لو سألتي الورد وهو ما بين ايدك اقطعك للكاتبة ضحكة قهر

57

ودي آكذّب عيوني .. وأعذرَك
بس عطني فرصة ألقى لك عذر !

لـ احمد المطيري..

بيت ابراهيم.. الملحق الخارجي..
وليد : انا ما قلت ما تطلعين برا..؟!
زمت شفايفها : طيب احنا طفشانات هنا و شفت البنات و كنت بس بـ اسلم عليهم بس هم غبيات يصارخون..!!
وليد لف على المربية : برا هالباب ما تطلعون.. كل شيء بـ يوصلكم لـ حدكم من راس مرفوع..
سحر : كيف يعني راس مرفوع..؟!
وليد حس بـ غباءة يكلم مربية تحكي عربي مكسر و بزر بـ كلمات ما يفهمونها.. ناظر المربية من حديد بعد ما كان يناظر سحر : شوفي برا باب هنا ما يطلع.. برا خطر.. فيه ناس ما يعرفهم..
هزت المربية راسها .. لكن سحر مسكت كفة : طيب اجلس معانا مو انت بـ تحميني..!! انت وعدت بابا صح..؟!
وليد : صح.. بس انا مشغول الحين..
سحر : كله زي بابا مشغول مشغول مشغول ..!! وشوف من البارح ما جاء.. اتصل عليه قوله يجي عشان نروح بيتنا انا طفشت هنا ما عندي و لا شيء ما فيه العاب ما فيه تلفزيون و لا شيء..
وليد : ابوكـ مسافر ما يقدر يجي الحين.. و اذا على الألعاب انتِ نامي الحين و اوعدكـ بكره الصبح اروح اجيب لكـ اللي تبينه..
سحر فلتت يده متحمسة : تجيب لي ايباد..!؟
وليد تنهد : طيب..!! الحين نامي.. اذا شوي رجعت وما شفتكـ نايمة ما فيه ايباد..!!
سحر : طيب موافقة.. خلاص روح عند الباب عشان ما يجينا ناس شريرين..!!
طلع وليد من غير لا يعلق ناس شريرين.!! مين..؟! ابوه و اخوانة و العالم اللي بالمجلس..!! لف على الحارس : من مكانكـ ما تحركـ اذا بـ تروح أي مكان تنادي واحد ثاني يحل مكانكـ لين ترجع فاهم..؟!
: تامر طال عمركـ ..
دخل المجلس ماله خلق زايدين ثلاث اشخاص عمر و الفريق جابر و سعود : السلام عليكم..
: وعليكم السلام..
جلس بالجهة الأمنية.. لأنهم منقسمين نصين غازي و رجالة بـ جهة و جابر و عمر بـ جهة .. و ابو سعود و عيالة مشاهدين بـ جهة..!!
عمر : كنّا ننتظركـ تشرف..
وليد : قبل احنا كنت انتظركـ تشرف.. وين ابطيت..؟!
عمر : شغل..!!
عساف : مين اللي كان يلحقكـ العصر..؟!
جابر لف على عمر : فيه احد مراقبكـ ..؟!
عمر : Fbi ..
جابر : ويش يبون منكـ ..؟!
عمر : يبون الرئيس..!! عرفوا اني اشتغل جاسوس بالعصابة و جابوا ليش صور اول لقاء لي معاه بـ لندن.. كانوا مصورينة.. كل ما بغوا يمسكونة اختفى..!!
جابر : ويش قلت لهم..؟!
عمر : ان احنا نشتغل على قضية هو رئيسها و الله يقدرنا نمسكة و يأخذ جزاه..
عساف : و انت ويش عرفكـ بالرئيس..؟! ويش عرفكـ بالقضية ان كنّا احنا مسكناها قبل اقل من سنة بعد ما سافرت انت دورة..!!؟
عمر : سافرت ايه بس مو دورة شغل.. وقتها لما تعرفت على الرئيس بـ لندن..
غازي : نبي من البداية.. من الصفر..
جابر : انت تدري اني كنت ماسكـ القضية بالخفاء.. كان هالشيء لـ تموية العصابة.. عشان ما يتوقعون انهم ملاحقين من شخصين.. بعد انت ما مسكت القضية بـ فترة انا كان عندي اهتمام و كنت اتابع تفاصيلها.. اقترحت هالإقتراح اني اشتغل بالسر من غير ما يدري احد حتى انت.. حتى ما نثير الشكوكـ بأي طريقة كانت حولنا.. و اخترت عمر عشان يقوم بالمهمة.. كنا نحاول نخطط و ننفذ و بـ يوم جاتنا اخبارية ان الرئيس بـ لندن و مقر اقامتة بعد.. و رحنا هناكـ و قابلة عمر على اساس شغل لكن عمر قال للرئيس اسمة الصريح كنّا نبي نضللة يتعرف على عمر اول و اهدافة المزعومة اللي احنا نبي نفهمة اياها و نخلية يحاول يشغل عمر معاه بـ حكم وظيفتة هنا..
غازي : ويش هالأهداف اللي مرت عليه من غير لا يفكر فيها..؟! شلون اقتنع..!!؟
عمر من غير لا يلتفت لـ عمه : عمي ابراهيم.. هو الهدف..!! هو حاقد على عمي بـ شكل مو طبيعي .. و انا حاولت ادخلة من هالنقطة و افهمة ان عمي مأخذ فلوس لأبوي و اني ابي استرجعها منه..
نايف : مو غريب..!! ما راودة شكـ انكـ ممكن تكذب يعني بـ يتوقع ان ابو سعود و ابوكـ بينهم مشاكل..؟!
عمر رفع حواجبة و ابتسم : ابوي و عمي على خلاف بـ وجهات النظر دايم.. و قد تهاوشوا كم مره.. و هو كان يدري انهم دايم يختلفون فـ ماراح يشكـ ان ممكن الموضوع يوصل لـ الفلوس.. خصوصاً ان كانت الهوشات هاذي من زمان..!!
