لو سألتي الورد وهو ما بين ايدك اقطعك للكاتبة ضحكة قهر

البارت الخامس

مدخل:/ انتظار .. صبر .
وسهرر.. شوق .
وشقا , ونفحه قهرر انتظار..
وتمضي الساعه على العاشق شهرر ..
وانت وينك ؟ او متى يصحى حنينك !

أبو عساف يهمس لأخوه : خلصت عدتها.
أبو سعود مبتسم : من جدك.
أبو عساف : ايه قضت من اسبوعين.
أبو سعود : ما دريت إن زوجها توفى طيب عندها غير الولدين اللي جابتهم.؟
أبو عساف : لا ما عندها.
أبو سعود : إن شاء الله خير.
أبو عساف : ناوي.؟
أبو سعود : ههههههههههههههه نقول يارب.
أبو عساف : وعيالك.؟
أبو سعود : ماني ماخذ راي احد فيهم.
أبو عساف : لا يا اخوي لا تزعلهم.
أبو سعود : عيالي ما اتوقع يرفضون لكن بناتي هن اللي جازم ما يرضن بس مالي إلا اللي براسي.
ابو عساف : فكر بالموضوع طيب على طول قررت.
أبو عبدالرحمن : ويش عندكم تهامسون أنت واياه.
أبو سعود : ابد يبه بس اكلم عبدالرحمن ناوي اخذ الرابعة إن شاء الله.
أم عبدالرحمن : ما أنت صاحي عندك ثلاث حريم كل وحده تقول الزين عندي و عندك عيال وراه تاخذ الرابعة.؟
أبو سعود : ابيها يمه كان المفروض تكون لي من زمان.
أبو عبدالرحمن : مين تقصد.؟
أبو سعود : منيره.
أبو عبدالرحمن : للحين تبيها.؟
أبو سعود : ولين بكره ابيك تخطبها لي يبه.
أم عبدالرحمن : وعيالك يا يمه وحريمك والله يزعلن.
أبو سعود : ما راح يزعلن حريمي لا درن انها منيره ما غيرها.
أم عساف : و تتوقع انها توافق.؟
أبو سعود : إذا ربي كتب لنا نصيب ايه بتوافق.
عساف : من كلامك يا عمي كنك خاطبها قبل.
أبو سعود : ايه خطبتها من 35 سنة بس ما صار نصيب وقتها.
يزيد : والحين بعد كل هالعمر تبي تأخذها ليش هي ما تزوجت.؟
أبو سعود : إلا تزوجت و ترملت.
عساف : وعيالها والا ما عندها .؟
أبو سعود : عيالها كبار يشيلون انفسهم.
عساف : والله ما اتوقع عيالها يرضون إن امهم تزوج بعد أبوهم.
أبو سعود : إن شاء الله بيرضون .. يمه كلمي أمها.
يزيد : شكل قلبك معاها من سنين يا عمي.
ابتسم أبو سعود : لا قلبي معاي لا تخاف على عمك.
أم عبدالرحمن : أول شيء حريمك إن كانن موافقات اخطبها لك وان ما وافقن والله ما اعتب الباب ولا اتدخل بزواجتك.
أبو سعود : يمه الله يهديك أنا ولدك ترديني.
أم عبدالرحمن : ايه اردك إن هاذي سواياك قلت لك جيب لي رضاهن وانا اوقف معاك.
أبو عبدالرحمن : امك معاها حق اهم شيء يوافقن يا أبوي ماهو معقول بتزعلهن بعد كل هالسنين ما قصرن معاك قامن فيك وجابن لك العيال والبنات وملن عليك البيت والحين تجحدهن على حساب مره.
أبو سعود : ماني جاحدهن يبه ولاني مفضل منيره عليهن كلهن فوق راسي ولاني مسوي شيء لمنيره ما سويته لهن حتى مهرها بيكون مثلهن ما يزيد عليهن ريال واحد بعدل بينهم يا يبه ماني مقصر على احد فيهن ولا على عيالهن اللي هم عيالي.
أم عساف : وبناتك بنات نوال بيوافقن تعرف امهن الثالثة والله ما اتوقع يرضن.
عساف : اووووه والله غير يقلبن البيت فوق تحت.
أبو عبدالرحمن : مالهن حق يرفضن ابدا ابوهن شوره بيده ماهو بيدهن.
عبير : حتى لو يبه والله لا يصير فيهن شيء من وراء هالزواجة ما فيه بنت بالدنيا ترضى أبوها يتزوج على أمها.
