لو سألتي الورد وهو ما بين ايدك اقطعك للكاتبة ضحكة قهر

61

الشوق لو ماهو من القلب نابع
مابي تجاملني .. ولا تحتويني

تملا فراغات الاصابع ب اصابع
وحاجة يساري مالها الا يميني

لـ صدووود..

بيت عامر.. البارح صدمتهم البتول ان عماد طلقها و تمسكنت عندهم و عامر وعدها يوقف معها.. لكن عماد من طلعتة ما رجع..
عامر : و انت متى ما اشتهيت و طقت براسكـ طلقت..؟!
ام ناصر : حرام عليكـ اللي تسوية.. بـ يرجع لكـ بـ خواتكـ و بنتكـ .. لا جاتكـ مطلقة تعرف شلون كسرت هالبنات..
ام عامر : يا وليدي ما يصير طلقت بنت عمتكـ و بنت خالتكـ ما احد بيظن فيكـ خير.. يا وليدي الدنيا سلف و دين.. هي البنية سواياها شينة.. بس ما نبيكـ تطلقها.. نبيكـ تضفها و تأدبها ما ظنتي صعبة عليكـ ..
عامر بـ حدة : ترجعها يا عماد.. تفهمني.. ترجعها..
عماد مرهق من السهر و التفكير المتعب : آسف يبه .. خاطري عايفها..
عامر : تبي تعصيني يا عماد.. خليت البنت و خاطرها مكسور و ضاربها .. مستقوي عليها ..؟! ويش اللي ما عجبكـ فجأة فيها..؟! مو البارح نكلمكـ عنها نبيكـ تقضبها و تسنعها و ما رضيت عليها..؟!
ناصر : ما تبي ترجعها هي رجع ام بنتكـ اجل..!!
مريم كتفت يديها : لا.. وعد طلعوها من الحسبة.. ما بقي فيها شيء زود عشان يقضي عليه عماد..!!
عماد وقف و ناظر عمتة : ان كنت عايف البتول مره فـ أنا عايف وعد مية مره.. ماني ميت عليها عشان اردها.. لو ابيها في بيتي ما راح يهمني احد حتى ابوها.. اقدر اجيبها غصباً عنها..
مريم عصبت : ماهو بـ كيفكـ يا عماد تكسرها .. ما قصرت فيها هذا انت رميتها بـ بيت ابوها مطلقة.. ليش حاسب ان الناس ما تعيش من غيركـ و انت متفضل على الكل.. و من بغيتة قربتة و من كرهتة ابعدتة..
عامر : مـــريم الله يرضى عليكـ .. ما انتِ كارهة الزين لـ بنتكـ ..
مريم : ليش تشوف ان الزين ترجع لـ ولدكـ ..!!
عامر : ان ما كان زين له و لها فـ هو زين لـ بنتهم.. لساتها صغيرة و الحين رابية بـ حضن امها .. بس تكبر شوي بـ تشتت بين ابوها و امها..
ناصر : عدا ان امها يمكن تتزوج.. لسى صغيرة و مو بعيد نسمع خبر زواجها بعد عدتها..
عماد هز كتفة : ما تهمني .. اللي يهمني بنتي..
عامر : دام بنتكـ تهمكـ رجعها و الا رجع البتول..
عماد : ما ابيهن الثنتين.. يبه مالي خاطر فيهن..!! (مسك أطراف جاكيتة بـ قوة يشدة) كارهن.. كاره جنس حواء كله..
عبدالله : عشانكـ للحين مقيد نفسكـ بـ قيد ما فكيتة من عمركـ رغم ان المفتاح بـ يدكـ ..
عماد يصارخ : تراكم طفشتوني.. كرهتوني حياتي.. ما صار قلب و تعلّق.. صارت روح و تنهان..
عامر بـ حدة : لا تصارخ .. احترم وجودي..
