لو سألتي الورد وهو ما بين ايدك اقطعك للكاتبة ضحكة قهر

36

من اللي علمك .. تجرح حنيني
وتعطي عيني اللون الرمادي ؟

على كثر الجروح اللي تجيني
وصلت لمرحلة ( كل شي عادي ) !

لـ حمد العيد..

ابو سعود : ويش اقول .. الله يحميك و يكون بعونك.. وعون جميع رجال الوطن..
وقف وليد و جلس يسار ابوه وباس راسة : تكفى يبه لا ارسلوني جثة لك قول لامي لا تزعل علي.. قولها اني عطيت روحي لوطني.. قولها لا تبكي و انا باذن الله شهيد.. قولها تسامحني يبه تكفى لا تخليها تزعل.. قولها بحافظ على صلاتي و فروضي و واجبات ديني.. و وطني.. و دراستي.. ما راح اخيب ظنها و لا ظنك يبه..
دمعت عيون مشعل على كلام وليد.. صد بوجهة عنهم.. وهو يشوف وجيه اخوانة و ابوه شلون تغيرت من حكى وليد بداية الموضوع و زادت عند كلامة الأخير.. صعبة تودع شخص عزيز عليك و انت تدري باحتمالية كبيرة انه ما يرجع لك الا جثة..
أحمد : ما ينفع تصبر لين نمهد لأمي الموضوع..
وليد : لازم اطلع الفجر.. ما بقي وقت.. انا بقولها اني مسافر بدورة تدريبية.. وما ادري متى تخلص و ممنوعة المكالمات.. هذا اخر شيء وصلت له..
خالد : بس انت تدري ان مهمتك ممكن تطول لحد امي ما راح تصدقة..
ياسر : و لو درت انك بتكون بخطر ما راح ترضى على هالشيء..
ابو سعود : بنقولها مثل ما قال وليد .. و بعدين تدبر.. الله بيسرها من عنده..
أحمد : و خواتي..؟!!
وليد : كلهم بسلم عليهم و أنا طالع.. (وقف) كان ودي اسلم على الكل بس ما يمديني.. بروح اجهز اغراضي.. و خرج.. ظلوا يتبادلون النظرات من وراه..
مشعل : يبه انت راضي..؟! راضيى يروح يرمي روحة بالنار..
ابو سعود : و ليش تشوفها كذا.. ليش ما تقول راح يفدي وطنة..
مشعل : ماني متخيل انه بيروح و يخاطر بنفسة.. لسى صغير..
سعود : مشعل..
مشعل وقف : بترضون لو بكره قالوا لنا .. تراه.. تراه .. مات تعالو استلموا جثتة..
سعود وقف وسحب مشعل و طلع برا .. ابوهم ماهو ناقص.. ما بعد استوعب حاتم و رجعتة و طلعة وليد المفاجئة عشان احد يلومة..
سعود واقف مع مشعل برا و يكلمة بهدوء : ابوي ماهو ناقص..
مشعل : ليش تبيه يرمي وليد بالنار..؟!
سعود : هذا و انت بتشتغل بالقانون..؟!
مشعل بقهر : اشتغل بالقانون ادافع عن الناس و احميهم.. مو ارميهم بالنار و اتفرج عليهم.. اكيد انت السبب وراء كل ذا.. ويش بتستفيد من انه يخاطر بحياتة..؟! بتجيك ترقية..؟! ليش ما هو اخوك ما تهتم لحياتة.. لهدرجة رخيص عندك.. و الا عشانة ماهو شقيقك عادي..
