لو سألتي الورد وهو ما بين ايدك اقطعك للكاتبة ضحكة قهر

64

يا أم العيون المنهكات الكحيلة
الشعر منك يؤخذ ، وينكتب بك

ماني أحبك حيل .. لأنك جميلة
أنتي جميلة حيل .. لأني أحبك

لـ حمد العيد..

بيت ابو سعود..
غرفة سها.. سعود جنبها على السرير و وليد مستند على الدولاب و خالد و ياسر على الباب واقفين..
سعود : تأكدي ان احنا ما نبي الا مصلحتكـ .. لو ندري ان ماجد ماهو كفو لكـ و الله لو يحط لنا الشمس بـ يد و القمر بـ يد ما عطيناه.. بس ولد عمنا ومن عمر نعرفة عارفين اخلاقة و دينة ما فيه شيء ينرد..
وليد تملل من حكي سعود : ابو سعود رقم اثنين.. انا تأكدت ابوي لما جابكـ ورثكـ اسلوبة بعد مو بس الشبة.. صراحة غش المفروض يقسمة بينا..!!
سعود : ماهو وقتكـ ترى.. روح شوف نفسكـ ازين.. (غمز له)..
وليد بـ حدة : شف لو تجيب لي طاريها مره ثانية ما تلوم الا نفسكـ ..!! هاه هذاني نبهتكـ قدامهم..!!
سعود : ويش بـ تسوي بـ تكفخني..؟!
وليد : تتخيل ما اقدر اسويها..!! لا ادخلكـ على زوجتكـ محمل..!!
سعود وقف و شمر كم ثوبة : طيب تعال.. نشوف ويش عندكـ ..!!
خالد بـ حدة : سعود من جدكـ تجارية هذا مضيع عقلة..!!
وليد متحمس من زمان ما تضارب مع احد وقف متجهز : ايه مضيع عقلي..
تقابلوا الإثنين سعود مبتسم على جنب و وليد الضحكة ماهي مخليتة يصطلب..
سها وقفت على ركبها بـ نص السرير : لا بليز سعود وليد ويش ذا ..؟!!
وليد تقدم بـ يضرب سعود بوكس لكن سعود صده و لف يد وليد وراء ظهرة : ترى اللي دربنا واحد..!!
وليد : تقصد غازي.. بس نسيت ان الصقر زاد عليه.. (و رفس سعود على ركبتة و فلتة سعود)..
سعود تراجع وراء خطوتين و بعدها باغت وليد اللي توه لف عشان يقابل سعود و ضربة سعود على بطنة ضربتين قوية خلت وليد يتراجع وهو منحني يديه على بطنة..
سها تبكي تبيهم يوقفون : الله يخليكـ سعود يكفي.. وليـــد..!!
وليد تنرفز من ضربة سعود و هجم عليه بـ ضربة على الركبة بـ رجلة و ضربة على الكتف..
ياسر وقف بينهم يصرخ عليهم : انتم مجانين من متى احنا نتهاوش كذا..!!
سعود : هو اللي يطول لسانة علي ناسي اني اكبر منه..
وليد : لا يا شيخ الحين صرت انا اطول لساني عليكـ عاد كنكـ انت محترمني..!!
سها نطت من السرير و وقفت مع ياسر بينهم : الله يخليكـ سعود يكفي ما يصير تهاوشون..!!
سعود : و الله ما اتركها له انا من زمان حمقان عليه على سالفة التدخين بالعها و ساكت هاذي هي جات على رجليها..
قرب سعود لـ وليد اللي كان مجهز يدية لـ الدفاع عن نفسة لكن سعود ضربة على جنبة بـ رجلة.. و لما وليد حط يدة على جنبة لا ارادياً سعود ضربة تحت صدرة.. بس ما كانت ضربة قوية..
سها نقزت تجري تنادي ابوها اول مره تشوف اخوانها يتهاوشون بـ هالشكل.. و ياسر و خالد كانوا يتفرجون ما نبهوا وليد و سعود لأن الإثنين يبي لهم تهزيئة محترمة من ابوهم..
سها تجري ع الدرج لـ الدور الأرضي و تصارخ تنادي ابوها : بـــــابـــــا..!! بـــــــابـــــا..!!
وقف ابو سعود على صراخها .. ام حاتم : خير ايش فيكـ ..!؟
سها يدها على صدرها تأخذ نفس و نطقت بـ تقطع : ســ عــود .. و ولــيـ ـد يتـ ـهـا وشون..
