لو سألتي الورد وهو ما بين ايدك اقطعك للكاتبة ضحكة قهر

14

جالس في مكتبة : اففف هذا اللي ناقص انا اتزوج وحده بزر.
التفت لباب مكتبة اللي انفتح بسرعة و دخل : سيدي.
: خيـر يا راشد.
راشد : البنت اللي ملكت عليها.. اسمها وعد.؟!
بدون نفس : يقولون.
راشد : انخطفت.
اعتدل بجلستة بعد ما كان يناظر الجدار و معطي المكتب جنبه و رافع رجل على رجل .. التفت بسرعة على راشد : ويـــش قلت.
راشد : دريت من سلمان يقول انها اخت سعود بن ابراهيم والبلاغ مقدمه سعود.
عماد : لا بالله كدينا خير اذا هذا اولها ينعاف تاليها.. و عرفوا من خاطفها.؟!
راشد : ايه .. صلاح مهددهم والحين منحاش من السجن وبعدها البنت اختفت.
وقف عماد : بقول لابوي يشوف ابراهيم.. شكل مشاكل البنت ويش كثرها وانا ماني ناقصها..
راشد : عماد.. تراها صارت زوجتك.
عماد : زوجتي بس وراي امن دولة وانت ادرى باللي انا فيه.
راشد : ما انت مسوي شيء.؟
عماد: ويش اسوي.؟! تقول اخوها مقدم بلاغ يعني الشرطة يدورون عليها.. ولا تنسى ان اليوم عندي جلسة.
راشد : بتروح لهم و زوجتك مخطوفة.؟!
عماد بنرفزة : تبيني احط يدي على خدي والى اشق ثوبي ترى الادمية اللي ارتبطت فيها انخطفت.. والا اصيح واندب حظي.. لا تنسى يا راشد لمين انا بروح لمين...!؟
راشد : شايل هم البنت اكثر منك.
عماد : وليش تشيل همها..!؟ لو هي مالها احد نقول.. بس هاذي ابوها ابراهيم بن مساعد ان كنت تجهله قم انشد عنه.. و بعدين تقول اخوها سعود يعني ولد عمها عساف و دام هالاثنين متولين القضية حط ببطنك بطيخة صيفي.. بيلقون البنت قبل لا تطلع الشمس.
راشد : ياخي تكلم عنها وكنها ولا شيء.
: وهي فعلاً ولا شيء عندي.. والملكة اللي صارت ماني معتبرها شيء.. وحتى لو جات ببيتي وليتها ما تجي ماني عادها شيء.. مالها عندي زود عن ماكلها ومشربها ومكان تنام فيه.
راشد : الماضي مكلبشك كلبشة.
عماد : امش نروح نضبط الوضع .. ما بقي شيء على موعد روحتي..
..
..
بجهة اخرى و مركز آخر.. يجلس وراء مكتبة يجمع الخيوط عشان ينقذونها بأسرع وقت ممكن .. عساف بحدة : ابي استنفار لكل الفرق ابي نقطة تفتيش بكل شارع رئيسي و تعممون اسمه و مواصفاته على الحدود..
سلمان : حاضر سيدي.
عساف : و دخل علي الغنم اللي مشغلهم حرس للسجن.
سلمان : حاضر... ادى التحية العسكرية وخرج.. اغلق الباب خلفه : يالله يا شباب ع التحقيق.
: عز الله اكلنا تبن.
سلمان : توكم تعرفون انتم قصرتوا بشغلكم والهربان شخص عليه قضايا فوق هذا خاطف له بنت.
: عشانها بنت عمه و اخت سعود.
سلمان : ليش عساف و سعود مقصرين بشغلهم.؟
: ما قلت كذا.
سلمان : اللي عندك قوله عند سيادة العميد.
: تبيه يقطع رزقي..
سلمان : يالله لا يطلع و يغسل شراعنا حده معصب.
سعود دخل بخطوات سريعة و واسعة : سلمان ..
وقفوا كلهم مع دخلته المهيبة.. بدون توتر اعصاب هو مخيف كيف واعصابه مشدودة و ممسوكة بشعرة باي لحظة تنقطع.... سعود : ما ورد أي جديد لك.؟
سلمان واقف : لا سيدي.
صوت من وراه : سيدي.
التفت له سعود : نعم يا رايد.؟؟
رايد بعد ما ادى التحية العسكرية : تم الاطلاع على جميع تسجيلات الكاميرات بالمستشفى.. للاسف ما فيه أي تسجيل لصلاح داخل او طالع.
سعود يمسح وجهه بكفوفة : شلون يعني..!
عساف خرج : خيــر ويش فيه..؟!
سعود : التسجيلات ما فيها أي اثر لصلاح.
عساف : و وعد.؟
رايد : كان معانا خالد و مشعل ما لفت انتباههم أي وحده تكون هي وعد.
عساف : معقولة حابسها بالمستشفى..؟ و يتحين الفرصة عشان يطلع.
سعود : يقولك ماهو داخل ولا طالع ماله أثر.
سلمان : يمكن احد خاطفها غير صلاح..