سعود استغرب : ابوي و عمي متهاوشين..؟! (ناظر ابوه) ويش هالحكي يبه..!؟
عمر : ليش ما قد حضرت هوشة لـ عمي و ابوي..!؟ هو نقار مو هوشة بس انهم دايم يختلفون.. بس انا كبرت الموضوع بالحكي و قلت شيء ما صار..!!
جابر ناظر بـ سعود : هذا مو موضوعنا كله سيناريو عشان نوصل للي نبيه و وصلناه.. الحين لازم ننهي كل شيء بسرعة و بـحذر دامه الحين ضايع لأن رجالة ماهم معاه.. يمكن يتخبط و يغلط و نقدر نمسكة..!!
غازي ناظر عمر : تعرف مكانة..؟!
عمر : مقرهم الرئيسي ايه.. بس ما يقعد فيه.. يجي عشان يسوي اللي يبيه و يطلع.. ما يثق بأي شيء على طول ينقل من مكان لـ مكان..
عزام : معاكـ رقم جوالة تكلمة و نتبع المكالمة عشان نأخذ احداثيات المكان اللي يكلم منه..!!؟!
عمر : لا.. قلت لكم حذر اذا بغى يكلمني .. يكلمني من أي مكان.. مرات يأخذ جوالات ناس يقابلهم بـالشارع يكلمني و يقفل..
وليد : تقول ما تعرف اسمة صح..؟!
عمر : لا .. حذر بـ شكل ما تخيلونة..
وليد : عندكـ له صورة..؟!
عمر : ايه عندي.. و دخلناها السستم ما تعرفنا عليه للحين..
وليد : طيب اعطيني اياها..
جابر سحب الملف و فتحة مد الصورة لـ وليد.. وليد ناظرة ثم وقف و اتجة لأبوه : تعرفة..؟!
ابو سعود ناظر وليد ثم الصورة حتى ينصدم.!! سحب الصورة و يناظر بـ ملامحة نفسها هي نفسها ما تغيرت.. نفس الهيبة نفسها.. نفس الشخصية نفس الحدة..!!
وليد : مين هو يبه..؟! ايش اسمة..!؟
ابو سعود مد الصورة بـ هدوء : ما ادري ويش اسمه بس شكلة ماهو غريب علي..!!
وليد مسك الصورة : يبه ما يحقد عليكـ كذا من الباب لـ الدريشة اكيد فيه ان بالموضوع..
ابو سعود وقف يناظر وليد الواقف قدامة بـ حدة : وشو تبي تشككـ فيني يا وليد..؟!
وليد : ما اشكـ فيكـ .. بس ليش يحقد عليكـ ..؟! ليش يبي يأذيكـ حتى لو بـ خواتي..؟! ليش هدفة يدمركـ ..؟! مو معقول كل هذا و انت ما تعرف غير شكلة..
ابو سعود : لا تعلمت تحترم ابوكـ تعال كلمني..!!
طلع ابو سعود و وليد يناظر الباب.. ما احد علق فيه ان بالموضوع.. فعلاً ابو سعود كانت تعابير وجهة تقول انه يعرفة ليش انكر..؟!! جلس وليد و عيونة على الصورة..
غازي بـ هدوء : وليـــد..!!
وليد لف الصورة و يناظر غازي : تعرفة..؟!
غازي : لا.. لو اعرفة كنت قلت لكم من قبل و ما تعنينا كل هالعنا..
وليد وقف : مشعل اعطيني مفتاح سيارتكـ ..!!
غازي وقف : وين رايح..؟!
وليد : لـ بيت عمي سعد.. دامه يعرف عن المشاكل اللي بين ابوي و عمي يعني اكيد يعرفهم عن قرب..
غازي : تدري ان المفروض ما تطلع يا وليد.. و لا تعتب الباب.. عمر بـ ينشد ابوه لا قابلة..
وليد سحب المفتاح من يد مشعل : ما راح انتظرة لين يقابل ابوه.. ابي اعرف الحين..
طلع وليد من غير لا يهتم الصورة بـ يدة و لحقه مشعل..
غازي : راسة يابس ما يفهم الحكي.. عساف روح وراه ان قدرت ترده لا تقصر..
عساف وقف : تأمر..
خالد يهمس لـ ياسر جنبة : ليش ابوي تصرف بـ هالشكل..؟!
ياسر : انا مثلكـ مستغرب.. حسيتة ارتبكـ ..!!
خالد : قوم نشوفة.. (وقف خالد و بعده ياسر) عن اذنكم..
حاتم وقف و صب لهم قهوة و اضح ان نقاشهم وصل لـ نقطة توقف..
..
انهار : لا ليش..؟!
وعد : بس اسأل.. انتِ كيفكـ مع الوظيفة الجديدة..؟!
انهار : الحمدلله مشغلة وقتي عن الطفش و التفكير.. انتِ ويش ناوية تسوين..؟!
وعد : ما بعد فكرت.. من هنا لين اخلص العدة بـ اكون مقررة ويش اسوي ان شاء الله.. مليت قعدة البيت..
انهار : ايه و الله تذبح ويش رايكـ نفكر بـ مشروع خاص..!؟
وعد ابتسمت : عادي ما عندي مانع بس شيء افلح فيه..
انهار بـ حماس : اوكِ نبحث و نشوف .. بـ اشاور خالي عامر هو يفهم بـ ذا المواضيع..
وعد وقفت : تعالي ابي اكلمكـ برا..
استغربت انهار.. قامت مع وعد .. جلست وعد بـ صالة العيلة اللي العادة يجلس الكل فيها.. جلست انهار وما حكت.. وعد : يمكن مستغربة ليش ناديتكـ .. بـ صراحة انا مستغربة منكـ ..
انهار آشرت على نفسها : مني..!؟ ليش.؟!
