★Mr.Right★ [ Completed ]

Extra [ 4 ] SC End...

“ ဟင်...ဒါက ..? ”

အခန်းပတ်လည်တွင်ပြည့်နေသော ရသ၏
ပစ္စည်းများကြောင့် အံ့ဩသွားရသူကမြတ်မင်း။ သဘောက အခန်းမှားဝင်လာသည်ဟု
ထင်သွားမိခြင်းဖြစ်သည်။ တကယ်တမ်း အခန်းမမှားပေ။ ရသကိုယ်တိုင်က ဤအခန်းတွင် နေရန် စီစဉ်ထားခြင်းဖြစ်သည်။

“ ဘာဖြစ်လို့လဲ ?”

မြတ်မင်း၏အံ့ဩနေသည့်မျက်နှာထားကြောင့် မျက်ခုံးအနည်းငယ်ပင့်ရင်းဆိုသူက ရသ။ မြတ်မင်း၏ အကြည့်တို့ကို ခပ်တည်တည်တုံ့ပြန်လိုက်သည်က မည်သည့်အရာကမှ ထူးခြားမှုမရှိသည့်နှယ်။

တကယ်တမ်းလည်း ထူးခြားမှုမရှိပေ။ဤသည်ကိုမြတ်မင်းက အဘယ့်ကြောင့် ထိုသို့ပြုမူနေမှန်းမသိ။ ယခင် ဤအိမ်တွင် အတူတူရှိတုန်းကလည်း မြတ်မင်းအခန်းထဲတွင် နေနေကျဖြစ်ပြီး မြတ်မင်းအိမ်ပြောင်းသွား‌တော့လည်း ထိုတိုက်ခန်းတွင် သွားနေသေးသည်။

“ ဘာမဟုတ်ပါဘူး ငါ့အခန်းက ဟိုဘက်မှာမလား ”

ရသ၏အမေးကို အူကြောင်ကြောင်ဖြင့်ဖြေလိုက်သော်လည်း မရေရာမှုတို့အပြည့်ဖြင့်။
တစ်နည်း မြတ်မင်း၏အခန်းက မရှိတော့တာများလား။

“ အဲ့ အခန်းက ရှုပ်နေတာ မရှင်းရသေးလို့
လောလောဆယ် ဒီအခန်းမှာပဲနေလေ ..”

“ .....”

နှစ်ယောက်သား ထူးဆန်းသောလေထုဖြင့် အခန်းထဲရှိနေကြစဉ် တံခါးခေါက်သံပေါ်လာသည်။ အိမ်စေတစ်ယောက်က ညစာစားရန် လာခေါ်ခြင်း ဖြစ်သည်။

“ ထမင်းစားရအောင် ..အဖေတို့စောင့်နေလိမ့်မယ်”

ပစ္စည်းများများစားပါမလာသော မြတ်မင်းက
ကျောပိုးအိတ်ကို ကုတင်ပေါ်တင်လိုက်သည်။
ထို့နောက် ရှေ့မှ ဦးဆောင်ထွက်သွားသော ရသ၏လက်ကို လှမ်းတားလိုက်ရင်း....

“ အင်း ...? ”

“ ငါ...”

အဆင်မပြေသလိုဖြစ်နေသည့်မြတ်မင်း၏ မျက်နှာထားကြောင့် ရသက တစ်ခုခုကိုသဘောပေါက်သွားကာ လှမ်းဆွဲထားသောမြတ်မင်း၏လက်ကို အသာလေးဆွဲဖယ်ရင်း...

“ ဒီအတိုင်း ...ညစာ စားတာပဲ... အစ်ကိုဘာတွေစိတ်ပူနေတာလဲ .. သူစိမ်းကျနေတာပဲ ..
မဟုတ်မှ ..အိမ်ကထွက်သွားပြီးကတည်းကိုယ့်ကိုယ်ကိုယ် သူစိမ်းလို့ သတ်မှတ်ထားတာလား ..”