ام سعود : وشوو..!!
سها : و الله .. بابا.. يتـ ــضا ربــو ن..
ابو سعود طلع ماهو مصدق ..!! سعود و وليد..!! لو قالت وليد ومشعل تجي.. بس سعود..!!
سها تمشي معاه بـسرعة : بابا الله يخليكـ استعجل الحين يذبحون بعضهم..!!
حط رجلة في صالة الدور الثالث طالع من المصعد دقيقة كل العيلة مجتمعة في غرفة سها.. دخل ابو سعود على ضربة متبادلة بين سعود و وليد..
ام احمد مصدومة صدرها يهبط و ينزل من طلعتها السريعة لـ الدور الثالث : و غـــبني..!! تهاوشون..!!
ابو سعود مدنق يهز راسة و مبتسم بإستهزاء..!!
احمد يكلم خالد : انهبلوا..!؟
خالد : شكلهم..!!
ياسر ابتعد حتى يوقف بـ جانب البقية.. حتى يكون سعود و وليد هم بؤرة المشهد..
وعد تكلم اخوانها مجتمعين كلهم عند الباب : ايش القصة..!؟
ياسر همس لها : تفرجي بس..
ابو سعود يصفق : برااافو ماشاء الله كفوو عيالي.. عداكم العيب.. الله يحميكم.. محتار ويش امدحكم فيه..!! (وقف جنب وليد و ضربة على ظهرة بـ قوة) كفوو و الله رجال..!!
وليد متنرفز..!! لكن هذا ابوه مو سعود عشان يرد له الضربة.. ابو سعود وقف قدام سعود.. و ضربة على كتفة بـ قوة و كأنة يربت عليه : كفوو انا كذا مطمن مرتاح بعد موتي بـ تكونون ونعم الإخوة و السند لـ بعضكم..!!
وليد يحاول يدافع عن نفسة و يبرر موقفة : يبـــه..!!
ابو سعود بـ حدة : و حـــطبة..!!
سكت وليد مكتف يدينة .. ابو سعود : انا ماني راسلكم تراضون اختكم..!؟ ويش اللي خلاكم تهاوشون..!؟
ما احد بـ الإثنين تكلم.. السبب تافة.. مجرد استفزاز وليد لـ سعود و سعود اللي كان ينتظر الشارة على وليد عشان التدخين.. خلى الإثنين يتهاوشون و يكبرون الموضوع..!!
ابو سعود التفت لـ ياسر و خالد : بشروني عساكم معاهم..؟!
خالد : لا..
ابو سعود : ليش ما فكيتوهم..!؟
ياسر يدري بـ يأكلون جزء من التهزيئة : ما قدرنا عليهم..
ابو سعود يهز رأسة بـ تأييد : ما قدرتوا حرام انتم صغار ما جيتوا طول رجلي وهم كل واحد جدار عندكم..!! ما تنلامون..
خالد : يبه هم ما هم بزارين حتى ما يحتاج احنا نفككـ بينهم..
ابو سعود : و شفتهم بزارين عندكـ ما وقفتهم ليش..!؟ يعني لو سها ما نادتني انتم بـ تفرجون عليهم لين واحدهم يذبح الثاني..!!
ياسر : اخوان يبه ما راح يسوونها..
ابو سعود : الشيطان شاطر ما احد يأمن غضبة.. (لف على سعود و وليد اللي تبعدهم عن بعض خطوة فقط..) محتار ويش اعاقبكم فيه..!! اضربكم و انتم اطول مني..!! (وليد صد بـ وجهة يحاول يضبط اعصابة ويضغط بـ اصابعة على عضدة .. ابو سعود انتبة له) كنه ماهو عاجبكـ كلامي.. ودكـ تكفخني ..؟!
وليد : حاشاكـ ..
ابو سعود وقف قبالة و ضرب وليد على ذراعة بـ قوة حتى يفكـ وليد تكتيف يدينة و يطلقها حرة : لا اضربني ازين..
وليد منقهـــر : يبـــه..!!
مشعل مستند على عكازة و يهمس لإخوانة : جنت على نفسها براقش..!!
شوق تهمس بإذن ام سعود : تكفين يا خالة كلمية.. يهدي بالة شوي.. اكيد الهوشة ماهي مقصودة..!!
ام سعود : يتضارب هو واخوه و تقولين ماهي مقصودة.. خلي ابو سعود يأدبهم..