عساف : بس عمي متزوج وقاضي من سنين يعني جات على الرابعة.
عبير : بس امهن الاخيرة و إن رضن ندى ونهى .. اما وعد وسها مستحيل يرضن.
أم عبدالرحمن : إن امهاتهن وافقن مالهن دخل.
عبير : ليش ماهو ابوهن.
أبو عساف : اجل لو اتزوج أنا ويش تسوين.؟
عبير : بذبحك قبل ليلة عرسك.
عساف : بنـــــت.
عبير : اجل تجيب لنا حرمة تقعد معنا وتجيب منها عيال لا والله ما ارضى.
عساف : وانتِ ويش دخلك.؟
عبير : أبوي وكيفي.
عساف : شكلك مشتهية تنضربين.
أبو عساف : ويش بلاك انتِ اشتطيت خلها على راحتها أنا وبنتي كيفنا.
عساف : يعجبك تقول هالكلام يبه عيب المفروض تستحي.
عبير : استحي إلا إن أبوي يتزوج على امي واسكت يعني أنت ترضى يتزوج علي امي.؟
عساف : إذا امي موافقة عادي.
عبير : لا مو عادي.
أبو عبدالرحمن : لا تخافين ماهو أبوك اللي بيتزوج عمك اللي انهبل وبيأخذ الرابعة.
أبو سعود : يبه الله يهديك حقي الشرع محلل اربع وانا ما تخطيت حدودة.
..
..
على طاولة الأكل.
ميار : ما تخيلون كيف ناشبة لي عقدتني في حياتي.
نهى : أنتِ متعبة نفسك معها طنشيها ولا تعطينها وجه.
ميار : اقولك ما ترحم ما ترحم اخاف تخسفني بالدرجات والا تعطيني مقبول.
وعد : إذا اعطتك مقبول تقدرين تعيدين المادة فيه نظام بالجامعة يسمح لك باعادة المادة اللي اخذتِ فيها مقبول بس يبي لك مرمطة على ما تنضاف لك.
ميار : واذا اعطتني فوق السبعين.
وعد : لا هالكلام ينطبق بس ع المقبول.
جود : ما عندك سالفة تعيدين مادة كارفة فيها.
وليد : لك خلق شقا.
ميار : اهم شي ما اشوف درجة مقبول ب كشف درجاتي.
مشعل : موسوسة.
وليد : عادي ما فيها شيء بالعكس اهم شيء عديتي في المادة.
ميار : ما علي وعد متأكدة من هالكلام يعني جربتيه من قبل.
ياسر : هههههههه ما تعرفين وعد ادفر منها ما فيه مصطفى النسخة البناتية.
وعد : قل اعوذ برب الفلق... شوفي أنا ما جربته وحده من زميلاتي بالاسلامي عادت مادة من المستوى الأول وهي كانت بأخر مستوى و جابت فيها امتياز لما عادتها من بعد المقبول بس أنتِ مو تروحين تقدمين طلب وتوقعين بنفس الدكتورة وكنك يا أبو زيد ما غزيت.
أم احمد : ويش ذا التعقيد بالدراسة.
ندى : هاذي انظمة الجامعة بس سالفة اعادة مادة أول مره اسمعها بصراحة ما عمري سمعت بنت عادت مادة ناجحة فيها.
نهى : ولا أنا أول مره ادري عن ذا النظام.
خالد : حتى أنا أول مره اعرف.
وعد : والله هذا اللي لقيته بالدليل الارشادي للطلاب.
مشعل : وأنتِ عندك وقت تقرين الدليل من جدك.
وعد : ايه طبعا لازم اعرف كل شيء قبل لا ادخل فيه واخذ حقوقي من الجامعة على اكمل وجه دام عندي احقية لاعادة مادة فشلت فيها ليش احرم نفسي واشوه كشف درجاتي بدرجة مخيسة.
وليد : يا حليلك المقبول تعتبرينه شوه أنا اشوفه امتياز مع مرتبة الشرف.
أحمد : والله معنية نفسك مادة ماهي مأثرة على المعدل.
وعد : هذا وأنت دكتور مالت عليك وعلى دكترك بدل ما تشجعهم على التفوق.
ميار : ما ادري حتى أنا احس مستحيل يخلوني اعيد مادة نجحت فيها.
وعد : اللي يسمعكم يقول جبت هالكلام من راسي ما أنتِ مصدقة اقري الدليل وعشان تأكدين أكثر روحي اسالي الوكيلة هي بتكون على دراية بالانظمة اكثر من أي احد ثاني.