وعد : احسكـ تغيرتي.!؟ يعني قبل ما كنتِ طايقتني و لا حتى حاولتي تتقبليني.. بس بعد ما تركت البيت و طلبت الطلاق تغيرت معاملتكـ معاي..!!
انهار حطت رجل على رجل : قصدكـ ان السبب عماد..؟!
وعد : ما ادري.. بس فيه شيء غريب بالموضوع..!!
انهار : وين الغرابة..؟!
وعد : ليش ما تزوجتي عماد..؟! اذا انتِ تحبينة و متأكدة انه يحبكـ و مستعد يقدم لكـ كل شيء تبينه ليش تخليتي عنه و وافقتي على الشخص اللي تطلقتي منه الحين..؟!
انهار : تبين الصدق و الا ولد عمه..؟!
وعد : الصدق يعني اذا ودكـ تحكين.. اما اذا بـ تقولين شيء غير الصدق و احرجتكـ بالسؤال قولي لي مالكـ دخل و خلاص..
انهار ابتسمت : لا عادي.. انا من كنت صغيرة عشت بـ بيت خالي عامر.. اناديه خالي بس اشوفة ابوي.. ما يخلي ادنى شيء يضايقني.. ما يزعلني ابداً و اذا زعلت ما ينام الا هو مراضيني.. كنت بنتة و يمكن خلاني اغلاهن ما ابعدني ابداً.. عيالة اخواني.. الا اللي قلبي مال له.. كبرت و كنت اشوف عماد غير.. تخيلي اني مستحيل ما اشوفة في اليوم اذا ما شفتة اجلس سهرانة لين اشوفة سوا طالع من البيت او داخل أي شيء ان شاء الله بـ يتعدا من غرفة لـ غرفة اهم شيء املي عيني.. هذا ما يعني اني كنت ما اتغطى عن العيال خالي عامر خلاني اتغطى و انا عمري 10 سنوات .. بعدين صار أي شيء يسويه عماد حتى لو هو يشوفة اخو هانا كنت اشوفة غير ما كنت اعرف اني ممكن القى مكان بـ قلبة.. بـ اولى ثانوي.. رحت بيت ابوي لأن ابوي قال البنت كبرت و انت عندكـ عيال ما يصير تبقى بينهم و تعبت بـ بيت ابوي.. يعني ابوي جــاف جداً.. ما عنده شيء اسمه احن عليها يمكن زعلت اراضيها ادلعها لا.. عدا ان زوجتة ما كانت طايقتني.. صح ما تضايقني لأن ابوي على قساوتة مستحيل يرضى ان زوجتة تضرني بـ شيء.. وهي تخاف منه.. دخلت المستشفى و كلمت خالي غازي قلت له يأخذني اذا ابوي ما يبيني بـ بيت خالي عامر عشان عيالة بيت خالي غازي ما فيه عيال.. وقتها ما جاء بس خالي عماد كان معاه و تهاوش مع ابوي يحسب ان تعبي بسببهم هو و زوجتة مسوين لي شيء.. ابوي حقد على عماد و عماد طنش الموضوع و لا فكر يرجع لأبوي و يعتذر.. طبعاً ابوي رجعني البيت معاه و جلست فترة طويلة انا ببيتة ما اعرف الا هو و علاقتي معاه سطحية جداً.. اخواني بعد ما اعرفهم يعني اساميهم و اشكالهم.. بس مالي احتكاكـ معاهم ما اعرف ايش يحبون و ايش يكرهون.. لما عرف خالي عامر اني ما طبت جاء هو و خالي غازي و طلبوا ابوي اني اعيش عند خالي غازي.. و وافق بـ طلوع الروح بـ شرط اني اجيه من الأربعاء للجمعة.. و اجلس معاه.. و وافقوا..!!
وعد تربعت متحمسة : طيب و بعدين..؟!
انهار : عشت ما بين ثلاث بيوت خالي غازي و ابوي و كل يوم اروح بيت خالي عامر..
وعد : عشان تشوفين عماد..؟!
انهار : ايه.. لما كنت بـ ثالث ثانوي وقت تخرجي ابوي فاتحني بـ خطبة عبدالملكـ لي.. يومها انصدمت و قلت له اني ماني موافقة و اخطيت بالحكي لين قلت له اصلاً خالي عامر يبني لـ عماد و انا موافقة..!!
وعد : و طبعاً ابوكـ ما يطيق عماد..؟!
انهار : بالضبط.. من بعد ما تمشكل معاه و هو كل ما قابلة سفل فيه ابوي.. حتى لو شافة بالغلط.. ابوي ما نساها له و لما عرف ان عماد يبيني قهره فيني..(دنقت تناظر الأرض) ما درى انه قهر بنتة بعد..!!
وعد : طيب ليش ما دخلتي خوالك بالموضوع على اساس انتِ رافضة و تركتي موضوع خطبة عماد على جنب لين تنحل بينهم..؟!
انهار : ما تعرفين ابوي اذا قال كلمة ما تصير ثنتين لو اموت قدامة اهم شيء كلمتة ما تنزل الأرض.. و لما عرفت انه مستحيل يزوجني لـ عماد فقدت الأمل فـ ما يهمني مين اتزوج.. سوا عبدالملك او غيره..!!
وعد : طيب ليش قلتِ لـ عماد ان ابوكِ قالكـ على العريس و انتِ وافقتِ..؟! ليش ما بينتي لـ عماد انه اخطأ على ابوكـ و يدين لأبوكـ بـ إعتذار..؟!
انهار : لأني لو بـ اقوله ما راح يروح و يعتذر بـ يروح يتهاوش معاه.. و ممكن يدخلون خوالي بالسالفة و تكبر.. و اصير انا السبب بالموضوع تخيلي لو اني اوقف مع خوالي ضد ابوي..!؟ حتى لو انه قاسي و ما رباني بس اسمه ابوي ما راح ارضى اني اشوف خوالي يبهذلونة..!! و الله بـ انقهر..
