لو سألتي الورد وهو ما بين ايدك اقطعك للكاتبة ضحكة قهر

46

عطني سما صوتك برفرف وأحلّق
صوتك رحل فيني أو إنّه رحل بي؟

قلبي .. و اعرفه لا تعلّق .. تعلّق
ابيك تاخذني .. على قد "قلبي" !

لـ آدم دليم..

الرجال جالسين برا.. لكن اكيد كل جماعة يسولفون لحـالهم..
بندر : ليش مو ابراهيم قايل لك ملك ابي افهم ليش تعيي..؟!
فيصل : ما ابي املك الحين.. انا قلت ابي الملكة مع الزواج بليلة وحدة لو ملكتوا لي ترى اخذها و ما اخليكم تشوفون رقعة وجهها بلا زواج بلا خرابيط ما تهمني..
خالد : لا اجل انثبر لين الزواج.. حلوه ذي تفضحنا و لا بعد بنملك لك الساعة 12 بالليل اخاف تفضحنا تملك العصر و بالليل ما نشوفك يباركون لك المعازيم..
فيصل ابتسم : عادي اسويها و الله.. ياخي سبع سنين و انا خاطب..مصخت..
مشاري : هانت خلاص بس نخلص تحدد موعد ثاني و تأخذ عروستك..
فيصل : لا تذكرني بهالموضوع اتنرفز المفروض بعد يومين زواجي.. و هذولي حابسينا هنا.. بكره بروح احجز موعد جديد اخر هالشهر.. و ما علي بأحد لو ما جهزت شيء عادي نعيش بفندق..
حاتم : ياخي تريث وشولة مستعجل..؟! اللي يسمع كلامك يقول مراهق و ابوه واعدة يزوجة مو رجال طول بعرض معتب الثلاثين..
فيصل : ايه اجلس اتريق بلاك ما جربت اللي جربتة.. لو اختك الهانم موافقة تروح معاي كان عيالي اطول مني الحين..
بندر : الحمدلله ان نهى ما وافقت و الا كان جاينا مستخف.. ويش بلاك اركد.. يمديك تضيع بنيتنا هناك ويش بنستفيد حزتها من وراك..؟!
ماجد : ههههههههههه و الله يا فيصل خربت البرستيج مره وحدة..
فيصل : بلا برستيج بلا خرابيط ويش سوا البرستيج لي.؟! هاه.. لو ما عندي برستيج كنت جريت بنت عمي من شوشتها و اخذتها معاي بس اني سمعت كلام البرستيج و هذا اللي استفدتة..
يوسف يكلم اخوه محمد بـ همس بينهم : من جدك..؟!
محمد : طبعاً.. ياخي مخفات كلهن ويش ذا كلمتين تجيبيهن و توديهن..
يوسف : اجلس على ذا الحالة ناسي ان عمي غازي شاك فيك و الله يا محمد ان يحط الأولي و التالي فيك.
محمد : ويش بيدريه..؟!! انت عرف عن سواياك لأنك شوي و تخلي المركز فندق تنام فيه.. اما انا ويش بيخليه يعرف عني..
يوسف : ما ادري.. بس اتوقع انه شاك فيك.. على الأقل خف هالفترة مو فاضحنا طول الوقت على الجوال عيونك عليه.. ترى ما استغرب يأخذة و يشوف ويش فيه.. عاد ما يحتاج له يأخذ له فرة خمس دقايق يعرف كل شيء..
محمد : لا تجلس توسوس حسستني بـ عمي شيطان.. و اذا عرف ويش بيسوي يعني..؟! بيضربني مثلاً..؟!! بيقول لي كلمتين ما علي..
يوسف : ايه بـ صدق ان ما عليك عمي يقولك كلمتين.. خلنا ساكتين ازين ياخي..
في جانب اخر.. من نفس المكان و نفس الجلسة..
عامر : انا مرممة كامل شوفة يمكن يعجبك..
ابو سعود يستفسر : هو نفسة البيت اللي بنفس المنطقة..؟! ما ودي ابعد عنها..!؟
عامر : ايه هو نفسة.. كبير واسع و شرح.. و اتوقع يكفي و يوفي..
عماد : بكره نروح نشوفة يا عمي.. و اذا اعجبك تأثثة على هواك..
ابو سعود : مو مشكلة لو اخذة الحين و نسكن فيه مؤقت لين ابني بيت جديد و بعدين أبيعة..
