لو سألتي الورد وهو ما بين ايدك اقطعك للكاتبة ضحكة قهر

20

لاتنادي وانت تدري
يشبهك فيني عنادي
إنت كابر!!
وانا اكابر !!
وتكبر في صدري المقابر
والعمر اللي جمعنا..!
عمر عابر!
لـ : صدووود..!

: انا سمعتهم ما اعرفهم انا بس ابلغكم باللي سمعته..
: طيب ممكن يا اختي تذكرين اسماء المجمعات اللي قالوها..
: الدرة.. و الزمرد .. و فيه واحد ثالث بس كأنه مو بنفس اليوم..
: طيب اسمه..
: الصالح.. ما ادري ماني متذكرة بس سمعت شيء زي كذا..
: يا اختي انتِ وين الحين.!.؟
: ما يخصكم انا وين انا بس بلغتكم.. وانتم اللي عليكم حماية الناس.. وقفلت الخط لتنقطع سلسلة المعلومات اللي ادلت بها..
عماد وقف وبصدمة : وعــد.!.؟
الفريق غازي : من وين لها الجوال.. فجأة لمعت براسه فكرة ليخرج بعصبية و وراه عماد وسعود ..
وليد مسترخي وراء المكتب و مغمض عيونة تعبان صايم وقرفان .. فتح عيونة على يد غازي اللي ضربت بالمكتب قام مفزوع وبعصبية : لو جاتني سكتة قلبية الحين من تخريعك لي ويش بتستفيد..!؟
الفريق غازي مستند على يديه و منحني شوي للأمام: انت معطي اختك جوال..!؟
بلع ريقة وليد : أي اخت عندي سبع خوات بعين اللي ما يصلي على النبي..
الفريق غازي اخذ نفس : اللهم صلي على محمد.. اخلص علي وليد..!؟
وليد : انت ما حددت بس تدري جايب لخواتي جوالات اذكر اني انا شريت لدانه جوالها و جود و اظن سها بعد..
الفريق غازي يصر على اسنانة : انت معطي وعد جوال..؟!
وليد : ليش اعطيها رجلها المسؤول عنها هو المفروض يجيب لها مو انا..
الفريق غازي : يعني ما جبت لها جوال..؟!
وليد : ابداً ..
الفريق غازي اعتدل بوقفتة بعد ما كان منحني للامام ومتكئ على المكتب : لو ادري انك مسوي شيء من وراي يا وليد والا اخطيت خطأ ومخبية علي .. ودريت عنه بيكون عقابك عسير..
وليد باستهزاء : حاضر يبه..
الفريق غازي لف على عماد : ابيك تروح المزرعة تأمن عليها .. وتفتش القسم اللي فيه وعد تقلبه فوق حدر.. اكد على البنات ما يخلونها تغفل عن عيونهم دقيقة وحدة حتى لو هي نايمة يراقبونها و خذ معاك شرطيات زيادة بعد ان لزم الأمر.. ولا تقعد بأي مكان لحالها حتى لو هي طردتهم .. ابيهم مثل ظلها معها..
عماد : حاضر سيدي.. وطلع هاذي اوامر غازي بقي هو بيستجوبها على هواة..
سعود : استغفر الله العظيم..
الفريق غازي التفت على وليد : مانيب قايلك روح مع حمد يعلمك كم شغلة تسويها..!؟
وليد : الا قلت لي و رحت بس ما راقت لي ويش يعني اجلس اكتب و اعدل مره مالي فيذا الاشياء,, من حلاة خطي هقوتي بتحتاج مترجم ان خليتني اكتب لك..
الفريق غازي : وليد لا تستغل صبري صدقني بنفجر فجأة فيك.. تراني مطول بالي عليك.. بس حاسب مني..
وليد : قنبلة موقوتة..
الفريق غازي : متى موعد تدريب السواقة..!؟
وليد : انت قلت بكرة..
الفريق غازي : زين بكره من 9 لـ 11 تكون مرزوع قدام المدرب.. فاهم..
وليد : ليش ساعتين خير ان شاء الله..؟!
الفريق غازي : ليش تسمي سواقتك سواقة .. والله يا وليد ان سيارتي جاها خدش لا ازيد مدة عقابك..
وليد : والله ما احد قالك اعطيني اياها..
الفريق غازي : وليد تراني قادر اريح راسي واسجنك.. بس انت مو مستغل طيبتي معاك وتراددني و مطول لسانك علي و انا للحين عادك حسبة ولدي..