سعود : تدري عمري ما توقعت تفكيرك لهدرجة صغير.. انت تعرف اني لا يمكن افرق بين انكم شقايقي او لا.. اصلا ما عندي اخوان اشقاء الا ميار و ميار بنت.. توقعتك خواتي يفكرن هالشكل لكن انت..؟! تتوقع اني برمي وليد عشان ترقية,..؟! اصلاً انا ما دريت انه متوظف معانا.. هو جاء لأبوي هنا و ابوي وافق.. و هو اللي عرض يدخل بالقضية.. ما احد جبرة.. هو اللي فدا روحة لوطنة ما احد حطه بالواجهة.. هو اللي تبرع بنفسة عشان حماية الوطن.. ماهو انا اللي بستفيد من وراه.. ولو جاء يوم و قالوا لي اخوك توفى.. ما راح ازعل .. لا تحسب عشان ماهو شقيقي مثل ما قلت لانه اخوي.. ربطنا اب و ما يهمني بالباقي.. ما راح ازعل عشاني عارف انه توفى بشرف.. توفى شهيد.. تجي انت الحين و قبل ما يطلع تلوم ابوي..؟! .. ما بعد استوعب صدمة حاتم عشان يجيه وليد.. انا متغانم ان ضغطة ما ارتفع و انت تسمعة حكي يكدر خاطرة..؟! و تزيدها عليه..
مشعل و عيونة غرقت : ما ابيه يروح.. ما ابي افقدة..
حضنة سعود.. و نزلت دموع مشعل ما يطري بباله الا ان وليد رايح للموت.. : افااا توقعتك اكبر من كذا.. ما فيه شيء تبكي عليه المفروض تفتخر فيه.. هالحين تبكي بكره لو قابلتة ويش بتسوي...؟! لازم تمسك نفسك يا مشعل.. لازم تكون اقوى من كذا.. وليد بيدخل مهمة و محتاج دعم نفسي.. مو يدخل و هو يخبرك تبكي عشانة.. اجل شلون بيكلم خالتي.. اذا انت زعلت خالتي بتشك بالموضوع..
مشعل رفع راسة ومسح دموع خانتة : طيب على الأقل يكلمنا و نطمن عليه..
سعود : لا.. فاهم.. لان حياة الكل بتصير بخطر.. حتى امي و خالاتي و ابوي و خواتي و اخواني و عماني.. الكل يا مشعل.. اول ما يطلع وليد من هالباب تنساه.. تنسى ان عندك اخ اسمه وليد.. لا شفتة و لا كنك تعرفة..
: انت ويش قاعد تقول..؟!
ارتعب سعود يوم سمع الصوت.. التفت شافهن واقفات مصدومات.. سمعوا الكلام.. : ندى .. نهى..
ندى : سعود احنا سمعناك.. ويش تقصد..؟!
سعود بثقة : ما اقصد شيء..
اما مشعل مسح دموع و رجع مكتب ابوه.. ما يبي ينحط بمواجهة مع احد.. لانه اكيدج بيفضح الموضوع..
نهى : لا يا شيخ.. سمعناك تقول تنسى ان عندك اخ اسمه وليد..
سعود : يتهيأ لك انتِ و اياها.. الا وين حاتم..؟!
ندى : مع امي.. كلهم جالسين بالصالة و خواتي ماسكاتة استجواب..
نهى تقدمت بتدخل وراء مشعل مسكها سعود : على وين..
نهى : بشوف ابوي الا بعد تبينا ننساه..
سعود تركها وهو يعفس فمة.. دخل وراها و من بعده ندى..
نهى التفت شافتهم جالسين كلهم : وين وليد..؟!
كلهم ناظروا سعود .. مستغربين ليش نهى تسأل عن وليد و بهالحزة بالذات..
ابو سعود : بغرفتة ليش..؟!
نهى التفت لسعود : ليش يقول لمشعل تنسى ان وليد اخوك و لا كنك شفتة و تعرفة..؟!
سعود : ما قلت هالحكي لا تألفين من راسك..
نهى : انا ماني صمخاء يا سعود.. سمعت ويش قلت.. وشوف شكل مشعل.. و اشكالكم.. و الله فيكم شيء.. وليد ويش فيه..؟! يبه.. لا يكون تبريت منه..؟!