عماد : ما تدري يا عمي يمكن يجي على هواك.. لأني اعتقد اكبر من بيتك الحين.. و هو اربع ادوار..
ابو سعود : اهم شيء عندي عدد الغرف..
ابو عمر : لا تشيل هم الغرف اتوقع تكفي.. لا تنسى ان اربع من بناتك بيتزوجن ان شاء الله..
ابو سعود ابتسم : حتى لو.. لازم لكل وحدة غرفة.. و ابي زيادة غرفتين عشان عيال خالد ما ابيهم ينامون مع ابوهم.. (ناظر عامر) هو فيه كم غرفة..؟!
عامر : الدور الأول كله استقبال مجالس الحريم و الرجال.. و الثاني فيه ست اجنحة منفصلة عن بعض.. و اللي فوقة فيه ثمان غرف و صالة و كل غرفة بحمامها.. و الأخير ست غرف بس اكبر من اللي تحتها و صالتين..
ابو عساف : انا اقول يا اخوي مناسب لك ما يحتاج.. بناتك بـ دور الثالث.. و عيالك بالأخير و اثنين منهم تعطيهم اجنحة ياسر و سعود عشان تزوجهم و تحطهم عندك.. و ولد خالد حطه هو وفارس بغرفة وحدة..
ابو سعود يناظر اخوه : هذا شورك..؟!
ابو عساف : انا اقول شوفة قبل لا تقرر.. ما يندرى يمكن ما ينشرح صدرك للمكان..؟!
ابو سعود : اجل بكره ان شاء الله بشوفة مع ياسر..
: السلام عليكم..
: وعليكم السلام..
ابو سعود يناظرة شايل شنطتة على كتفة : على وين..؟!
وليد : بـسافر..
بندر عصب عليه : حلوه تسافر و انت متى ما طخت براسك شلت شلايلك و غديت..؟!!
وليد يناظر عمه : لا تنسى اني بـ دورة و خلصت إجازتي..
سعود : مو على اساس بتكمل الإسبوعين..؟!
وليد : ما باقي الا كم يوم و اكمل اسبوعين.. و الرئيس اتصل قال لي ارجع و خلص تدريبك احسن لك..
غازي اللي كان هادئ جداً عند هالكلمة رفع راسة لـ وليد.. بندر ناظر غازي : مو انت اللي مرسلة كلم رئيسة وقولة الولد كتفة ما انجبر كسرة.. خله يقعد لين ينجبر كسرة..!!
وليد : ابو شوق ماله دخل.. يعني هو ارسلني بس الدورة لها رئيس.. ماله دخل يقولة خله عندنا ليش الدنيا سيبة..؟!!
يزيد : انا ابي افهم ويش اللي مخليك قارد نفسك..؟!
وليد : ماني قارد نفسي عادي دورة و بخلصها..
وقف سعود : انا بوصلك المطار..
وليد : لا ابو شوق بـ يوصلني رضاوة عشانه كسر كتفي لازم يشيل عني شنطتي..
غازي وقف : بـ وصلك بس اني اشيل شنطتك.. لو تحب السماء ما سويتها لك..
وليد اشر لـ سعود عشان يلحق غازي.. اما وليد اتجه لأبوه و باس راسة و همس بإذنة : يمكن اطول هالمره حيــل.. اني قدرت اجي هالمره ما يعني اقدر اجي متى ما بغيت.. يبه تكفى اذا صار أي شيء لا تجلس تضرب اخماس بأسداس انا بكون بـ خير ان شاء الله بس انت ادعي لي..
ابو سعود : اذا قدرت تكلمني لا تقصر يا وليد.. ادري انك بايعن عمرك.. و يومك بايعة لـ وطنك ما عندي مانع يستاهل.. لكن تكفى اذا فيه درب امن من اللي انت تسوية اسلكة.. تكفى يا وليد..
وليد باس كتف ابوه : لا تخاف علي يبه.. تأكد اني اختار أأمن شيء و لا اسوي شيء ما ادري ويش عاقبتة.. بس انت ادعي لي..
ابو سعود : الله يوفقك و يفتحها بـ وجهك.. وقف وليد حتى يسلم على اخوانة و سلسلة من التوصيات الهامسة بينه و بينهم.. مو بس اخوانة اللي وصوه رجال غازي اللي يعرفون وليد لـ مين رايح كان لهم نصيب من التوصيات المكررة على اذنة..
