لو سألتي الورد وهو ما بين ايدك اقطعك للكاتبة ضحكة قهر

16

" غنيت لك.. ع وتر الفرقا لحن..!"

راشد : طيب نقطع علاقتنا بالعصابة اللي يروح لها عزام ونثبت على اللي يروح لها عماد.
عساف : لا ابداً لازم ما يحسون اننا عارفين مخططهم ونخليهم يحسون انهم ضاحكين علينا.. الا ان حسينا ان حياة عزام بخطر..
نايف : و ممكن بهالتصرف نخليهم يشكون بفهد اللي متقمص شخصيتة عماد ..
عساف : على كذا عملياتهم الجاية مو قريب .. اقربها اللي قال عنها عماد عملية اغتيال الشيخ ورجل الاعمال..
عزام : بس لو نعرف اللي فوق الناس ذولي.
عماد : طيب ليش ما نسحب جلال مثل الكلب ونخليه يقر و يعترف.
الفريق غازي : مستحيل لو ما يبقى شيء ما تعذبه فيه ما راح يتكلم.. اللي عرفته ان جلال عنده عيله و عيلته تحت حماية رئيسة اذا خاطر وقال كلمة وحده عيلته بتنمحي من على وجه الأرض.
سعود : لازم نلقى طريقة نتنصت عليهم فيها..
عماد : لو بنحط أداة تنصت بيكشفوني دايركت.. و بيعرفون اني من الأمن.
عساف : صحيح.. طيب ما نقدر نغر حمود اللي قلت انه معاك و نحاول نكسبه بصفنا..؟!
عماد : ما ظنتي.. لان حمود شكله من زمان معاهم .. يعني عارف دهاليزهم.
عزام : بقولكم على فكرة ادري انها خطر .. بس ما يمنع اننا نحاول.
الفريق غازي : قول اللي عندك.
عزام : سطام اكيد يعرف مين اللي فوقة.. و سطام عنده اخت.
الفريق غازي : لا تقول نخطفها عشان ما ارفسك برجلي.
عزام : لا ويش نخطفها رجال امن و يخطفون .. يتزوجها واحد فينا.
راشد : ما انت صاحي ويش يتزوجها على اساس سطام بيزوج أي احد..
عزام : اسمعني اللي اعرفه ان سطام علاقتة مع اخته سيئة.. انا بتزوجها بخليها تقرب من اخوها و بعدها اقدر ادخل بيته بحجة اني زوج اخته.
عماد : صاحي انت و ام يزن.
عزام : ما احد بيدري عن هالزواجة يعني على ورق.
الفريق غازي : شيل هالفكرة من راسك ما تفيد بشيء دامه علاقتة زفت ما راح يراضيها ولا يهتم فيها يعني يهدد و يقتل و يسوي بلاوي بتهمه علاقتة بأخته..!؟
عزام : احاول نسحب خيط عشان نشوف ويش تاليه بننتظر عمليتهم..!؟
عماد يناظر جواله يدق : جر أي خيط تبيه بس مو زي هذا ويش تبي باخت مجرم.
عزام : قلت لك نحاول نعرف أي معلومة عن رئيسهم..
الفريق غازي : خير يا سعود شكلك متضايق..
سعود يمسح وجهه بكفوفة : بصراحة شايل هم اختي.. ما راح تحمل كل اللي يصير لها.. حتى لو بينت انها قوية بتنكسر.. مالها قوة تنحشر وما تقابل احد .. وعد اذا ما انفرط عداد كلماتها ما ترتاح.. ما تخلي احد ما تحكي معاه.. تعرف على أي وحده تقابلها و لا يهمها تقول عادي انتم موسوسين تشوفون كل الناس ما فيهم خير وانا مو مثلكم لين جابت المصيبة و وحده من صحباتها تخبر صلاح كل شيء عنها.
عزام : غلطان .. صلاح كان يعرف اخبار اختك منها بنفسها.