ندى : وليش مو العميدة.
وعد : تلاقينها لاهية باجتماعات وكذا واذا لقيتي فرصة تكلمينها لا تقصرين كلميها وخشي بعيونها بعد.
مشعل : اللي ودي اعرفه صدق على مين طالعة بدفرنتك هاذي.
وعد : ولازم اطلع على احد يعني إذا قدَرت ايش يعني دراسة وشهادة ومستقبل وطموح وايش بيضيف لك تخرجك وقت تصير غصب دافور.
خالد : أنا مقدِر ويش يعني دراسة وكل اللي قلتيه بس عاد ماني دافور هالكثر.
وعد : شوف عزيزي خالد أنت تعتبر نفسك دافور عشانك تأدي بحوثك و تذاكر قبل الاختبارات باسبوع بس هذا الاغلبية يسويه ولا يعتبر دفرنه.
ميار : والله شكل حالتك صعبة.
دانه : بقوووه صعبة ما تشوفينها يوم تذاكر اصلا تعتزل العالم جوالها مقفل ولا تطلع من غرفتها كلللش.
نهى : تعذيب ماهو مذاكرة.
جود : صدق والله هذا تعذيب للذات كأنهم معلقين حياتك بهالشهادة.
سها : عاد صدق صدق وعد ويش استفدتي من دفرنتك.
وعد : ارضيت نفسي عشان ما الومها لا جاء يوم وحسيت اني مقصرة.
ميار : بس أنتِ جالسة بالبيت الحين يعني لا شغلة ولا مشغلة يعني ما راح تلومين نفسك.
وعد : ما تدرين يمكن اتوظف بكره بوظيفة تحتاج معدل عالي والا المفاضلة تكون بالمعدلات و انرد على حساب معدل خايس لا يا حبيتي ما احب احمل نفسي أي تقصير بحقها.
نهى : ما عليكم معقدة تحتاج علاج نفسي.
مشعل : أول مره تقولين كلمة اوافقك فيها معقدة معقدة معقدة.
وعد : والله أنا كذا احب كل شيء كامل بحق ذاتي.
أم ندى : قولوا ما شاء الله لا تصكون بنتي بعين.
وعد : والله جبتيها أنا اقول ليش بابا ماهو راضي على دراستي اثاريها من عيونهم.
نهى : ماشاء الله ما شاء الله ما شاء الله عشان ترتاحين.
أم سعود : ايش فيك يا ابوي ما نطقت من لما جلسنا.
سعود : متضايق شوي بالشغل.
سها : الحمد لله .. سفرة دايمة.
أبو سعود : بالعافية.
ياسر : متى بيسافر عمر.؟
سعود : طيارته بعد ساعة.
أحمد : بتوصلة المطار.
سعود : لا عساف بيوصله.
جود : ليش عساف يسهر لساعة 12 .
سعود : نـــعـــم..
جود : صدق والله احسه شايب ينام بعد صلاة العشاء.
سعود : شايب هاه.
أم سعود : هو ماهو كبير مره عن سعود.
أبو سعود : ايه بينهم اربع سنين.
ميار : يعني يمه أنتِ تعتبرين سعود شايب معناته حتى عساف.
ياسر : والله انه شيخ الشباب الله يكتب له الخير مع ندى.
وعد وقفت : الحمد لله .. سفرة دايمة.
أبو سعود : بالعافية .. ايش فيك اليوم شكلك تعبانة.
وعد : ما فيني شي بس تعب المعهد.. الحين بنام و أرتاح.
سعود : انتظري لا تنامين ابي اكلمك.
وعد تدري ويش بيكلمها فيه هالايام مفتح عينه عليها من شاف السيارة وهو كل يوم يجيبها من المعهد : ما يتأجل الموضوع ماني رايقة.
سعود وقف : لا ما يتأجل. .. طلعت و طلع وراها دايركت.
بغرفة وعد وقف على الشباك وشاف السيارة: هاه يا وعد ما أنتِ قايلة لي شيء.
وعد : أنت اللي طلبت تكلمني مو أنا.
سعود التفت لها واشر بيده على الشباك : مين هذا.؟
وعد : مين تقصد.؟
سعود : أنتِ عارفة مين اقصد اللي واقف معاك عند باب المعهد واللي لحقنا من المعهد للبيت رحت الدوام ورجعت وهو للحين مكانة وسبحان الله واقف قدام شباكك وكل ما رحت الدوام والا رجعت شفته وما يروح إلا بعد الساعة 11.