راكان : كان زين لا سافرت احد يقلق علي كذا..
وليد يربت على ظهر راكان : قل لا إله الا الله لا تنظلني.. و بعدين الناس مقامات يا عمي..
في السيارة غازي و سعود الإثنين قدام.. سعود مأخذ مكان السايق..
غازي : ما طرا له يخلص سلامات بيخليهم يشكون..؟!!
سعود : ترى فيه منهم اللي ممرر الموضوع بمزاجة و ساكت.. و فيه منهم اللي ماشي عليه.. عندك عمي بندر و عمي مشاري ابصم بالعشرة انهم ماهم مصدقين ان وليد رايح دورة.. لكن عيال عماني ماشي الموضوع عليهم..
غازي : و الله اذا اخوك بـ يجي اكيد بننفضح.. لو يقر مكانة و يقضب ارضة ما احد شك فينا..
لف سعود على رئيسة : انا ادري انك من زمان تعدنا عيالك.. و الحين انا صرت حسبة ولدك صدق.. و الولد يشيل عن ابوه همة.. كلنا حاسين ان فيك شيء.. علمني يمكن اقدر اعاونك..
غازي يناظر لـ وليد جاي جهتهم : ما فيني شيء.. صح اني متضايق هالفترة بس تعدي..(يضيق عيونة) بعون الله تعدي..
سعود : ان شاء الله..
ركب وليد وراء و رمى شنطتة .. جلس بالوسط عشان يتكلم براحتة مع الإثنين.. اما سعود حرك السيارة.. وليد ناظر غازي : شوف ترى انا ما حذرتك بس الحين احذرك..
غازي لف عليه مستغرب : خير ان شاء الله..؟!
وليد : اختي.. ندوش ان زعلتها في شيء ما راح يهمني انت رئيسي و إلا لا بطلع حقها من بين عيونك..
غازي : استغفر الله.. خل همك بنفسك و بس.. مالك شغل بـ غيرك.. اسمعني زين و فتح مخك..
وليد رجع و سند ظهرة على المرتبة و حط رجل على رجل : ادري بـ تقول وليد انتبه لا تغلط و انتبه لـ عملياتهم و اذا جاتك فرصة ذهبية بإنك تتواصل معانا لا تقصر.. ويش بعد..!! لا يرف لك جفن معاهم و انتبة لكل حرف يقولونة خلك منتبة.. و لا يخدعونك لا بمظاهرهم و لا تفكيرهم اللي يدعون فيه الصلاح.. و أي شيء يقولونة و يضايقك لا تبين لهم.. و اذا حاولوا يستفزونك لا تنولهم مرادهم.. و اسمع كلمة الصقر اللي ما تأذيك.. (ناظر غازي) شفت اني حافظ الكلام مثل اسمي..؟!!
غازي : ياخوفي ببغاء يردد وراي و العقل ميــــح!!
وليد : بـتشوف كيف العقل ميح يا ابو شوق.. انا وليد بن ابراهيم..
غازي : اسمع مو تتهور و تبلغنا بشيء عن طريق جوالك..؟! و الله لا اذبحك يا وليد..
وليد : قالوا لك مهبول انا ادري ان الصقر بيراقب جوالي..
غازي : حاول تبين له شخصيتك اللي متفقين عليها.. لا ترضى بكل شيء و تأخذ و تنفذ من غير لا تنشد.. عصب فيه ناقشة بين له انك ذكي و مو كل شيء يطوف عليك.. خله يرقيك و يعلمك بأشياء ما علمها بأحد من قبلك فاهم و الا لا..؟!!
وليد : فاهم.. و الله فاهم.. اصلاً الصقر حاطة بجيبي انا و مريح راسي..
سعود : ايه اوثق فيه و ودنا بـ داهية..؟!!!
وليد بـ غرور : مو انا اللي واثق فيه هو اللي واثق فيني..
غازي يمسح وجهة بكفوفة : يارب صبرني عليه..
وليد مبتسم وهو يشوف غازي معصب صار له كم يوم هادي يبي يعصب فيه مثل قبل و يتهاوشون.. : ليش ويش سويت لك انا الحين..؟! تراني صادق.. يعني هو لو ما وثق فيني ما راح يوريني لا اوراق و لا غيره..
غازي يصر على أسنانة : ثقتك الزفت بنفسك هي اللي بتودينا بـ داهية.. وليد فتح مخك.. لا تخرب كل شيء جالسين نسوية..
