حياة بريئه

البارت الثالث

روايه/ حياة بريئه

البارت/ الثالث

بقلمي الكاتب/ حسن الأسدي
-----------------------------------------------
بعد مرور اسبوعين

جنت گاعده اغسل بملابسي وندگ الباب گمت لبست حجابي وفتحت الباب لگيت خاله ام خالد

ام خالد.. السلام عليكم

حياة.. وعليكم السلام تفظلي خاله

ام خالد.. يمه هاي مواد الكبه وهاي اللبلبي عندچ ونريدها نفس من چانت تطبخها بيبيتچ الله يرحمها ريحته توصل لذاك الصوب

حياة.. ان شاء الله خاله من عيوني بس اوگفي عندي شغله وياچ

ام خالد.. خير يمه محتاجه شي بعد

حياة.. دخلت ورحت اخذت فلوس من الكنتور وجبتهن لخاله ام خالد .... تفظلي خاله هاي الفلوس مال المسواگ

ام خالد.. خايبه عبالي عندچ شي مهم روحي يمه انتي بنيتي وبيبيتچ ماقصرت وياي الله شاهد وگفت وياي وگفه اخت وماعافتني لا بحزن ولا بفرح وترديني اخذ فلوس منچ مااخذهن وحق كل حرف بلقرآن ردي فليساتچ يمه رديهن

المهم عندچ نفط اليوم لو لا

حياة.. اي خاله عندي بطل

ام خالد.. زين ترسي الصوبه ولفانوس لان هلايام هوه ايئذن المغرب وهمه يطفون الكهرباء يله يمه عندچ العافيه

حياة.. الله وياج...راحت خاله ام خالد واني كملت غسل الملابس وصعدت لسطح حته اشرهن شريت الملابس درت وجهي اريد انزل وشفت المكان لحترگت بي بيبي رحت يمه وگعدت بلگاع ورجع انعاد المشهد گبال عيني ماگدرت اسيطر على مشاعري ودموعي .. وين رحتي بيبي وعفتيني اشتاقيتلچ يل ريحتچ من ريحه الجنه يا قطعه من گلبي وفارگتني
صفنت ويه روحي فقدان الحبايب صعب على لگلوب الموت مايعور الميتين بس يعور الحيين وموتچ عورني وكسرني يابيبي

گالو الم لفراگ يتخطه حدود المسافات يخليك ظايع بين الحلم ولحقيقة الليل والنهار واسوء انواع لفراك لمه يكون من غير وداع

مرت الساعات واني كملت الكبه ولفيت 49 كبايه وخليتها بالثلاجة وغسلت لمواعين واخذت ملابس من الكنتور ودخلت سبحت وطلعت نشفت شعري ومشطت ولله شوي وأذن اذان المغرب انطفت الكهرباء گمت شغلت الفانوس ورحت للحمام توضيت ورحت لغرفه بيبي وفرشت السجادة وبديت اصلي صليت وخلصت گمت جبت القرآن وبديت اقره خلصت رفعت ايدي للسماء ودعيت {( اللهم هب المتوفين سعهً في قبورهم
وهب لضلمتهم نوراً ولذنوبهم غفراناً
وبرد على قبورهم واجعل الجنه لهم
داراً ومستقراً واضلهم بضلك يوم لا
ضل الا ضلك يارب)}

طبگت السجادة ورجعت القرآن لمكانه رحت للطبخ طلعت من الكبه لسويتها وگليتها وسويتلي عشه وتعشيت وفرشت فراشي وطفيت الفانوس وعفت الصوبه مشتغله لأن الجو بارد ثلج وتمددت بفراشي وقريت سوره الكرسي ونمت ..... فزيت على صوت الرعيد گعدت البيت اظلم وكلشي ما اشوف رحت لغرفتي عندي شمعه شغلت الشمعة ورحت للمطبخ لگيت المطبخ بي ماي داخل المطر من جوه الباب خليت الشمعه على الطباخ وفتحت الباب شلت فراش المطبخ وخليته بلطارمة رفعت راسي المنطقه كلها ظلمه طافيه بيها الكهرباء ولاجواء تخوف بس صوت المطر ولرعيد دخلت للمطبخ ومسحت الماي وسديت الباب وعندي بطانية قديمه خليتها جوه الباب حته مايدخل ماي المطر رحت للغرفه شفت الساعه بـ4 الفجر گلت بعد ماتسوه النومه حياة راح ايئذن اصلي وگوم اطبخ الكبه اذن گمت رحت توضيت ورجعت للغرفه فرشت السجادة وبديت اصلي جاي اصلي واجت الكهرباء صليت وقريت قـرآن ورحت باوعت من الشباك لگيت المطر واگف بوجهي للمطبخ شغلت لضوه وطلعت الكبه من الثلاجة وخليت الجدر على الطباخ وذكرت من بدت بيبي تعلمني الطبخ چانت هاي اول اكله اطبخها وچانت واكفه فوگ راسي وتعلمني طريق الكبه المرگ وبده النهار يطلع ستوت الكبه وطفيتها اخذت الماسحه وصعدت للسطح نزلت ماي المطر كله ونزلت رحت شفت الساعه بـ7 لبست حجابي وعبايتي واخذت المكناسه وطلعت للشارع كنست يم الباب جاي اكنس وطلعت خاله ام خالد