وعد : معاكـ حق هالشيء بـ يكسرة.. عاد كل شيء يهون و لا الضنا يشوف ابوه منكسر بـسببه.. هالشعور يذبح...!!
انهار : وما بغيت اعيشة.. اعيش مع واحد ما ابيه بس على الأقل فيه حياة و لا احس اني اموت كل شوي لا ذكرت اني كسرت ابوي..
وعد : طيب ما عليش يعني بـ اتلقف زود.. انا ما احس تفكيركـ تافة ..
انهار ابتسمت : سبب طلاقي..؟!
وعد : ايه..!! يعني انا كنت موجودة يوم تهاوشتي مع عماد و كذا.. ما اتوقع هذا سببكـ ..!!
انهار : عاد تصدقني خوالي من دلعهم لي صدق انصحوني و كذا بس مشى عليهم الوضع و اقتنعوا بالسبب رغم اني ما توقعت..
وعد : يمكن عشان ماما من قبلكـ صاروا يتوقعون أي شيء..!!
انهار : شكله كذا..
وعد : طيب ليش تطلقتي..؟!
انهار : لأن الحياة مع عبدالملكـ باردة..!! باردة لين ما تدخل امه بالموضوع اذا دخلت انقلب كل شيء.. تخيلي امه متحكمة بـ حياتنا .. لو بـ نطلع برا البيت تعرف.؟! يسمع كلامها بـ كل شيء كل شيء ما عنده شخصية الا علي..!! و ياليتها شخصية عدلة هواش و منافخ لين وصلت للضرب..!!
وعد فتحت فمها : ضربكـ ..؟!
انهار : ايه..
وعد : ويش سويتي..؟!
انهار : و لا شيء..!!
وعد : كيف يعني و لا شيء ..؟!! سكتي و ما اعترضتي..؟! عادي يضربكـ ..؟!
انهار : امبلى يعني تهاوشت معاه لين قلت بس.. و زعلت و راضاني بعدها ضربني مره ثانية و قلت لأبوي و قالي مكان المره بيتها حتى لو زعلها تصبر عليه و انتِ عندكـ ولدين..!!
وعد : طيب اذا صبرتي على الضرب وما حكيتي اجل ويش اللي خلاكـ تطلقين منه..؟!
انهار : ما تحملتة زود لأن امه هي اللي كانت تملى راسة وهو يمشي وراء رايها و فوقها يضربني.. و طلبت الطلاق.. و رحت بيت عمي عامر و ابوي كلمني و قلت له اني ما براسي الا الطلاق و لو يردني عليه راح اشتكي لـ خوالي ما راح يسمحون له يهيني..
وعد : و اكيد طلع ابوكـ من الموضوع و بقيتي مع زوجكـ بـ هواش خصوصاً ان خوالكـ ما يدرون..!!
انهار : ايه.. تخيلي اني اكلمه في البداية مره كان متمسكـ فيني و اعتذر لي و بعدها بـ فترة صار يستخدم اسلوب امه و ما هميتة و عادي يطلقني بس عيالي ما اخذهم معاي..!!
وعد : و وافقتِ ..!؟
انهار : ايه.. ما كان قدامي حل الا اني اخبر خوالي و يكبر الموضوع و ندخل محاكم..
وعد : تدرين انكـ غبية لو مخبرتهم خوالكـ بـ يجيبون لكـ عيالكـ من غير محاكم.. واضح ان زوجكـ خرطي يمشي وراء امه و اذا كلمه خالي عامر بـ يوكله تراب من غير محاكم..
انهار : ما ادري يا وعد كنت مشوشة ما كنت اشوف هالحل .. ما عليه حسوفة دامه ماهو مسوي نفسة رجال الا علي ويش ابي فيه..!!
وعد : طيب و عيالكـ ..؟!
انهار : اروح اشوفهم كل اسبوع عند جدتهم .. تخيلي انها تبي تقهرني و تقولي انها خطبت له و بـ تزوجة..
وعد بـ قهر : لا يكون وضحتي لها انكـ مقهورة..؟! ترى اذبحكـ ..!!
انهار : ليش انقهر عليه ..!! تدرين كثير يزوجون بناتهم لـ شباب حتى لو امهاتهم ما ينطاقون يقولون ليش بـ تعيشين مع الرجال و الا امه..؟! على اساس يهونون المشاكل اللي بـ تصير..
وعد عفست وجها : معاكـ حق تطلع الأم حية رقطاء و تدمر حياة ولدها.. اففف ضيقتي خلقي و الله..
انهار : عادي ماني متضايقة ما عليه حسوفة يا بنت.. هذا انا عايشة حياتي..
وعد : على قولتكـ يا كثر اللي ما عليهم حسوفة.. الطلاق احيان ارحم من حياة فاشلة بـ كل المقاييس..
انهار : مثل انتِ و عماد..؟!
وعد : عليكـ نور..
انهار : على الأقل عماد عنده شخصية مو مثل عبدالملكـ وراء امه..
وعد : عاد من زين شخصيتة.. كيف زوجتة ..؟!
انهار : هههههههههههه .. ابد تجيب المرض..
: ماشاء الله يالسوالف ..
التفتن الثنتين لـ مريم.. اللي جلست جنب وعد : خير ان شاء الله عساكن بس مجتمعات على خير..
وعد : انا عني ما اعرف الا الخير الحمدلله ما ادري عن بنت اختكـ .. كاد هي بـ تخربني..!!
انهار : يا حمارة الا انتِ راعية الشر كله..
مريم : ما يحتاج تعلميني فيها اعرفها..(ناظرت وعد) وين نهى..؟!
وعد : ما ادري يمكن فوق..!!
مريم : شكلها تعبانة وما تبي تقولي..