شوق شوي و تبكي : تكفين يا خالة و الله ما يسوى الموضوع..
كلمتها الأخيرة كانت واضحة لـ الكل ما انتبهت ان صوتها تعدا وتيرة الهمس لـ خالتها.. سمعوها كلهم لأنهم ساكتين ينتظرون ابو سعود ويش بـ يقول.. التفت ابو سعود لـ شوق بـ حدة..!! : كيف..!!
نظرتة كفيلة بـإنها تنزل دموعها.. كيف لما يكون الكلام لها.. و ممكن تأكل حرة ابو سعود بسبب الهوشة كلها هي..
سعود قرب لأبوه و باس راسة : يبه شوق ما تقصد..
ابو سعود ناظر سعود : كيف الموضوع ما يسوى.. و اخوان متهاوشين..!؟ اجل ويش يسوى..؟!
سعود بـ هدوء : ما تقصد الهوشة.. تقصد ما يسوى الموضوع انت تعصب عشانة.. و هي صادقة يبه .. انا و وليد غلطنا ايه و ما احنا اول اخوان يتهاوشون.. المصارين بالبطن تهاوش..
ابو سعود : هالحكي ماهو عندي يا سعود.. علمني ويش اللي تهاوشتوا عنده..
سعود : يبه هي بدت بـ مزحة و كبرت..
ابو سعود : حكيكـ ما خرط مشطي .. جيب لي غيرها..
سعود : و الله يبه كانت مزحة و اخواني يشهدون..
ابو سعود : مزحة و اخوانكـ ما قدروا يفككون بينكم..!! مين يكذب علي فيكم..؟!
وليد : سعود..!!
سعود التفت لـ وليد بـ حدة : نعـــم..!!
وليد بـ نفس حدة سعود : ايه انت تكذب..!!
شيء واحد يتمناه سعود بـ هاللحظة ابوه ما يكون بـ هالمواجهة.. عشان يسفل بـ وليد و يطلع الحرة كلها فيه..
ابو سعود يضغط على شفايفة السفلية بأسنانة : الحين بـ نعرف مين يكذب فيكم علي (التفت لـ سها) تعالي..!!
سها صكتها ام الركب.. : انا..!!
ابو سعود : تعالي لا تخافين.. ما احد فيهم بـ يقرب لكـ ..
سها : طيب اسأل خالد و ياسر كانوا فيه..!!
ابو سعود : لا ابيكـ انتِ تعالي..
قربت بـ خطوات مترددة خوف من ابوها الغاضب.. و خوف من اخوانها وقفت و مد يده ابو سعود و حط يده على كتفها و وقفها جنبة مقابلة لـ سعود و وليد : قولي لي انتِ كل الموضوع من طقطق لـ سلام عليكم..
سها لفت حتى تقابلة .. و رفعت يدينها له تهدية : بابا .. الله.. يخليكـ ..
ابو سعود مسك يدينها بـ يدة اليمين و نزلها : قلت لكـ لا تخافين و الله ما احد فيهم بـ يقولكـ كلمة..
سها : كانوا .. يمزحون.. حتى وليد كان يضحكـ ..
ابو سعود : طيب على ويش..؟!
سها : سعود قال لـ وليد شوف نفسكـ و وليد نبهة ما يقوله زي كذا مره ثانية و الا بيتهاوش معاه و سعود شجعة قالة قرب ورني اللي عندكـ و بعدها تهاوشوا.. وقالة.. سعود.. انه منقهر منه عشان التدخين..!!
جود من الحماس صفرت .. انتبهت على نفسها و مشعل يسد نفسها و ابو سعود يناظرهم بعد ما قطع مشعل صوت جود.. تركها مشعل و مسكـ عكازة من جديد.. و جود تناظر أي شيء الا ابوها..
وعد بعد ما أبعد ابوهم نظرتة عنهم : مجنونة انتِ..!!
جود تهمس لها : يقولكـ الموضوع وصل لـ التدخين و احنا يا غافلين لكم الله.. خسارة ليتهم تهاوشوا بـ غرفتي مو بـ غرفة سها كنت خليتهم يتكافخون ما ناديت ابوي الا بعد ما يخلصون عشان يبدأ الشوط الثاني و النهائي من الهوشة.. و اكون حاضرة من الأول .. مو مثل اختكـ الخبلة اللي خرت الأولي و التالي..