ندى شهقت : لااا.. يبه تكفى لا .. ما صدقنا حاتم يطلع عايش و يرتاح قلب امي.. ما نبي خالتي تتعب تكفى..
نهى : تبريت صح..؟! يعني مو بعيدة بكره تتبراء منا كلنا.. نبي نعرف ويش سوا ويش الغلط ....
قاطعتها حدة ياسر : هيـــــــه انتِ ركبتي سيناريوهات من عندك و صدقتيها.. ويش اللي ابوي تبرأ منه خبلللة..
نهى : الا احنا سمعنا سعود يكلم مشعل.. ومشعل يبكي..
ابو سعود : يا بابا فهمتوا غلط.. و يمكن ما سمعتن زين.. لان وليد بيطلع الفجر بيسافر..
ندى باستغراب : يسافر..؟! ليش..؟! و وين بيروح..؟!
سعود : امريكا.. و ليش عنده دورة..
نهى ببرود : اجل وصووه لا يرجع لنا بمره و عشر عيال..
خالد : كأنك تدقين بالحكي..
نهى : ما جبت شيء من راسي..
خالد : ليش فيصل رجع و بيده مره..؟!
نهى : ماني ضامنتة.. ممكن يعترف بعد سنين مو شرط يعترف الحين..
ياسر : خبـــلة انتِ خبــــلة..
نهى : شكـراً اخي العزيز.. اقول ترى اخوك الجديد برا و انتم مسوين اجتماع ذكوري عيب ماهي حلوة بحقة..
في الصالة جالسات حوالية و يستجوبونة..
جود : كم عمرك..؟!
حاتم : 28 سنة..
دانه : ماشاء الله.. طيب ويش تخصصك..؟!
حاتم : طب عظام..
ميار : يا عيني و متى تخرجت..؟!
حاتم : من زمان..
ميار : احلف بس..
حاتم ابتسم : و الله..
ميار : صدق طيب متى امداك تأخذ ماجستير يعني الطب سبع سنوات مره كثير احس يبي لك فترة عشان ترتاح..
حاتم : ليش ارتاح و انا ما وصلت اللي ابيه.. بدري ع الراحة..
سها : شكلك دافور.. بعض الناس طالعين عليك..
ام ندى : اذكري الله..
سها تلوي فمها : لا اله الا الله .. بكره يقولون صكيتية بعين..
وعد : و اذكري الله عشاني..
سها : لا اله الا الله.. لا اعوذ بالله غثيتوني..
حاتم : لازم تقرنين اعجابك بماشاء الله ماهي مكلفتك شيء..
سها : اهااا محاضرات.. اجل شكلنا بنسلم عليكم و نمشي..
ام ندى : مير ما نمتي خير ان شاء الله ما عندك دوام بكره..
سها ابتسمت : هلا هلا رجعت نوالتي لسابق عهدها.. كفووو و الله لك فترة مهيتتنا..
ام ندى تضربها على ذراعها : استحي على وجهك ويش مهيتتكم.. شكلك تبين العين الحمراء..
سها : لا تكفين لا توصلينها للحمراء خليها برتقالي بيني و بينك..
جود : احد قالك من قبل دمك ثقيل..
سها : لا انتِ اول وحدة.. يالله ما عندك نظر..
جود : انا ما عندي نظر..؟! لا حول ولا قوة الا بالله.. صدقيني يا خية ما ودي اكسر بخاطرك.. بس مير يعني.. و الا أقولك خلاص بتحملك.. و الله يعيني..
سها : لا تكفين لا تحمليني قولي بس ويش عندك..
ام احمد : انتن ويش بلاكن.. كل وحدة لسانها ويش طولة..
: خير ويش فيكم..؟!
جود تتمسكن : بابا شوف سها بس تحكي علي..