وعد : نهاوي..!! تجي عليها ما اخبر انها قد قالت انها تعبانة و الا تشكت.. عادي تمرض وما تقول لأحد بس احنا نكتشف و لا بعد تهاوش تقول ما فيها شيء..!!
مريم : العرق واحد..!!
انهار : ههههههههههههههه كسحتكـ ههههههههههههه..!!
وعد تناظر انهار مقهورة : هد فم ان شاء الله.. زين الحين خلتيها تضحكـ علي..؟!
مريم : انتِ اللي جبتية لـ نفسكـ مسوية نفسكـ وين و انتِ خرطي..!!
وعد تلف الموضوع : و دامنا خرطي انا و نهاوي يعني نحتاج احد يرعانا نحزن .. يعني احنا ما نحب نقول لأحد و نبلشة احنا تعبانات و كذا.. و نستحي نتصل عليكـ تعالي و نخليكـ تعنين و ما يصير تنامين عندنا و اشياء معقدة ويش كثر..!! ويش رايكـ نحل الموضوع كله بدل كل هالمعمعة و انتِ تكونين معنا لأن احنا نحزن و حتى انا عندي بنت و ما اعرف لها لحالي لازم احد معاي..!!
مريم وقفت : لو دريت ما جيت جلست معاكن..
انهار تناظر خالتها طلعت لفت على وعد : ويش تقصدين من الحكي كله ما فهمت شيء..؟!
وعد : نبي ماما ترجع لـ بابا.. بس هي رافضة..!!
انهار : اوووف من جدكـ ..؟!
وعد : ايه ليش وين الإشكالية.؟!
انهار : ما فيه اشكالية.. خلاص انا بـ اساندكم اجل.. بـ احن على راسها لين توافق ما عليكـ و لو تدري جدتي يمكن تهفها على راسها عشان توافق عاد ابوكم عندها غير..!!
وعد : لا لا.. انتِ تكلمينها ايه.. لكن لا احد يعرف غيركـ .. جدتي خليها للأخير ما ابيها تعرف الحين..
..عساف بـ حدة : كم ماشين يوم الاقيكم قبلي هنا..؟!
ابو عمر : عساف اهدأ .. ايش فيكم يا عمي ..؟! اول مره تجوني هالوقت و بـ هالشكل..!!
وليد : ابي انشدكـ و ابيكـ توعدني تقول لي كل شيء من غير لا تخبي علينا شيء..!!
ابو عمر ناظر عساف الواقف و وليد و مشعل استغرب من كلام وليد : اجلس عساف..
جلس عساف يتنهد.. لف ابو عمر على وليد : قول اللي عندكـ ..
وليد طلع الصورة : مين هذا..؟!
ابو عمر ناظر الصورة تعرف عليه.. : ليش ..؟! من وين تعرفة..؟!
وليد : عمي انا ابي اعرف مين هذا و ايش اللي بينه و بين ابوي..؟!
ابو عمر : و ليش ما نشدت ابوكـ ..؟!
وليد : يقول ما يعرفة..!! بالأصح هو ما يبي يعلمنا مين هو و لا ويش بينهم..؟!
ابو عمر : ابوكـ يدري انكـ جاي تنشدني عنه..؟!
وليد انقهر : لا ما يدري.. بـ تعلمني و الا لا..؟!
ابو عمر شبكـ اصابعة بـ بعض : الموضوع قديم يا عمي.. له سنين.. و كلن راح بـ حال سبيلة..
وليد يناظر جوالة يطق بإسم سعود : طيب علمنا لو هو قديم.. نبي نعرف ويش القصة..؟!
ابو عمر : رد على جوالكـ يمكن ابوكـ درى انكـ جايني تنشد عنه..!!
وليد رد على الجوال : خيـــر..!! .. ايه .. ماني جاي لين اعرف الموضوع.. طيب .. خلاص الحين بـ اجي.. قفل الخط وهو متنرفز.. : ابوي يقول تعالوا..!!
ابو عمر ابتسم : اذا تبي تعرف شيء انشد ابوكـ عنه مو احد ثاني..
وليد : ابي اعرف ليش تهربون من الموضوع..؟!
ابو عمر : ما نتهرب .. روح لأبوكـ و هو بـ يعلمكـ ..
وليد وقف : طيب بـ اشوف يعلمني و الا لا .. بس ما راح اسكت اذا ما عرفتة اليوم بـ اعرفة بكره..
..
غرفة جود..
ريما : طيب ويش بـ تسوين..!؟
جود تفتح الكتاب و تسكرة : و لا شيء.. اعلى ما بخيلها تركبة..
ريما : جودي البنت تهددكـ لها سنة و هي تلاحقكـ..
جود : لو تقدر تسوي لي شيء كانت سوتة من زمان..
ريما : ما ادري بس تخوف و الله يعني اتوقع لو وحده تسوي لي كذا و تهددني و الله لأعلم بابا و ما اداوم من غيره..
جود : هههههههههههه اما ما تداومين من غيره قوية..!!
ريما : و الله صدق ليش عايفة عمري انا .. عاد الا احد يهددني و اسكت لا يا حبيبتي ما اداوم الا بـ حرس معاي..!!
جود انسدحت : الموضوع مو مستاهل انتِ مو رايحة مكان خالي.. مدرسة فيها اقل شيء 300 طالبة غيركـ وين بـ تلقى الفرصة لأنها تسوي لكـ شيء..
ريما : و الله ما احد يضمن ويش يصير له .. يمكن تجيها الفرصة على طبق من ذهب.. جود من جد عاد لا تروحين لحالكـ خليكـ بين صحباتكـ مو تهورين..!!
جود : طيب و لا يهمكـ عمتي..
ريما : هي ايش تبي منكـ .. يعني شايفة انكـ مو من النوع اللي تبيه و لا انتِ ملقيتها بال ليش حاطتكـ براسها..؟!