وعد : و بابا ليش ناداها عشان لا كذبت عليه خوف من اخواني بـ يعرف.. وليد مجنون واضح اعصابة تلفانة.. و بابا يضغط عليه..!!
جود ناظرتها : نعم..!!
وعد : المفروض يخليهم لين يهدون بعدين يناقشهم الحين كل واحد منفعل .. بالذات وليد مو متحكم بـ اعصابة مثل سعود.. اضمن لكـ لو سحر مكان شوق من شوي وليد ما تحركـ هذا اذا ما كفخها هو..
جود : ايه و الله هاذي بعد غير سالفة مرت اخوكـ هاذي يي لها قعدة مرتبة..
وعد : شلون بـ تقعدين معها و انتِ مضربة يا حرام يا قالكـ زعلانة..
جود : عطيتكـ وجه .. بـ اجيبها شوي و احقق معاها..
وعد : انكتمي لا يطوفنا شيء..
ابو سعود : الإثنين تسبقوني لـ المكتب الحين.. و قبل لا تحركون.. و الله .. ثم و الله لو احد فيكم يهاوش سها و الا يكلمها ما يلوم الا نفسة..
تحركـ وليد و بعده سعود اللي مسكـ شوق وطلع فيها لـ الصالة : روحي لـ الجناح..
شوق ما راددتة : طيب..!!
ابو سعود يناظر عيالة الباقين : ايش فيكم..!؟ ودكم تهاوشون..!؟
الكل تحركـ بـ يطلع.. ابو سعود : انتم الإثنين .. (التفتوا كلهم.. لكن نظرة ابو سعود لـ خالد و ياسر) انا ماني قايل تطلعون سها و تونسونها..!؟
سها : ماله داعي بابا اصلاً انا نسيت.. وليد و سعود نسوني بـ الفيلم اللي سووه..
ابو سعود قرص خدودها : الله يرضى لي عليكـ ..
ابتسمت سها تجاهد تظهر الرضا لـ الكل.. طلع ابو سعود طلع بعده ياسر و خالد..
ابو سعود وهو متجه لـ المصعد و من غير لا يخلي مجال لـ الرفض : جود ابي اشوفكـ على السفرة..
جود اتسعت عيونها لها كم يوم ما تجلس معاهم عشان يراضيها و يقتنع بالطب..!!
وعد : تستاهلين هذا الأسلوب ما ينفع يا حياتي..
جود بـ قهر : كيفي انا اسوي اللي ابيه..
ياسر : انتِ الى متى بـ تجلسين بالرقعة اللي حاطتها على راسكـ ..!!؟!
جود كتفت يدينها : لين يطول شعري..
ميار : معنية نفسكـ و كابتتها روحي مشغل و ضبطي شعركـ و قضينا..
جود : هذا شيء راجع لي.. و انا ما ابي اقص شعري..!!
خالد جلس : الله أكبر.. اذكر كنتِ تحنين على ابوي تقصينة لو سانتي..!! ويش اللي تغير..!!
جود : تفكيري تغير و انا حره بـ تفكيري..
ام احمد : خلونا ننزل تحت ما عاد باقي وقت على العشاء..
وعد : صراحة ودي عندي كاميرا مراقبة في مكتب بابا بـ هالحزة اشتري شوفة التهزيئة اللي بـ يأكلها سعود بـ نص عمري..
حاتم ابتسم : لا تشمتين الشماتة ماهي زينة..
وعد : مو قصة شماتة.. بس انتِ تعرف ايش معنى سعود يتهزأ من بابا..!! يالطيف ..!! ودي انها مسجلة بـ فيديو و كل شوي اعيدها و اتفرج عليها..!! (تصفق بـ حماس) وناسة..
ام حاتم : الله يديم علينا الروقان..!! ويش عندكـ ..!؟
وعد ابتسمت : ويش عندي..!! (خالد و ياسر ضحكوا وعد التفت عليهم) هيه انت و اياه هد فم ان شاء الله.. انتم مو حاسين بـ قيمة الحكي اللي اقولة.. ما يحس فيه الا شخص بابا وكلة تهزي لين شبع و سعود كان الساعد الأيمن لـ بابا وقتها بـ يحس بـ حكيي..
ام سعود : حرام عليكـ يا وعد و الله سعود يحبـكـ و يخاف عليكـ و يحاتيكـ ..
وعد : و انا احبه يا خالة يعني اذا قلت كذا اكرهة..!؟ اكيد لا.. بس ياربي ما راح تحسون فيني خلوها بالقلب ازين..