وعد : تشك فيني يا سعود.
سعود : ما أشك فيك بس هذا اللي ينشاف قولي لي مين هذا.
وعد : وانا ايش عرفني مين هذا.
سعود بصراخ : أنا شفتك بعيوني تكلمينه تبيني اكذب عيوني واصدقك.
وعد بحده : قلت لك ما أعرفه ولو أعرفه بقولها بوجهك ولا يهمني.
سعود مسك وعد من يدها بقوه : وعد قسماً بالله لو ما قلتي لي من هو لا اتصرف معاك بطريقة ثانية.
..
نهى : غريبة أول مره سعود يطلب يكلم وعد العادة يتهاوشون قدام الكل.
ميار : يمكن مو هواش . يمكن بيكلمها بموضوع ما.
جود : يمكن يبيها بسالفة عمر.
ندى : بس وعد قررت و خلصت ولا راح ترجع برايها اللي براسها تسويه.
نهى : صح بس يمكن بينصحها وكذا.
فجأة سمعوا صوت صراخهم .
أم ندى : خير إن شاء الله. هذا مو صوت سعود.؟
أحمد وقف : إلا بروح اشوفهم.
أبو سعود : أحمد.
أحمد : نعم.
أبو سعود : إجلس أنت واخوانك خلهم يكملون هوشتهم.
خالد : يبه اخاف سعود يفقد اعصابة ويضربها.
أبو سعود : قلت اجلسوا.
مشعل : غريبة عليك يبه العادة ما ترضى بالهواش.
أبو سعود مبتسم : مروق اليوم بخليهم على راحتهم.
جود : بسم الله عليك يبه الله لا يضرك إن شاء الله دوم.
نزل سعود مسرع على الدرج بيطلع برا البيت والعصبية واضحة على ملامحة.
نهى : بسم الله بركان طلع من بيتنا.
سها : بروح اشوف وعد لا يكون مسوي فيها شي.
قامن البنات كلهن لاختهن افتحوا الباب وشافوها جالسة على السرير ماسكة يدها.
وعد : خير.!
ناظرن ببعضهن اردفت جود : جينا نتطمن عليك من البركان اللي طلع.
وعد : مثل ما أنتِ شايفة بخير .
ندى : ايش فيه سعود معصب..؟
وعد : اساليه لا تسـأليني وبعدين يلا اطلعوا ماني فايقة لكم.
طلعوا كلهم وصكوا الباب.
ندى : سها أنتِ أكيد تعرفين ويش السبب.
سها : ليش قالوا لك كنت معاهم يوم تهاوشوا.
ندى : لا بس ويش الشي اللي مخبيته وعد عننا وخايفة منه أكيد عرفه سعود وهو اللي خلاه معصب.
سها تقدمتهم : ما ادري.
..
..
..العشا..
جالسين يتقهون.
سعود و وعد يتبادلون النظرات النارية اللي ما خفت على احد.
سها : وعد ويش فيه سعود عليك.
وعد : قومي وبعدين ناديني و اقولك.
سها : طيب.
وعد : بابا ما ابي اروح المعهد بكره.
أبو سعود : ليش سنيورة وعد.
وعد : راسي مصدع من الحين.
أبو سعود : خذي بنادول ونامي وبيروح الصداع.
نهى : اهنيك اختي على غبائك أول على بالي بس أنا اللي مخي متنك بس طلع حتى أنتِ بالله هذا عذر ينقال لغياب بكره.
ميار : شكله من كثر الدفرنة ما عادت تثبت.
وعد ما عاد إلا هي نهى الداجة تقولي غبية ما تدري اني بس بفتح سالفة عشان سها تقوم.
نهى : ليش تناظريني كذا.
وعد : صدمتيني بصراحة قلبي الصغير لا يتحمل.
نهى : ما عليه يا خيتي لازم تواجهين المشكلة.
وعد : علميني تكفين كيف تكيفتي مع غباءك.
سها : وعد تعالي ابيك؟
نهى : انتن ويش عندكن مع بعض.
وعد : يا لقفك. وقفت ولحقت سها للحديقة.
جود : أبوي متأكد إن وعد وسها ماهن توأم.؟
أبو سعود : لا تصدقين شاك بعقلي. ويش رايك يا أم ندى.
