ငါ့ကိုမချစ်ဘူး .. (COMPLETED)

-26-

Unicode

နွေဦးရဲ့ရောင်နီဖျဖျလေးက ဒေးမျက်နှာပေါ်ခပ်သဲ့သဲ့ကျဆင်းနေသည် ။

မျက်လုံးစုံမှိတ်၍နွေးထွေးမှုကိုခံယူမိတော့ အနားက ရယ်သံတိုးတိုးလေးကြားရ၏ ။

ဒေးမျက်လုံးဖွင့်ကြည့်လိုက်သည် ။

ရီဝေဝေမြင်ကွင်းထဲမှာ ပတ်ဝန်းကျင်က အနှေးပြကွက်လေးလိုလှလှပပ ။

သူပြေးနေသည် ။ တကယ်ကိုပေါ့ပေါ့ပါးပါး ပျော်ပျော်ရွှင်ရွှင် ။

နောက်တော့ သူ့မြင်ကွင်းထဲ ပိုးသားအင်္ကျီအဖြူရောင်လေးနှင့် တစ်စုံတစ်ယောက်ဝင်ရောက်လာ၏ ။

"လွင်ပြင်?"

မရေမရာသူ့ခေါ်သံကို တစ်ဖက်က အပြုံးလေးတစ်ခုနှင့်တုန့်ပြန်တာကြောင့် သူပိုအံ့ဩသွားသည် ။

လွင်ပြင်က သူ့လက်ကိုဆွဲရင်းပြေးသည် ။ တကယ်ကို ကြည်ကြည်နူးနူးနှင့်လဲရယ်နေသေးသည် ။

"ဟင်?"

မြင်ကွင်းထဲက ရုတ်တရက် လွင်ပြင်ပျောက်သွားတာကြောင့် ဒေး ယောင်ယောင်မှားမှားနှင့်လိုက်ရှာမိ၏ ။

နောက်တော့ ရောင်စုံပန်းခင်းကြီးတစ်ခုထဲ သူရောက်သွားသည် ။

ညနေဆည်းဆာမှာ ပန်းလေးတွေရဲ့အရောင်အသွေးက ပိုမိုရုပ်လုံးကြွနေသယောင် ။

ထို့ထက်ပိုလှပနေသည်က ပန်းခင်းပေါ်မှာ ကြွကြွရွရွလှဲအိပ်နေသည့် လွင်ပြင် ။

ဒေး မသိစိတ်ကနေ သူ့အနားကတိုးကပ်သွားမိသည် ။

အနီးကပ်မြင်နေရသည့် လွင်ပြင့်မျက်တောင်လေးတွေက ကော့စင်းနေပြီး မျက်မှန်မတပ်ထားတဲ့မျက်ဝန်းလေးတွေက ကြည်လဲ့နေ၏ ။

ဒေးအရမ်းမင်သက်သွားမိသည် ။

အမြဲတည်တင်းနေတဲ့နှုတ်ခမ်းထူထူလေးက လှလှပပတွန့်ချိုးနေပြီး ဒေးကိုညှို့ယူနေသကဲ့သို့ပင် ။

မျက်လုံးလေးပင့်ပြီး ဒေးကိုကြည့်နေပုံက တကယ်ကိုနူးနူးညံ့ညံ့လှလှပပ ။

'လှလိုက်တာ'

ဒေးနှုတ်ကနေ ကိုယ်တိုင်သတိမထားလိုက်မိခင်မှာပင် ခပ်တိုးတိုးရေရွတ်မိသွား၏ ။