في مكتب ابو سعود..
ابو سعود : انا بس ابي اعرف ويش اتصرف معاكم..!! و الله استحي حتى اني اهاوشكم.!.! ويش خليتوا لـ البزارين..!.!
سعود : الله يرضى لي عليكـ و الله ان الموضوع ما يستاهل تعصب عشانة.. قلت لكـ هي مزحة و كبرت و زادت عن حدها نوعدكـ ما عاد تتكرر..
ابو سعود : عشاني بينكـم يا سعود ما تتكرر..! و بعد ما اموت ويش بـ يصير..!! غير ان وليد له حكي ثاني ما شافها مزحة..!!
وليد : انا ماني طايق نفسي.. ممكن تأجل النقاش لـ وقت ثاني..!!
ابو سعود : لا..
وليد يحكـ جبهتة بـ اصباعين يحاول يكبت انفعالة : انتم صار لكم فترة ما تحسبون تجيكم فترة عشان تقهروني فيها.. ما راعيتوني.. و انتم اللي تعرفون ويش اللي تحملتة..!! انا عشت بـ فترة صعبة تألمت فيها من جهتين.. عشان اختي و مهمتي و روحي اللي قدمتها فدا لأرضي.. و لما انتهيت و ما حسبت اني ابي اخلص من كل شيء ابتلشت بـ بنت الصقر و صرتوا على الطالعة و النازلة تدقوني بـ الحكي فيها.. هالشيء يستفزني.. تعرفون ويش معنى احمي بنت واحد قهر اختي..!! انا كل ما شفتها اشوف ابوها..!.. صرت مجبور اعيش معاها بـ نفس البيت..!! ما احد فيكم حس بالضغط اللي اعيشة..!! ثم تسألوني ليش صار الموضوع مو مزحة.. (وقف) أي احد بـ يجيب لي طاريها و بـ يحطها بـ رقبتي و يحملني مسؤوليتها بـ ادبغ فيه و اتهاوش معاه.. بس ابوها يقيمون عليه الحد بـ ارميها بـ دار ايتام.. ماني مسؤول عنها.. ابوها هو اللي تخلّى عنها و رماها علي و انا ماني ملزوم فيها.. ما ابي اشوفها و لا اسمع طاريها..
طلع وليد من مكتب ابوه و بعدها من البيت كله..
ابو سعود : الله يهديه راسة يابس البنت ويش ذنبها..!! يحملها ذنب ابوها وهي طفلة مالها حيل و لا قوة..!!
سعود : اصبر عليه فترة يمكن اذا تقفل ملف القضية كامل و انتهت يروق.. هو ينتظر ينتهي كامل التحقيق و الحكم بـ فارغ الصبر..
ابو سعود : بـ تكلمة يا سعود.. ما ابي يكون بـ خواطركم شيء على بعض.. لا عشان بنت الصقر و لا غيرها..
سعود : تأمر اهم شيء رضاكـ ..
ابو سعود : ما يضايقني الا اني اشوف قلوبكم ماهي على بعض..!! انت الكبير يا سعود عليكـ الحمل اكثر منهم.. ما ابي احس ان كل تعبي و تربيتي تروح هباء منثوراً.. تكفي يا ابوي لا تضايقني بـ هالسواة..
سعود وقف و جلس جنب ابوه بعد ما باس راسة : يبه و الله لو دريت ان وليد متحسس من هالموضوع ما ضايقتة و لا فتحت السيرة معاه.. كل الموضوع كان مزحة و هي حزت بـ خاطرة..
ابو سعود : الله يرضى عليكـ ..
سعود : يبه لا تضيق من شوق تراها و الله ما تقصد..
ابو سعود : ادري يا سعود.. و هي ما حكت الا من خوفها عليكـ .. الله يبلغني شوفة عيالكم..
سعود : آميـن يارب..
..
بيت غازي..
: انا قلت اشاوركـ متى ما بغيتي يجي يأخذكـ ..
لينا توترت .. صحيح انها تبي شوفتة.. لكن فجأة و قبل لا تتجهز نفسياً : ما ادري.!!
امال : يا ماما مالها داعي قعدتكـ عندنا دام ابوكـ راضي على رجعتكـ لـ عمر.. بيتكـ و زوجكـ اولى فيكـ ..
لينا : بس ماما .. يعني احس يبي لي وقت اجهز نفسي..