أم ندى ابتسمت : حاشاك بس هن طول الوقت مع بعضهن رغم يومهن صغار بس يتناقرن حتى وعد كانت مصفقة سها بس عاد سبحان الله.
ياسر : تذكرون يوم سها لعبت بشعر وعد بالمقص ووعد نايمة.
: ههههههههههههههههههههههههههههههه.
أحمد: والا وعد يوم اعطت سها دواء يقالهم يلعبون بغت تذبحها.
ميار : شكل حياتهم كانت حفلة.
ندى : كانوا 24 ساعة هواش.
أم سعود : الطردة قرده.
خالد : عاد الحين غير كلش, طول الوقت مع بعض على إن عمر وعد اقرب لها نهى لكنها قريبه من سها اكثر.
نهى : توافق نفسي أنا و وعد ما نتوافق هي حارة وانا باردة لو فيه شيء بنسويه مع بعض تعصب علي, اخر شيء هي تسوي كل شيء.
وليد : زين معترفة ببرودك.
أم ندى : ما أقول غير الله يعين فيصل.
نهى لفت وجهها ما تبي احد يجيب طاريه.
ميار : مين فيصل.؟
جود : هذا ولد عمي سعد خاطب الست نهى من زمان.
ميار : افا ما علمتيني يا نهى هذا وانا اختك.
نهى : ما فيه شيء اقوله كله كلام اصلا.
ياسر : وجيتهم عندنا جدي وعمي وعياله والخطبة اللي صارت ماهي مالية عينك.
نهى : لا ماهي ماليه عيني كيفي.
سعود : لا بالله انهبلتي ويش اللي يملى عينك اجل ماهو أنتِ اللي رفضتي تروحين معاه.
نهى : ما ابي اسافر معاه أنا حره.
خالد : نهى دامك وافقتِ عليه أنتِ لازم تراعينه بكل شيء ويوم قال بأخذك المفروض ما رفضتي.
نهى : خالد رجاءا ما ابي احد يكلمني بالموضوع.
..
سها : خير وعد ويش فيك.
وعد : سعود درى بالزفت اللي واقف برا.
سها مصدومة : اوووفف ويش دراه.
وعد: الزفت وقف يكلمني بالشارع الكل راح من المعهد إلا أنا ملطوعة بالشارع تخيلي واقف يكلمني.
سها فاتحة عيونها على الاخير: وأنتِ كلمتية.
وعد : هددني لو ما رديت عليه بينزل من السيارة وانا خفت الشارع شبه فاضي لو سحبني وركبني السيارة ما احد داري.
سها : طيب ليش ما تعذرتي باي شي لسعود ليه ما كذبتي أي كذبة.
وعد : شلون اكذب والحمار اللي برا لاحقنا للبيت وسعود شافة ولا راح سعود الدوام ورجع وهو واقف مكانه ما تحرك.
سها : ياربي ويش بنسوي الحين.
وعد جلست : بطق يا سها ما عاد فيني اتحمل نقار مع سعود وهواشات كل يوم مليت من هالحياة ويش اسوي.؟
سها : علمي أبوي.
وعد : مجنونة أنتِ انهبلتي تبيني احفر قبري بيدي أنا ماني قادرة على سعود بقدر على بابا.
سها : فكري فيها بالعقل هذا الحل الوحيد اللي قدامك لو كلمتي واحد من اخواني ماراح يقدرون على سعود هذا واحد . اثنين راح يلومونك ليش ما تكلمتي من البداية ويمكن يوقفون بصف سعود. وثلاثة م تضمنين ردة فعلهم لا احمد ولا ياسر وحتى خالد اما مشعل وليد ما ينفعون بموقف زي كذا.
وعد : على أساس بضمن ردة فعل بابا.
سها : بابا مروق من بعد رجعة ميار ناديه وعلميه كل شي ووريه كل الاتصالات والرسايل بابا هو الوحيد اللي يقدر على سعود وعلى اخواني كلهم.
وعد : واذا وقف ضدي يا سها ويش اسوي والله لا يذبحني بابا ولا يسأل علي.
سها : ما اتوقع بابا يسويها .. طيب قولي لي حل ثاني غير هذا.
وعد : وانا قلت لك ليش عشان تفكرين عني مخي معلق . ما قدرت انام من الصداع اخذت بنادول 4 حبات ولا نفع.
سها : ويش هالخبال يا وعد 4 حبات صاحية أنت.
وعد : ذبحني الصداع. خلينا من ذا شوفي لي حل بالمصيبة اللي بتجي على راسي.
