★Mr.Right★ [ Completed ]

Part [ 10 ]

ရေချိုးခန်းမှထွက်လာသည့်အခါ မည်သည့်အချိန်ကတည်းက စည်း၏ကုတင်ပေါ်
ရောက်နေမှန်းမသိသော ငယ်ငယ်သည် မှောက်ခုံရက်လေးဖြင့် ဂိမ်းအပေါ်စူးစိုက်ကာသဲကြီးမဲကြီးနှိပ်နေသည်။အနားရောက်လာသော စည်းကိုပင်သတိမထားမိသည်အထိ
ဂိမ်းထဲအာရုံရောက်နေပုံရ၏။

ရေချိုးပြီးစသဖြင့် ‌အိမ်နေရင်းတီရှပ်အဖြူနှင့်ဘောင်းဘီတိုကိုသာဝတ်ထားသော်လည်း
အသားဖြူသည့်ငယ်ငယ်က သန့်သန့်လေးနှင့်ဘာနေနေအပြစ်ဆိုဖွယ်ရှိမနေ။ဖြူသန့်
သော လက်မောင်းသားတို့ကကြည်လင်နေပြီး ခြောက်ပုံမရသေးသောဆံသားတို့မှရေစက်ကလည်းကျနေသေးသည်။

နူးညံ့သောအသားအရည်နှင့်အတူ ဘေးတိုက်မြင်နေရသောမေးရိုးအပြင် ခပ်ဖြူဖြူ
လည်စလုတ်လေးမှာ လူပျိုပေါက်လေး
ငယ်ငယ်၏ကြည့်‌ကောင်းနေမှုကိုပို၍ ပြီးပြည့်စုံစေ သည်။ထို့နောက်စည်း၏ အကြည့်တို့သည်အိပ်ရာဘေးစားပွဲပေါ် ရှိ
မေမေတင်ထားပေးသည့် နှင်းဆီနီလေးပေါ်ကျရောက်သွားကာ အတွေးတို့ကလည်း
နူးညံ့သွားရသည်။

ပန်းတစ်ပွင့်ကိုနူးညံ့လှပသည်ဟုတင်စားရလျှင် ငယ်ငယ်ကတော့ နီနီရဲရဲနှင်းဆီလေးတစ်ပွင့်လိုမှလှပတာမျိုးမဟုတ်ဘဲ ပွင့်ချပ်တစ်ခုစီတိုင်းကရဲတင်းခြင်းကိုကိုယ်စားပြုပြီး
အသွင်လေးကတော့ တရစ်ရစ်နှင့်ဆွဲ‌ဆောင်မှုရှိနေတာမျိုးသာဖြစ်လိမ့်မည်ထင်သည်။

မဆီမဆိုင်အတွေးတို့ကိုတွေးပြီးသည့်အခါတွင်တော့
နေလယ်တုန်းက ကောင်မလေးတစ်ယောက် ၏လက်ကို ကြင်ကြင်နာနာတွဲထားသည့်မြင်ကွင်းကို ပြန်လည်မြင်ယောင်မိသည်။
မိမိလက်ထဲကြီးပြင်းလာသည့်ကလေး
တစ်ယောက် အရွယ်ရောက်နေပြီဖြစ်ကြောင်း သတိထားချပ်မိသွားသောစည်းက သက်ပြင်းလေးတစ်ချက်ချမိချေပြီ။

ဂိမ်းဆော့နေရင်း အလိုမကျသော ရေရွတ်သံနှင့်အတူ အရွယ်ရောက်ပြီးသားလူငယ်လေးတစ်ယောက်၏ ဟိုဟိုဒီဒီ အဓိပ္ပါယ်ရသော စကားတို့ဖြင့်ဂိမ်းထဲမှသူငယ်ချင်းများနှင့်
စနောက်နေသည်မှာ အနား‌ရောက်လာသောစည်းကိုပင်သတိထားမိပုံမပေါ်ပါ။