غازي : عمر يبيكـ بـ خلاقينكـ .. يا بابا انا لو علي و الله ما اطلعكـ من بيتي.. بس انتِ تزوجتي و صرتِ مسؤولة من عمر .. و انا يوم شرطت عليه تبقين عندي لين تولدين كنتِ بـ اتأكد انه مو جابر نفسة عليكـ .. و وافق على شرطي وهو مو راضي رغم اني بـ نفسي ما كنت ناويها التسع شهور كلها تبقينها عندي.. مثل ما قالت امكـ زوجكـ و بيتكـ اولى فيكـ ..
لينا : بابا انا مو معترضة على اني اروح معاه.. بس خايفة..
غازي : ايش اللي مخوفكـ ..؟!
لينا : كل شيء.. يعني الوضع تغير كلش كلش .. و انا حامل..!! احس نفسي مترددة..
غازي يـتأكد من رأيها : يعني اقولة يعطيكـ فرصة تستعدين..!!
لينا : مو عارفة..!!
غازي بـ حزم : ايش اللي ما انتِ عارفتة..!؟ انتِ تبين الروحة معاه هالحين و الا بـ تأجلينها لين تستعدين..؟!
لينا هزت اكتافها : ما ادري..!!
غازي وقف : انا بـ اروح اشوف ندى و انتِ قولي لأمكـ رأيكـ ابيه عندي الليلة ابي اعرف ويش اقول لـ الرجال لأنه ينتظر ردي عليه.. وده يجي الحين..!! ماهو صاحي.!!
امال : هذا من جده..؟!
غازي : و جد جده..!! عن اذنكم..
امال التفت لـ لينا بعد ما طلع غازي : ايش فيكـ ماما ويش مرددكـ ..؟!
لينا : خايفة.!.!
امال : من ايش..!؟
لينا : من كل شيء.. خايفة من عمر من اهلة من نفسي..
امال : صلي ركعتين لـ ربكـ و اخلصي نيتكـ لله.. و روحي مع زوجكـ دام ابوكـ سمح له يأخذكـ لا تكسرين بـ خاطر الرجال وهو متشفق على شوفتكـ ..
لينا مستغربة..!! : متشفق على شوفتي..؟!
امال : اكيد .. لا تصيرين غبية و ما انتِ حاسة ان عمر يبيكـ فعلاً لو مو مهتم لأمركـ ما سعى لأنه يحاول في ابوكـ يأخذكـ لـ بيتة.. كان فرح بـ شرط ابوكـ و انبسط فيه و نفذة و لا رجعكـ قبل لا تولدين.. افهمي انه هو يبيكـ عشانكـ ..
لينا : يعني اروح معاه..!؟
امال : ايه.. روحي يا ماما لا تردينة.. الرجال ما قصر معانا لا تقصرين معاه..
لينا : طيب مو الليلة بكره..!!
امال : اللي يريحكـ ..
جناح ندى.. التفت لـ التلفزيون شغال على القرآن و الصوت عالي عشان تسمعة.. دف باب غرفة النوم اللي كان مفتوح اساساً ما كانت موجودة بالغرفة.. وقف شوي حتى يسمع صوت كحتها التفت لـ جهة الحمام شافها واقفة على المغسلة تغسل وجهها.. : السلام عليكم..
ناظرتة ندى بعد ما نشفت وجهها : وعليكم السلام..
غازي : كيفكـ الحين..
ندى رمت المنشفة على الكنبة : على حالي..!!
غازي : ايش رايكـ نروح لـ دكتورة..!؟
ندى : ليش.!؟ انت ناوي تأخذني من مكان لـ مكان..!! مره شيخ و مره دكتورة..!؟
غازي اتجه لـ السرير و جلس عليه ما يبي يقرب منها و يضايقها : ما راح يضركـ ..
ندى : لا ما فيني حيل..
غازي : على الأقل تعطيكـ فيتامينات جديدة تعوض النقص..!! ما يصير تجلسين على هالحالة..!!
ندى : ليش تبي تمرضني غصب..!؟
غازي : على اساس انتِ مو مرضانة ..!؟ ندى صحصحي شوفي نفسكـ..!؟ ما فيه لقمة تبقى في بطنكـ الا طلعتيها..!؟
ندى : انا ما فيني اتهاوش معكـ ..
غازي : الحين انا ابي اتهاوش معكـ ..!؟ علميني ويش اكلتي اليوم..!؟
ندى : ما ادري انا مو مستوعبة شيء ما اذكر..
