ابي افهم ليش مصر عليها ابي اعرف ويش اللي بينك وبين ابراهيم عشان تبي تأخذ منه بنته.
أبو عبدالله : ما بيني وبينه إلا ضربات شغل.
عماد : ماني مصدق.
أبو عبدالله : عمرك ما صدقت .. وعد ابيها في بيتي.
عماد : لو ما أنت متزوج اربعة يمديك اخذتها.
أبو عبدالله : تهبى .. اخذ وحده كبر بناتي.
عهود : يبه تراها شرانية يعني لسانها طووووويل.
عماد : بس هذا اللي ناقص .. يمه انتِ داعية علي.
أم ناصر: ويش ادعي عليك يمه..
عماد : ما ادري كانكم بتبلوني بوحده لسانها طويل.
عهود : قصه لها.
يوسف : يالله عشان يصير لك اكشن بحياتك تغير الروتين يكون فيه احد تهاوش معاه.
عماد : لا يا شيخ عشان اصبحها بطراق و امسيها بطراق.
أبو عبدالله : عشان اكسر يدك قبل لا ابراهيم يكسرها لك.
..
..

لا اله الا انت سبحانك اني كنت من الظالمين..

لا أحلل نقل الرواية دون ذكر اسمي..

ضحكة قهر.