عماد صوتة انبح : انا محترمكم لكن انتم مو محترميني.. حياتي ما احد له دخل فيها .. اذا سمعت منكم ربع كلمة عن وعد و الا البتول راح اتركـ البيت لكم..!!
ام ناصر مسكتة من ذراعة : لا تكفى يا ابوي لا تتركـ البيت.. احنا ما نبي الا مصلحتكـ ..
عامر : باليوم اللي تطلع من البيت وهاذي نيتكـ .. فـ بيتي يتعذركـ لأخر العمر يا عماد.. ماهو انت اللي تهددني.. كان انت ما سويت لأبوكـ حساب وهو اب واحد.. تبي ابوكـ يسوي لكـ حساب..!!!
طلع عماد من بينهم اعصابة تلفانة..!! ما نام من البارح ما بين فرارة شوارع و جلسة بالمكتب.. ركب سيارتة و يلف بدون هدف.. هو كذا الحب يوقف الحياة..؟! هو العيب فيه و الا فيهن.؟! ثلاث..؟! اخرهن عايرتة و عافها.. وقف السيارة و سند راسة مسح على شعرة وده ينتف شعرة شعرة و يخرج كل هم عالق بـ راسة.. كتف يدينة و غمض عيونة.. يلوم نفسة اللي ما فهم تفكيرهم..؟! "تفكير المجتمع" ليته اتبع نظرتهم و خبى كل شيء بـ خاطرة على الأقل ان ما لقى مع من حب لقى ما يلقى من يتشمت فيه.. شيء بـ خاطرة و يـ ندفن بـ خاطرة.. مسح وجهة بيدينة الثنتين : حسبي الله و نعم الوكيل.. حسبي الله و نعم الوكيل.. شاف طيفها مبتسمة له و كأن صورتها عالقة بـ جفن عينة .. ابتسم لا شعورياً .. شوفتها بـ تهون عليه واجد.. شغل سيارتة يروح يـشوفها.. فجر.. دائماً البدايات من الفجر.. يمكن شوفة لـ بنتة تكون بداية جديدة..
..
بيت غازي.. في مكتبة.. جالس على الكنب ينتظر بنتة..
من غير لا يرفع نظرة عن الأوراق : ادخلي..
دخلت متوترة من بعد ما قالت له انها حامل ما كلمها.. تفاجأت بتجديد عقد زواجها من امها و لما جاب لها الدفتر توقع ما قال لها شيء.. حاسة انه زعلان منها.. قبل سنتين و نص وقفت في نفس المكان.. مذنبة..!!
رفع عيونة لها و نزل النظارة : انا معودكـ تدخلين عندي كذا..؟! و الا نسيتي كيف تسلمين على ابوكـ ..؟!
قربت منه و دنقت تبوس راسة.. و رفعت كفة باستها بعدها باست كتفة و ما رفعت راسها لأنها بكت.. حط يده وراء ظهرها و جلست و لفت يدها اليمين على رقبتة.. ما شالت راسها عن كتفة اليسار..
لينا : آسفة بابا و الله العظيم ما فكرت بـ هالطريقة.. و الله ما كان قصدي اسيء لكـ ..
غازي : ادري يا بابا ان هذا مو تفكيركـ .. احيان الواحد من التوتر او الخوف يروح عن بالة اشياء ثانية.. عمر كان تفكيرة انه يبعدكـ من المكان و يأمن عليكـ .. و انتِ وافقتية و قررتوا قرار خاطيء .. لو اني اشكـ بـ نيتة يا لينا و الله ما خليتكـ على ذمتة دقيقة وحدة.. لكني واثق فيه شخص يضحي بـ نفسة عشان يحمي وطنة و يفديها بـ روحة وعلى عاتقة هم كبير و جيتكـ عنده زادت همة و حطكـ بـ عيونة (رفع راسها عن كتفة و حضن وجهها بين يدينة يمسح دموعها بـ إبهامة) وين بـ القى لكـ ازين منه..؟!