سها : طيب سعود ويش قالك.
وعد : قالي لو استمر هالوضع بيتصرف. وأنتِ شفتي كيف نظراته لي طول الجلسة.
سها : مالك إلا اللي قلت لك بابا هو الحل اللي قدامك هذا الحل اللي اشوفه مناسب.
فارس يصارخ : وعد سها تعالوا العشاء.
سعود وقف وراء فارس: ليش تصارخ من هنا.
فارس : عشان ما اسمع شي وتذبحني وعد.
سعود : ما احد يقدر يسوي لك شي.
سها وعد اللي بيدخلون : تعالن. وأنت فارس ادخل تعشى .
وقفت وعد بتملل منه : نعم ويش تبي بعد.
سعود : ليش تقومن من قعدتنا وتطلعن برا تشوفن احد.؟
وعد بعصبية : لا أنت أكيد مخك ضارب.
سعود : من شاف شين فعايلك ما فهم إلا هالشيء.
سها : أنا بدخل .
مسكها سعود : قولي لي ويش كنتم تكلمون فيه.
وعد : سعود ما لك دخل تفهم مالك دخل.
سعود : لي دخل غصباً عنك تفهمين وعد لا تخليني اكسر راسك قولي لي مين اللي واقف برا للحين وطلعتي تشوفينه.؟
وعد: ماني قايلة لك خل الشك يذبحك.
سها فلتت يدها من سعود ودخلت تجري وسعود لحقها : سها..
سها : نعم.
سعود : الحين تقولين لي ويش اللي مخبياته انتن.
أحمد وقف : خير ايش فيكم انتم اليوم.
سعود : احمد خلني اتفاهم مع هالثنتين بطريقتي.
خالد : سعود اهدأ أبوي الحين بيجي من مكتبة.
سعود : خله يجي يشوف بنته المصون ويش تسوي.
وعد : ما اسمح لك تكلم عني بهالطريقة يا سعود واللي اسويه أنت مالك دخل فيه.
سعود : والله لا اكلم أبوي يفصلك من المعهد ويقعدك بالبيت وخلي نفسيتك تدمر مو بس تتعب مو بس كذا بتتزوجين عمر غصباً عنك.
وعد : خله يفصلني احب على قلبي اما اني اتزوج عمر هاذي نام واحلم فيها يا سعود.
سعود : ايه تبين لك واحد رخمة ما يسوى ريال عشان تمشينه على كيفك لا قلتِ يمين قالك حاضر وعلى أمرك.
وعد : لا تبيني اخذ واحد شراتك يدفني بالحياة.
سعود: ايه طبعا ما تبين واحد مثلي يريبيك من جديد.
وعد : سعود أنا لي خصوصيتي ولا اسمح لك او لغيرك يستجوبوني ويتدخلون بشؤوني دام أنا ما سمحت لكم.
سعود : ايه طبعاً تبين الحبل ينترك لك عشان تهيتين.
أبو سعود واقف يستمع لكلامهم : خلصتوا والا للحين.
مجرد حضوره يجعلهم يصطفون و ينهون نقاشهم.
أبو سعود : من متى اصواتكم تنرفع بوجودي.
سعود : يبه السموحة بس بنتك اللي مدلعها ومخلي لها الشور فعايلها تخلي الواحد يفقد اعصابة.
أبو سعود : ويش سويتي يا وعد.
سعود : لا تسألها يبه اسال هالهانم اللي معها طول الوقت.
أبو سعود : ويش مسويات انتن.؟
وعد : وليش اللي احنا مسويات ليش مو هو اللي مخترع سالفة من راسة.
سعود : ما فيه دخان بدون نار يا وعد.
وعد : النار أنت اللي مولعها و مطلع دخانها.
خالد: سعود يمكن أنت فاهم غلط مين اللي مكلمك.
سعود ناظر وعد وبقوه : شوف عيني ماهو كلام احد.
أبو سعود : ويش اللي شفته.
سعود : بتقولين يا وعد والا اقول.
وعد : ما عندي شي اقوله.
سعود : طيب.. اجل أنت يا سها أكيد أنت تدرين تكلمي.
سها اللي وقفت ورى خالد : أنا ما اعرف شيء.
خالد: سعود اهدأ لا تفسر المواضيع من راسك اسمع منهم أول شي.
سعود : طيب أنا بصبر لكن لو بس شكوكي تأكدت بنسبة 1% يا وعد والله لا اتصرف معك ووقتها ما احد له حق يلومني. طلع سعود معصب من البيت.
