မူဂျီအယ်လ် (Unicode)

Part (27)

မူဂျီအယ်လ်

🌸pann

Part (27)

နိုနို ကိုကို့ကို စိတ်ဆိုးနေပေမယ့် ခုတော့ ညမအိပ်ဘဲထိုင်စောင့်နေခဲ့တာ.. ။

ဒီနေ့ တော်တော် နောက်ကျနေတာ..။

ည ဆယ့်နှစ်ကျော်နေပြီကို.. ပြန်မလာသေးဘူး။

အိမ်မှာ နိုနို တစ်ယောက်ထဲ.. ။

' ဖုန်းဆက်ကြည့်ရကောင်းမလား.. '

' ဟင့်အင်း မဖြစ်ပါဘူး.. ငါ့ဘက်က ပြန်ချော့ရသလိုဖြစ်အုံးမယ် ဟင့်အင်း '

ဖုန်းဆက်ကြည့်ရမလားလို့ အကြိမ်ကြိမ်တွေးမိပါသေးတယ်.. ။

ဒါပေမယ့် မာနကတင်းခံနေတာ..။

နိုနို ဖုန်းမဆက်ဘဲ ထိုင်စောင့်နေခဲ့ရင်း အိပ်ပျော်သွားခဲ့တာ.. ။

မနက်မိုးလင်းမှလန့်နိုးရသည်..

" ဟင်... "

နိုနို သေချာလိုက်ရှာကြည့်ပေမယ့် ကိုကို့ကိုမတွေ့..။

" ဘာလဲ.. ပြန်မလာတာလား "

အိပ်ပျော်သွားတော့ ကိုကို ပြန်လာလား.. မလာလားမသေချာ ။

ပြန်ရောက်လာပြီး အစောများပြန်ထွက်သွားတာလား.. ဒါလည်းမသေချာမရေရာနဲ့ ။

စိတ်ထဲတော့ တစ်ခုခုလိုနေသလိုလို..

စိုးလည်းစိုးရိမ်နေသလိုလိုပါ.. ။

အရင်ကလည်း ကိုကို ခုလိုနိုနို့ကိုဘာမပြောညာမပြောနဲ့ တစ်ပတ်ကျော်တဲ့ထိ အန်တီတို့အိမ်မှာတစ်ယောက်ထဲထားခဲ့တာ.. ။

ခုလည်း အဲ့လိုများ ထပ်ထားသွားတာများလားလို့.. တွေးမိတဲ့အတွေးတွေကို မတွေးသင့်မှန်းသိလို့မတွေးဖို့ ကြိုးစားလည်းမရ ။

မဟုတ်လောက်ပါဘူး.. ကိုကို ငါ့ကို ထပ်ထားသွားခဲ့တာ မဟုတ်ဘူး ။

သူပျောက်သွားရင်လည်း ငါအလွယ်လေးပြန်ရှာလို့ရတာပဲ..။

ထားသွားတာမဟုတ်ဘူး.. ဟုတ်တယ် ငါ့ကိုထားသွားတာ မဟုတ်ဘူး ။

နိုနို ကိုယ့်ကိုယ်ကိုယ်အားပေးရသည်..

.

ဒီနေ့လည်း နိုနို ထပ်စောင့်ပါတယ်.. ။