صدفة

✨الجزء 53✨

كل الأعين مشات جهة الباب .. كايشوفو فهادي لي مع أزار .. اول مرة كايشوفوه مع شي وحدة .. شاد فخصرها بتملك و متجاهل نظرات الناس و جرها معاه لواحد الطبلة خاوية و بعيدة على داك الهاراج
نيهال : علاش كايشوفو هكا خلعوني
أزار : ماديهاش فيهم بقاي شوفي غير فيا
ضحكات نيهال على هضرتو يحساب ليها واش كايضحك .. سها فضحكتها .. تخيلها حتى عيا و عمرو تخيل غاتكون بهاد الجمال و الأناقة و البرائة .. قرب ليها و باسها فحنكها جنب فمها .. تزنگات و بقات كاتشوف ياكما شي حد شافهم
نيهال : أزار شنو كادير الناس كايشوفو
أزار : لي يتسالني شي حاجة يجي عندي
نيهال : واخا غير بعد
بعد عليها .. شافت فحسناء لقاتها غتاكلها بعينيها و ماكرهاتش تقتلها .. شدات فأزار فيديه لي كانت فوق الطبلة .. شاف فيها متعجب و شافها فين كاتشوف حتى بانت ليه حسناء .. تبسم عرفها غارت .. عجبو الحال بزاف و زاد زير عليها .. شاف واش كولشي حاضر بان ليه ألبرت و تبسم و فور ما تجمعات ابتسامتو فاش شاف أرسلان داخل .. طرطق عنقو و خنزر فنيهال
أزار : تحركي من حدايا نهرس ليك رجليك
نيهال : شنو
باقي ما كملات هضرتها حتى وقف عليهم أرسلان .. فرحات نيهال بزااف و بغات تنوض تعنقو و هي تحس براسها مجرورة و رجعات جلسات
أزار : جلسي لاارض
أرسلان : غا جلسي أنيهال حسن عوانك مع هاد المريض
أزار : ايلا ساليتي يمكن ليك تمشي و تخلي المرأة مع راجلها بخصوصية
تعجب أرسلان من جرأتو و شاف فنيهال لي حمارت و غمضات عينيها كاطمأنو .. ضحك أرسلان بخفة و مشا
أزار : مالك كاطيري
نيهال : بغيت غير نسلم عليه
أزار : بوسيه نتي حسن
نيهال : مالك دبا راه عادي و اصلا راه صديق من الطفولة
أزار : واخا يكون خوك ممنوع باغة تسلمي و تعنقي و تبوسي ها انا مانرضهاش فوجهك
ميقات فيه نيهال و تلفتات الجهة الأخرى

فطابلة أخرى .. مع هزات عينيها و هي تشوفو دايز من قدامهم .. حبات فيه فمها و من أناقتو .. نغزات صاحبتها مصدومة
إيناس : هو هو و الله حتى هو
إشراق : مالك و شكون هدا
إيناس : داك لي عاودت ليك عليه ضربني بالطوموبيل و وصلني لراس الدرب
إشراق : و شنو جا كيدير هنا
إيناس : راه حنا لي شنو كانديرو هنا اما هو باينة ملعق و من الفاميلة و لا معرفة
إشراق : الله ياربي اش هاد العائلة لي كايولدو غير الزين
إيناس : احح انا طحت نااري اهياتا مامتيقاش بلي شفتو و هو قدامي دبا
إشراق : ايوا شبعي تحنزيز فيه راه شوية و غانمشيو
إيناس : شنااهوا واش نتي من نيتك و الله و مانخرج مع العروس و نحضر للعرس كلو من لول للخر لا مشيت
إشراق : ايلا تبعتك و الله حتى تحوز عليا حنان
إيناس : و باااز
سكتو شوية إيناس حاضية أرسلان و مرة مرة كاتجي عينيهم على بعضياتهم و لكن دغيا كايحيدها
إيناس : إشرااق كانظن نساني
إشراق : ماتظنيش . تأكدي
إيناس : و اصلا لي شافني داك نهار و بديك الحالة يحساب ليه غير بنت الليل باينة كرهني و حتى ايلا عقل عليا مستحيل يكلمني و لا يشوف جيهتي
إشراق : مالك دبا كاتغبني شكون گاع يكون هو
ساطت إيناس و حاولت ماترجعش تشوف جيهتو .. طلقاتها تاني ضحك و ضحكهم واصل فين و فين .. حتى ناضت إشراق متاجهة للحمام