سعود : مين اللي له مصلحة غيره .. وهو الزفت اللي مهددنا انه ياخذها.
عساف : يمكن داخل متنكر.
: سيدي.
عساف : خير يا عبدالرحمن.؟
عبدالرحمن : تم البلاغ عن سيارة مسروقة لـ متعب بن مرزوق.
عساف يكتف يده اليمين ويرفع يده اليسار لخده : طيب هنا مو قسم المرور ليش جاي تقولي.؟
عبدالرحمن : سيدي السيارة سجلتها الكاميرات عند المستشفى اللي انخطفت منه وعد.
سعود يمسح شعره بيده و ينطق بقهر : الله يأخذك ياصلاح أخذ عزيز مقتدر.
عساف : ابيكم تراقبون السيارة وتتبعون كاميرات جميع الشوارع تشوفون لها أي تسجيل نشوف وين بنوصل فيها.. رايد روح مع عبدالرحمن و شوف الشخص اللي نزل من السيارة هو صلاح والا لا.
عبدالرحمن : الشخص اللي نزل من السيارة دخل المستشفى معاه مره وطلع وهي معاه.
عساف : يعني ماهو صلاح.؟
عبدالرحمن : دامه معاه مره من يوم دخل فهذا مستبعد.
عساف : ربي ارحمــــــني.
سعود : سلمان طلع لي كل الارقام اللي اتصل عليها صلاح قبل لا نقبض عليه يمكن يتصل على أي احد فيهم.
عساف : حط كل الخطوط تحت المراقبة كلها.
سلمان : حاضر.
سعود : كل واحد يروح يتمم المهمة اللي كلفناه فيها.
ثلاثتهم ادوا التحية العسكرية و خرجوا..
عساف التفت على الاثنين اللي من يوم دخل غرفة سلمان معطيهم ظهره : و انتم الحين ابي اعرف شلون قدر يفلت منكم..؟
: .....................
عساف بعصبية : انطقوووا يومكم مو قد الشغلة ولا تعرفون تحافظون على الأمن ليش مقدمين على الوظيفة..
: سيدي .. احنا قد المهمة لكن صلاح طلب انه يطلع للحمام واحنا مو بيدنا نرفض له.. خرجناه و بعدها خرج من السجن.
سلمان جاء يركض وانفاسة تتصاعد خوفاً من مصيبة قادمة : سيدي.
عساف التفت بحدة : خيـــر.
سلمان : زياد .. انحاش.
اتسعت اعينهم صدمة من هول الموضوع .. اثنين ينحاشون من السجن بيوم واحد..
سعود بعصبية : انت ويش قاعد تقول.؟
سلمان : ورد البلاغ من حرس السجن باختفائة من ساعة.
عساف بعصبية بلغت الجحيم : قسماً بالله لا اوريهم نجوم الليل بعز الظهر .. ساعة مختفي توهم يبلغونا انه منحاش.. خرج بخطوات سريعة كا اعصار سيدمر كل ما يكون امامه.. بجانبه سعود وجه احمر من شدة الغضب.. مجرمان لهم يد بعصابة مخدرات احدهم تمت الاطاحة بهم من شهرين و محجوز لم يتم الاستفادة من استجوابة فقد ذاكرتة اثناء الاطاحة به. جميع من يراهم يقف لهم يؤدي التحية العسكرية ولا يخطوا خطوة واحده الا بعد ما يتخطونه.
عساف : سعود .. مين اللي جاب الدكتور اللي كشف على زياد وكتب التقرير انه فاقد ذاكرتة.؟
سعود : عمر..
عساف : وعمر يعرفه يعني جاب دكتور موثوق والا دكتور زفت.
سعود : ما ادري اذكر احد اشار عليه فيه بس ماني فاكر مين.. ليش شاك بشيء.؟
عساف : اول شاك الحين متأكد.. زياد يمثل علينا انه فاقد الذاكرة.. لذلك بس نطلع من هنا ابي الدكتور اللي كشف عليه وكتب لنا التقرير.
سعود : ليتك تكلمت من قبل يا عساف.. بعد ما طاح الفاس بالراس.
عساف : والله لا اكسر رووسهم بذا الفاس مو عساف بن عبدالرحمن اللي يستغفلونه.
..
..
عماد بعد ما اغلق أخر زرار في ثوبة : هاه كيف.؟
راشد : تمام.. بس سيدي.
عماد : خير.؟
راشد : انتبه.. لا تتهور.
عماد : لا تخاف.. بس تابع لي مجريات التحقيق مع اللي خطف وعد بعرف ويش صار.؟
راشد : ليش ما انت مهتم.؟
عماد : لو خيروك بين الدولة و زوجتك.. مين تختار..؟ انا ماني جالس بمكتبي وحاط رجل على رجل عشان تلومني انا جالس احمي دوله يا راشد.. و وعد و وراها اخوها و ابوها وعمامها بيطلعونها من تحت الأرض..
راشد : يارب.. قبل ما يصير فيها شيء. لاني سمعت ان البنت مخطوفة من المستشفى ومسوية عملية اليوم.
