Silence In The Mirror (completed)

အပိုင်း တစ်ဆယ်။

နှင်းဆီတွေကို သဘောကျလာဖို့ မရည်ရွယ်ခဲ့ပေမယ့် မုန်းဖို့တော့အကြိမ်ကြိမ် ကြိုးစားမိနေတာပါ။ သို့ပေမယ့် နှလုံးသားလေးက ခပ်တိုးတိုးသာအမြဲဆိုလေ့ရှိသည်။ ထိုသည်မှာ

   " နှင်းဆီကို ချစ်၏ "

ဘယ်တတ်နိုင်ပါ့မလဲ၊ နှလုံးသားရဲ့ စေလိုရာအတိုင်းပဲပေါ့ ချစ်ရသူ

  
***

ခြံထဲရောက်ခါနီး အိမ်မကြီးဆီသို့ တဖန်ပြန်လှည့်လာရသော ခြေလှမ်းများ။ ဖိနပ်စီးထားနှင့်ပြီးမို့ ခပ်ပါးပါး‌ ဒေါက်ဖိနပ်မှ မြည်သံသည် တိတ်ဆိတ်သော ပတ်ဝန်းကျင်၌ ကျယ်လောင်စွာထွက်ပေါ်နေ၏။
အားမပါသော်လည်း တွန်းဖွင့်ရသည်မို့ ဝုန်းခနဲအသံသည် အနည်းငယ်မျှ ကြာအောင်သာ ဆူညံလိုက်ရသည်။

" ဟိုအမျိုးသမီး နေမကောင်းဘူးဆို "

ထိုစကားသံမှာ ကြားရုံဆိုသည်မျှသာဖြစ်၏။ အိပ်ပျော်နေသူအား မျက်စိထောင့်မှ မြင်နေရပြီမို့ အကူအိမ်ဖော်မလေးကိုသာ ခပ်တိုးတိုးဆိုရတော့သည်။

" ဟုတ်တယ် မမလေး၊ ဆရာဝန်တော့ မပြရသေးဘူး အဲ့တာ "

" ဟုတ်ပြီ အခုဆရာဝန်ဆီ ဖုန်းဆက်လိုက်၊ ချက်ချင်းလာဖို့မှာနော် "

မျက်နှာရိပ်တစ်ချက်ပြလိုက်သောအခါ နားလည်သွားကြဟန်ဖြင့် အသီးသီးအကုန်ထွက်သွားကြ၏။ ထိုအခါမှသာ ဝတ်ထားသော ကုတ်အနက်ရောင်အား ချွတ်ချလိုက်ပြီး ကုတင်ခြေရင်း၌ ပုံထားလိုက်သည်။ အိပ်ပျော်နေသူအား တစ်ချက်ပြန်လှည့်ကြည့်တော့ မှိန်း‌နေစဲသာမို့ ဖိနပ်တို့ကို ချွတ်ဖို့ရွယ်လိုက်၏။

" ဟင် "

" ဘာတွေဟင်နေတာလဲ သမီးဖြစ်သူက အိမ်ပေါ်ကဆင်းသွားတာမဟုတ်ဘူး။ ပရဟိတသွားလုပ်ရုံပဲ ဘာလဲ အလွမ်းနာကျသွားတာလား "

ဒေါ်လွှမ်းနှင်းဆီကလေ အနုပညာသွေးတွေများ အပြည့်ပါလာသလား မှတ်ရတယ်။ တစ်ခုခုဆို သူ့မှာ အပြီအပြင်တွေကို ခံစားလို့။
အခုလည်း ဖျားတယ်ဆိုတာ ငယ်သွေးကြွယ်ကြောင့်ပဲနေမှာ။ အမေစိတ်မကောင်းဖြစ်မှာစိုးလို့ တိုက်ရိုက်မနှုတ်ဆက်ပဲ သွားမယ်ဆိုလို့ ခွင့်ပြုပေးလိုက်တာကို သူ့ကိုလာမပြောလို့ဆိုပြီး ရစ်သေးတာ။ အလုပ်က အစည်းအဝေးရှိလို့ သွားရပါမယ်ဆို သူရစ်နေတာက မပြီးနိုင်မစီးနိုင်။ ဒါကိုစိတ်မရှည်ဖြစ်လာပြီမို့ နည်းနည်းလေး အော်လိုက်မိတာကို ငိုယိုပြီးအခန်းထဲပြေးဝင်သတဲ့။
ကြည့် အခုဖျားပါဖျားသွားပြီ။