وليد : اوكِ اوكِ لا تعصب.. انا مانيب بزر اعرف ويش قاعد اسوي..
غازي يناظر سعود : سعود اعكس الطريق خلنا نرجع المزرعة لين يفتح مخة..
وليد نط قدام بين غازي و سعود : ويش يعكس من جدك.؟! انا متفق معاه بكره اكون عنده..
غازي بـ حدة : مو لما تفتح مخك التنك المقفل..
وليد : طيب لا تعصب.. انا متفق معاه على اساس بكره.. بجي و بيرسل لي رجالة بس بقولة اني مأخذ رحلة ترانزيت و بروح المطار عشان الكاميرات تسجل خروجي منه بعد ما غير ملابسي طبعاً.. و برتاح بـ شقتي و بقوله اني جيت من البارح..
غازي : تدري لو قايل لي ودوني شقتي على طول و الله كنت رجعتك صدق.. بس كويس يفيد فيك التدريب يطلع منك.. اهم شيء تنتبه على طول..
وليد : طبعاً يطلع مني بس انت مو راضي تثق بـ قدراتي..
سعود : وليـــد خلاص عاد.. اصطلب بلا سوالف التنكيت بوقت غلط..
..
دخل الجناح و هو متأكد انها ما نظفتة.. اكيد ما راح تنظفة اما وعد تسمع كلامة!! اكيد بيصير فيه شيء باليوم اللي وعد ما تعاندة فيه.. انصدم بـ ريحة قبل لا يفتح باب الجناح و اول ما فتحة داهمتة بشكل قوووي عقد حواجبة بـ حدة و هو يناظر المكان كله مغـــبر حتى لف على المطبخ و نفس الشيء اتجه للصلاة حتى على الكنب المكان مغبر اتجه لطاولة و مسح بإصباعة و فرك اصباعة السبابة بالإبهام يتعرف على الشيء اللي مالي المكان اتجه لغرفة النوم و ما كانت حالتها احسن ابداً بالعكس كانت هي الأسوء اسوء حتى الحمام مليــان من هالمادة.. وما راح يفــكر مني سوا.. ما فيه غيرها هي.. طلع من الجناح و وقف عند الباب صــرخ : وعــــــــــــــــــــــد.. وعـــــــــــــــــــــــد..
اما هي جالسة مع البنات بعد الفجر اسيل و ندى و نهى و صبا و جود.. ابتسمت يوم ناداها و لا همه الناس نايمة صاحية جالس يصارخ..
ندى : وعد قومي شوفي زوجك ويش يبي..؟!
وعد تقاوم ابتسامتها : يعني ويش يبي..؟! خليه بالطقاق..؟!
جود : ويه يا صراخة شكلة معصب روووحي بــسرعة..
لحظات حتى تنزل هنادي : وعد عماد يبيك..؟!
وعد : رجلي تعورني ما فحالي اطلع فوق..
هنادي عقدت حواجبها عماد مولع و هاذي جالسة رجل على رجل و لا هامها شيء..؟!!
: قولي للبنات اللي عندها يذلفن..
هنادي ناظرت البنات جالسات بالصالة : بنات ادخلوا الغرفة عماد بـ ينزل..
دخلوا كلهم الا هي.. و ليش تدخل ما راح تهرب من شيء سوتة.. هنادي ناظرت فوق لعماد بالدور الثاني : انزل ما فيه احد..
قبل لا تكمل كلامها كان متعديها اتجه للصالة شافها جالسة و لا هامها ولا كأنها مسوية شيء.. و مو بس كذا قدامها صينية قهوة و تتقهوى حضرتها..: ويش ذا الحركة اللي سويتيها..؟!
وعد هزت رأسها ببراءة و بيدها فنجان القهوة : أي حركة..؟!!!
عماد اتجه لها بسرعة نزلت الفنجان قبل لا يوصل لها هذا يحرقها و لا يهمه شيء رفعها و دفها على جدار : يعني ما تعرفين ويش مسوية.. وعـــد لا تستفزيني..؟!
وعد بـ حدة : انت جاي مدرعم و تهاوش ويش دراني عن ويش تتكلم..؟!!
عماد يلف بالمكان ما يبي يمد يده عليها : يارب صبرني يارب.. (لف عليها و اشهر يده بتهديد في وجهها) تراني ساكت و متحملك.. و متحمل البزرنة اللي عايشة فيها..
