صدفة

✨الجزء 22✨

☘️فالقصر☘️

دخلات ليسا و مشات عندهم للصالون و لقات الكل تماك رجال و نساء و منهم البنات و مشات جلسات جنب ماماها
داليا : فين كنتي يا هاد البنت خلعتيني عليك
ليسا : غير عند البحر اماما لاش غاتخافي
داليا : ماحدنا فالمغرب و فهاد القصر بالصبط كل تحركاتك خاصني نعرفهم
ليسا (ساطت) : اووففف اماما لاش هادشي كلو
داليا : بلا أسئلة نتي فبلاد غير بلادك و هنا خطر عليك سمعتي و دبا سكتينا و لا طلعي لبيتك

ليسا شافت حتى عيات و مشات جنب البنات و ابتاسمات ليهم و ردوها
ليسا : سلاام
شمس : نتي هي ليسا
ليسا : مم انا
ملاك : سمعنا بلي جات هنا شي بنت و جانا الفضول نعرفوها
شمس : طلعتي زويييينة
ليسا : شكرا ليك أحبيبة عويناتك لي زوينين
شمس(همسات لسوسن) : ناااري شحال حبيتها
مريم : مافخباريش غانتصادفك هنا
ليسا شافت فيها و ناضت طلعات لبيتها لي وجهاتها ليه الخدامة
سوسن : مالكي مع البنت تانتي
مريم : واالو قصة و فاتت
شمس : عاودي اش كاين بيناتكم حتى ناضت
مريم : هاديك غير قحبة ماتغركمش المظاهر أزوينات

غمزاتهم و خرجات لجردة فين لقات عهد جالس و كايقرا فشي وراق
مريم : حياتي شنو كادير هنا
عهد : سيري تقودي أمريم الله يرحم ليك الجد
مريم : مالك معصب واش واقعة شي حاجة
عهد : ظبا غاتوقع ايلا ما طرتي من حدايا دبا (بالغوات) يلاااااه غبببرييييي

مريم تخلعات من شكلو و هربات لداخل قبل ما يهرسها من شس قنت دخلات و رجعات جنب البنات ما عاجبها الحال
سوسن : اوا أزين هي جرا عليك حبيب القلب
مريم : لاااا مستحيل يديرها (قربات ليهم) عهد كيموت عليا و هاد الحقيقة نتوما مامتقبلينهاش

ضحكات ملاك بشوية على هاد المسطية لي قدامها و رفعات راسها لقات مريم كاتخنزر فيها
ملاك : اش كتشوفي نتي ؟؟
مريم : ههههه الصراحة كاتبقاي فيا
ملاك جمعات الضحكة : شوفي أديك بنت دانون غاتفوتي ساحتي و لا ماغيعجبك حال محيت غاتخرجي منها غير خاسرة (جبدات ليها حنكها) راك باقي ماكتعرفينيش نمسح بيك الأرض و نشفي فيك العدو سمعتي
مريم : خلعتيني و الله

تخطاتها ملاك محيت عارفة غاتعصبها و غاتنوض تنتفها و خلات سوسن و شمس غير كايشوفو
شمس : واقيلا غاتنوض شي حرب بين هادو
سوسن : غير سكتي أنا عارفاهم بجوج مساهلينش و لكن ملاك كلنا عارفينها مايقد عليها غير لي خلقها
شافت فيها مريم و ضحكات بسخرية
مريم : دبا غانشوفو

مشات مريم خرجات رمقات عهد من بعيد و ركبات فلوطو و كسيرات

☘️عند نيهال☘️

فاش تفارقت مع ليسا ركبات فلوطو و تاجهت عند شخص لي متأكدة هو الوحيد لي غايفوج عليها..وقفات قدام عماارة كبيرة هبطات من لوطو و هزات راسها
نيهال : ملجئي الوحيد
طلعات فلاسانسور و تاجهات لطابق 6 خرجات
بقات كاتشوف فداك الكولوار و هي مترددة و غالأخير تاجهات لقدام واحد الأبارطومون و صونات المرة لولا و 2 و 3 و ما من مجيب حتى كانت غاتمشي عاد حل ليها رجل فقمة الوسامة  الكولة و التجريدة و زيد عليها الزين لي عاطيه سيدي ربي..لابس فقط شورط و شعرو طايح على عينيه و علامات العكر كاينين فعنقو
حل عينيه على جهدهم فاش شافها ماحس براسو حتى هزها و بدا كايضور بيها و كايبوس فوق راسها
نيهال(و هي كاضحك) : أرسلان واش حماقيتي حطني
أرسلان : مامتيقش واش رجعتي أنهولتي
حطها و بقا كايشوف فيها بحال ايلا مامتيقش واش هي لي قدامو
نيهال : ماتبقاش تشوف فيا هكا
دفعاتو و دخلات مدرمة تصدمات المبسان ظبال الشراب فوق الطبلة و گاع الدار مرونة بحال ايلا كانت فيها الحرب و رجعات ضورات راسها ليه و هي مخنزرة
نيهال : باقي ماغترباش نتا
أرسلان : حتى نلقى حلالي
ساطت نيهال و بدات كاتجمع و هو دخل لبس حوايجو و خرج معاه واحد البنت و نيهال كاتهيزز راسها بلا حول و كاضحك
خرج أرسلان مع البنت يوصلها للباب
أرسلان : بوسة أخيرة و سيري
يلاه غاتبوسو سمعات غوات نيهال
نيهال : أرسلااااااااااااااااااااان
بدا الآخر كايضحك على تصرفها و غواتها و شحال توحشو و ودع البنت و سد الباب و دخل عندها لقانا قادات ديك روينة و جالسة كاتشوف فواحد الصورة
نيهال : باقي محتافظ بيها
ابتاسم أرسلان و عنقها
أرسلان : عمرني نتخلا عليها و هي فيها ختي صغيرة لي ماعنديش
نيهال : الله يخليك ليا
عنقاتو و بدات كاتبكي بلا ماتشعر و الآخر مستغرب بعدها عليه و شاف فيها مغوبش
أرسلان : نيهال واش دار ليك شي حد شي حاجة والله حتى نغبر لبوه الشقف دوي شكون بكاااك
نيهال : إيمان ماتت أ أرسلان ماتت
أرسلان تصدم رجع عنقها مخليها تبكي على خاطرها و تفش قلبها
نيهال : عرفتي شحااال بكيت على الله نرتاح أ أرسلان و لكن تاد ما كنزيد نتجرح
أرسلان : ششش صااافي ماتبكيش هاد العوينات ما يستاهلوش