Unicode
"ဟေ့! ဟေ့! မင်းရည်းစား မင်းထိန်းနော် .. မကိုဋ်ဒေးမောင်! ငါတို့ကိုလိုက်ရိုက်နေတယ်ဟ! "
"နင်တို့မဟုတ်တာမပြောနဲ့ ငါတို့က ရိုးရိုးသားသားသူငယ်ချင်းတွေ!"
ကော်ရေတာတစ်လျှောက်ပျံ့လွင့်လာတဲ့စကားပြောသံတွေ ။
တဝါးဝါးအော်ဟစ်ရယ်မောနေကြတဲ့ယောကျ်ားလေးအုပ်စုကြီးကြားမှာ တန်းခွဲ(၂)ရဲ့အလှပဂေး ပန်းပွင့်ဖြူက နီရဲနေတဲ့မျက်နှာလှလှလေးနဲ့ စနောက်နေတဲ့သူတွေကိုလိုက်ရိုက်နေခဲ့သည် ။
"ဟားဟား!"
ကျောင်းသားအုပ်စုကြီးရဲ့သဘောတကျရယ်မောနေကြတဲ့အသံများက ဘေးကပ်ရပ် တန်းခွဲတွေအထိပါပျံ့နှံ့လို့သွားခဲ့သည် ။
ဒီအသံတွေရဲ့မြစ်ဖျားခံရာက မကိုဋ်ဒေးမောင်တို့အုပ်စုကဆိုတာ အသံနားထောင်ရုံနဲ့တင်အားလုံးသိကြပြီးသားပင် ။
"တော်တော့.. သူရှက်နေပြီ"
"အမယ်.. သူ့ရည်းစားကိုစတော့ တားတယ်တဲ့ ဟျောင့်တွေ!"
"မကိုဋ်ဒေးမောင် ကျောင်းဆင်းရင် တစ်ဝိုင်းလိုက်ကျွေးလိုက်တော့!"
တန်းခွဲ(၂)ရှေ့မှာ တဟေးဟေးအော်ဟစ်ပြောဆိုနေကြတဲ့အသံတွေက လွင်ပြင်တို့တန်းခွဲ(၁)အထိပါ အတိုင်းသားကြားနေရတဲ့အထိ ကျယ်လောင်လွန်းနေခဲ့သည် ။
ရယ်မောနေကြတဲ့အသံတွေကြား လွင်ပြင့်နားထဲကြားနေရတာ တစ်ယောက်သောသူရဲ့ရယ်သံနက်နက်တစ်ခုတည်း ။
မိန်းကလေးဘက်ကငြင်းဆန်ပေမယ့် သူ့ဘက်ကဘာမှမပြောလာတဲ့ မကိုဋ်ဒေးမောင်ကြောင့် အပြင်ဘက်ကိုနားစွင့်နေမိတဲ့လွင်ပြင့်မျက်ခုံးတွေအလိုမကျစွာတွန့်ချိုးထားလိုက်မိ၏ ။
ဒါကရော မကိုဋ်ဒေးမောင်ရဲ့ ဘယ်နှစ်ယောက်မြောက်အပျော်ရည်းစားများဖြစ်နိုင်မလဲ ။
လွင်ပြင် မသိချင်တော့ပါ ။
မကိုဋ်ဒေးမောင်ဆိုတာ သူ့အတွက်တော့ အမြဲရင်နာစရာတွေသာဖန်တီးနေတတ်တဲ့သူပဲ ။
"ဟျောင့်! လွင်ပြင်ကကြိုး စာဆက်ခေါ်ဦးလေ!"
လွင့်မျောနေတဲ့အတွေးတွေက ဘေးက ထက်သူရရဲ့လှုံ့ဆော်သံကြားမှ ရပ်တန့်ကုန်တော့သည် ။
YOU ARE READING
ငါ့ကိုမချစ်ဘူး .. (COMPLETED)
General Fictionအိပ်မက်ရှည်ကြီးတစ်ခုမက်တယ် ။ ကျောခိုင်းထားတဲ့နောက်ကျောပြင်တစ်ခုကို ငါက တစ်ဖက်သတ် ဖက်တွယ်ဖို့ကြိုးစားနေခဲ့တာတဲ့ ။ ဟင့်အင်း.. မင်းငါ့ကိုမချစ်ဘူး ။ မကိုဋ်ဒေးမောင် x လွင်ပြင်ကကြိုး