خالد : وعد قولي لنا ويش اللي معصب بسببه سعود.
وعد : الله يأخذني زين .. تركتهم وطلعت..
أبو سعود ناظر بسها اللي محتمية بخالد لو يمسكها بكلمتين يخليها تخر كل شيء: سها.
سها : بابا أنا مالي دخل لا تسألني عن شيء السالفة بين وعد وسعود أنا مالي دخل.
أبو سعود : بس أنتِ تعرفين سبب هواشهم.
سها : مالي دخل بابا مالي دخل.
..
وليد : ودي اعرف ويش مسويه وعد عشان يهاوشها سعود.
مشعل: اللي يسمعك يقول أول مره يتهاوشون مو جديد عليهم.
وليد: بس ما قد شفت سعود معصب هالكثر واول مره يهدد وعد قدام أبوي صح كم مره يهددها قدامنا بس أبوي مو فيه .
ياسر : وانتم ليش مشغلين انفسكم بهاذي السالفة.
وليد : ياخي ودي اعرف ويش اللي مسويته وعد.
خالد : هالشيء مالكم دخل فيه فاهمين.
مشعل : ما احنا صغار تسكتنا يا خالد.
خالد : ما ابي اسكتكم بس الموضوع بيد أبوي ماله داعي تلتون وتعجنون فيه.
ميار تكلم وعد : الحين سعود و وعد دايم يتهاوشون.
ندى : دايم دايم دايم يتهاوشون.
جود : هوشة قد اللي شفتيها من شوي ما قد وصلت لها بس دايم يتناقرون بالكلام واحيان يحتد النقاش.
ميار : طيب ويش السبب ليش هم الاثنين بالذات.
جود : لانهم الاثنين عنيدين سعود مأخذ طبع أبوي و وعد جامحة ما ترضخ بسهولة حتى انها متعبة أبوي وما يمر اسبوع إلا يهاوشها.
ميار : ليش أبوي عصبي.؟
ندى : لا مو عصبي مره بس شديد شوي ويحب يمشي البيت على نظام واحد و وعد ما تبي هالشي وعلى كل شيء تعترض عشان كذا بكل جلسة تلاقينها تناقش أبوي او سعود واحيان ياسر.
ميار: طيب هي ليه تجيب المشاكل لنفسها تطاوعهم وخلاص.
نهى : اما وعد تطاوعهم ما عرفتيها للحين.
ميار : شكلها عصبية صح.
ندى : مأخذه حدة أبوي عشان كذا هي و سعود ما يتراضون.
ميار : وانتم طيب.
ندى : أنا عني ما ارادد أبوي او سعود في شي ممكن اناقش خالد ياسر احمد بس أبوي وسعود لا . اما طويلات اللسان جود و سها هم يطولون السنتهم بالحكي بس مو كثر وعد, ودانه و نهى ما يباعدوني رغم إن نهى شكلها بتحول يمهم.
جود : ندى ماني طويلة لسان أنا. عيب الكبير يطلع منه كلام زي كذا.
..
يوم جديد و بداية تمرد جديدة.
جالسين ع سفرة الفطور.
خالد يكلم وعد : هاذي الشريحة اللي طلبتيها.
وعد : شكرا.
وليد : ليش وين شريحتك.؟
وعد : ما تشتغل خربانة.
مشعل : كذا فجاءة خربت.
وعد : هو تحقيق والا ايش.؟
مشعل: لا بس غريبة شريحة تخرب من حالها.
وعد : ماني مجبورة ابرر لك شلون خربت.
أم ندى : وعد خلااااص , ويش فيك اليوم من صباح الله خير معصبة.
وعد : هم لا يناشبوني وأنا ما اعصب.
سعود : اليوم أنا بجي اخذك من المعهد 11 بالضبط راح اكون عند الباب مو تأخرين.
وعد : يصير خير.
سعود فتح جواله : هاتي رقمك الجديد.
وعد : أنا اتصل عليك وأنت سجله.
سعود: إذا تأخرت عليك لا تعتبين باب المعهد.
وعد : طيب لا تأخر واجد تراهم طردوني من قبل يقولون ماهم مسؤولين عن التأخير.
سعود : طيب.
مشعل : طيب أنا اجيبها ما عندي شيء.
سعود بنظره لها معنى لوعد : لا أنا اجيبها. وقف : أنا ماشي تبون شي.
أبو سعود : سلامتك.