وليد : الحين كل اللي تسويه فيني و حسبة ولدك..!! الحمدلله يارب اني ماني ولدك.. الا لو اني عدوك ويش بتسوي..؟
الفريق غازي التفت لسعود : اشهد سعود اني محذرة اكثر من مره.. غلطة وحده بعد هالكلام ورده علي بهالشكل وتقليل الاحترام بيخليني اسجنة..
سعود : حاضر طال عمرك.. دخل غازي لمكتبة وسعود قرب من وليد : تبي تنسجن لحالك حزتها بترتاح..!؟
وليد : لا ما ابي.. بس عاد هو خانقني ..
سعود : لا تكذب انت اللي مطول لسانك عليه.. خلك محترم معاه واسمع كلامة لانه ما يبي الا مصلحتك..
وليد : طيب نعسان ابي انام..
سعود : والله لو انك محترم معاه وشاف حالتك هاذي كان قالك روح نام من غير لا تطلب بس عاد انت ما تخلي الواحد يسوي خير معاك..
..
وعد تصارخ : قلت لك ما معاي جوال..
عماد بعصبية : لا تصارخين ماني اصغر عيالك..
وعد : تراك خنقتني جعلك تموت ياحيوان .. انا ماني عبدة عندك ربي خلقني حره بنت ناس احرار..
عماد : ليش انا قلت انك عبدة عندي .. ترى زمن العبودية مات و ولى .. انا سألتك سؤال محدد وين الجوال اللي معاك..؟
وعد كتفت يديها على صدرها : وانا جاوبتك جواب محدد جوال ما معي..
عماد : رااااااااااااانيه هيفــــــــــــــــاء..
خلال ثواني دخلن الثنتين باحترام : امر سيدي..
عماد : اقلبوا لي الغرفة فوق تحت ابي الجوال بيدي..
: حاضر ..
وعد تناظرهم ببرود الجوال مخبيته بغرفة عماد .. نظراتها تلاحقهم ..
عماد : ليش ما علمتينا عن مجمع الزمرد و صالح..؟!؟
وعد : ما ادري عن ايش تتكلم..
عماد : اهاا ما تدرين.. راح اخليك تدرين بطريقتي.. بس خلي الجوال يطيح بيدي..
وعد التفت عليه : تراك حاط نفسك والي علي.. انت ترى بالنسبة لي ولا شيء تفهم..!؟ ولااااا شيء..
عماد بسخرية : تصدقين عاد انتِ بالنسبة لي الهواء اللي تنفسة .. ياعمي طيري بس كني ماخذك عشاني متيم في هواك,, فرقاك عيد..
وعد : يالله نعيد مع بعض,, و طلقني..
عماد : تحسبين انه عاجبني اني احس وحده ثقيلة على قلبي مثلك حاطها على ذمتي .. ترى الموضوع مأزمني اكثر منك..
وعد : مبين بدليل انك محبوس مثلي..
عماد : عاد هذا قدرك تنحبسين بين اربع جدران..
وعد : ان شاء الله تنحبس انت مع ذيابة وينهشون لحمك..
عماد ابتسم بسخرية : الذيب ما يخاف من الذيابة..
وعد ابتسمت بسخرية لتردها له بشكل مباشر : كنت متأكدة من يوم ما شفتك انك حيوان مو آدمي..
عماد يأشر على نفسة : انا حيوان..!؟ (مرر لسانة على أسنانة العلوية) : اسحبي كلمتك لا افتري فيك..
وعد : ويش بتسوي يعني بتضربني .. ما يهمني..
و بحركة بسيطة تشبثت يد عماد بشعر وعد ليشدها اليه : لا تحديني انتِ تدرين اني اقوى منك و ما راح تقدرين تجاريني..
وعد احدى يديها على يده اليمنى الممسكة بشعرها بقوة .. ويدها الاخرى على يده القابضة على عضدها بقوة : يا كلب عارفين انك قوي.. ماشاء الله رجال,, صفقوا له يا بنات..
البنات اللي كانن يفترن بالغرفة بحثاً عن الجوال لكن ما ان امسك عماد بوعد التفتوا لهم ..
