#جنة_وهدان
الحلقة الخامسة
......................
🌹 بسم الله والصلاة والسلام على رسول الله 🌹
مهما حاولت نبذ الماضي الأليم ودفنه في أعماق أعماق الأرض ستنفجر الأرض يوما ليعود من جديد لينغص حياتك ولتتحقق دعوات من ظلمتهم وتتحقق فيك العدالة الإلهية.
تسلل لقلب تالين الغيرة حين ردد زين اسم قمر أمامها فردت ببعض بنزق...قولتلك أنا مسميش قمر ، أنا تالين اللي أنقذتك من الحادث اللي اتعرضتله وكمان دكتورة في المستشفى هنا .
ضيق زين عينيه قائلا بإستغراب ...دكتورة إزاي ؟
تالين ...زي الناس والله ، ده أنت غريب أوي .
زين ...خلاص يا ست الدكتورة ، متتچمصيش إكده عاد بسرعة ، وأنا شاكر لأفضالك يا ست الستات .
فابتسمت تالين بخجل .
ثم ولج إليهما وكيل النيابة مستئذنا بقوله ...تسمحوا ؟؟
ثم أردف وكيل النيابة... حمد لله على السلامه يا أستاذ زين؟
أعرفك بنفسي ..أنا حازم وكيل النيابة .
وياريت لو حالتك تسمح تجاوبني على بعض الأسئلة
وأهمها طبعا أنت بتتهم مين؟ يعني تفتكر مين اللي يعمل فيك كده ؟
أغمض زين عينيه بألم وحدث نفسه ...مفيش غيرهم ولاد عبد المتجلى طبعا ، وأنا عارف كيف هاخد بتاري منيهم
مش بالحكومة عشان إكده عچول ...يا باشا أنت أكيد خابر زين إني رچل أعمال كبير في السوچ وأكيد ليا أعداء كتير چوي ، فالله أعلم مين فيهم ، عشان إكده مچدرش أتهم حد معين ، عشان مظلمهوش صراحة ، وأنا راچل عخاف ربنا .
وكيل النيابة ...أنا عارف ، بس أكيد بتكون بتشك في حد معين ،ظهرت بينك وبينه عداوة في الفترة اللي فاتت دي .
زين ...لا مفيش يا باشا حد معين .
وكيل النيابة بنفاذ صبر...يعني حضرتك مصمم متتهمش حد ، بس كده حقك هيروح ،وهنقفل ملف التحقيق .
واللي عمل كده ممكن يتعرض ليك تاني بدال أول مرة مأخدش جزاته .
زين ...لا يا باشا مش بتهم حد ، وخليها على الله وأكيد برده لازم أحرص أكتر المرة الچاية .
وكيل النيابة ...تمام أقفل التحقيق يا باش كاتب ويلا بينا بدال مفيش فايدة .
وللمرة التانية ألف حمد الله على سلامتك يا أستاذ زين .
زين ...الله يسلمك يا باشا .
خرج وكيل النيابة مع كاتبه ثم حدقت تالين النظر في زين .
زين بإندهاش ...مالك إكده عتبصيلي چوي ، فيه علامة
على وشي ولا إيه ؟ولا تكونيش معچبة !
انفعلت تالين من قوله مردفة بسخرية ...أعجب بمين إن شاء الله ، أنت فاكر نفسك إيه ؟
لا فوق حضرتك أنا دكتورة وليا مركزي ،فمتخدش
في نفسك ألم كده .