عماد ببرود : مو عملية قسطرة كان عندها ثقب وتقفل اليوم.. يعني شيء بسيط.
راشد : عماد لا تروح .. البنت اهم من هالروحة اعتذر لهم بأي شيء قولهم انك مسافر.
عماد : ما راح أأخر اموري عشانها.. اليوم بنعرف متى موعد العملية والخطة اللي على اساسها بيتم التهريب.. وكيف بتتنفذ عمليات الاغتيال.
راشد : الله معااك الله حاميك..
..
..
: تحسبينهم بينقذونك مني مثل المرة اللي طافت
: ويش تبي فيني حرام عليك أنا مسوية عملية اليوم.
: جعلها فيني ولا فيك.
: جعلك تموت ولا يصلون عليك.
: انطمي ولا ابي اسمع صوتك .. لازم نشوف لنا مكان اخبيك فيه قبل لا اروح موعدي.
: جعل الخير يتخبى عنك ولا تشوفه كل حياتك.
: مصره إني اسود عيشتك.
تحاول تفك يدينها اللي رابطها وراء ظهرها من غير لا يحس فيها راح ترمي نفسها بالشارع والسيارة تمشي ولا إن حقير مثل هذا يدنسها.
: تلقين اخوك وابوك و ولد عمك يناظرون السماء يشوفونك فيها.
وعد : جعل ربي يحرمك شوفك يا حقير.. انا ما سويت لك شيء عشان تضرني..
صلاح : ماني ضارك انا احبك احبك احبك قلتها لك كم مره.. ما راح اضرك..
وعد : جعل الامراض كلها تحبك ولا يكتب لها ربي تفارقك.
صلاح : بـــس بـــس لا تدعين لا اذبحك الحين.
وعد : احسن من اني اكون مع واحد قليل شرف مثلك.
صلاح : يااارب صبرني بس.
وعد : ليش انت تعرف الرب عشان تدعيه..!
صلاح بصراخ : انطمــــــي.. لو اسمع منك حرف واحد يا ويلك يا وعد تفهمين.
وعد : لا ما افهم..
صلاح يرد على جواله : هلا طال عمرك.. بارض الله الواسعة.. نعــم..! ما اقدر معاي وحده .. ايه .. ويـــش تقول...! بس انا قلت لك من قبل طال عمرك عنها.. ما ابي اتخلى عنها.. طيب مسافة الطريق.. قفل الجوال.
وعد : نزلني..!
صلاح : شكلك ما تستوعبين الكلام من اول مره.
وعد : من ناس حثالة مثلك ما استوعبه.
صلاح : تدرين وين بنروح الحين.
وعد : قسمــاً ان ما نزلتني لا اذبحك.
صلاح : مره خوفتيني.!
وعد : نزلني يا كلب يا حقيـــر والله لا اذبحك.
صلاح يوقف عند باب فله بعيدة عن الحياة.. بعيدة عن الدنيا بعيدة عن سير الناس.. هناك قريباً من الحدود .. وقف السيارة ونزل ساحبها معاه وهي تصارخ : اصرخي من اليوم لا بكره ما احد بسامعك هنا..
..
..
جالسين بمكتب في فيلة بعيدة عن الأعين.. فيلة تراها من الخارج تحكي الجمال والاناقة.. ما ان تخطوا اول خطوة في قلبها تشعر بان الموت يناديك.. خالية من كل شيء حتى من قطع الاثاث .. فقط هذا المكتب أثث بطريقة فخمة والباقي ينادي الهجران ينادي الموت.. حتى الاضاءة خافتة.. و الحديقة اشجارها ميتة.. كل شيء هنا ينادي الموت.. حتى من يدخل هاذي الفيلة هو يعلم ان مصيره الموت..
: هلا بعزام وينك يا شيخ من زمان نتحرى هالشوفة.
عزام بهدوء وثقة : تخبر يا سطام مشاغل هنا و مشاغل برا.
سطام : ايه سمعنا ان عندك عملية جديدة.
عزام ابتسم : بعض مما عندكم.
سطام : بس اللي سمعته بتكون ضربة بالسوق.
عزام : نتأمل من وراها.
سطام : ويش رايك نكون شركاء اجل.. سمعت ان ودك بشريك.
عزام : تعرفني ما ادخل مع شريك الا بشروطي.
سطام : وانا عند شروطك واللي اوله شرط اخره نور .. اعطينا هالشروط وان شاء الله ما احنا مختلفين عليها.
عزام : اجل هالاتفاقية لوقت ثاني.. اجتماعنا اليوم لموضوع غير ذا.
: السلام عليكم.
: وعليكم السلام.
تقدموا الثلاثة مع بعض و سلموا على رئيسهم وصافحوا عزام ..
سطام آشر بيده اليسار على عزام : اعرفكم عزام بن مبارك..
: والنعم.
عزام : ماعليكم زود.
سطام آشر على الثلاث الداخلين : ناصر .. زياد .. صلاح.
عزام : والنعم.
: ماعليك زود.
سطام : مبروك الافراج.