عماد صر على اسنانة ويده اليمنى تشد شعرها بقوة و يده اليسرى تنغرز بعضدها يشعر بأنه يمسك عظم وليس جلد و عظامها ستتكسر في كفة .. صرخ على البنات : اطلعوووا بــــــــــرا .. خلال ثانيتين خلت الغرفة الا منهم .. امسك وعد بشدة وهي التي كانت امامه وهو خلفها : وعد لا تحديني على شيء ما ابيه قايل لك اكثر من مره .. لا تطولين لسانك والزمي حدودك.. لا تخافين بطلقك بس نخلص من فترة الحجز بطلقك وبفتك منك.. بس من هاللحظة لين يصدر قرار الافراج عنك طيعيني بكل شيء عشان ما افتري فيك لاني ما راح اتحمل منك كلمة وحده زيادة.. ضغط بيده الممسكة بشعرها ليجعل رأسها يتقدم نحو الامام و يعود به للخلف مره أخرى : فااااهمـــــــــــــة..
وعد : لاااا ماني فاهمة... ولا راح افهم.. طلقني ما ابيك والله لا اشتكي عليك.. لا تحسب اني ضعيفة والله لا انتقم منك يا حيوان اكرهـــــــــــك.. كلكم اكرههههكممم..
عماد : عاد انا المتيم في هواك .. الحين وين الجوال..؟
وعد : ما عندي جوال يا رجال يا قوي..
عماد افلت يده عن عضدها ليمسك بذراعها يلفة وراء ظهرها و يضغط على ذراعة بقوة .. صرخت وعد من شدة الألم : آآآآآآآآآآآآآآآآآآآآآآآآآآآآآآآآ ياكلب والله لاشتكيك..
عماد : احسن لك تكلمي وين الجوال..
وعد : ما عندي..
عماد : من وين كلمتي المركز وقدمتي البلاغ بان فيه متفجرات بمجمع الزمرد و صالح..؟!
وعد : ماهو انا..
عماد : كذابة انا سامع التسجيل باذني ما راح تخوني اذني بصوتك..
وعد شوي وتصيح من الالم : طيب اترك يدي..
عماد : اول شي قولي وين الجوال..؟
وعد : في جيب بنطلوني الجنز..
تركها عماد بحسن نية اتجه للدولاب .. لتمسك هي بالفازة الصغيرة الموجودة على الطاولة وترميها على كتفة وتطلع برا الغرفة وتقفل عليه الباب..
ارتفع صوت الفازة على الارض لتنتشر اشلاء عند اقدام عماد وضع كفة اليمنى على كتفة اليسرى مكان ضربة وعد : آآآخ .. ويش تحسبني جدار ما احس.. والله لأوريك يا وعيد ما اكون عماد.. اتجه لباب المقفل فقد سمع صوت القفل عدة مرات بعد خروجها طق الباب اكثر من مره : وعـــــــــــــــد..
وعد واقفة قبال الباب : جرب انك تنحبس يا حيوان مثل ما حبستني..
عماد : تراك تلعبين بالنااار..
وعد : عادي حياة معاك جهنم اصلاً ما تفرق معاي..
عماد : رانيه افتحي الباااااااااب..
اتجهت رانية للباب لكن وعد دفتها : ابعدي مالك دخل .. فاهمة ..
رانيه : هذا امر من سيادة العميد..
وعد : والله ما تفتحين الباب..
رانيه : يا بنت الحلال بتودينا بداهية امر من سيادة العميد ما احد يقدر يخالفة..
وعد : انقلعي هناااك والا بفتري فيك ما راح يفيدك لا سيادة عميد ولا غيره..
هيفاء : ارجوك يا سيدة ما ينفع اللي تسوينه..
وعد : مالكم دخل.. والله لاوديكم بداهية لا عصيتوني..
بنت جديدة من اللي جابهم عماد : يا اختي ما ينفع اللي تسوينة هذا سيادة العميد مو حيا الله راح تتهمين بالتعدي على رجل امن و حبسة..
وعد : فيلمك هذا اللي قلتية ما يهمني انا محبوسة محبوسة على الأقل أطلع بفايدة و انتصار..
فجأة طغى صوت على محاولات اقناع هيفاء ورانيه لوعد .. كان صوت الباب اللي انكسر قفلة من عماد اللي ضرب القفل بدرجة الكومدينة بعد ما خرجة من مكانة بضربة وحده طاح القفل وفتح الباب .. ابتسم بعبث اول ما شاف وعد قدامه صرخت من فجعتها بطلعتة : آآآآآآآآآآآآآآآآآآآآآآآآآآآ..
راحت تجري تنحاش دخلت غرفة عماد بتقفل الباب بس رجل عماد كانت عائق لها على الباب دف الباب لتبتعد هي عنه : انت اللي بديت..