غازي : طيب ما تبين تروحين مستشفى ايش رايكـ اجيب لكـ ممرضة في البيت تجلس معكـ لين تولدين..!!
ندى : الله يخليكـ ما ابي احد يزن فوق راسي و يحن علي..!!
غازي : انا معطيكـ وجه بـ زيادة المفروض ما اشاوركـ .. اجيبها من غير لا اقولكـ ..
ندى : ماهو بـ كيفكـ تجبرني على شيء..
غازي : لا بـ كيفي دام انتِ ما تعرفين مصلحة نفسكـ و لا مصلحة اللي في بطنكـ .. اتقي الله فيه و في روحكـ ..!!
ندى : انت مو مستوعب اني مو متقبلة هالحمل.. مو متقبلة ان يكون داخلي انسان.. تعرف شنو يعني هالشيء.. انا عمري ما فكرت بالموضوع و لا توقعتة بـ هالشكل .. مو متخيلة ان بطني بكره بـ تكبر و بيصير يتحركـ و احس فيه..!! ماني قادرة اتقبل الموضوع و الله مو قادرة..!! انا لو مو خايفة من ربي كنت نزلتة و ارتحت من هالعذاب..!!
غازي : عذاب..!! استغفر الله العظيم.. انا بـ احجز لكـ عند دكتور نفسي من غير أي اعتراض بكره بـ نروح..
طلع قبل لا يسمع ردها.. ما بين شيخ و طبيب عادي و طبيب نفسي من مكان لـ مكان ينقلها .. هو يبيها ترتاح .. وهي ما تحس هاذي راحتها..
..
بيت ابو سعود..
رند : و الله بابا بنت سعيرة..!
خالد : بابا ايوه اعرف البنت.. هاذي زوجة عم وليد..
رند شهقت : زوزة.!! (حطت يدها على خدها) يالبي.. و انا تيب.!!
خالد مستغرب : و انتِ ويش..؟!
رند فتحت عيونها : انا مو زوزة..!!
ميار : مستعجلة على الشقا ليش يا خية..!؟
رند جلست بعد ما كانت واقفة جنب ابوها و ترفع رجلها و تنزلها : عمه دانه صارت علوسة يعني زوزة و البنت السعيرة زوزة و انا لا..!!
ميار : خليكـ مثلي ازين .. ويش لكـ ما نبي نصير زوجة..!! بعدين الرجال وع مو زينين..!!
رند : انا البس فستان علوسة تبيـــر..!!
خالد : خلي تفكيركـ ما يتجاوز روضتكـ و دراستكـ ازين لكـ .. حلوه تصيرين عروسة..
رند : حلاس عسان انا اسير تبيرة..!!
ابو سعود : بـ تعقدون البنية من صغرها..!!
وعد : و الله من قلة الأدب..!! عيب يا بنتي عيب..!! الله اكبر.. الدنيا تغيرت..!!
ام سعود : لا و الله يا بنيتي الدنيا ما تغيرت مير الناس تغيروا..
ميار : ترى وعد حسستيني انكـ مره كبيرة.. كنت انتظركـ تقولين زماننا البنات يستحون بس يجيبون لهم طاري العرس..!!
وعد : هههههههه لا مو لـ درجة نستحي.. ياخية الوجية صارت مغسولة بـ مرق..
ابو سعود : و بما انها صارت مغسولة بـ مرق .. ما انتِ حاسة انكـ طولتي بالرد..!؟
انقلب وجهها بـ إحراج خفيف ما قدرت تسيطر عليه : يمكن..!!
ابو سعود ابتسم : طيب.. ما انتِ قايلة لنا ويش قررتي..!؟
وعد : عندي شروط اذا هو وافق عليها سم الله و باركـ اذا رفض كلن يروح بـ حال سبيلة..
سعود : ويش هي شروطكـ ..؟!
وعد هزت راسها : نو نو .. بـ اقولها له بـ نفسي..
سعود : نعـــم..!! ليش ايش شايفتنا قدامكـ حمير..!؟!
وعد : و ليش مو من حقي اشوفة..!! فيه شيء اسمه نظرة شرعية عادي و الا انت تبي تخالف الدين..!!
ابو سعود : طيب انا ما عندي مانع يا وعد.. الحين سعود اتصل عليه و قولة يجي..!!
وعد نقزت مصدومة : الحين..؟!
ابو سعود : ايه الحين.. مو يهمكـ تقولين شروطكـ له خلاص الحين بـ يكلمة سعود ويقولة يجينا..!!