زياد يجلس باستهزاء : قول مبروك النحشة.
سطام ابتسم.. ثم تحولت لضحكة صاخبة تردد صداها بالمكان : ههههههههههههههههههه... أشري شوفة عساف بن عبدالرحمن و سعود بن ابراهيم بنص ثروتي.
ناصر : والله لو شفتهم يوم دروا عن نحشة صلاح .. الدنيا كلها انقلبت المركز انقلب مثل بيت النحل ما احد بمكانة الكل يفتر.
سطام : ايه صلاح ماخذ بنتهم ليش ما يصيرون مثل النحل.. الا وين حاطها.؟
صلاح ببروح : بالسيارة.
زياد : جايبها هنا..؟ صاحي انت.؟
صلاح : وين تبيني احطها.؟
ناصر : اخاف يدلون المكان هذولي بيقلبون المدينة فوق تحت عليها.
سطان : انا قلت له يجيبها معاه.. تدري يا عزام لو هي لي ما غلت عليك كنت هديتها لك.
عزام : ما تقصر و انا ما كنت بردها.
صلاح : ولو انها غالية علي.. وتعبان عشان اخذها وماهو اول مره اخذها او احاول اخذها.. بس ما فلحت المره اللي فاتت بس هي لك هدية دام الرئيس بيهديك اياها.
عزام ابتسم : مقبولة الهدية.
زياد : انا ما ادري ويش عندك على ذا البنيه بذات.
صلاح : عشان اقهر اخوها سعود.. وعساف.. وخطفها كان سهل من المعهد تعرف البنات اللي في المعهد مو كثر بنات الجامعة او المدارس.. و بعدين البنت غبية كل شيء بتسويه تكتبه بحسابها بالتويتر اخبارها اخذها منها وعساف و سعود يحسبون ان وحده من زميلتها اللي معطيتني اخبارها حتى اسم المعهد اخذته منها.
ناصر : تدري لو انت تطب بيد عساف بيهرسك بدقيقتين و يعجنك.
صلاح ببرود : بكل الاحوال بموت الحين والا بعدين .. عساف راسل اوراقي للمحكمة وما راح يكون اقل من اعدام.
سطام : خلونا من عساف و سعود بيجي يوم نفركش ذا الاثنين وندبغهم على وجيههم .. نبدأ في المهم مهمتنا الجاية و اللي عزام بيكون طرف جديد فيها و اول عملية يأديها معانا وفالها النجاح ان شاء الله.
عزام : ايه وهذا اللي مجتمعين عشانه.
زياد : نسمعك طال عمرك.
سطام : راح تكون بعد رمضان بالضبط.. وتحديداً 1/10 .. يوم العيد الظهر.
صلاح بصدمة : بعز النهار..؟
سطام ابتسم بخبث : ايه .. ما راح يجي ببالهم اننا بنتجرأ عليها.. لكن يوم العيد الظهر والعصر الناس كلها نايمة .. ما احد راح يشك اننا ممكن نسوي عملية تهريب سلاح ومخدرات والشمس بكبد السماء.
زياد : ما تحس انها خطة متهورة.
سطام : ابــداً.. والرئيس مقتنع بالخطة ميه بالمية.
ناصر : حتى انا أأيد الخطة الناس كنها بغيبوبة بهالوقت لو قلنا الصبح او الليل صحيح بنكون بخطر بس الظهر او العصر ما تلقى الدومري بالشارع.
عزام : المكان.؟
سطام : فندق .............
زياد : سيدي احس اننا بنتهور كثير ليش مو بالخلا.؟
سطام : لا بتكون بالفندق بمواقف السيارات.
عزام و نظرته تثبت بعين سطام : انا موافق.
ناصر : وانا ما عندي اعتراض.
صلاح : وانا بايعها بكل الاحوال ما تفرق عندي.
سطام : تفرق عندنا يا صلاح.. عساف وسعود ان قبضوا عليك بيوكلونك تبن عشان تعترف.
صلاح : صار لي قد ايش عندهم ما اخذوا مني معلومة وحده بس حققوا معاي بخصوص بنتهم.. اما الباقي ما اعطوه بال لانهم اغبياء العصبية معمية عيونهم.
ناصر : فعلاً اذا قدرنا نضربهم من كذا اتجاه راح يتشتتون.
سطام : يتشتتون هذولي صح مخين بس عن ميه.. والله لا يقلبونكم فوق تحت.
زياد : طيب .. و بعد ما يتم التبادل واستلام البضاعة.؟
سطان : ننظف المكان كالعادة..
زياد : بس اذكر ان ما فيه متفجرات تكفي لتنظيف الفندق وكأن شيء لم يكن.
سطان : لا تخاف جبنا واحد معلم فيها و يسوي لنا كل الانواع والاشكال.
زياد : اجل خبري عتيق..
عزام يوقف بثقة : اتوقع كذا انتهى اجتماعنا..
سطام : ايه انتهى.. قالنا التوفيق.
عزام : ان شاء الله..
سطام : لا تنسى اتفاقنا على الضربة الجديدة.