عقد حواجبة سعود : منها.!.؟
عزام : تعرف البنات ومواقع التواصل.. و شكله سألها عن اسم المعهد و هي معلمته بحسن نية.
عساف : حسن نية..!؟
عزام : ايه يعني مأخذ دور بنت عشان يعرف كل شيء عنها..
عماد صد بوجهه عنهم : خبلة..
الفريق غازي : المهم انها بأمان الحين.. و ان شاء الله هالوضع ما يطول وتنحل هالازمة و ترجع لكم وعد.
سعود يناظر بالاوراق قدامه متناثرة على الطاولة : والله على اللي اشوفه قدامي ماني متأمل اننا ننتهي من القضية هالحين.. اللي نقدر نسويه نبطل أي عملية بيقومون فيها لين نعرف اللي فوقهم.. وهالشيء بيأخذ وقت طويل..
عماد : تذكرت .. عساف قالوا لي انك كنت تبيني بخصوص قضية الدكتور.
عساف : ايه.. كنت ابي اعرف ويش توصلتوا له..!؟
عماد : للحين التحقيق ما انتهى بس الواضح انها قضاء وقدر.
عساف : لا ماهي قضاء وقدر .. قضية قتل مدبرة.
عماد تقدم بجلستة وسند كوعة على فخذة : الدليل..!؟
عساف : الدكتور كنا مكلفينه بالكشف على زياد لما كان عندنا وهو اللي كتب عنه تقرير انه فاقد للذاكرة.. وكان يتابع حالته كل فترة.. و باليوم اللي انحاش فيه زياد انحرق بيت الدكتور.
الفريق غازي : يعني زياد القاتل..؟
عساف : ويمكن احد يبينا نشك بزياد.. يعني فيه احد فوقهم يلعب فيهم.. امر صلاح يخطف وعد ثم يرجعها.. و امر زياد انه يحرق بيت الدكتور او هو حرقة عشان تنحط بحساب زياد.. اخاف يكون فيه طرف احنا ما ندري عنه..
الفريق غازي : انت وراء ما ترد على جوالك اللي من جلسنا وهو يدق.
عماد : عمي لا تعصب.
الفريق غازي : عمت عيونك قول امين.
ابتسم عماد : ان كان يهون عليك انعمي امين.. رد على جواله : الو.. هلا عبدالله.. ما ادري باستراحة ابو سمر.. بحي ............. لا الاستراحة زينة.. انت بس خلص لي الاشغال الثانية كلها.. كلمت ابوي على الذبايح.. طيب على خير.. انا اخلص من الاجتماع واروح لي مشوار و اجيكم.. طيب عبدالله خلاص والله بجي.. اوك .. مع السلامة..
الفريق غازي : ويش عنده اخوك..؟
عماد : ويش فيك نسيت ان بكره زواجي..!؟
سعود بصدمة : من جدك بكره بتسوية..؟
عماد : ايه لان بعده احتمال يكون رمضان.. بعدين كله عرس رياجيل.
نايف : مبرووك يا عريس.
عماد : الله يبارك فيك عقبال عندك.
نايف : لا تكفى عندي اللي مكفيني.. لا تقوم حرب ما نخلص من وراها..
عماد : هههههههههههه تراك معزوم.. وكلكم معزومين.
راشد : من غير عزومة بنجي اما بننتظرك تعزمنا.
الفريق غازي : ما تحسون اني معطيكم وجه ولا كني رئيسكم.
عساف : والله معطينا وجه.. بالذات هذا .. (آشر براسة على عماد) اجل بوسط الاجتماع اتصالات و عمي.
عماد : لا تعاون على الشر..
عساف : ما اعاون الا على الخير.. مبروك عليك بنت عمي..
ما انتبه عماد لنبرة عساف الغريبة لما نطق بنت عمي : الله يبارك فيك.
الفريق غازي : وانت متى بنفرح فيك.؟
عساف : والله كل ما نويت احجز ما ادري ويش اللي يأخرني.. بس بنخليها للظروف.