سعود : الله يسلمك مع السلامة.. وضع قبعتة العسكرية على رأسة وسلم على رأس ابوه وامه وخالاته وخرج من المنزل.
ميار تكلم سها: ماشاء الله عليه هيبه شلون وعد تتهاوش معاه.
سها : وعد ما يهمها اهم شي تسوي اللي براسها وبس.
ندى : قصدك تمارس هواية كسر الكلام.
سها : ندى شي ما تعرفينه لا تكلمين فيه.
ندى : سها احترميني أنا اكبر منك.
سها : على راسي.
نهى : صباح الخير.
أبو سعود : تو الناس نهى خانوم ارجعي نامي.
نهى جلست باحباط : ايش اسوي مالي خلق اداوم اليوم.
ياسر : شلون صابرين عليك المدرسة للحين. لو اني مكان المديرة مقدم فيك شكوى لوزارة التربية من زمان.
نهى : ليش ويش شايفني.
ياسر : اوووف حتى نهى طالع لها لسان اليوم.
نهى : ليش من غيري مطلع لسانة اليوم.
ياسر : حطي لسانك بحلقك وردي علي زين لا اقصة لك.
نهى : ما فحالي اتعب نفسي بالرد عليك.
ميار : أنا تأخرت.
نهى : تو الناس الساعة 7.30 بلاش دفنرة زايدة.
ميار : بلاك ما تعرفين مين وراي.
نهى : مين.؟
ميار: الزفت عزه تدخل قبل الوقت وتحضر وان ما كنتِ موجودة غياب حتى لو دخلتي ع القوت بالضبط.
سها : ما عندكم سالفة شايلينها من ارضها. لو انكم معلمينها إن الله حق ما سوت هالسواة معاكم.
ميار: ايه اللي ما جرب يدرس عندها يتكلم عنها كذا.
أحمد وقف : يلا طيب أنت و دانه .
وقفوا معاه : مع السلامة.
: مع السلامة.
..
المعهد..
: أبوك اللي فرحانة فيه حرامي سرق فلوس أبوي يوكلكم فلوس حرام أكيد عادي عندكم لانه مربيكم عليها.
وعد : تاكلين تبن أنتِ وابوك .. تخسين تكلمين عن بابا بهالالفاظ اللي ما تليق إلا فيك أنتِ واشكالك.
: ما أنتِ مصدقة روحي اسالي أبوك عن عامر سلامة الـ...... والا ما عندك القوة تكشفين تاريخه الاسود.
: الله يسود وجهك يالشينة قسماً تكلمين عن بابا بهالطريقة لا اذبحك.
المديره : خير ايش هذا .. أنتِ واياها ... ما تستحون على وجيهكم ما كأنكم كبار. قدامي اشوف على المكتب .. التفتت على الطالبات : وانتم يلا كل وحده على مكانها.
مكتب المديرة.
: ادري ما راح تصدقين إن أبوك نهب فلوس أبوي لكن واجيه شوفي ويش بيقولك بس جيبي له طاري أبوي.
: من غير ما اجيب طاريكم أنا اعرف بابا مستحيل يسوي اشياء زي كذا لا تسون فعايلكم و ترمونها علينا.
المديرة : بس حتى هنا تهاوشن.. هالمره راح اكتبكم تعهد المره الجاية راح تدفعن غرامة مالية 500 ريال و اهاليكم يدرون وتكتبون تعهدات وفصل لمدة ثلاث ايام.
وعد : تراني داخله هنا بفلوسي خلي هالشي في بالك.
المديرة: ما تستحين على وجهك خذي فلوسك واضربي الباب الحين ما يشرفني استقبل وحده مثلك عندي.
وعد : والله يا زينها كنت اتمناها من سجلت والا هذا تسمينه معهد أنتِ شايفة اسلوبكم المخيس بالشرح شايفة مستوى تدريس معلماتك والا اخلاقكم النفسية.
المديرة : اطلعي برا.
وعد : جيبي فلوسي أول شي.
المديرة : ما يحق لك تسترجعين المبلغ بعد مرور اسبوع من الدوام.
وعد : أنا ما داومت اسبوع للحين ابي فلوسي الحين والا بتصل على الشرطة.
المعلمة: اعطيها فلوسها يا استاذة خليها تروح واضح انها راعية مشاكل.
..
..
لا إله الا انت سبحانك اني كنت من الظالمين.

لا أحلل نقل الرواية دون ذكر اسمي.

ضحكة قهر