عماد : انا اللي بديت ..
وعد كانت تتراجع وراء وعماد يقرب منها : شوف والله ان سويت لي شيء لا افتري فيك ترى حتى انا يطلع مني مو بس انت..
عماد : هههههههههه انتِ يالنتفة بتفترين فيني ..علميني وشلون بتفترين فيني بتضربيني بفازة على راسي..؟!
وعد : ايه و اقتلك بعد واخليها دفاع عن النفس..
عماد : دفاع عن النفس..!! مشكلة ان هنا عندنا شهود لو كنا لحالنا كان يمكن احتمال واحد بالمية يعني تمشي خطتك..
وعد ضربت بالكومدينة خلاص بقي على الجدار خطوة : اسمع خلنا نسوي اتفاق..
عماد يوقف خطواتة وهو مبتسم على خوفها وهروبها منه كتف يديه : ويش هو اتفاقك..؟
وعد بلعت ريقها : انا اعطيك الجوال بس تكون برا .. ولا عاد تجي هنا..
عماد : لااا اتفاقك غلط مافيه ايه عدل بيننا .. تعطيني الجوال ما اعاقبك على تخبيتة .. لكن على انك ترمين الفازة علي وانا رجال طول بعرض ولا تستحين هاذي كبيرة.. ما تنغفر لك ابد..
وعد ظناً منها انها ممكن تتغلب على عماد وتنحاش منه بأقل الخساير او تبي الانتصار.. تنحاش ولا يوصل لها ولا تعطيه الجوال يعتبر انتصار و يسجل بسجلات الحياة العقيمة بينهم.. راحت تجري برا الغرفة لكن عماد كان اسرع و وصل لها قبل لا توصل للباب : مو كل مره تسلم الجرة يا وعد.. وين الجوال ترى صبري بدا ينفذ..؟
وعد : قلت لك ما عندي جوال..
عماد : توك قايلة لي بتسوين اتفاق وتعطيني الجوال لا كنت برا .. وعد لا تحديني استخدم اساليب شديدة معاك ... والله العظيم عندي شغل فوق راسي و انتِ ماخذة من وقتي..
وعد : انت اللي جيتني ومضيع وقتك مع وحده ما تبيك انت اللي ضيعت وقتك بنفسك لا تغلط و تبرر خطاك وتحطني السبب..
عماد : اسلوب الفلسفة مو علي .. خليك عاقلة واعطيني الجوال..
وعد : ان زين اوعدني بشي..
عماد : لو انك معطيتني اياه اول ما طلبته كنت وعدتك بشيء, لكن الحين فوق اللي سويتيه تبين تأخذين مقابل.. ترى ممنوع يكون معاك جوال انتِ ممنوعة من التواصل يعني اللي تسوينة جريمة يا وعد راح يشككون بولائك وانك ممكن تسربين معلومات..
وعد بلعت ريقها : قصدك للعصابة..
خفف عماد من ضغطة عليها وهي التفت له : ايه..
وعد : بقولك شيء..
عماد : قولي..
وعد : انا ما خنت الدولة .. و روحي فداها .. بس مالي ذنب..
عماد تغيرت ملامح وجهه : ويش تقصدين..!؟
وعد: هم قالوا لي شيء وما سويته.. بس بعدين ما ادري..
عماد سحبها وجلسها على السرير : شوفي ادري ان اللي مريتي فيه مو هين.. بس حطي قدام عيونك ان هذا امن وارواح ناس يا وعد .. لا تستهينين بالموضوع ابد.. أي حرف تقولينه لي وان ما كنت موجود كلمي البنات يدقون علي وانا بجيك..
وعد : صلاح..
عماد : ايش فيه..!؟
وعد : صلاح و واحد ثاني معاه هم اللي قالوا لي..
عماد رفع حواجبة يحاول يستوعب الكلام اللي قالتة : ويش قالوا لك..!؟
وعد : قالوا لي اقولكم على التفجير بمجمع الدرة..
عماد : نعــم.؟!
وعد : لا.. هم قالوا لي انهم بيفجرون مجمع الزمرد والقنابل اللي فيه ماهي خطيرة .. (رفعت يديها بتشتت) ما ادري..