عزام : ماني ناسي.. التفت لصلاح بثقة : ما انت معطيني هديتي.؟
ابتسم صلاح و وقف : الا بتأخذها من هالشنب..
عزام : نسلم عليكم..
طلع وطلع معاه صلاح..
زياد : من وين هذا.؟
سطان : هذا عزام بن مبارك اشهر من نار على علم بالسوق.. بس من تحت لتحت يضرب السوق ضربات قوية ممكن يرفعة و ممكن ينزله بغضمة عين.
ناصر : اهم شيء انه قد الثقة.
زياد : نجربه طلع مو قده نصفية مثل غيره.
وقفوا عند سيارة صلاح المسروقة و بجنبها سيارة عزام .. فتح صلاح الباب اللي وراء و سحب وعد اللي طلعت تناظر فيه وتناظر بعزام .. فتح دبة السيارة : حطها هنا..
صلاح : بتخنق البنت.
عزام : تحسبني غبي اطلع و بنت وراي .. ركبها بس.
صلاح رمى وعد بالدبة وهي تصيح و تحاول تفك نفسها وتنحاش منهم.
عزام بحدة : قسماً بالله ان سمعت لك حس لا اذبحك وادفنك ولا احد داري عنك .. فاهمـــة.
وعد طنشته ولا كنه تكلم وهي تحرك بقوة تبيه يفكها يذبحها ولا يصير لها شيء ثاني.. يستلمون اهلها خبرها ميته روح وجسد .. ولا روح ميته وجسد حي..
سكر عزام الدبة بقوة عليها ولا اهتم ان جاها شيء او لا.. العصبية معمية عيونه واعصابه منفلته ..
ركب سيارتة وخرج من المكان..وصلاح دخل.
صلاح : تلقون عساف وسعود يضربون اخماس باسداس شلون انحشنا من السجن.
ناصر : بركاتي..!
زياد : اللي يسمعك يقول انت اللي مكتشف هالطريقة.
سطام : الا شلون انحشتوا.؟ ما خبرتوني.
ناصر : تذكر الxxxx اللي يفقد الشخص ذاكرتة لمدة نص ساعة او زود شوي.
سطام : ايه اللي انت طلبته من جورج يصنعة.
ناصر : ايه عليك نور.. هو حطيته بأكل الحرس مرتين ونحشتهم ما غير لا احد يحس بعد ما البسوا ملابس ضباط.
سطام : العقل المدبر انت.. ما ينخاف عليك.
..
..
: سيدي.
سعود : اذا ما عندك خبر زين لا تقوله روح كلم عساف.
عساف يدخل لمكتب سعود : بنسمع انا وياك.. قول يا رايد.
رايد : تم العثور على السيارة المسروقة بالبر.. وردنا بلاغ من قسم المرور بعد رفع البصمات من عليها وموجودة بصمات صلاح .. وبصمات اخرى ما تعرفنا عليها والارجح انها لوعد.
سعود : حسبي الله ونعم الوكيل..
عساف : والله بس يطيح بيدي لاخليه يدور الموت ولا يلقاه... يجلس على الكرسي سند كوعة على فخذه و مقدم : شلون قدروا ينحاشون و يخترقون الجهاز الامني.. مستحيل ما يكون لهم احد يعاونهم.. اكيد فيه خاين بيننا يعرف نقاط قوة هالمكان ونقاط ضعفة.. والا اثنين ينحاشون من نفس المركز..
سعود : و حط ببالك انهم مو بنفس التوقيت وهذا بحد ذاته كارثة.. لو اثنين وانحاشوا مع بعض تهون عند اثنين مو بنفس التوقيت.
عساف : زياد و صلاح اكيد انهم على علاقة ببعض.. زياد عضو بعصابة مخدرات و ما حسبنا اخذناه عندنا عشان نستدل منه على باقي افراد العصابة مثل علينا فترة ماهي هينة انها فقد الذاكرة باليوم اللي داهمنا فيه وكرهم.. هذا يعني انهم عصابة كبيرة اللي قدروا يضحكون علينا و يجيبون دكتور و يتعاون معاهم.. و غير كذا افرادهم اللي بيننا اللي نحسبهم افراد يفدون ارواحهم للوطن.. و هم على العكس..
سعود : انضحك علينا يا ولد عمي واحنا يا غافلين لكم الله.. صرنا مضحكة.. وفوق هذا اختي مع مجرم.
عساف يسند ظهرها للكرسي : هذا اللي بيجنني ولاهو مخلني اقدر اثبت كل ما حاولت اربط حبلين ببعض القى هالموضوع بوجهي.. معقولة صلاح خطف وعد بامر من احد فوقه.. معقولة يكون دافع الخطف اكبر من انك شهدت ضده بالمحكمة.
سعود : اذا صلاح عضو بعصابة ما راح يسوي شيء من وراء رئيسهم.. هذا يعني ممكن يكون رئيسهم هو اللي وراء عملية اختطاف وعد اليوم مو صلاح.
عساف : جيب أي شيء من البيت عليه بصماتها يطابقونها مع البصمات اللي بالبيت.