لينا : انا ما ابيكـ تزعل مني.. و الله بـ اسوي كل اللي تبيه مني بس الله يخليكـ لا تتركني.. انت اماني..
ابتسم غازي : ما راح اتركـ انا ماني عايفكـ يا بابا.. (باس جبينها) عمر كلمني ..
مسحت وجهها من اثار دموعها.. و تنحنحت..
غازي : اجلسي زين اول شيء هاذي ماهي جلسة زينة لكـ ..
لفت بعد ما كانت جنبة و معاكستة و سندت ظهرها على الكنب ما ودها تسأل وش يبي..!!
غازي رفع حواجبة : ما تبين تعرفين ويش يبي..؟!
لينا : يعني اذا تبـي تقول لي..!!
غازي ابتسم : لا تحاولين تلعبين علي.. نسيتي اني غازي بن حمدان..؟!
لينا ابتسمت : ما نسيت.. الله يحفظكـ لنا..
غازي : طيب لا تحاولين تراوغين معاي..
لينا : بابا ما راوغت يعني اذا انت ودكـ تعلمني اكيد بـ تعلمني..
غازي : انا ابي اعرف انتِ تبين تعرفين و الا لا..؟! بـ اشوف مهتمة لأمرة..!؟
تمسح على اظافرها : يمكن.!.! ما اعرف يعني لو..؟!
غازي : لو ايش..!؟
لينا : اني انجبرت..!؟
غازي : انجبرتي..!؟ المشاعر ما فيها اجبار يا لينا.؟!
لينا : بس انا .. يعني ما كنت اشوف احد غيره.. هو كان يوفر لي كل شيء.. يعني يمكن لو انا بـ حياتي العادية ما شفتة و لا عرفتة.. ما اعرف بابا بس كان يعني..!! صح يحميني.. بس..!!
غازي مد يده على كتفة يمكن تطمن.. حاس انها خايفة : قولي لي يا بابا.. لا تخافين من شيء.. سوا انا او عمر او غيرنا.. بـ احميكـ بـ روحي..
لينا : اغلب حياتي هناكـ هواش.. معاه طبعاً.. كان يقهرني و ادعي عليه من قهري.. و لما جاب لي بنت عماد.. دعيت عليهم الله يحرق قلوبهم وهو واحد منهم.. كنت احس اني لعبة بـ يدة.. اذا ما بغى يسمعني و الا يجاوب على اسئلتي عصب علي و انا اخاف منه.. مرات ما يهمني احس ان مالي احد ليش اخاف على روحي و ما احد يبي قرب هالروح..!! بس ..!! كنت احس بالأمان معه.. اذا اضطر يطلع يدب فيني الرعب لين يرجع اخاف احد من الرجال اللي شفتهم يدخل عندي..!!
تنهد غازي : عصبيتة و هواشة لكـ كان شيء طبيعي .. هو متوتر اصلاً بـ وجودة هناكـ اكيد بـ يخاف على نفسة .. و انتِ كنت عبء زيادة عليه.. يعني زوجة بـ وسط ظروفة هاذيكـ تثقلين عليه شيء طبيعي يعصب عليكـ .. ما انتم بـ حياة عادية وجودكـ بـ حياتة يهون عليه..
لينا نقزت من مكانها لـ مجرد التفكير بـ هالإحساس : طيب اذا تزوجني عشانكـ ..!؟ يعني يمكن هو ما يبيني.. بس تورط معاي..!؟
غازي شد عليها : ليون بابا بدون انفعال.. عمر لو ما يبيكـ ما قرب منكـ .. صدقيني هو مهتم لأمركـ انا كنت بـ اعاقبكـ و اعاقبة.. بس هو كلمني اليوم.. و أكد لي انه ما فكر يقرب منكـ لو ما يبيكـ .. انا قبل لا يتصاوب كنت ناوي اروح له و اشكرة من جديد و اقوله ان اللي انربط بينكم بـ ينحل عشان ما احرجة و لا راح اسكت عن الموضوع و اعلق زواج حتى شروطة ماهي تامة.. ما كنت ادري انكـ حامل و مخبية علي..