عماد مسك يديها المرفوعة بتوتر شد عليها : حاولي تسترخين.. وعلميني ويش اللي صار بالضبط..!؟
وعد : بعد ما وصلنا المكان هناك.. اخذني صلاح داخل.. وقابل رجال.. وقالوا لي احنا بنوصلك للشرطة ولا راح نسوي لك شيء.. بس خليك عاقلة و اسمعي كلامنا.. نبيك تبلغين الشرطة عن تفجير في مجمع الزمرد و مجمع صالح يوم خمسة رمضان..
عماد من كل كلمة بل كل حرف حرارة جسدة ترتفع من شدة غضبة وكأن النار بينه وبينها هي فقط .. يحاول ضبط اعصابة سيترك لحظة انفجارة فيها للأخير : و بعدين..
وعد : انا وافقت لاني خفت على نفسي.. قال صلاح انه بيتواصل معاي على جوالي.. بعدين رجعني للسيارة و هناك سمعت الثنين اللي اسمائهم ابو نمر و ابو سبع انهم بيفجرون مجمع الدرة بس والباقي بيكون لتشتيت الامن عشان ينشغل بالتحقيق و يقدرون يهربون الاسلحة والمخدرات بعدها باسبوع بيكون خف التشديد والتفتيش والامن بيكون بمركزة يحقق بالقضية مع صلاح و واحد ثاني نسيت اسمه وهم بيسرحون ويمرحون على كيفهم..
عماد : غيره..!؟
وعد : قالوا .. ان فيه احد يخونهم.. و انهم راح يعاقبونة بس يكشفونة..
عماد : غيره.!.؟
وعد : بس..
عماد : تدرين ويش ودي فيه الحين..!؟
وعد ببراءة : ويش..؟!
عماد : انحــــرك..
وعد انقبلت حالتها : يكون ازين على الاقل ما اقابل خشتك .. ولا انتحرت عشان ما ادخل النار .. انت اللي قتلتني..
عماد : اللهم اني صايم.. هاتي الجوال..
وعد : طيب انا اطفش..
عماد : هاتي الجوال هاذي مسؤولية يا وعد هاتي الجوال..
وعد دفت الكومدينة وطلعته من تحتها مدته عليه : ما تخافين اعرف مخبئك السري..
وعد : لا ما اخاف يا كثر المخابئ السرية .. بخترع لي واحد ثاني..
عماد يقلب بالجوال : لا عاد تلعبين معاي.. ان شاء الله ما تتعرضين للمسألة عشانك مخبية معلومات على الأمن..
وعد : لا تكذب ما خبيت اتصلت و بلغت.. يعني انا اول شيء علمتكم على اللي سمعتة من الرجالين .. بس بعدين فكرت انه من الاحتياط اني ابلغكم على اللي قالوه بعد ما يندرى ويش يسوون..
عماد : يطلع منك .. يعني ما ينقال انك ذكية بس ممكن تجيك شطحات.. شكلها من الشيطان..
وعد تجلس على الكومدينة : ايه معاشرة لي شيطان هالايام متأثرة فيه..
عماد ابتسم : انا شيطان ..!؟ لا حول ولا قوة الا بالله..
وعد : اللي على راسة بطحاء..! تصدق اني انا معطيتك وجه بالرغم من اللي سويتة فيني..
عماد من غير لا يناظرها يفتش بالجوال : وتصدقين انا بعد معطيك وجه..
وعد : لا ما اصدق..
عماد وقف : ابي اجي على الفطور و بما انك زوجتي انتِ اللي تسوينه ما احب اكل الشغالات..
وعد باستهزاء : بس كذا من عيوني حبيبي..
عماد يدري انها تستهزء فيه : تمام أي شيء تحتاجونه كلموا بدر يجيبه لكم..
وعد : طيب.. ما انت معتذر عشانك شديت شعري و بغيت تفتت عظامي..!؟
عماد : و انتِ بتعتذرين عشانك بغيتي تكسرين كتفي..!؟
وعد : لا..
عماد : وانا بعد لا..
وعد بثقة : على راحتك.. مردك تندم..
عماد رفع حاجبة بسخرية لها : انا اندم.. ما عرفتيني..
وعد : عادي من هاللحظة لين ينتهي الحجز بعرفك مثل لما تكون خبز يديني..
عماد يعطيها ظهره و بيمشي : تبطين عظم يا بنت ابراهيم..
وعد : بذكرك اياه يا ولد عامر..
..
رند : باباتي ما ابعى..
خالد : رند ترى طفشت من الصلاة وانا اتحايل عليك..
رند : انا ما احبت..
خالد : و انا احبك.. يالله يا بابا..