سعود : ما يحتاج اجيب.. جوالها هنا لاقينه بغرفتها بالمستشفى.. رفع سماعة التليفون : سلمان طابق البصمات اللي في السيارة مع كل البصمات اللي تلقاها على جوال وعد... وقفل الخط.
عساف : ابوي ما وقف اتصالات.. كلهم مجتمعين ببيتكم..
سعود : انا قلت لهم ما راح ارد على احد فيكم لو عندي أي خبر زين والا شين بكلمكم ماني مخبي عليكم.
عساف : لازم نشتغل بسرية يا سعود.. دام لهم اعوان بكل مكان التصريح بخططنا والتفكير بصوت عالي يكشفنا..
سعود يلف بكرسيه الواسع يمين ويسار ويمسك بيده اليسار قلب يضرب به على المكتب : اكيد بختار جماعة موثوقين.. نشتغل معاهم.. بس لو القى وعد ويرتاح بالي.
..
..
الجو متوتر لأبعد حد.. واكثر ما يسيطر عليه الهدوء.. الدقيقة تمر كاليوم لا تنتهي .. ابنتهم لا يعلمون أي هي.؟ لم يتلقوا أي خبر عنها شر او خير.. اعصابهم تنادي بالانهيار قريباً..
ام عبدالرحمن : الساعة صارت ثلاث وهي مالها حس للحين.
مشعل : والله لو امسكه لا ادفنه وهو حي..
خالد : ياسر دق على سعود شوف ويش استجد.
ياسر : من شوي داق.. وهو ما ينطاق.
ابو سعود يفرك جبهته بثلاث من اصابع يده اليمين : يارب عونك.. هي ضعيفة ما راح تقدر تحمي نفسها.. يارب لا تفجعنا فيها..
نهى : ياليتكم ذبحتوه يوم كان هنا و حاول يخطفها.
احمد : هذا اللي ربي كاتبة .. لكن شلون طلع من المستشفى فيها.. وهو فيه امن.. لو قلنا خدرها واخذها شايلها بيشكون فيه الامن شايل وحده مريضة وطالع فيها لو داخل الموضوع ما ينشك فيه.. لو قلنا مهددها تقدر يوم توصل برا تصارخ او تسوي أي شي يلفت انتباه الامن..؟ شلون قدر يطلعها من بين الناس.
سعود يجلس منهد : اخذها بكرسي متحرك.
ابو سعود : ويش الاخبار.؟
سعود : ما من شيء زين.. المركز مقلوب فوق تحت.. ما احد يدري شلون انحاشوا بس الاكيد ان فيه احد يدعمهم.. ماهو معقول قدروا يخترقون الجهاز الامن.. اكيد لهم اعوان بالمركز و برا.
ابو سعود : اختك..؟!
سعود : معاه للحين يبه.. اخر شيء السيارة توقفت بالبر .. ولقيناها هناك بعدها ركبوا سيارة ثانية لحقنا اثرها للاسفلت وبعدها اختفت.
ام عبدالرحمن : ويش بيصير على اخيتك هالحين.؟
سعود : ربي يحميها.. ادعي لها يمه.
ابو عساف : وعساف وينه.؟
سعود : بالمركز يحقق مع الحرس بيشوف كيف قدروا ينحاشون من المركز.
ام عساف : الله يكون بعونكم.. ويرجع لنا بنيتنا بخير وسلامة.
ابو عبدالرحمن : روحوا ريحوا لو فيه خبر بيتصل عساف يعلمنا.
سعود : انا برجع المركز.. بس ابي شي يفوقني.. ميار سوي لي قهوة ضبطيها.
ام سعود : ارتاح يمه والفجر روح المركز.
سعود : لا يمه بنتابع مجريات التحقيق.
ميار وقفت : طيب.
سعود : ضبطيها ميار و ثقليها ابي هالصداع يفك عني.
ميار : ان شاء الله... خرجت من بينهم للمطبخ.
ياسر يحك دقنة : يعني ويش بتسون خطوتكم الجاية ويش بتكون.
سعود : نحاول نربط المواضيع ببعض.. عشان نوصل لنقطة تكون الخطوة الجاية.. الموضوع مشربك فوق ما تخيلون.. انتم عليكم بقضية الاختطاف بس هو بالاصح اكثر من قضية مع بعض.. وعد طاحت بيد عضو من عصابة..
ام عبدالرحمن : وهذا وشو يا وليدي.
ابو عمر : مجموعة ناس ما يخافون الله ما يدلون غير دروب الردى.
سعود : احس يديني مربطة ماني قادر اسوي شيء أي فكرة تجي براسي احاول اجمع اطرافها بس افتكر ان وعد بين يديهم انهبل..
احمد آشر لسعود يسكت ابوه وجدانه وخواته ماهم حمل يسمعون آشياء تزيدهم ما تنقصهم.
ابو عساف : عامر وولده وجيهم نحس علينا.
ابو سعود و وجهه يحكي التعب النفسي والجسدي : ما اقول غير ياربي لا تفقدني عقلي..