وعد : قلت لك من قبل طلقني.. انا و انت ما احنا لـ بعض..
عماد : عشم ابليس بالجنة.. و الله يا وعد تحلمين بالطلاق.. و الله ما تسمعينة..
وعد : كيفك اجل تحمل ما يجيك..
عماد اتجه لها بـ قوة ضغطها على الجدار و رفعها عن الأرض حتى اطراف اصابيعها ما تلامس الأرض حط يده على رقبتها يخنقها .. يصر على اسنانة : ويش اللي كبيتية بالجناح..؟!!
وعد وجهها احمر تحاول تبعد يديه عن رقبتها وهو مثبتها و لا هامة شيء : بـــعد.. كح كح .. بــــعد يا حمـــار..
هنادي ماسكة ثوب عماد من وراء تبيه يبعد عن وعد : عمـــاد تكفى ذبحتها و الله ذبحتها..
عماد دف هنادي عنه و يناظر وعد : احسن لك تكلمي..؟!
وعد تحرك رجولها تبي تضربه و تضربة على اكتافة تبيه يبعد عنها لكن عماد جبل قدامها ما تزحزح و لا ربع ملم..
هنادي على شفا حفرة من الصياح متعلقة بأخوها : تكفى يا عماد الله يخليك.. و الله بتروح فيها البنية.. يمــــــــــــــــه.. يمــــــــــــــــــــه..
عماد ابتعد عن وعد حتى تطيح على الأرض : صابر عليك يا بنت ابراهيم لين طفح الكيل منك.. زودتيها..
وعد يديها على رقبتها و لا رفعت راسها له : ما اشوف طفح الكيل اللي عندك.. جاب نتيجة.. طلقني.. دامك .. مو قادر.. تحملني..
جلس على ركبه شد شعرها حتى يرجع راسها لـ وراء : انا حلفت ما تسمعين الطلاق.. و انتِ تبين نفسي تعيفك.. عادي اسعي لهالشيء يا وعد و الله لأخليك معلقة لا متزوجة و لا مطلقة..
وعد غمضت عيونها بـ قوة و فتحتها : ما تقدر.. ما كثر الله من المحاكم و الله لأرفع عليك قضية خلع.. و اقدر اكسبها بـ سهولة دامني ما تزوجتك برضاي.. و الله لأقولهم كم مره طحت بالمستشفى بسبتك..
ابتسم عماد بـ خبث : ما عندك و لا تقرير طبي.. كنت اخذك و اردك ما عندك أي اثبات..
وعد ابتسمت : عندي شهود.. انا ما كنت اقابل احد غيرك يعني ما احد غيرك متسبب في الإنهيار العصبي اللي جاني مرتين.. و الله لأحيكهم كلهم على الحكي اللي قلتة لي.. و موظفاتك اللي جبتهم يحرسوني عشان ما اطلع شهود على الحكي اللي قلتة انت بحقي..
شد شعرها زيادة و هي تغمض عيونها ما تبي تقولة يفلتها : جربي و روحي اشتكي.. بـ شوف كيف بتوقفين عمي ابراهيم بالمحكمة.. و تشتكين عليه حتى هو اللي ظلمك و زوجك من غير لا يشاورك..
وعد : ما يخصك في بابا.. و بعدين بابا ما زوجني لـ واحد ردي مثلك الا ابوك لوى ذراعة.. تتوقع انت بتصير مثل ابوك و تلوي ذراعي و انطم.. عندي مين يوقف و يجيب لي طلاقي منك و غصباً عن خشمك يا عماد..
عماد يشد على شعرها يبيها تسكت و كل شوي يزيد و هي كل مره تزيد و لا هامها : ويش اللي كبيتيه بالجناح..؟!!!
وعد محاجر عيونها اسودت من شد عماد لـ شعرها لكنها جاوبت ببراءة عشان تحسفة : هاذي بودرة نمل.. الجناح مليان نمل قلت قبل لا ينظفونة الخدم اخليهم يحطون بودرة عشان النمل..
خفف من شعرها لا شعورياً.. ابتعد : بودرة نمل..
وعد تحاول تبعد عنه قبل لا يستوعب شيء : ايه..
عماد رجع شد شعرها : كذابة بودرة النمل مالها ريحة.. وحتى لو لها هاذي ريحتها عطر يعني ماهي هي..؟!
وعد : ما انت ملزوم تصدق..