لينا : و الله هو قالي.. هو قالي حافظي عليه لين ما احل الموضوع.. هو قالي يبيه..!!
غازي : قلتِ لي يا بابا وهو قالي.. انا فاهم وجهة نظرة.. هو خايف عليكـ من الكل من العصابة و مننا.. يمكن توقع ان لو احد درى انكـ حامل و ما اشهروا زواجكم هالشيء بـ يضركـ سوا انا او عمكـ عامر او عيال عمكـ .. انا صح اني يوم دريت بـ حملكـ تضايقت.. و زعلت من عمر اللي طلبكـ تخبين علي.. بس لما سمعت من ابوه و منه حتى عيال عمة سعود و عساف توسطوا له عندي اليوم ما هان علي.. انا كنت شارط عليه ما يشوفكـ لين بعد نفاسكـ يملكـ و يعرس و تبقين عندي من غير لا احد يدري لا جانا احد قلنا انكـ مسيرة علينا و الا زوجكـ مسافر.. (ابتسم غازي) وهو وافق وقتها وده يصفقني من قهره.. ما دريت انه موافق كذا بس لين يضمن الملكة عشان يخلي الأوادم توسط له عندي..
لينا : ما راح اعصيكـ يا بابا بـ امشي على شوركـ ..
ابتسم غازي : من وراء قلبكـ ادري.. شوفي عيونكـ كيف تلمع من حكينا عن عمر..!!
اتسعت عيونها بـ صدمة : و الله..؟!!
غازي : تحبينة..؟!
تراجعت بـ ظهرها على وراء منصدمة من ابوها..!!!
غازي مسكها من معصمة و شدها له : مستحية مني يعني..؟! اصلاً ما يحتاج تجاوبين بـ لسانكـ .. عيونكـ و نبض قلبكـ اللي احسة بـ يفجر عروقكـ من سرعتة تجاوبني..
ناظرت يد ابوها محاوط معصمها حست انها فعلاً غبية زي ما قال عمر..!! كان مستغرب شلون هي الغبية بنت غازي.. مفضوحة.. يمكن حتى عمر يدري..!! يمكن يدري هي كانت ضعيفة اخر فترة عنده.. يمكن حس ان له شيء بـ قلبها اذا ابوها لاحظ ليش عمر ما يلاحظ..؟!
همست : أنا مفضوحة..؟!
غازي : انتِ كتاب مفتوح.. مو مفضوحة.. سهل الواحد يتنبأ بـ ردود افعالكـ ..
لينا عقدت حواجبها : يعني غبية..!! ما ابي اكون كذا..
غازي : ليش تشوفينها من هالمنظور..؟! الناس شخصيات.. فيه القوي و الغامض و الخبيث و البريء و الطيب.. و فيه من اللي يجمع كم صفة.. يعني ممكن تلقين واحد قدامكـ طيب و بريء و وراكـ اخبث منه ما فيه.. و فيه الضعيف و خبيث زي ما يقولون من تحت لـ تحت.. و فيه القوي بس يكون طيب.. و انتِ من النوع اللي يظهر قوتة لكنها هشة يا لينا اساسكـ ضعيفة و بريئة..
لينا شدت يدها : كأنكـ تسبني..؟!