جود : يقولون انها اللي تحطه بـ راسها تجيبة..!! و حطتني بـ راسها و ما قدرت علي.. تحسب اني مثلها مريضة.. و قد كلمتني كم مره و شرشحتها بين البنات خليتها ما تسوى ريال..
ريما : اثاريكـ انتِ ما قصرتي الشر .. اكيد بـ تحطكـ براسها..!!
جود : ويش تبيني اسوي اذا هي جاية بين البنات تحسبني خويتها..؟! هذا اللي ناقص اعصي ربي عشانها..؟!
ريما : المهم تنتبهين .. خلصتي المادة..؟!
جود : يب يب.. شلون ما اخلصها و ابو سعود كل ما شافني قالي كتابكـ و كتابكـ ..!!
ريما : اوووف الحال من بعضة الموضوع وصل لأمولة تهددني اعلم ابوكـ ..!! ياربي احس اني بزر اذا قالت لي كذا من جد اتخيل امي تقولة هاوش ريما تراها ما ذاكرت زين اليوم..!! بالله تخيلي هذا موضوع جلستهم..؟! انا لا تزوجت و جبت بنات ما راح اسوي فيهم كذا اما اهددهم بـ ابوهم ليش يخوفونا غصب..؟!
جود : بل بل بل كل ذا تحلطم.. شوي شوي وصلتي لأنكـ تزوجتي و حملتي و ولدتي و عيالكـ كبروا بعد..؟! انتِ ويش عندكـ اليوم على طاري الزيجة هاه...؟! لا يكون انخطبتي و انا ما دريت ترى بـ اذبحكـ ..!!
ريما : لا تخافين لو انخطبت بـ اتصل عليكـ و ابشركـ بعد.. حتى بـ اقولكـ اني موافقة خلاص و ما يحتاج نسوي عرس بعد اسبوع خطبة و ملكـة و نقضي ليش نأجل الموضوع..!!
جود : هههههههههه مشفوحة اول كنت بـ افكر ازوجكـ مشعل الحين هونت اخاف عليه منكـ ..!!
ريما تمسح رقبتها : احم ليش اخوكـ ناوي يخطب..؟!
جود : لا ما قد جاب طاري خلي اللي اكبر منه يتزوجون عشان هو يفكر يتزوج..!!
ريما ترفع حواجبها : آهـــا..!!
..
في المكتب ابو سعود و وليد..
ابو سعود واقف وراء مكتبة و وليد قبالة : رايح تدور وراي..؟!
وليد بـ هدوء : ما دورت وراكـ انت قلت ما تعرفة .. و رحت انشد عمي سعد يمكن يذكرة..!!
ابو سعود : نافش ريشكـ علي..!؟
وليد : يبه الله يرضى عليكـ انا ما اخطيت ابي اعرف مين اللي متسبب لنا بـ كل هالمشاكل.. يبه نبي نرتاح.. ابي اعيش حياتي وليد بن ابراهيم.. يبه كل شيء محسوب علي حتى الحرف.. الموضوع ماهو علي و بس .. خواتي و صبا بنت عمي..!!.. و انت و احنا .. و الأهم من كل ذا الوطن يبه.. مو انت رضيت اشتغل هالشغلة عشان نقدم للوطن ارواحنا فدا له..؟!
ابو سعود جلس : استغفر الله العظيم..!!
وليد : يبه لما نكون نعرف اسمه الحقيقي مو مثل لما نعرف مجموعة اسماء مستعارة له..
ابو سعود وقف حتى يطلع من المكتب : منصور بن حمد..
ويش كثر الذكريات تجمعة بـ منصور.. ويش كثر الحنين لأخ ما لهم نفس الأب و لا نفس الأم.. بس حياة جمعتهم و علقتهم حتى يعيشونها مع بعض اخوان.. ": لا يا ابراهيم لا..
ابراهيم : ليش .. انا ماني عارف ويش مغيركـ علي..!!
منصور رفع رجلة على الكنب : ما انت عارف..!! انت اكثر شخص كنت احسه روحي.. تخيل ان روحكـ تطعنكـ..!!
ابراهيم فزع : بسم الله عليكـ ويش هالحكي.. علمني ويش مكدركـ ..
منصور يناظر ابراهيم : كنت احسب لي ناس اخوان طلعوا عدوان..
ابراهيم : مين هم..؟! علمني و انا اخذ لكـ حقكـ منهم.. بس ترجع مثل قبل.. و تتركـ هالسم اللي تشربة.. حرام عليكـ عيالكـ و بناتكـ بـ حاجتكـ اذا انت انكسرت بـ تكسرهم..!!
منصور انهاء الكأس بـيدة و نزلة على الطاولة : انا انكسرت و ما فيه اللي بـ يجبرني و عيالي هم يرعون انفسهم.. (بـ نبره حادة) و حقي انا بـ اخذه.."
طلع وليد وراء ابوه بسرعة منصور بن حمد .. منصور بن حمد..!! اول مره يسمع هالإسم.. دخل وراء ابوه للمجلس.. : السلام عليكم..
: وعليكم السلام..
غازي ابتسم عرف ان وليد اثر على ابوه.. بـ ينتظر يعرف ويش السر..؟!