الفريق : وانت سيد سعود ..!؟
سعود : تكفى لا تجيب طاريه احس اني مكلبش وبدخل السجن.. اما تكون وراي مره تنشدني وين رايح ومن وين جاي و ويش بتسوي لا ابدا ماني من اهله.
الفريق غازي : افاااا ويش ذا النظرة للزواج.. بس خلاص عروستك عندي بس تعزم على الزيجة.. وان ما عزمت انا زوجتك من وراء خشمك.
سعود ابتسم : ترى بتدعي عليك اللي بتخليها تأخذني انا مالي دخل مبري ذمتي.
الفريق غازي : انت بس اعزم و تبشر بعزك.. ما ودك تفرح امك و ابوك هذا وانت اكبر اخوانك.
سعود : اخواني يفرحونهم ليش تنحط براسي.
عزام : ياخي انت وعماد سوو زي ابائكم و طقوا اربعة.
عماد اتسعت عيونه : انا وحده و للحين ما شفتها وين بلقى وقت لاربعة.. بعدين ويش تبيني اشيب على صغر والا يحوشني جنون اربعة يالظالم..
سعود : وعد ما ينوخذ على راسها مره..
ناظره عماد وكأنه سعود يحذره : لا ما نبي يكفينا وحده.. نسال الله التوفيق بس.
الفريق غازي : اصلاً بس جرب و فكر تأخذ عليها مره عشان انهيك من الدنيا بكبرها.
عماد : افااا تنكرت لي و صرت بصف بنت اختك من الحين.. لا ما اتفقنا على كذا ابدا ابدا.
الفريق غازي : انت ويش بلاك اليوم احسك فاصل علينا.
عماد : والله ما نمت .. وشكل جنوني بيطلع عليكم.
الفريق غازي : قم اطلع برا اشوف..
عماد وقف وابتسم : كنت ابيها من زمان .. اخذ جواله : لا تقولي ارجع.. ولا تتصل علي.
الفريق غازي : والله ان بغيتك لا تجي غصباً عنك.. يالله فارق الحين روح نام.. بس مو تترك بنت اختي لحالها..
عماد وهو طالع : زين ذكرتني.. كنت بروح انام بغرفتي.. نسلم عليكم..
: مع السلامة.
..
بعيداً عن الحياة هي ماكثة.. ستمضي الحياة وهي هنا في مكانها.. حتى و ان انتهى حجزها.. هي لا تريد ان تستمر بهذه الحياة لم يعد لديها ما تعيش من اجله.. ام تخلت عنها.. واب ضحى بها.. واخوة تخلوا عنها.. وحبيب تركها.. و دراسة حُرمت منها..
: ما يصير ما تأكلين من البارح وانتِ على ذا الحالة سيادة العميد عماد قال انك مسوية عملية ولازم تأكلين.
ما اعطتها أي أشارة تدل على سماعها لكلماتها .. جسدها ميت عدا رموش عينيها ترف بحركة لا ارادية.. دقات قلبها تنبض على وتر بطيء وكأنها تريد للحياة ان تسبقها.. و انفاسها الهادئة متأثرة بسكون الجو من حولها..
رانية : خليها على راحتها يا هيفاء سيادة العميد اكد علينا ما احد يعصب فيها.
هيفاء : عاجبك نومتها بالصالة كذا البنت بيصير فيها شيء.
رانيه : طيب ويش الحل .. سيادة الفريق اول مانع ان احد يكلمها او تكلم احد..
هيفاء : ما ادري بس البنت بتروح من يدينا واحنا جالسات نتفرج عليها..
جات الخدامة تأشر لهم وهن واقفات مو مستوعبات ويش تقول.
رانيه : فهمتي شيء.؟!
هيفاء : لا.. بس كنها تقول اكل شوفيها تأشر على فمها..
رانيه : ويش الفايدة من خدامة بكماء بالله .. استغفر الله بس الله يشفيها.