وعد : طيب اجلها كم يوم..!! انا ما تجهزت..!!
ابو سعود : لا الحين ليش تجهزين له.. المفروض يشوفكـ بـ طبيعتكـ مو تكشخين له على غير سنع و بعدين كلها عشر دقايق.. و عشان بكره اقول لأخوي عن ردكـ انتِ و اختكـ .. ما احد مأخرني الا انتِ ..
بلعت ريقها مو متخيلة تشوف عساف قبل لا تستعد نفسياً للمقابلة..!! ناظرت سعود اللي وقف و قام من الجلسة عشان يكلم الجوال..
ابو سعود : ام احمد انتبهي لـ البنت وليد ماهو ملقيها بال.. وهي حسبة يتيمة الخوف من ولدها لا يقهرها وهي ضعيفة..
ام احمد : الله يصلحة و يهديه ما رجع الا الفجر هلكان و حط راسة ما اخذ ساعتين الا قام و طلع من جديد..
ابو سعود : خليه هالفترة على كيفة.. مردة يطيح اللي براسة..
خالد : بكره موعد مشعل..!!
ابو سعود : ايه.. الله يعين..
ام احمد : مو المفروض يمشي على رجلة هالحين..!! صار له كم يوم..
ابو سعود : الله كريم..
رجع سعود : يقول عشر دقايق بـ يكون عندنا هو في بيت جدي..
طلعت وعد تجري من بينهم عشر دقايق لازم تلقط انفاسها على الأقل و ترتب كلامها هي صح عندها شروط بس ما رتبت حكيها شلون بـ تقولة..!! من متى القلوب يترتب لها الحكي عشان تفهمة يا وعد..!! كل ما ينبع من القلب يوصل لـ القلب من غير شرح و لا ترجمة..
ام سعود : ويش بلاها استخفت..!!
سعود : تستاهل.. حلوه ذي تقول شروطها له عينكـ كنت عينكـ و احنا جدارن عندها..!! اكيد بـ تغير رايها..
خالد : عادي ما فيها شيء يا سعود بـ يشوفها نظرة شرعية بـ تقولة اللي عندها و اذا عنده رد بـ يقولها اللي عنده تحت نظرنا..
سعود : عندها شروط احنا واسطة خير بينهم ما يحتاج تشوفة و يشوفها.. يعني هي ما تعرف شكلة وهو ما يعرف شكلها.. و الله لو تقولون لـ عساف يرسمها لـ يرسمها بـ تفاصيلها.. مالها يومين من تغطت..
ابو سعود : انت ايش فيكـ اشتطيت ..
سعود جلس : ماهو عاجبني الموضوع..
ميار : و الله من تعقيدكـ ويش فيها ان شاء الله..!؟ دام عندها شيء بـ خاطرها خلها تقولة لا توقف بـ حلقها..!!
سعود : خير ان شاء الله ست ميار ويش عليكـ انتِ..!؟
ميار : و انت ويش عليكـ بـ وعد.. بابا موافق يعني ما يخصكـ ..!!
ام سعود : عيب يا بنت هذا اخوكـ الكبير..!!
ميار : على عيني و راسي بس انا ما قلت شيء غلط.. يقولي ويش عليكـ وهو بعد ويش عليه..!!
سعود : بـ اكبر عقلي عن الرد عليكـ ..
حاتم يحول الموضوع : ترى انا اليوم معزوم على العشاء..
ابو سعود : معزوم عند مين..!؟
حاتم : عند عاصم.. من زمان مواعدة و ما صارت فرصة..
ابو سعود : لا تطول..
سعود وقف على صوت الجرس : هذا اكيد عساف..
طلع سعود .. ام حاتم : سها بـ مكتبكـ من الفجر..
ابو سعود : أدري... انا معطيها شغل كثير و طلبتها تخلصة بـ اسرع وقت يمديها..
ام سعود : كذا البنية بـ تتعب ..
ابو سعود : لو ما اعطيتها شغل ما راح تلقى شيء تشغل نفسها فيه على الأقل لين يتم موضوع ماجد رسمي و يحددون عرسها وقتها بـ تلهى بـ جهازها..
خالد : بس يبه الكمبيوتر حقكـ شغال و فيه نت..
ابو سعود : لا تخاف ما راح تستخدمة .. لو غير سها كنت قلت لكـ تسويها.. بس سها بـ تخاف.. انا بـ اروح اشوف عساف استعجلوا وعد..