جلس ابو سعود جنب عمر و وليد جلس جنب ابوه.. قبل ما يسأل أي احد عن الموضوع او يوجة أي تعليق بدا ابو سعود بالكلام.. : منصور بن حمد.. كان من افضل الأشخاص و ازينهم.. ما يفوت فرض بالمسجد.. كان رفيق لي.. تربيت معاه.. اخر مره تشاركت معاه بـ شيء زين .. لما شاركنا بـ حرب الخليج مع بعض.. بعد ما رجعنا سالمين الحمدلله.. بعدها بـ فترة انقلب حالة.. تغير حيل علي.. صرت ادور عليه ما القاه.. تعرف على ناس جدد.. وقتها انا و بن حمد كنّا متشاركين بـ شركة.. لكن الشركة بسبب اللي كان يسوية بعد ما كانت تصعد صارت تطيح بالأرض ومن سيء لأسوء.. و قررت انفصل عنه بـ شغل لـ حالي.. ما كان راضي بالبداية بس اخذ الموضوع عن تحدي بيني و بينه و فتح كل واحد فينا شركتة الخاصة.. و صار بيننا تنافس.. و بـ فترة اشتغل معاه اخوي سعد.. ظلينا فترة طويلة على ذا الحال.. و كنّا نتلاقى بس ماهو بالحيل مثل قبل.. بـ مجلس بين التجار .. عشاء مسوية فلان و الا علان.. بعدها عامر كان يكسب صفقات بعضها كان ممكن ترسى على بن حمد.. هو رجال ذكي و يعرف بـ ايش يدخل.. ما يدخل مشروع ماهو واثق من نجاحة 100% .. و هالشيء خلى بن حمد يتراجع و اشتغل مع ناس اللي تعرف عليهم وقت ما كنت متشاركـ معاه.. و ما فادة هالشيء بالعكس دمروة.. و افلست شركتة و اضطر يبيعها و شريتها منه انا و اخواني بـ مبلغ ما تستاهلة الشركة بـ وقتها لكن عشان العشرة اللي بيني و بينه.. من بعد ما شريت الشركة منه ما عاد سمعت له حس لين جاني عامر يخطب لـ عماد و قالي ان عنده اوراق من بن حمد و بعضها شيكات كانت بيننا و بين بن حمد بـ حكم الشغل.. هذا كل شيء بيني و بينه..
جابر : طيب انت ما ضريتة ليش يكن لكـ هالحقد كله..؟! ليش ما حقد على عامر عشان الصفقات اللي خسرها..!؟
ابو سعود : لأن بن حمد يشكـ اني انا اللي اوشيت لـ عامر بـ اسلوبة في الشغل و خسرتة فلوسة كلها..
عساف : و ليش ما حاولت تكلمة و توضح له ان ما يخصكـ الموضوع كله..؟!
ابو سعود بـ آسى على رفيق الحياة : اوصل له..!! منصور ما تغير عشانه شكـ فيني.. حتى اخلاقة تغيرت.. و تصرفاتة..!! صار يشرب و يسكر..!! تدلى دروب الردى و ما رجع من بعدها..
وليد : ليش اول تهربت من انكـ تجاوب علينا..؟!
ابو سعود يناظر بـ الفراغ من غير لا يحط عينة بـ أي احد فيهم : لأنه .. اخوي..!! ما كنت راح اصدق انه يسوي فيني هالشكل و يقهرني..
دبت الحمية بـ وليد حط يده على ظهر ابوه : ما عاش من يقهركـ و احنا حواليكـ و الله و الله لا اقهره ما اخليها له..
ابو سعود : لا .. انت ما تسوي له شيء.. الأمن يتفاهمون معاه.. انسوا اللي سواه فينا خلاص..
وليد : و ليش ننسى ..؟!
ابو سعود بـ حدة : اقولكـ اخــــوي.!.! تفهم..؟!
مشعل : و ليش هو ما قدّر الأخوة اللي بينكم .. و يبي يضركـ..!!
ابو سعود وقف : قلت لكم اللي عندي.. ما ارضى ان واحد من عيالي يضر اخوي.. كلامي واضح.. (لف على غازي و جابر) خذوا راحتكم البيت بيتكم.. بـ اصلي لي ركعتين..!!
طلع ابو سعود وعيالة مقهورين أي اخ اللي يبي يضرهم و ابوهم بعد يمنعهم من انهم يستردون حقهم..!!
جابر : خلاص شباب احنا بـ نحل الموضوع بالمركز.. و ان شاء الله كل شيء بـ ينتهي قريب مع التحقيقات و الأدلة..
غازي : وليد رجاءاً لا تتهور.. حكم عقلكـ شوي.. خروجكـ من البيت ماهو بـ مصلحتكـ .. حتى لو الصقر بالسجن ما يعني تسرح و تمرح على كيفكـ ..
وليد بـ هدوء : ان شاء الله..!!
وقف غازي و جابر و وقفوا معاهم كلهم.. سعود بـسرعة : وين ما تعتبون الباب قبل لا تعشون..
غازي : قبل ما تحلف و الله اننا رايحين الحين عندنا شغل ويش كثرة..
احمد : افاا الشغل يتأجل و الله ان ابوي يزعل.. استريحوا و عينوا من الله خير..
جابر : انا ما احب الرسميات و الشغل ذا .. بيتكم صاير مقر .. كل ما جيناكم بـ تعشونا يعني..؟!
ياسر : افااا ماهو من قيمتكم و الله ..
جابر تقدم بـ يطلع : ابيكـ تقول لا ما احنا معشينكم تفزع لي مو تفزع مع اخوانكـ ..
سعود : افاا طال عمركـ ما قد جيتنا و تطلع ما تعشى عندنا و الله عيب بـ حقنا..!!
نايف : اووه يعني عادي احنا ما نتعشى دايم مبلطين عندكم..!!
مشعل : اذا قعدوا رؤوساءكـ انت بـ تقعد ليش نتعب بإقناعكـ ..
غازي مشى : مالنا فيه بـ اوصل اهلي البيت و بعدها بـ اروح المركز..
: مع السلامة.. طلعوا وراء بعضهم غازي جابر عساف نايف و عزام و عماد.. بقي عمر واقف على الباب.. اللي ناظر ياسر : بالله ناد لي صبا ابي اسلم عليها..
ياسر : تأمر..
وليد : تهقى بـ نستفيد من اسمه..؟!
عمر : مو بس اسمه.. بـ نجرب كل شيء بـ يدنا اذا ما استفدنا عمي يعرف عنه اشياء واجد.. بـ يفيدنا..
سعود : بـ تضغط على ابوي..؟!
عمر : هو عارف انه تغير يعني شيء طبيعي بـ يساعدنا اننا نلقي القبض على شخص يضر الوطن..
