عصفورتي الحمقاء ( مكتمله )

العوده

بعد مرور شهر على قرار وائل وعثمان

رجعوا مصر تاني واختاروا مقر مناسب لشركتهم هنا وكالعاده اداره الشركه لعثمان ووائل في منصب المدير التنفيذي خلصوا تجهيزات الشركه والمكاتب وساب عثمان اختيار الموظفين علي وائل

بدأو بشغل وصفقات بسبب رغبه عثمان في الظهور بقوه ف الأسواق المصريه ماهو ماينفعش بعد السفر والبعد سنين يرجع ومايكونش في موضع قوه اهو حاجه توقفه علي ارض صلبه قدامها "حجه" مقنعه يحطها قدامها لغيابه هو عارف ان مهمته صعبه بس غزل قلبها ابيض وهو مهما كان عثمان اللي مكانتش بتقدر تبعد عنه ولا تعمل اي حاجه من غيره

في نفس الوقت كان وائل بيجهز نفسه عشان يزور بيت خالته بعد سفر سنين ومش مصدق انه هيشوفها اخيرا دقات قلبه سامعها بوضوح حاسس برجفه قلبه جوا ضلوعه من القلق والفرحه سايق العربيه واتصل بعثمان ....
عثمان؛ الله ..مش مصدق انك افتكرتني وانت رايح تزور خالتك ده انا قولت انت هتنساني انهارده

وائل: يا ابني طب قول السلام عليكم الاول داخل فيا وش ليه وبعد انا مقدرش انساك يا عوثو

عثمان بعصبيه: يا ابني هقصلك لسانك اللي بيناديني بأسماء غبيه زيه ده

وائل؛ الله ماخلاص ياعم عثمان يعني انا غلطان اني متصل اطمن عليك وحشتني من امبارح ياجدع

عثمان ؛ لا وحياه امك انت مش متصل عشان وحشتك انت متوتر وركبك بتخبط في بعض ومتصل بيا عشان تهدي شويه

وائل: خلاص ياعم عرفنا انك فاهمني وقافشني كويس وبعدين مش تحمد ربنا اني بتصل بيك اصلا ده انت ساحلني بقالك شهر في تجهيزات الشركه وانترفيوهات مع الموظفين

عثمان: والله ماتنساش ان الرجوع كان فكرتك من البدايه وانت اللي صممت يبقي تشيل الليله للاخر

وائل؛ دلوقتي الرجوع بقب فكرتني ومين اللي كان شايط ومحروق من الصور والفيديوهات اللي بتوصله ... مين اللي كان بيسهر باليومين والتلاته مش عارف ينام ولا يركز من التفكير .....يا بارد ده انا قولت اول حاجه هتعملها لما نرجع مصر انك هتجري عليها تعرفها برجوعك انما بقالنا شهر وانت حتي ماروحتش شقتك اللي في نفس العمار عشان تشوفها

عثمان؛ ماهو انا مش اهبل عشان ابص عليها وامشي زيك انا اليوم اللي هروح فيه لغزل مش هخرجها من حضني ومش بعدين اخدها ونطلع ع اقرب مأذون كمان وعشان كده كان لازم اجهز الشركة واخلص من الموظفين وكمان نبدأ اول شغل لينا وبعدين اروحلها

وائل؛ والله يا ابني انا ما عارف انت جايب الغرور ده كله منين ارحم نفسك غرورك هيقتلك

عثمان: يا حبيبي ده ثقه مش غرور ابدا وبعدين انا عرفت انها كانت بتمتحن الفتره اللي فاتت مكنش ينفع اشتتها ابدا ولسه قدامها اسبوع كمان وبعد كده حتي لو خطفتها وسافرنا مش هكون شايل هم حاجه