شمس

٣٤

#شمس٣٤
شهد السلمان

جنت كاعد ويا شمس نضحك ونسولف ودك تلفوني اجاني اتصال من رقم غريب وكال انه هو اكرم كمت من يمها حتى ما تحس بشي لان مردت تنسد نفسها او يتغير مزاجها او تخاف وتتوتر

- الو
- اسامة اني اكرم طلبت من الضابط احجي تلفون و محتاج اشوفك
- لحظة ،
شتريد !؟
- ما اكدر احجي على التلفون من تجي حتعرف
- ماشي جايك
- منتظرك

وصلت السجن و طلبت اشوفة و الضابط دز علي بالمكتب وكعدنا سوة بدا هو يحجي اللي يريدة ..

- ادري بيك جاي من ورة خشمك بس بنفس الوقت اني اعرف بداخلك مناسي عشرتنا وصداقتنا
- ادخل بالموضوع اكرم
- صار
بدون اي مقدمات واعرف اذا اتأسفلك منا لحد ما اموت انت مراح تسامحني بس اني تعبت من الحقد والكراهية وانت شفت شلون اني جنت مخدوع كل هاي السنين
- يعني دتبرر السويتة بانه انت انخدعت
زين وين انسانيتك وانت مثل الوحش شيجي كدامك تسحكة ؟
- يا اسامة اني بشر جان من حقي اعيش بحريتي بدون ما اتقيد بانتقام و اخفي مشاعري و احتياجاتي بس في سبيل ابين قوتي
وغلطت وثقت و انغدرت من اقرب شخص جان الي جنت احسة سند وحماية و ظهر وفعلا هو جان مفضلني على اولادة وهو اللي قنعني بانه شمس مو بنتة و انه هو اللي قتل زوجتة حتى يغسل عارة مو ماتت بمرض مثل ما عرفت بعدين لان شمس مو بنتة وهي خانتة ويا ابوك وبالتالي هي تصير اختك يعني جنت متخيل هي تابعة الك ولوالدك
- وانت لهذا السبب جنت تكول علاقتنا اني وياها متجوز ؟
- اي ، من سويت بيها هذا الشي و خليتها مدمنة اني جان هدفي انه ادمر ابوك و احرك كلبة مثل ما كلبي احترك واني اللي اقترحت هذا الشي على خالي وهو وافق مجنت متخيل انه هو ديكذب لان اني مشايف مرت خالي و لا حتى شمس ما اعرف اي شي غير اللي يكولة خالي
ومن جنا دنريد ناخذها من بيتها وشفتك انت تعجبت للصدفة اللي جمعتنا مرة ثانية لهذا مخليت اخوها يقتلك و طلعنا بسرعة حتى ما تشك بية لان من الاول جنت مخطط بدون علم خالي  نلكى شمس ونساوم بيها ابوك بس بعدين اتغيرت الخطة كلها بسببك و حاولت انه تكون انت وشمس مجموعين سوة في سبيل الضربة تصير دبل على ابوك وعليك انت همين
- وليش تاخرت كل هذا الوكت
- متاخرت بس لان احنا دائما تحت المراقبة و نخاف بسبب شغلنا لا ننلزم ومجنت اريد اسوي اي خطوة غلط في سبيل احقق انتقامي منك ومن ابوك وصادفت انه يكون عدنا تسليم شحن مخدرات واجتي اخبارية علينا لكن ملكو شي لان لحكنا نخفيها
- ليش ما اتصلت بية من الاول بلا متوصلنا لكل هذا واني جنت راح اجيك بدون ما تدمرها
- لان جنت موهوم بشمس و بكل شي كل يوم يمر واني اعذبها احس بنشوة الانتصار و احس هي هاي العدالة اللي جنت احلم بيها من صغري و من ساعة اللي علمني خالي شلون احقد وشلون اخذ حقي واني اتمنى هاللحظة تجي
- ماشي ، هذا الحجي افتهمتة كلة بس اكو شي جديد ؟
- الجديد هو لازم تعرف انه هديل خطيبتك مظلومة مثل ما ظلمتك واني السبب حتى تتفاركون طبعا بس مو لنفس السبب اللي ببالك لان هديل مخانتك وياية و لا مرة ولا حتى بيوم انطتني وجه حلو
- ههههههه حدث العاقل بما لا يعقل
زين راح اكول كلامك صح بس اللي شفتة بعيني شنو ؟
- اللي شفتة جان ناقص تفسير وشرح هواية بس انت مقبلت تسمعها واني طبعا مجنت اريد ابررلك اكتفيت اتفرج عليك
المهم ..
بعد ما عرفت بيك خطبت كلت صارت الفرصة اللي جنت اريدها من زمان حتى اكدر ادمرك عن طريق خطيبتك
هديل بنية حبابة و خلوقة وما انكر انه هواية جنت احسدك عليها وحبيتها بيني وبين نفسي بس كل اللي صار لان هي طيبة زيادة و عدها ثقة بكل الناس واي ناس ما تخَون احد او تحس انه هو حيغدر بيها بما فيهم انت
جانت تشوفك كلشي بنظرها ومجانت تصدك انه ممكن تنكلب عليها و تغدر او تخون او يتبدل شعورك تجاهها