ام خالد..صباح الخير

حياة.. صباح النور

ام خالد.. شلونچ يمه بلمطر خوب مافاض البيت

حياة.. لا لا دخل شوي من باب المطبخ ومسحته وبعدين مامطرت هواي شوي وبطلت

ام خالد.. ولله يمه ضليت احسب بيچ الليل كله حسبه تاخذني وحسبه توديني
گلت بس لا فاض المطبخ مثل كل مره وعود وذكريني بس ارجع من السوگ اخلي خالد يسويلچ عتبه لباب المطبخ حته بعد مايدخل للمطبخ ماي

حياة.. خاله تره اني راح ابدي شغل من اليوم گعدت الفجر طبخت الكبه وراح اگعد گبال باب بيتي وللرزق على الله

ام خالد.. راح تگعدين هسه

حياة.. اي خاله وهاي الجهال لتروح للمدرسه تشتري وبعد ساعه ويبدي الدوام

ام خالد.. توكلي على الله يمه وشوفي باب رزقچ

حياة....
راحت خاله ام خالد للسواگ واني دخلت طلعت الحصيرة وفرشتها بلباب وطلعت الجدر ولكاسات ونسيت الخواشيگ بلبيت طلع ياسين ابن خالد يريد يروح للمدرسه

حياة.. ياسين فدوه الله جابك تعال شوي

ياسين.. ها خاله

حياة.. فدوه اروحلك ادخل جوه تلكه مجموعة خواشيگ على الطباخ جيبهن وتعال

ياسين.. إن شاء الله خاله

حياة...دخل ياسين جاب الخواشيگ

ياسين.. هاي الخواشيگ

حياة.. تسلم يوم لنخدمك عريس

وبددت الجهال تجمع گبال المدرسة ولتمو الجهال وبدو يشترون من عندي دخلو الطلاب للمدرسه وشوي واجت خاله ام خالد

حياة.. الله يساعدچ اتفضلي گعدي ارتاحي

ام خالد.. يمه حياة حطيلي صحن چبير كبه وهاي فلوسة هسه يگعد خالد يتريگ بيها هوه ومريته

حياة.. رجعي فلوسچ لجوزدانچ

ام خالد.. يمه لا تشلعين گلبي وتفتيني فت اخذي لفلوس

حياة.. خاله اذا مارجعتي لفلوس لجوزدانچ بعد لساني ما يطخ السانچ اخذي الكبه وروحي خاله انتي مو تاخذين صحن واحد انتي تشيلين الجدر وتمشين

ام خالد.. ليش يمه اريد انتحر بي ههههههههه

حياة..هههههههه .... راحت خاله ام خالد وصار الظهر وطلعو الطلاب من المدرسه وصارت علي هوسه وبعت الكبه كلها خلصت وگمت حته ادخل للببت لان اذن اذان الظهر واجه علي ياسين ابن خالد وبيدة صحن

ياسين.. خاله امي تگول حطينه كبه بهاي الصحن

حياة.. بس ساعدني خل اندخل الجدر واحطلك كبه من جوه لان هاي خلصت

حياة....
دخل ياسين سله الخواشيگ ولكاسات واني دخلت الجدر ولميت الحصيره دخلت حطيتله كبه

ياسين.. هاي الفلوس

حياة.. سلملي على امك وكلها يولن لفلوس مايسون وعيب مابيناتنه فلوس احنه اهل ومشكور لان دخلتلي الغراص يوم لنخدمك عريس .... راح ياسين واني توضيت وصليت وسويتلي غده وتغديت ومر اليوم طبيعي صار المغرب ورحت اتوضيت وفرشت السجادة اريد اصلي وندگ الباب رحت فتحته اني فتحته واني انصدمت

للحكايا بقايا.......
-----------------------------------------------
هلو حبايب قلبي يا اجمل قراء التصويت أولاً ثم القرائه 🌟🌟🌟

تحياتي

الكاتب

حسن الأسدي 🎗️🌺