ابو عمر : ما يصير تتطير وتتشائم.
ابو عساف : ما انخطفت البنت غير اليوم .. لا يكون عامر وراء صلاح.؟
ابو سعود : لا عامر ما يسويها.. البنت بنت اخته.. وبعدين كان قادر يخلي عماد ياخذها اليوم ومن غير لا يسوي كل ذا .. و يحط نفسه بمشاكل هو بغنى عنها.
ياسر : وعماد ليش يأخذها.؟
ابو سعود : انا ملكت لوعد اليوم على عماد بن عامر بن سلامه.
انصدمـــوا كلهم.. يناظرونه .. ابو سعود : اضطريت لوى ذراعي وما قدامي الا ان ولده يملك عليها.. وبعدين هو ولد خالها.
ابو عبدالرحمن : معطي بنتك واحد من برى الجماعة هاذي ماهي سلومنا يا ابراهيم.
ابو سعود : عاداتهم ما تباعد عاداتنا ماهم اغراب عنا يبه.
خالد : بس عامر عدوك يبه ماهو صديقك عشان نقول عادي.
ابو سعود بعصبية ينهي النقاش قبل لا يطول : قلت لك لوى ذراعي .. الشيء اللي ما تعرفون عنه لا تحكون فيه.
ياسر يحاول يمتص غضب ابوه : احنا ما نطلع من شورك يبه.
ميار تنزل القهوة على الطاولة.. وقف وليد ياخذها و يأخذ الفناجيل يدور على الموجودين يقويهم. ابتدأ بجده.
ابو عبدالرحمن يمد باطن كفه مفرودة له : لا يبه مالي فيها هالحزة.
دانه : طيب جوال وعد هم دايم بالمسلسلات يتتبعون الجوالات وكذا..
سعود : جوالها عندنا بالمركز.
وليد : متأكد ان صلاح هو اللي اخذ وعد لان خالد و مشعل شايفين تسجيلات الكاميرات بالمستشفى ولا شافوا وعد.
سعود : ايه متأكدين.. صلاح متنكر.. و طلع بوعد على كرسي متحرك.. غير عن كذا بصماتها موجوده بالسيارة.. وتطابقت مع بصماتها على الجوال..
خالد ياخذ الفنجال من يد وليد : طيب الكاميرات اللي بالشوارع ما تقدرون توصلون فيها للسيارات اللي سلكت الطريق بعد ما وقفت السيارة المسروقة.
سعود : الطريق بري ماعليه كاميرات مراقبة.
..
..
بصراخ يهز اركان المكان : شلون يعني ما حسيتوا عليهم.؟ هاه..؟ واحد ينحاش منكم المغرب والثاني الساعة 11 ليش .؟ هي وكالة بدون بواب..؟
يقف امامه عشرة اشخاص يصطفون بخوف .. بندم.. لا يقوون على الحديث او حتى الدفاع عن انفسهم.
عساف : ابي اعرف انتم عندكم عقول ..؟ والا حيوانات تشتغل هنا.. لما واحد ينحاش المغرب .. يعني لازم تتشدد الحراسة اكثر صح والا لا..؟
: ...................
بصراخ : ردوووووووا.
اومئوا برووسهم نعم..
عساف : ولما هو ايه.. شلون ينحاش زياد بعد ما انحاش صلاح.. عيونكم وينها بقفاكم.؟
سلمان فتح الباب ادى التحية العسكرية : سيدي.
عساف : اتحفني بعد.. اليوم كلها ما تلقيت خبر زين احكي.
سلمان : الدكتور اللي كتب التقرير بخصوص زياد و يتابع حالته.
عساف : ايه.
سلمان : وردنا بلاغ من قسم الامن الجنائي انه تم قتل العيلة كلها.
عساف يضرب المكتب بكفوفة بقوة : حسبي الله ونعم الوكيل... مين متولي القضية.؟
سلمان : العميد عماد بن عامر.
عساف : رتب لي موعد معاه.. من الصباح بدري.
سلمان : على امرك.. ادى التحية العسكرية وطلع.
عساف : شفتوا ويش سوا اهمالكم.. الامانة اللي انحطت على عاتقكم اهملتوها.. برفع امركم للجهات العليا وهي تصدر عقوبتكم... والآن كل واحد على مكانه لين نشوف ويش يصير.
رايد دخل : سيدي..
عساف : نعم.
رايد : صدر امر المحكمة بخصوص صلاح وتحديد الجلسة.
عساف : متى.؟
رايد : بعد اسبوع.
عساف : ياليت نلقي القبض عليه قبل الجلسة ونفتك منه.
رايد : يارب.
عساف يستمع للآذان : الله اكبر الله اكبر..
رايد : ما انت رايح ترتاح.؟
عساف : وين القى الراحة يا رايد.. علمني..
رايد : هذا سعود راح.. روح ريح ساعتين.
عساف : سعود الحين بيجي.. بس بيتطمن على عمي وجداني لا ينهارون.
رايد : ماعليش سيدي.. المرافقة اللي معاها وين موقعها من الاعراب.
عساف : ما كان معاها احد.. هي لحالها.
