اهرب من الماضي اليك
- ياغائبًا رغم المسافةِ بيننا ما أقربك...
وكعد اباوعله يمسح بكصته من العرك احسه متوتر اكثر مني رفعت راسي شفت بت عمتي نهاد عيونها عليه وادموعها بعينها ضلت عيني عليها باوعتلي وراستا طلعت من الصاله مدري وين راحت ما اهتميت كلت اكيد كاعده تبجي على ابوها لان الي اعرفه ابوها مريض فما ركزت بالموضوع .........
احلام :اكلج خيه ام سلطان جيبوا الذهب وخلي ايلبسها الحلقه هسه ما اله داعي انسوي حفله ثانيه هسه ايلبسها وانفض السالفه .........ضلوا يحجون بهل الموضوع هوه بالبدايه جنه متفقين هسه بس عقد وغير مره حفله ايلبسني الحلقه وصدك دزوا ولد على بيت عمتي ايجيب الذهب اشوي واجه جايب الشبكه لبسني الحلقه وايدي بيده ترجف ايدي صايره ثلج وهوه ايده دافيه باوعلي وابتسم وضغط على ايدي ايهديني شال ايدي وباسهاا ابتسمت ابوجهه ودنكت......خلصت الحفله ومرت الايام. مرات مهند يجي يكعد يمنه لو اخوي محمد لو احمد لو ابوي يجي ساعه وايروح بديت اتعود عليه واحبه صارت روحي متعلقه بيه من يندك الباب واسمع مهند جاي اطير من الفرح احتار شسوي على الرغم من يجي العشيره كلها تكعد يمنه بس مرات امي اطلع حجه علمود تسحب اخواني من يمنه وايعوفونه ابوحدنه ناخذ راحتنه .........اجه يوم العرس كاعده والمره تشتغل بيه من مكياج وتسريحه وامي امكابلتني وكاعده وخواتي همين اجن وجابن زعاطيطهن وياهن الصالون صارلك هوسه والمره اشوفها اتأفف حقها ما باقي احد ما جاي وياي باقي بس ابوي ما اجه ويانه... ... خلصنه من الصالون اشوي واجت سياره الزفه والفرقه جايه وياهم وهوسه وتصفيك اجه مهند لزمني من ايدي وركبني السياره حماي سلطان هوه الي يسوق وكاعده يمه امه وصلنه للبيت نزلت وذبح زوج عمتي خروف جوه رجلي طبيت داخل كعدوني بالصاله والنسوان اكبالي ايدبجن ونسوان عمامي الي ايشوفهن ايكولل واوو ايموتن علينه كاتلات اعمارهن عليه وعلى مهند اجت بيبيتي كعدت يمي وصبوا عشه للنسوان ضليت اباوعلهم وهمه ياكلون وانه من الصبح ماكله بس لفه جبن وحليب جابوا غده الي بس ما اكلت لان جنت خايفه ومتوتره وهسه اشو شفت الاكل ومتت جووع ولا وحده من الخاتونات كامت جابتلي فرد صحن اكل بيه والله كون هسه ابسط بنصهم واكعد اكل وياهم شنو معناها همه ياكلون وانه لا يمعودين ذكروني بس بلحمه ماكو مغلسين والله صارت الدمعه بطرف عيني ميته جوع بعد مااتحمل وانوب خواتي مدري وين راحن فص ملح وذاب اختفن وامي رايحه يم خالتي ادري يا امي مو انه بنتج غير المفروض اكعدين يمي عايفتني المن يهي المعرسه انه لو اختج ضليت اباوع للاكل وبطني ازقزق باوعتلي بيبتي وحجت......
_ها يمه هدوه جوعانه تردين انده وحده من البنات اتصبلج عشه ......هيه كالت هيج وانه راستا طفرت وكلت اي والنسوان كلهن ضلن ايباوعلي ما يعرفن شسالفه دنكت راسي مفتشله .........
أنت تقرأ
اهرب من الماضي اليك
Randomخلف كل باب تجد حكايه تختلف عن الاخر وكل حكايه تحمل عبره في تفاصيلها قد نجد فيها ذللك غير معقول ولاتسطيع العقول استيعابها تجد حكايات حزينه ام مفرحه قد تجد حكايه حب او خيانه فرح اوحزن .........والان دعونا نطرق باب احد البيوت العراقيه للنكشف عن اسراره...