رند : لاااا ما ابعى انا ما احب دواء مو تعم..
احمد جلس جنبها : ويش عندها حبيبة عموو..
رند : عموو انا ما احب دواء مو تعم..
احمد : اه طيب انتِ تحبين تكونين مريضة وتعبانة وما تلعبين..
رند : لااا..
احمد : اجل لازم تأخذين الدواء عشان ما تتعبين مرة ثانية..
رند : تيب بس سوووويه..
احمد ابتسم : على خشمي كم رنود عندنا..
سعود : السلام عليكم..
: وعليكم السلام..
سلم على ابوه وامه وخالاتة وجلس او بالاصح تمدد على الكنب : بقي شوي وانهار من التعب..
ام سعود : بسم الله عليك يا ابوي خذ يومين اجازة رئيسك مو رافض لك..
سعود : يمه مو بس انا اتعب حتى اللي معاي و حتى رئيسي يتعب بس كله يهون عشان البلد..
ام سعود : يا ابوي انا خايفة عليك..
سعود : هذا ابوي ما خاف علي .. يمه اللي اسويه انا واجب علي وعلى كل انسان قدام جنسيتة مكتوب سعودي..
منيره : لا تشيلينه هم فوق هم يا ام سعود.. الله حامية هو واللي معاه ان شاء الله..
سعود : عليك نور يا خالة الله الحامي..
ام احمد : ما شفت وليد من طلع الصبح ما رجع..
سعود : عند الفريق غازي لا أحد يشيل همه.. يبه تراه يوصيك ما تصلح له السيارة ولا تعطيه أي سيارة لين يتعلم.. لانه سحب الرخصة منه..
ابو سعود ابتسم : شكله بادي حامي مع اخوك..
سعود : اليوم خلاه يكرف و وليد يستاهل صراحة لسانة ويش طولة.. حتى الشباب توسطوا له عند الفريق غازي يروح البيت ينام بس هو رفض .. عشان ما ينساها..
ام احمد : يا عزتي لولدي كارفه وهو صايم..؟
سعود : ماهو صاير له شيء يا خالة الفريق غازي عارف ويش يسوي.. معاملة مثل ولده..
ام احمد : مثل ولده و انت تقول كارفة..
سعود : ايه و يحق له يكرفة عشان اللي سواه ماهو شوي..
ام احمد : خالد يا ابوي دق عليه شوفة وينه بقي نص ساعة عن المغرب..
سعود : يمكن يفطر مع الفريق غازي لاني طلعت من المكتب وهو كان عنده يشتغل معاه..
ام احمد : ابو سعود دق على غازي قله يصرف الولد ما صارت من الصبح عنده ويش هالشغل اللي للمغرب..
ابو سعود : ما راح اتدخل غازي يعرف ويش يسوي .. خله يأدب وليد يكفي له خمس سنين قاضيها بالثانوي وليته يأدب مشعل معاه..
مشعل بفاجعة : ويش سويت انا..؟!؟
ابو سعود : ست سنوات قاضيها بالثانوي.. اللي مثلك باقي له سنة و يتخرج وانت توك تخش الجامعة ما تستحي لا سأل الدكتور كم اعماركم اللي معاك يردون اعمارهم 19 و انت 22 ..
مشعل : يبه ويش جاب طاري الدراسة الحين.. انا تعبت وسويت اللي علي و هذا انا نجحت..
ابو سعود : لو انك مسوي اللي عليك من اول سنة خشيت فيها الثانوي كان المفروض متخرج من زمان .. بس استحيت لا يطلع وليد اللي اصغر منك من الثانوي قبلك وهو وده ينافسك بشيء شديتوا حيلكم بأخر سنة.. اذا الدراسة ما قدرتوا عليها بتقدرون على فتح بيوت..
ام احمد : ابو سعود الله يهديك ويش بلاك على الولد حاط حرتك فيه..
ابو سعود : لا تدافعين عنه يا حنان .. هذا اللي خرب الاثنين وليد ومشعل دلعك لهم لا هاوشتهم رحتي لهم من وراي طبطبتي عليهم كنك تقولين لهم اللي سويتوه صح لين خربوا..
ياسر : يبه طبيعي امي تطبطب علينا أي ام بالدنيا تطبطب على عيالها مو بس امي .. امي ما غلطت.. امي مو السبب بدلع اخواني .. حتى انت يبه..
سعود : يــــــــاسرر..
ابو سعود : سعووود خله يقول اللي عنده .... قول يا ياسر..