عماد : خلاص اكيد راح النمل الحين تقومين تنظفينة مو الخدم مانيب عايز لأقولهم بس انا قلت لك يعني انتِ تنظفينة..
وعد شدت يده من شعرها و رمت يده على صدرة : تراني معطيتك وجة يا ولد عامر.. انت بكامل قواك العقلية..؟!
عماد : كتف يدينة : ويش رايك يعني..؟!
هنادي اللي كانت حاضرة الهوشة من اولها : عماد الله يخليك خلاص انا بكلم الخدم و بشرف عليهم بنفسي لا تسوي مشكلة..
عماد : انا قلت وعد تنظفة..
وعد : تحلم يا عماد ان شاء الله تطلع منه قبيلة صراصير ما نظفتة لك..
عماد ميل راسة شوي و احتدت عيونة عليها : مو انتِ جالسة فيه و انا فاتحة ل كانتِ خص نص..؟!
وعد : هذا الظاهر بس نيتك ما ادري ويش هي..؟!!
عماد : نيتي تحترمين نفسك و تنظفينة..
وعد : و اذا ما نظفتة ويش بتسوي يعني..؟! بتضربني يا ليت كان زين يا عماد سوها و شوف مين بيجلس على ذمتك دقيقة وحدة..
عماد : تعودت اسمع كلامك بأذن و اطلعة بالثانية.. انتِ لسان يلعلع على الفاضي..
انقهرت منه انقــهرت..يحسبها خايفة منه!! هي للحين اصلاً ما التفت له عدل و استفردت فيه و الا علمتة شلون لسان يلعلع على الفاضي.. : جرب يا عماد و سوها و اعلمك شلون انا لسان يلعلع على الفاضي..
في الغرفة صبا صكتها ام الركب وهي تسمع الصراخ و الهواش.. لو مالها دخل كانت خافت من صوت عماد كيف وهي اللي معطيتها البوردة!! ممكن تصيح.. اما جود هي اكثر وحدة متحمسة و تشجع.. اكيد تشجع اختها.. و اسيل تتذمر و نهى باردة ما همها الموضوع اما ندى تنقد على الإثنين الناس نايمة وهم يتهاوشون لا مراعين كبير نايم و لا صغير..
ندى : الله لا يبلانا يعني ما عندهم جناح يقفلونة على انفسهم و يحلون مشاكلهم مو جالسين تحت و يصارخون و الله ماهي زينة لو يصحون جدتي فاطمة و الا عمتي نوره(ام عامر)..
أسيل : استخفوا الإثنين من جد استخفوا.. ويش الهبال اللي عايشينة ما كنهم كبار الا بزارين..
نهى : ويش عليكم الثنتين.. خلوهم يتهاوشون انتم ويش عليكم..؟!!
ندى : خليهم يتهاوشون ما علينا لكن مو الفجر و الناس نايمة هم يلعلعون..؟!! ويش قلة هالذوق هاذي..؟!!
صبا تضرب خدها مرعوبة من تخيل عمها يدري انها اعطت البودرة وعد : و الله يا بنات ما دريت انها بتسوي كذا..
اسيل مستندة على الباب و تتسمع : الحمدلله و الشكر و انتِ ويش دخلك.؟! ويش عرفك ان وعد بتسوي زي كذا..؟!
جود ابتسمت : يا ويلك يا صبوي لو بابا يدري.. يمكن حبل المشنقة على طول..
اتسعت عيون صبا : لا..
ندى : وجع ان شاء الله يا جود.. تمزح عليك يا صبا.. اصلاً من كل عقلك بيجي ببالهم ان وعد اخذت البودرة منك..؟!! وحتى لو دروا بيحسابونك انتِ ليش وعد المصاصة بـ فمها بزر.!!!
صبا : ما ادري.. و الله يا بنات مرعوووبة!!!
نهى : معطية الموضوع اكبر من حجمة انتِ مالك دخل فيه كلش كلش حتى لو دروا ان وعد ماخذة البودرة منك ويش بيقولون ليش اعطيتي وعد بودرة جسم..؟!!
جود حاطة اذنها على الباب لفت عليهم و يدها على فمها : اووووش الموضوع وصل للطلاق..!!
اسيل : من جدك طلاق على حساب بودرة..!!! ويش ذا السخافات..؟!
نهى تناظر اسيل : ماشاء الله وين العقل ذا لا جاء طاري نيوف..
عفست اسيل وجهها : كل عمري عاقلة بس فيه ناس لازم اصير معاهم مجنونة..