سها حطت يدها على راسها : يا ربي يا كبرها.. ويش اللي احكي عليك..؟! على اساس انتِ ما جرحتي مشاعري..
جود تمثل الصدمة : انا جرحت مشاعرك..؟! يا ربي .. عشانك اختي بس ما راح اتحسب عليك.. ظلمتيني الله يسامحك..
سها : يوه اصبري بحط قطرة عيون انزل لك دمعتين.. تأثرت بطيبتك.. وقلب الأبيض الصافي..
نهى : صافي و الا المراعي.. هههههههههههههههههههههه..
كلهم التفتوا لها حتى اخوانها اللي جو وراء ابوها يناظرونها.. بعد ما كانو يشوفون تمثيل سها و جود و فقش كل وحده ع الثانية.. خالد : ويش المطلوب اننا نضحك..
جود : هههههههههههههه لقطي وجهك..
ابو سعود بحزم : بــــــس..
اعتدلت كل وحدة بجلستها بهدوء و بالعة لسانها..
ابو سعود : لي فترة ما اسمع اصواتكن ويش صار لكن اليوم..
سها : يعني صار عندنا اخ جديد لازم نفرح فيه..
ابو سعود : تدرين كم الساعة يا هانم.؟!
سها بلعت ريقها : ايه..
ابو سعود : بكره ما عندك دوام..؟!
سها : احم.. الا بس.. بس بغيب..
ابو سعود : و ليش ان شاء الله..؟!
سها : لان ما عندي الا محاضرة ما تسوى..
ابو سعود : صدق ما تسوى..؟! حتى الدراسة ما تسوى.. ليش تتعبين نفسك انثبري بالبيت..
سها بفجعة : لا . لا .. خلاص خلاص بداوم..
ابو سعود : لا ريحي نفسك ليش تداومين ما تسوى..
سعود : و الله من البلادة..
سها : مو بلادة .. بس الدكتورة كارهتني و ما ابي احضر لها عشان ما...
نهى قاطعتها: لا تقولين عشان ما تهاوشين معاها لانك ما قدرتي تردين عليها من اول مره كلمتك..
خالد : ويش اللي ترد على دكتورتها ويش قلة الأدب هاذي..؟!
نهى : اللي مثل دكتورتها ما يتسمى قلة ادب.. يتسمى تعليم الاحترام.. و الله شيء..
ابو سعود : على آخر عمري بسمع سوالف حريم..
سها : مو قصة سوالف حريم .. بس هي تكرهني ويش اسوي لها انا..
ابو سعود : طنشيها..
وعد : لا تطنشيها.. سمعيها كلمتين تبلع لسانها وراها..
ابو سعود حمر عيونة : نعم..؟!!!
وعد : و الله صدق.. اجل تقولها انتِ داخلة هنا بواسطة ابوك.. طيب و اذا هي ويش دخلها..؟! جامعتها و الا جامعتها..؟!
ياسر : ايش تقول..؟!
سها : تقول هذا مو مكانك انتِ دخلتي هنا عشان واسطة ابوك.. فيه بنات احق منك بالمكان اللي انتِ جالسة فيه.. شرشحتني قدام الله و خلقة..
أحمد : سها يمكن انتِ فاهمة غلط..
جود : و الله ما يبي لها اغلاط يعني وحده تقولها كذا يكون فيه احتمالية لانها فهمت غلط ما تجي احمداني..
أحمد : طيب انتِ سويتي لها شيء و تضايقت منها..
سها : لا طالبة جديدة وما اعرف احد ويش بسوي لها.. اصلاً هي من لقاء المستجدات وهي حاطة دوبها من دوبي.. مناقرتني حتى على جلستي..
دانه : انتِ عشانك جديدة مو متعودة على اجواء الجامعة.. يعني فرق عن الثانوي.. بس فترة تتعودين..