غازي : لا ما اسبكـ .. بابا ما ابغى احكي في اشياء ممكن تزعلكـ .. لكن اللي اعرفة و متأكد منه على الأقل بالنسبة لي انا.. انكـ ضعيفة و ممكن أي احد يقولكـ كلمتين و تمشين وراه.. و اعتقد انتِ عشتي هالشيء مرتين.. و شفتي الصالح و الطالح.. مشيتي وراء سامي و غلطتي نيتة كانت قشرا.. و مشيتي وراء عمر لكن عمر نيتة كانت طيبة.. يا بابا ما يصير الإنسان يكون ضعيف بـ هالشكل.. ما انكر اني اخاف عليكـن.. كل يوم اتخيل أشكالكن من بعدي..!! شوق و انتِ و ريما و همس.. اربع بنات من غير اخ.. و عم واحد..
لينا : جعل عمركـ طويل يا عمري.. احنا من غيركـ ما نسوى شيء..!!
غازي : ما ادري ويش اللي جر ذا الحكي.. يالله قومي عشان تعشين لازم تأكلين عن اثنين..
لينا : بابا تكفى اهتم بـ نفسكـ عشانا..!! الله يخليكـ ..
غازي وقف : الروح امانة يا بابا..
وقفت لينا من غير لا تناظر فيه : احم بابا ايش كان يبي عمر..؟!
غازي ابتسم : ما طافكـ تنشدين..؟! (مشى يطلع من المكتب و هي تمشي وراه) قالي يبي يوديكـ دكتورة ما تدرين كم لكـ حامل.. و عشان يطمن عليكـ و على الجنين.. بس طبعاً انا رفضت تروحين معاه.. يبي يلوي ذراعي هالعمر.. راح تروحين بكره مع امكـ ..
امال تنزل الصحن على طاولة الأكل : نروح وين..؟!
غازي سحب الكرسي و جلس : تأخذينها دكتورة نساء.. عشان نطمن و تشوف كم لها حامل..
امال تناظر بنتها مستغربة : ما تدرين قد ايش لكـ ..؟!
لينا سحبت الكرسي و جلست : لا..
امال : ويش ذا الغباء اللي فيكـ ..؟!
غازي بـ هدوء : امال..!!!
امال ناظرت غازي : ويش فيكـ خلاص متزوجة ماهي جاهلة..!!
غازي : لا تحرجينها.. وين ريما..؟!
امال تنهدت : وين بـ تكون..؟! بـ غرفتها اكيد تخبر بكره الأحد..
غازي : صايرة تكذب علي و هي مخلصة المواد.. تقولي ما خلصت عشان ما اهاوشها..
امال جلست : تعبت معاها.. الحكي يدخل من اذن و يطلع من الثاني.. و لا كني احكي..!! اول مسوية لها قهوة..
غازي : استغفر الله العظيم..!! و ندى وينها..؟!
امال : قالت ما تبي تعشى حضرتة معي و طلع قبل لا تجون..!!
يطقطق بالطاولة متنرفز..!! بنتة من جهة.. و ندى من جهة..!!
امال : ايش فيكـ ..؟!
غازي : ابداً و لا شيء.. ما قالت لكـ ليش ما تبي..!؟
امال : تقول ماهي مشتهية.. طبيعي مع الحمل احيان تقل شهيتها للأكل..
غازي : هالحكي ماهو عندي.. هي و الهانم هاذي (آشر على لينا) ابي اشوفهن على كل طاولة..!!
لينا ابتسمت تهدي من عصبيتة : و انا ارفض أكل معاكـ يا جعلني فدوة لكـ ..
غازي وقف و هو مبتسم : تمسيح الجوخ.!! ويش تبين..؟!
لينا : ظنكـ شين فيني يعني ما اقولكـ حكي حلو الا اني ابي شيء..؟!
غازي : ما ادري توني معاكـ ما طلبتي شيء.. خليني اشوفهن و ارجع لكـ .. طلع الدور الثاني .. جناحة.. لأن ريما اسهل لو ما رضت بـ يشيلها و يوكلها غصباً عنها..
دخل غرفة النوم.. مسكرة الإضاءة..!! يعني بـ تقعنة انها نايمة.. شغل الأنوار : ندى..!!
