صدفة

✨الجزء 63✨

وقف عليهم دري الكبير و كايطلع و ينزل فملاك حتى لمح جروح فيديها
.. : ماما شوفي يديها
المراة تلفتات عند ولدها و رجعات شافت فملاك لي حدرات راسها
المراة : سليمان ولدي سير قابل كتوبتك الله يرضي عليك
سليمان (خنزر فملاك) : واخا
خرج متاجه للصالون .. اما ملاك شافت فالمرأة بحرج
ملاك : خاصني نمشي اختي أحلام
أحلام : ماتديش على سليمان راه باقي صغير و هو طبعو هكا
ملاك : لا لا غير حتى انا عائلتي غايكونو كايقلبو عليا من الأحسن نمشي
أحلام : لي بغيتي و لكن على الأقل بقاي حتى تغداي معانا حشومة تمشي بلاش
ملاك : واخا ربي يخليك

فمكان آخر .. كان جالس مفرق رجليه و خدام فبيسي و التلفزة قدامو خدامين فيها تسجيل الكاميرات لايف .. حتى قشع طيف دايز .. هز راسو و بقا كايشوف حتى بانت ليه أنثى محجبة كاتقاد الطبلة دلفطور .. بقا متبعها اش كادير بلا مايحس حتى وقف عليها الگارد قال ليها شي حاجة و مشات مابقات رجعات .. لبس عليه حوايج الخدمة و مشط شعرو و رش ريحتو الرجولية و قاد مگانتو و هز لفون و هبط بكاريزما .. لقا الفطور محطوط فوق الطبلة .. مكانش متوقع الطباخة تكون صغيرة لهاد الدرجة .. عيط على واحد لگارد و جا وقف عليه و هو كياكل
عمار : شكون هاديك لي كانت تحوم هنا
الگارد : بنت الخدامة اسيدي ايلا زعجوك نقدرو نجرو عليهم
عمار : لا غير سير
سالا عمار فطورو و خرج متاجه لسيارتو نحو الشركة .. اما عند إشراق فكانت جالسة كاتفطر هي و مها فأمان الله حتى تاصل تيلي ديال إشراق وجاوبت حتى خرجات عينيها فمها و بعد مدة قطعات .. طارت على مها غاطير بالفرحة
إشراق : اااااااا مااامااااا و أخييييرااااا غايحن علينا الله و أخيييراااا ضحكات ليا الدنيا
حنان : مالك يا هاد البنت خلعتيني
إشراق (بحماس) : لقيت خدمة
حنان : باينة تاني غاترجعي فالنهار لول بحال قبل

نخليو هاد جوجات يتناقشو و نرجعو للفيلا .. جالسة جنب البنات و يديها تحت حنكها غير كاتخمم و حاسة براسها مخنوقة .. استأدنات منهم و خرجات برا كاتشم الهواء و عقلها خدام .. بقات كاتمشا و ماوقفاتش حتى لقات جردة كبيييرة و فيها ألعاب د دراري صغار .. مشات جلسات فكرسي و بقات كاتشوف فدراري و بنيات يلعبو .. كاتبسم ليهم بلا ماتحس .. يلاه غاتنوض حتى شافت نفس الأب و بنتو ديال داك نهار

فلاش باك🦋

بعدما غسلات يديها حسناء خرجات و فطريقها لمحات رجل و معاه بنت صغيرة باينة واش بنتو كان كايلعب و ضحكاتهم واصلين لعندها .. تجاهلتهم و تحركات لمجموعتها

عودة🦋

رجعات جلسات و هي مراقباهم فيها فضول كبير و غريب تجاههم و تساؤلات كثيرة عليهم فحال فين هي الأم مثلا ؟ .. كان كايلعب معاها و عاطيها خاطرو و خايف عليها من أقل حاجة