سها بقهر : انا ماني هبلة.. هي الوحيدة اللي تعاملني هالشكل.. كل الدكاترة عادي الا هاذي.. بكل محاضرة تسأل عني.. و تسالني و كل محاضرة ترد علي نفس الحكي..
ابو سعود : ماله داعي تعصبين.. دانه ما قالت شيء..
سها : كل واحد اقوله يحملني انا الغلط.. و انا ما غلطت هي حاقدة علي ويش اسوي لها يعني..
ابو سعود : طيب اهدي.. مسرع عصبتي.. الموضوع ما يسوى تعصبين عليه..
سها شتت نظراتها ما تبي تصيح و يحسونها ضعيفة تبكي على شيء زي كذا بنظرهم تافة : ما عصبت..
سعود : عامليها بالحسنى مردها تتغير..
أحمد : ايه هذا الرأي الزين.. اصبري عليها ماهي مدرستك كل المواد..
سها تأخذ نفس و ترمش عشان ما تبكي : هي رئيسة القسم.. و تدرسني مادتين و كلهم ثلاث ساعات.. يعني اربع محاضرات.. بالأسبوع.. و كل محاضرة.. تسأل عني و تناظرني باستهزاء.. و كل محاضرة تسالني تبي توقعني بأي شي.. عشان تنقصني.. درجات..
مشعل : يمديها زيا بلتكم هاذيك اللي حاقدة عليكم بسبب مسيرة بعض الناس..
وعد : ما عليش بس ما توقعتك غبي لهدرجة قالت لك رئيسة قسمهم.. ويش بيخليها تدرسني و انا مو بقسم علم النفس..؟!
مشعل : اهااا ما ادري.. قلت يمكن عاد انتِ ما تخلين احد بحالة..
وعد : طالعة عليك اكيد..
منيره : طيب ليش ما ناقشتيها.. ممكن انتِ سويتي شيء مو منتبهة..
سها صرخت : قلت لا احد يحملني الغلط .. انا ماني مجنونة عشان ما اعرف ويش مسوية..
ابو سعود بحدة : سهــــــا..
وقفت سها و دموعها بتنفجر ماسكة نفسها و مقهورة..
ابو سعود : و الله طالت و شمخت .. من متى ينرفع الصوت بوجودي..؟! و لا بعد على خالتك..؟! اعتذري منها أشوف..
من غير لا ترفع عيونها عن الأرض و صوتها يرجف : آسفة.. وطلعت من بينهم بسرعة قبل لا تنفجر صياح..
البنات كل وحدة تلتفت على الثانية و ساكتات.. من زمان ابوهم ما صرخ عليهم.. بس كأن الأمور بترجع لسابق عهدها..
نهى تلعب بشعرها و تقرب من وعد و تهمس باذنها : كل ذا عشان مناير..
وعد بنفس الهمس : مو شيء جديد عليه..
نهى : من زمان ما هاوشنا.. و لا صرخ علينا..
وعد : و من زمان ماما ما سالتنا عن الدوام شوفيها سالت سها اليوم.. بنرجع مثل قبل يا حظي..
نهى : ايام الكبت و ضيقة الخلق.. اشوا اني بتزوج و الا كان صار فيني شيء..
وعد : لا تفرحين واجد.. ما تدرين لو بيت بابا اهون من بيت فيصل..
نهى بفزعة : اعوذ بالله فاولينا خير..
جود بهمس تنبه خواتها : بس..
التفتن عليها .. جود : ويش صاير اليوم..؟!
نهى : علمنا علمك..
جود : هذا و انا كنت بفاتحة اني اغيب.. الحمدلله عدت على خير..
نهى : ابلعي لسانك و داومي بس..
ابو سعود : و الله خوش رجعنا لمساسرة..؟!
اعتدلت كل وحده بجلستها و لزمت الصمت..
ابو سعود : ما كلمك وليد يا سارة..؟!
ام احمد باستغراب : يكلمني بأيش..؟!