غمضت عيونها وما ردت عليه.. رغم انها تعرف ماهو صعب عليه يعرف انها صاحية.. بس يراقب تنفسها بـ يعرف..!! قرب منها : قومي و كلميني..!!
ندى رفعت اللحاف بـ قوة و جلست : آمر ايش بغيت..؟!
ناظرها بـ حدة اسلوبها ما راق له..!! : خير ان شاء الله..؟!
ندى غمضت عيونها و اخذت نفس..
غازي : ويش هالإسلوب يا هانم..؟!
ندى : أي اسلوب..؟! ما اعتقد اني قصرت..!! انت الليلة اصلاً مو عندي .. و انا حضرت لكـ العشاء مع امال.. يعني ما اعتقد مسوية جريمة لو نمت..!!
غازي : من متى تكلميني بـ حدة..؟! اخبركـ ترجفين من تسمعين صوتي..!!!
ندى عقد حواجبها : يعني انت هذا اللي تبيه اني اخاف منكـ ..!؟
غازي : ما ابيكـ تخافين مني.. ابيكـ تصلين على النبي و تروقين.. تعوذي من ابليس هاللي راكبكـ من امس..!!
ندى : اللهم صلي و سلم على نبينا محمد و آلة و صحبة أجمعين.. و اعوذ بالله من الشيطان الرجيم.. كذا تمام..؟!
غازي : ايه.. يالله قومي عشان تعشين..
ندى : مو مشتهية..!!
غازي : ندى الله يرضى عليكـ ما ابي اجبركـ على الأكل.. ما انتِ بزر ما تعرف مصلحة نفسها..
ندى : قصدكـ مصلحة اللي بـ بطنها.. و مين قال اني ماني بزر.. انت تعاملني كني بزر..!!
غازي : اللهم طولكـ يا روح.. ويش سويت لكـ عشان احسسكـ انكـ بزر..؟!
ندى : انت تعاملني كني وحده من بناتكـ .. انا ما احتاج يكون عندي اب.. عندي ابوي الله يخليه لي..
غازي هاذي مخها ضارب..!! مسح على شنبة بـ يده اليمين يراقبها تحكين بـ عصبية و انفعال..
ندى : انا محسنة الظن فيكـ و الا قلت ما انت واثق فيني..!!
غازي : انا غبي اللي جاي ابي راحتكـ .. اللي متعني و جايكـ عشان تأكلين.. اخر شيء تخورينها بالحكي.. راجعي كلامكـ قبل لا تنطقينة يا ندى عندي.. ترى مو كل مره تسلم الجرة..
ندى وقفت بـ حدة : يعني تهددني..!؟ ناوي تمد يدكـ علي..؟!
غازي وقف و بين الإثنين السرير زين اللي ماهي قريبة منه و الا سواها و ضربها فعلاً : انا قلت بـ امد يدي عليكـ ..؟! انت مستوعبة الحكي اللي تقولينة..!؟
ندى : ايه مستوعبة.. انت اللي مو مستوعب كيف تعاملني.. من دخلت بيتكـ و انا بالعة و ساكتة.. لكنكـ تبي تضايقني حتى بـ وقت راحتي..!!
غازي منصدم : لـ هالدرجة انا ما انطاق..؟! كل ذا النفسية الزفت عشاني تأخرت عليكـ و ما جيتكـ الا الفجر..؟!
ندى : انت مو مستوعب انكـ تغلط علي.. ترميني بـ بيت اهلي و ترجع لي متأخر اتصل عليكـ ما تلقى الوقت ترد علي فيه.. فرضاً كنت بالبيت لـ حالي و تعبانة بـ اموت و اتصل عليكـ و لا ترد ويش بـ سوي حزتها..!؟
غازي : لو اني خابركـ بالبيت لـ حالكـ ما كنت طنشتكـ و اعرف ان اتصالاتكـ لـ شيء مهم و ضروري..