رايد استغرب : ليش طيب.؟ ما عندها خوات.
عساف : الا عندها.. بس هي عنيدة وراسها يابس.. يبي لها من يهفها كف يهد ضروسها يمشيها على الصراط المستقيم لو معاها مرافقة كان ما وصلنا لذا المواصيل.
سلمان : سيدي.
عساف يرفع نظره له : اتحفني.. تدري لو ما اؤمن بالله لا اقول وجهك نحس ياخي ما جبت لي خبر زين.
ابتسم سلمان : ويش اسوي اليوم كله ما فيه خبر يونس.
عساف : قول ويش الجديد.
سلمان : حددت لك موعد مع العميد عماد بن عامر الساعة 9..
عساف يلعب بقلمه يمين و يسار : زين.. اكيد بيحققون الحين و يبحثون عن الادلة نشوف ويش عندهم .. انا بروح البيت ببدل ملابسي واخذ شور من ذا القرف..
رايد : ارتاح ساعتين و اذا استجد شيء بندق عليك.
عساف : لا تحاول تقنعني بعدها بمر على بيت عمي نتطمن على الكل..
..
أحمد : يبه لازم ترتاح.
ام عبدالرحمن بصوت عالي : لا اله الا الله محمد رسول الله.
ابو عمر وقف يسند والدته : ما امداك تصحين يمه.
ام عبدالرحمن تمشي ببطء متوكأه على عصاها.. : كل ما غمضت عيني ما اشوف الا البنية قدامي.
ابو عمر : الله يلطف فيها .. هو ادرى بحالتها.
ام عبدالرحمن تجلس : والله وعيد ذكية ان شاء الله انها تقدر تفك حالها منه جعله الماحي.
احمد : بس هي تعبانة يمه.. ما فيها شدة.
يزيد : استغفر الله.
خالد : خواتي ما بغن يهجدن و يفكنا من الصياح والنياح كن الواحد ناقص توتر.
سعود يجلس بتعب : السلام عليكم.
: وعليكم السلام.
خالد : توقعتك بالمركز.
سعود : عساف قالي لا تجي هو بيجي الحين بعدها بنمشي مع بعض.
ام عبدالرحمن : ما فيه جديد يمه.؟
سعود : لا يمه.. ادعي ربي يحلها من عنده.
فارس : عساف برا..
سعود : قله يدخل ما فيه احد.
ابو سعود : لقيت عامر متصل علي.. اكيد انه وصله العلم..
ابو عساف : رديت عليه..؟
ابو سعود : لاا.. ماني فايق اكلم احد.
ياسر بقهر : ليت من يحط صلاح بين يدي والله لا احطه بقفص ذيابة ينهشون فيه.
عساف : السلام عليكم.
: وعليكم السلام.
سلم على الموجودين وجلس جنب جدته..
ابو عمر : شكلك مهدود الحيل.
عساف : ايه والله..
سعود : ايش الاخبار.
عساف : الدكتور اللي كتب التقرير عن زياد.. انقتل هو وعيلته كلهم.
ام عبدالرحمن تحط يدها على راسها : اعوذ بالله اعوذ بالله الله يكافينا الشر .. يارب سمعنا الخير.
سعود اسند كوعة على فخذة وتقدم بجلستة : مسكت القضية.؟
عساف : لا العميد عماد بن عامر ماسكها.
سعود بدون نفس : عامر سلامه.؟
عساف : ايه ليش تعرفه.؟
سعود : سمعت عنه..
عساف : ضبطت معاه موعد بعد ساعة.. بشوف ويش عنده.
سعود : وبيقولك.؟
عساف : القضية مرتبطة ببعض لازم نركبها مع بعض عشان نوصل للفاعل..
سعود : زياد ما غيره ما يبي لها..
عساف يحك دقنة بيده اليسار : او احد يبينا نشك بزياد..
سعود : ايش تقصد..؟
عساف .. بتعرف قصدي بعدين.. وقف : انا بروح اقابله اشوف ويش عنده... رد على جواله : نعم يا سلمان .. ايه.. لا حول ولا قوة الا بالله .. تدري لا عاد تنقل لي الاخبار انت .. ما جبت لي خبر زين.. ههههههههههه طيب خلاص لا تزعل... بفتح قسم لاخبار الافراح وبعينك رئيسة... طيب أكد على مساعدة يحجز لنا موعد جديد.. ابي اعرف تطورات القضية معهم... انتظر اتصالك.. بالتوفيق.
سعود : خيــر.؟
عساف يجلس : عماد اعتذر عن الموعد.. يقول الحين مشغول.
سعود : يفضي نفسة نص ساعة يسمع فيها اللي عندك.
عساف : خله يمسك خيوط القضية عشان نجمعها.
خالد : تكفون لا تسمعونا مصايب اللي فينا مكفينا.
عساف : هذا ربي يجازيني عشان اقول لسلمان انت شكل وجهك نحس ما تجيب غير الاخبار الشينة.
..

لا اله الا انت سبحانك اني كنت من الظالمين..

ضحكة قهر..