شمس

٢٥

#شمس٢٥
شهد السلمان

كلنا واكفين ننتظر يتجمعون المسافرين و هي ساكتة و صافنة طلبت منها تاكل شي قبل لا تصعد السيارة مقبلت وعيونها مسهمة ؛ 
خلت جنطتها ع الكاع تعبت منها باوعتلي حسيتها تحاول تحجي وياية باي شي يخفف توترها اللي جان واضح جدا عليها
بالضبط حالتها جانت تشبه اللي رايح يجيب نتيجة تحليل او امتحانات والخوف والقلق مسيطر عليها ..

- اسامة
- نعم
- مراح تاخذ فلوسك؟ بعدك مصر ؟
- ما اخذها انت بحاجتها هسة شسوي بيها اني  واليسمعج يكول مدري شكد
- اكدر ادبر نفسي واذا اخذتها منك معناها هاي دين حيبقى عندي
- واني اريد يظل هالدين
- ليش يعني  !
- حتى يصيرلنا حجة نتلاكة علمودها
- هههههه شون حنتلاكى انت بالشرق واني حروح بالغرب
- مثل ما تلاكينا بعد هالغياب حنتلاكى بعدين اكيد
لو انت متريدين تشوفيني بعد ؟

دمعت عينها بس مرادت تبجي وغيرت ملامحها بابتسامة حزينة وغيرت الموضوع

- اسامة انت صارلك ساعة تحجي وياية تنبيهات على تحذيرات واني اكيد حسوي كل شي كلتة بس بالمقابل ما اريد  اقيدك بكلامي او تحسة تدخل مني بالنهاية هو مو حقي بس اكدر احجي ؟
- احجي اي شي يخطر ببالج
- مراح تزعل ؟
- ههههه مراح ازعل لا تخافين
- بصراحة ..
من يوم اللي شفتك واني حسيت انت انسان طيب برغم جان كلامك قاسي بس حسيت انت متشبه اللي جانو يجون للبيت مو مثلهم ابد
لا تخلي اللي صار وياك يحولك لغير انسان لان انت مغلطت ويا احد
يمكن الصار حتى تتعلم متخلي ثقتك بأي احد وتتأكد منة من كل النواحي يالا تبدي تأمن بي مو حتى تكون انت مثلهم
عيش حياتك عاشر ناس جدد زينين اشتغل وابني مستقبلك و لا تضيع نفسك بهاي الاشياء وبماضي فات خليهم وراك وكل يوم عيشة كأنه هو هذا اليوم اللي منتظرة استغل كل دقيقة بي لا تضيعة بموقف راح او علاقة فشلت او حدث ما كمل حتى لو جانت صدمتك بي قوية ..
- ليش تريدين اسوي كل هذا ؟
- لان انت تستاهل احسن شي بالدنيا ولان  كلبك صافي
- منو كالج كلبي صافي !
- لوما انسان صافي متساعدني وانت ممكن تتاذى من وراية واساسا انت تكول مواثق مني ومن قصتي بس مصدكني من داخلك واحساسك تجاه اللي ديصير وياية هو اللي ديخليك توكف وياية ..
- الله كريم ححاول افكر بكلامج ..
- واجه هديل واكرم اذا سمحتلك الفرصة لا تخليها بكلبك لان محد يستاهل تضملة شي ، صحيح انت سترت عليها بس بالنهاية انت اتاذيت و مو ذنبك  حتى هم راحو كلمن عاش حياتة وبقيت انت على اطلال الراح ؛
واقلها انت سويت باصلك هالشي لوحدة لازم يخليك تفرح وتفتخر بنفسك وبرجولتك لان حتى وانت تتصنع القسوة بس رجولتك وشهامتك غلبتك
- شمس ...
اني اسف على الاشياء الصارت بيناتنا وعلى كل كلمة كلت...