ياسر فتح الباب .. و دخلوا اخوانة عرفوا ان صبا جات.. صبا تفاجأت لما شافتة ياسر ما علمها بس سحبها من غير لا يقولها شيء.. صرخت : عــــمــــر..
عمر فتح يدينه لها وهو يضحكـ حضنها : يا عيون عمر..
صبا تبوس كتفة : يا حياتي متى جيت و الله ما دريت و الا كنت استقبلتكـ بالمطار..
ابتسم عمر : انا جيتكـ ماله داعي تعنين.. كذا صبوي تزوجين وما تنتظريني..!؟ و الا ما يهمكـ وجودي..!!
صبا : لا و الله بس بابا قال انه ما يصير نتشرط احنا مو اهل العرس.. و انا ما حبيت اعنيكـ و الله اني فقدتكـ حيل..
عمر يبوس راسها : ما تفقدين غالي.. جعلني ما اذوق حزنكـ ..
صبا تحضنة بقوة : وااااو صاير خـــقة من وين كل هالزين اعطيني شوي..!!
عمر : يرفع نقابها : من هنا.. احد يكون عنده اخت مثلكـ و ما يأخذ منها شوية زين..!!
ياسر المتفرج الصامت..!! صبا عندها روح مع اخوها.. بس هالروح مفقودة معاه و هو السبب.. هو اللي حطمها من اول ليلة..!! تنهد عازم على التغيير حتى لو دلوعة يبي يعيش معاها لأنه مستحيل يفكر يطلقها تظل بنت عمه الأفضل يتأقلم معاها ومع دلعها..
عمر : يــــاهووه وين وصلت..!!
ياسر انتبة لـ عمر اللي يحركـ يده قدام عينة : هنا ما ابعدت..
عمر غمز له : صبا لاعبة بالحسبة..
قرصتة صبا و وجها حمر اختفت وراه و عمر يضحكـ : هههههههههههههه.. تعالي شلون تزوجتي انتِ..؟!
ياسر : مثل كل البنات و الا ويش حاسب بعد..؟!
عمر : ماني حاسب .. بس ياسر تراني ما كنت موجود وقت خطبتها و لا زواجها.. تكفى يا ولد عمي لا تقهرني فيها.. الشيء اللي بـ توجعها فيه بـ يوجعني..
ياسر : لا تشيل هم ان شاء الله صبا بـ عيوني.. انت بس انتبة لـ نفسكـ ..
صبا لفت و تعلقت بـ رقبة عمر : ليش انت وين بـ تروح..؟!
عمر : عندي شغل و بـ اروح اقضية.. انتبهي لـ نفسكـ و لـ ياسر..
صبا : احبكـ عمر..!!
عمر ناظر ياسر : شكلها لكـ بس لازم تمر بـ نقطة تفتيش اللي هي انا..
صبا ابتعدت عنه بـ قهر : صاير قليل ادب..!!
ياسر و عمر : ههههههههههههههههههههههه..
..
شقة منيره و عيالها تحت حراسة مشددة..
منيره : قوم يا ابوي و الله شكلكـ تعبان..!!
نواف : لا يمه ما فيني بلى بس نعسان..
نايف : ما عليكـ يمه يتدلع بس..
منيره تمسح على شعرة : الحمدلله اللي ربي ردكم لي سالمين من غير لا نضر احد.. و الله قلبي كان ياكلني كل ساعة و انا بـ بيت ابراهيم.. مستأمني على بيتة و اطعنة بـ ظهرة و اضرة..!!
نايف : الحمدلله الموضوع عدّا على خير ..
منيره : بكره بـ اروح بـ اتعذّر منه..
نواف جلس : وشوو..؟! خلاص يمه عاد طلقتي منه و قضينا من هالموضوع..
منيره ابتسمت : لا تعصب ويش بلاكـ اشتطيت كل ذا غيره علي..!؟
نواف : اذا ما غرت عليكـ على مين اغار..؟!
منيره : على عروستكـ ..
نواف : يجيب الله مطر..
نايف : يمه على ويش بـ تعذرين من ابو سعود..؟!
منيره : ضايقتة يا ابوي لين خليتة يطلقني.. ما طلقني من الباب لـ الدريشة.. انا طولت لساني كني بزر .. ادري ان اللي سويتة غلط بس كنت افكر انه يطلقني و ارجع لكم و اقول للي حرمني منكم انه طلقني يمكن يعتقنا..
نايف : حسبي الله و نعم الوكيل فيه..
منيره : لازم اتعذر منه (ناظرت نواف) لا تسوي فيها بـ تزعل بـ اروح معاكم نكلمة من عند الباب و نمشي.. لازم يا ابوي.. هو ما قصر معنا..
سكت نواف ماهو عاجبة..!! اما نايف : اللي يريحكـ يمه نروح لهم بكره و كلميه..
نواف : منور حركات كاني ماني ما عندنا .. هاه مو يعني تجددين اللقاء و الحب القديم اللي وهقنا..!!
قرصتة منيره من عضدة : ما تستحي قليل الأدب.. كنت بزر ما عاد فيه شيء ينذكر حتى..
نواف : صح بـ دليل الخطبة المتهورة اللي سواها و اللي غيرت حياتنا سنة و قلبتنا فوق تحت..
منيره : قم عن وجهي توكـ ما انت تعبان..!! يالله اذلف عني..
نواف ابتسم : لا خلاص بـ اقولكـ شيء ثاني.. كيف بناتة ما عنده وحده تطيح الطير من السماء تخطبينها لي..؟!
نايف بـ حدة : ما تستحي تحكي بـ اعراض الناس..؟!
نواف : لا تتفلسف قلت خطبة بالحلال ما حكيت فيهم.. هاه يمه ويش رايكـ ..؟!
منيره : رأي يقول اقوم اسوي عشاء ازين لنا كلنا..