ابو سعود بهدوء : بيسافر..
ام احمد بصدمة : يسافر وين يغدي..؟!
ابو سعود : بيروح دورة برا..
ام احمد : دورة..؟! دورة ليش..؟!
احمد : دورة مع الفريق غازي.. ان شاء الله ماهو مطول..
ام احمد : ويروح معاه ليش..؟! مو على اساس عقاب ثلاث شهور و تقضي.. يأخذه معاه ليش..؟!
خالد : عادي يمه و وليد حاب يروح و يستفيد من الدورة.. ما فيها شيء..
ام احمد : و دراستة..؟! ما يكفي انه مهملها..؟! من صار مع الفريق غازي و هو مهمل كل شيء.. اكله و شربة.. و نومتة.. و دراستة.. حتى جلستة معنا ما عاد يجلس مثل اول..
ياسر : كل ذا حب لوليد يمه..؟! و بعدين انتِ موسوسة.. و الا هذا هو وليد ما تغير غير انه ركد شوي .. احسن له من الهياتة.. اول ما يرجع غير تالي الليل يجلس مع اخوياه.. على الاقل مع غازي الواحد يضمنة و يعرف معدنة..
ام احمد : ليش شايف عليه شيء انت..؟!
ياسر : لا يمه ويش بشوف..؟! عاد ماهو اخر العنقود عشان تشفقين عليه هالكثر..!؟
ام احمد : انا ماني راضية عن سفرتة.. ما ابيها..
ابو سعود : سارة.. وليد ماهو صغير.. يعرف مصلحة نفسة..
ام احمد : لو يعرفها ما ترك دراستة و اهملها.. ما راح لأختة وهو يدري انها محبوسة.. ويش استفاد من روحتة لها.. ولا شيء.. غير انه تعاقب عليها و الحين بيسافر..
ابو سعود : ما اهملها يا سارة.. وليد ما عاد صغير عشان تخافين عليه.. خليه يروح يشوف الدنيا.. < يقنعها و الا يقنع نفسة ان وليد رايح لدورة برا.. ماهو للموت..؟!!
ام احمد : و يرجع مثل خالد بيدة مره و عيال..؟!
: هذا ظنك فيني.. من جدك يمه انا وجهي وجه زواج..؟!
ام احمد التفت له واقف.. ومنزل شنطتة : ليش هاذي..؟!
ابو سعود : قلنا لك بيسافر..
ام احمد : كذا من غير رضاي..
وليد يبوس راسها و كفها و يجلس جنبها : افااا و الله من غير رضاك ما أعتب الباب.. بس تكفين يا يمه خاطري بهالدورة.. ترضين ان ولدك يكون بخاطرة شيء و لا يحصلة..؟!
ام احمد : و انت ترضى تروح لشيء انا ماني راضية عنه..!؟
وليد : لا ما ارضى.. بس انا قلت اجهز شنطتي و اعرفك يا ميمتي ما انتِ رافضة ومخليتها بخاطري..
مشعل كان وده يقوم و يصفق وليد على ذا الاسلوب.. ما كأنه بيروح لمهمة..
ام احمد : قد ايش بتقعد..؟!
وليد : ما ادري للحين ما حددوا..
ام احمد : يعني بتطول..؟!
وليد يبوس كتفها : و الله ما أدري بس ان شاء الله ربك ييسر و يعين..
ام احمد : اول ما توصل تكلمني..
وليد يبوس راسها : ما اقدر قبل ما نطلع الطيارة بيأخذون اجهزتنا ممنوع نكلم أي احد.. بس اوعدك ان جاتني فرصة بكلمك.. بس لا تنتظرينها ما ابي بالك يكون مشغول فيها لان احتمال كبير ما اتصل..
ام احمد : استغفر الله..
احمد : انتِ بس ادعي له يمه الله يوفقة..
ام احمد : الله يوفقك يا أبوي..
..