ياسر : يبه تعرفني ما اطق الطار مقلوب .. انت بعد كل عمرك حاكمنا نحضر مجالس الرجال و ان اعترضنا غصبتنا عليها .. لكن مشعل و وليد جابوا لك ابسط عذر سمحت لهم .. غير كذا سامح وليد يسهر برا البيت من متى احنا نسهر برا البيت لين تالي الليل..!؟
ميار تهمس لسها : شكل المواجهة حامية..
سها : حيــــل عاد ياسر لا عصب ما يعرف مين قدامة..
ميار : يعني ممكن يتهاوش مع بابا..!؟
سها : بابا ما احد يقدر عليه..
ميار : الله يستر لا تقوم حرب..
ابو سعود : الله و اكبر صرت انا غلطان الحين .. مو انت جيتني يا احمد وقلت لي يبه الدنيا تغيرت و اخواني يحق لهم يسهرون برا البيت مو للفجر بس على الأقل لـين 2 ..
احمد : ايه يبه وانا عند كلامي.. الدنيا ماهيب مثل اول ... الشباب ما يطلعون الا بالليل و سهرات مع اخوياهم..
ابو سعود : الحين انا اللي اتحمل الخطأ..
ياسر : لااا ولا امي اللي تحمل الخطأ.. لان هم كبار ما يصير يبه تحمل امي دلعهم..
ابو سعود : اشوفك تدافع عن امك.. ليش ناسي مين ابوك..!؟
ياسر : لا ماني ناسي على راسي..
ابو سعود بحزم : وليد بخلي غازي يريبة على كيفة ولو اقابلة بقوله ادبغة زيادة .. و ان يبي زيادة عطيتة مشعل..
مشعل : يبه ويش بلاك تبي تبرأ مننا..
ابو سعود : لا تقولني كلام ما قلتة.. اصطلب يا مشعل و خلك رجال..
مشعل ينهي النقاش قبل ان يتفرع و ينتهي بتجريح و اوامر : ان شاء الله على أمرك..
فارس : بابا..
ابو سعود ابتسم : تعال..
تقدم فارس و رفعة ابو سعود جلسة على رجله : ويش فيك زعلان..
فارس : شوف ولد خالد اقوله قول عمي يقول لا انا اكبر منك..
ابو سعود : عاد ولد خالد ما نقدر عليه..
فارس : ليش مو انا عمه..
ابو سعود : عمه و نص..
فارس : خله يقول لي عم..
خالد : فويرس خل ولدي على جنب لا تدخله بدلعك..
فارس : طيب خله يقول لي عمي مو انا اخوك..
خالد : بس كذا ولا يهمك.. نخليه يقولك عمي..
رند : لا انتِ سععععيررررة مو عمي..
سعود : يا عيني على طوالة اللسان..
فارس : اسكتي لا اضربك و انتِ بزر..
رند : مااا ابي ما تقدلين تدلبيني..
فارس اللي كان بينزل من حضن ابوه شد عليه ابو سعود : من جدك بتضرب بنت اخوك..! الرجال ما يمد يده على مره..
فارس : هي تكلم علي..
ابو سعود : ما عليه بكره بتكبر و تعرف الصح..
رند : انا تبيـــــرة .. مدت لسانة تقهر فارس..
جود : خويلد نصيحة اقضب بنتك والا بتجي وما تلقى غير عظامها..
ام سعود : لا بسم الله عليها .. الله يحفظها..
رند ترفع يديها تدعي : الله يحفدني..
سعود : ههههههههههههههههه تعالي يا عمي..
رند : لااا ما ابي..
خالد : روحي كلمي عم سعود..
رند تجلس بعد ما كانت واقفة على الكنب بين ابوها و احمد : لاااا ما ابي..
سعود : بعطيك فلووس..
نطت رند على الارض بسرعة واتجهت لسعود ومدت يدها : هاتي فلوسي..
سعود : صارت فلوسك من متى..!؟
رند : انتِ دلتي.. (التفت لابوها بزعل) بابا سوفي عمه سعودي..
مشعل : لا تخلي بنتك تطلع برا صدقني على اول طيارة برااا السعودية.. بيشككون بوطنيتها خصوصاً مع ذا العيون الرمادية..
سعود شالها : بعطيك فلوس بس قولي عم سعود..
رند : عم سعووودي.
سعود : حلوو عم.. ليش قبل شوي تقولين لي عمه..؟ انا رجال مو مره..