ندى تشد على شفايفها السفلية عشان ما تبكي : يعني تعترف انكـ طنشت اتصالاتي..؟!
غازي : لا.. كنت حاطة بالمكتب و انا كنت بـ غرفة الإجتماعات مع الشباب..
ندى : يعني بـ تضمن ان جوالكـ يكون معاكـ لو احتجتكـ ..؟!
غازي يمشي من قدام السرير حتى يقرب منها : انتِ جالسة توسوسين .. الشيطان يلعب بـ راسكـ و يخليكـ تتوهمين اشياء و تتضايقين عليها و هي ما صارت..
ندى ضربت رجلها بالأرض بـ قهر ابوها يقولها الشيطان يلعب بـ راسكـ اذا قالت له أي شيء و هالحين غازي : انتم ليش تشوفوني كذا..؟! يعني اللي انت تسوية فيني مو غلط..!؟
غازي : وين الغلط في الموضوع..؟! اني اتأخر عليكـ طيب انتِ المفروض تراعين طبيعة شغلي و تعرفين ان وقتي ماهو ملكي.. ممكن يجيني أي طارئ يخليني اقعد 24 ساعة بالمكتب و ممكن زود..
ندى : طيب انت ليه ما تفكر فيني.. هالشيء يتعبني.. يعني انت فاهم شغلكـ ليش ما تخليني ارجع مع احد من اخواني لـ بيتي انا ما اقدر انام بـ بيت اهلي عشان اقول يمكن تدق الحين بعد شوي الحين بـعد شوي يروح الوقت و انت ما دقيت..!!
غازي : طيب اذا هذا اللي مزعلكـ انا بـ احاول احل الموضوع.. اذا صار عندي شيء و تأخرت عليكـ بـ ادق عليكـ و اقولكـ تنامين بـ بيت اهلكـ كذا تمام يا روحي..؟!
غثيان قوي يلعب فيها تراجعت وراء لين لصقت بالجدار : ممكن تبعد عني..!!
غازي رفع حواجبها و هذا وهو يبي يرضيها : خير ان شاء الله هانم ندى .. ما تحسين دلعكـ اليوم مصخ..!؟
ندى استندت على الجدار و يدها على بطنها : بس ابعد عني خلاص ما ابي شيء.. انا قرفانة من نفسي..!!
غازي بـ حدة : نـــــدى..!!
تعدت من جنبة تجري و هي كاتمة نفسها و يدها على فمها.. حتى توقف على المغسلة و ترجع.. وقف قريب منها : ندى..!! انتِ متوحمة فيني..؟!!
بكت ندى كانت بـ تجلس على الرخام من التعب مسكها غازي قبل لا توصل الأرض و يديها متعلقة بالمغسلة : تعالي.. اجلسي هنا..
ندى جلست على الكنب و جلس جنبها غازي : تعبانة.. ماني طايقة شيء.. تكفى ابي امي.. الله يخليكـ ابي اروح لها..
غازي : تبين اوديكـ المستشفى..؟!
ندى : لا بس ابي اروح لأمي..
قامت تجري لـ المغسلة من جديد ترجع.. وقف : البسي عبايتكـ انتظركـ بالسيارة..!!
نزل الدرج بـسرعة ناظرهن جالسات و ما اكلن كانن ينتظرنة ينزل مع ريما و ندى عشان يتعشون كلهم مع بعض : ليش ما تعشيتن..؟!
لينا : ننتظركـ.. هاه نجحت المهمة..
غازي : ما شفت ريما .. و ندى تعبانة بـ اوديها لأهلها..
امال : و الله كن وجهها اصفر حتى قلت لها ترتاح و ما طاوعتني..
غازي : ما ادري ويش فيها..!! ليش ما علمتيني من قبل..!!
امال : و الله ما طرى علي .. و انا حاولت فيها بس هي الله يهديها راسها يابس..!!
غازي : خلاص تعشوا و شوفي ريما.. على ما اودي ندى..
..