هيفاء مسكت الخدامه وتحاول تأشر لها عشان تفهمها اشرت على نفسها : انا.. مو فاهمه.. (أشرت على راسها وبعدين سوت لها بيدها لا) اللي تقولين.. (آشرت على فمها انها تتكلم)
الخدامة طلعت قلم و نوتة من جيبها وكتبت فيها "أنت يبغى أكل"
رانيه : طيب من اول اكتبي وريحينا.. مسوين حفلة هنا بالحركات نحاول نفهم عليك..
هيفاء : انا مشتهية اكل وانتِ.؟
رانيه : ويش عندنا نضيع فيه الوقت غير الاكل والتلفزيون بس اكتبي لها تسوي لنا قهوة.
هيفاء اخذت القلم والنوتة وكتبت فيه "ايوه جيبي أكل .. وسوي قهوة".
تربعت رانيه : ويش تبينا تنفرج..؟!
هيفاء : ما ادري حطي أي فيلم أي مسلسل أي قلعة..
رانيه : على اني ما احب اتفرج بس ما عندنا شيء نقدر نسويه غير الجلسة على التلفزيون.
هيفاء تجلس جنبها وتلتفت وراها تناظر وعد المنسدحة على الكنبة : يا حياتي شكلها مره تعبانة..!؟ شوفي وجهها شاحب.
رانيه : تتوقعين ويش تقرب لسيادة العميد..!؟
هيفاء : ما ادري .. بس سمعتي بدر برا يقول سيادة الفريق اول موصي عليها..
رانيه : يمكن اخت سيادة العميد..
هيفاء : يمكن زوجته.!.؟
رانيه : ويش زوجته .. ليش ما دريتي ان زواج سيادة العميد اليوم.!.؟
هيفاء بصدمة : كذاااابة .. بيتزوج.!؟
رانيه : ايه والله اليوم زواجه و مسوي بس عرس رياجيل.
هيفاء : احسه ماله خلق حريم.. بالله شلون يتزوج..؟ الله يعين زوجته عليه.
رانيه : اللهم آمين .. انا اذكر مره سمعت له نقاش مع العقيد راشد.. يكلمه عن وحده و كان معصب.. حتى اذكر يقول جابت ولد جابت له ولد.. ولدها المفروض هذا مني انا مو منه هو.
هيفاء : اووووف .. متى هالكلام..؟!
رانيه : يمكن من خمس سنين.. تهقين انه نساها وقرر يتزوج.؟
هيفاء : اللي يحب ما ينسى.. شوفيني ما نسيت عاصم وهو عايش حياته.
رانيه : تقولين لي اللي يحب ما ينسى هذا عندنا احنا الحريم عشانا لا حبينا نحب من قلوبنا نحب بكل شيء بس الرجال ..! ما يحبون الا لغرض وبس ينتهي اللي يبيه رمى اللي يحبها..
هيفاء : مو شرط.. انا احسه على حسب الانسان نفسه فيه رجال اوفياء و فيه حريم اوفياء.. بس المرأة تنجرف وراء قلبها اكثر من الرجال.. يعني لو وحده حبت شخص ما يناسب لها بترمي كل الحواجر اللي بينهم بالجدار..
نزلت الخدامة الصواني على الارض قدامهن.
رانيه آشرت لها تجلس : حياااك اجلسي.
جلست الخدامة مبتسمة.
رانيه : ايه كملي اللي تقولينه.
هيفاء : ايه اما الرجال لا يفكر بعقله و يهتم بالحواجز..
رانيه : هذا يعني انهم يبيعون المره عند اقرب بسطة.. والمره يا عيني متعلقه فيه..
الخدامة آشرت على وعد المستطحة وراهم : آآآ .. (آشرت بيدها ويش فيها).؟
هيفاء كتبت لها بالنوتة اللي منزلتها الخدامة على الارض جنبها : تعبااانة.
تبدلت ملامح الخدامة للزعل ورفعت يديها تدعي لها.
هيفاء ابتسمت : شكلها طيبة.
رانيه : ياليت .. وحتى لو ما هي طيبه بس بتشوف سيادة العميد بتصير طيبة غصب.
..