خالد : لا تحاول تعلم,, ما ينفع بكره تكلمك كنك بنت عادي..
ام ندى : توها صغيرة عليها بكره تكبر وتعلم..
رند : يالله هاتي فلوسي..
فارس : حتى انا ابي فلووس..
رند : انتِ لااا بس انا عمه سعودي يعتيني فلوسي.
نهى : عز الله كدينا خير بيأذن المغرب واحنا نتسامر على نقار بنت خالد وعمها..
ابو سعود وهو يناظر رند اللي تناظر محفظة سعود بيده ويطلع لها فلوس منها : تشبة وعد..
دانه : لا بابا تشبه امها..
ابو سعود : تشبه لها بدلعها .. نفس حركات وعد..
ام ندى : صادق والله .. مره تذكرني فيها..
خالد : ابشركم أنا توظفت و صرت كابتن..
ابو سعود : مبروك ان شاء الله..
خالد : الله يبارك فيك يالغالي..
: مبروك يمه ولو اني ما ابيها..
خالد ابتسم : الله يبارك فيك.. بكره بتعودين يمه عادي.. صار لي سنين ادرس برا..
جود : اهم شيء لا تنسى اختك حبيبتك لو تعلقها على الجناح ما تقولك لا..
خالد : اختي .. و حبيبتي.. و تبيني اخذك معاي اهنيك على الثقة العمياء..
..
الفريق غازي : ابيك تنزل تفطر عندي..
وليد : لا كثر الله خيرك الجايات.. ابي انام ما ابي فطور..
الفريق غازي : ماشي بكره تكون عندي قبل سبعة الصباح ان شاء الله..
وليد : ان شاء الله..
الفريق غازي : ما يصير ما تفطر انت تعبت اليوم..
وليد : ما اتوقع اني اهمك عشان تخاف على صحتي.. لك عندي ثلاث شهور اشتغل عندك فيها واسمع طلباتك غير كذا رجاءاً لا تدخل..
الفريق غازي : قصدك خمس شهور لا تنسى انك كذبت علي وعطيت الجوال لاختك..
وليد : خلاص ياخي ما راح تنسى .. اللي يسمعك ماني جالس اتعاقب الحين..
الفريق غازي : وليد تعلم ترد علي بأدب..
وليد : انا قرفان من نفسي يعني احتمالية اني ارد عليك بأدب هاذي مره ضئيلة..
الفريق غازي : اسمعني بمرر لك هاذي لكن أي كلمة من بكره تقولها غلط تزيد عليك يوم عقاب..
وليد صد عنه يناظر الشارع .. يبي المهلة تخلص وغازي كل مره يزيدها ولا ينقصها..
الفريق غازي : انتبه لا تزيد السرعة عن 80..
وليد : ان شاء الله.. على امرك يالغالي..
ابتسم غازي يدري ان وليد باقي له شوي و يفصل و يمكن يسوي حادث من كثر التعب.. كان يراقبة بدقة حتى ما يسوي حادث و يروح فيها الاثنين..
لف وليد حتى يسلك عدة مترات في الشارع الداخلي و بعدها دخل على اليمين من بوابة فيلة غازي حتى تستقر السيارة بعد لحظات امام الباب..
الفريق غازي : انزل..
وليد : قلت لك ما ابي افطر بنام..
الفريق غازي : طيب قلت انزل وتعال اركب مكاني..
وليد بطفش : ممكن تأجل دروسك للوقت اللي اكون مصحصح لك فيه..
الفريق غازي يفتح بابة : قلت انزل..
فتح وليد الباب بطفش ونزل واتجه للجهة الثاني..
الفريق غازي : جعفــــــــــر.. جعفـــــــــــــر..
لحظات و جاء جعفر بخطوات سريعة : نئم بابا..
الفريق غازي : وصل وليد لبيتهم..
جعفر : حاضر بابا..
الفريق غازي سند ذراعة على باب الراكب : بكره بيمر عليك جعفر الصباح وبعدها تجيني عشان نروح المركز..
وليد : ليش الحوسة هاذي كلها خل جعفر يجيبك وانا اجي مع سعود وقضينا..
الفريق غازي : لا ابيك انت اللي تسوق فيني حبيت سواقتك..
وليد يدري ان غازي يستهزئ فيه : طيب .. ان شاء الله نروح مره نفحط انا و اياك..
الفريق غازي : اوك بس لا تحطها بيوم ماني فاضي .. عشان اروق معاك..
..