شمس

١٣

#شمس١٣
شهد السلمان

من فكرة لفكرة بيني وبينها اقترحت علية توديني بهاي المحافظة لان هي جانت فترة عايشة هناك و عدها اقارب همين بيها وبهيج تضمن اماني يمهم و لان الناس محدودين وبسيطين وكلهم محافظين ما عدهم غش اهل المدينة ولا ناسهم استغلالية الا ما ندر
عجبتني الفكرة بس مجان عندي اي مستمسكات ظلت ببيت عبير اول مرية اشتغلت يمها واكثر من مرة طلبت من هيام تجيب اغراضي منها مقبلت و كالتلي اخر شي عبير حركت كل شي يخصني وما ادري اذا صدك او جذب يعني من باب خوفها لا انهزم عبالها الاوراق مقيدتني او توكفني عن الهروب ...
المهم نرجع للحاجة صبيحة كالتلي راح الكالج احد يساعدج حتى تطلعين هوية بدل ضائع وفعلا الله يرزقهاو يسهل امرها لحد اليوم ادعيلها طلعتها الي بظرف اسبوع وهي دفعت كل التكاليف
بقيت بهاي الفترة بالجامع انظف بي واساعدهم ومرات اطبخ للعاملين بي والحمدلله حسيت نفسي انسترت ومحد ممكن يكدر ياذيني وطبعا الناس الخيرة ينطوني اللي يكدرون علي سواء اكل او فلوس محد يقصر وياية او ويا اللي موجودين من الناس المحتاجة
- يعني جنتي قريبة مني واني ادور بغير مكان  ؟؟
- اي كلش قريبة
- وراها شنو صار وياج ؟ سافرتي لو هم انتظرتي ؟
- سافرت لهنا عبرية ويا كرايب حجية صبيحة ودلوني على مختار المنطقة وشافلي هذا البيت اللي جنا بي وكل فترة يطلون علية ويتطمنون عني لحد ما صارو زبايني وطبعا هواية ساعدوني بموضوع تجهيزات الشغل من مكينة الخياطة للمحلات اللي اجهز منها
- وشنو قصة ام عمار ليش كلتي اسمج هذا ؟
- اهل القرية يسالون هواية بيهم هاي الطبيعة الفضولية ومن يشوفون مرة وحدانية يكثر الحجي عليها خاصة اذا بنية صغيرة وحدها ساكنة وممتزوجة فالله هداني لفكرة انه اكول متزوجة ورجلي مفقود ما اعرفلة اثر وابني همين متوفي
- وكلتي اهلج يلحكوج لهنا بس ظروف صارتلهم وما اجوي
- اي صح شمدريك ؟ ؟
- حجتلي ام ابتسام اللي توديلها اكل
- يعني انت جنت تعرف اني موجودة وجيت وراية ؟؟
- لا بالاول ما ادري بس الموضوع وما بي انه اني اشتغل ببغداد وطلبت نقل ردت اغير جو وناس وجيت لهنا وبالصدفة دنحجي ع الاكل اني وام ابتسام كالتلي عن وحدة اسمها ام عمار
وبيوم جنت اسبح بالشط وانت مريتي تلمين الحطب عرفتج من كشفتي وجهج حتى تغسلين سالت وكالولي انت نفسج ام عمار لان اغلب الناس هنا يعرفوج صغار وكبار
راقبتج وبقيت كاعد قريب منج وكع تلفوني مني اني وراجع حسيت هو مموجود من رجعتلج شفت بابج مخلوع و الباقي انت تعرفي
- الحمدلله انت جنت موجود ما جنت اعرف شراح يصير لو ما الله دزك
- منو ذولة اللي جانو يمج يعني بس اخوتج لان اللي شفتهم ٤ ؟
- ابن عمي واخواني الاثنين وواحد ما اعرفة اصلا ويجوز اعرفة بس لان متلثم مميزتة
- مو نفسهم الي بلغتي عليهم شون كدرو يطلعون و اندلو مكانج
-لا هذولة غيرهم بس هم كالولي انت بلغتي علينا وانهزمتي وندري بيج لان الممرضة اعترفت وكالت اني اللي هزمتها
- اكلتها الممرضة خطية اكيد صارت بخبر كان وطيحو حظها
- شبيدي عليها والله مجان عندي غير حل
- قصتج طويلة ومتعبة كلش واللي شفتي مو سهل برغم حجيتي بوقت قصير بس العشتي اطول اكيد
- الحمدلله على كل حال
- انت ما جعتي ؟
- لا
- خايفة ومتكدرين تاكلين ؟
- متوترة وقلقة
- بس هيج حتوكعين اكلي وارتاحي نامي اني هنا
- شكد حتبقى انت يوم ؟ يومين ؟
حيجي يوم وتروح هالشغلة متخلص الا لمن يلزموني واموت بيدهم يالا حينتقمون مني اني اعرف
- محد يكدر يوصلج لا تخافين
- الغريب انه شلون لكوني وبعد هالسنين حاطيني ببالهم
- تدرين اني دا اتذكر لامح وجوههم وهيأتهم بس ما اعرف وين
- هنا قصدك !؟ لو ببغداد !
- لحظة ...
وبدت ذاكرتي ترجع ليوم اللي جنت باستراحة الطريق والجماعة اللي جنت كاعد وراهم جانو نفس هيأتهم و ضخامتهم وعرفت سبب حجيهم وليش جانت لهجتهم لهجة انتقامية وحجيتلها عن هالشي واكدتلي انه جانو يحجون عنها  ..
فات النهار بسرعة واحنا سوة بدون ما نحجي شي مليون سؤال ببالي بس ما اكدر اسال
جانت شاردة وسارحة لدرجة متحركت اي حركة ومتسوي اي شي صامتة هادية وملامح القلق تنرسم بعيونها و على وجهها علامات الخوف واحيانا اقرة يأس واحباط ويا كل دمعة تنزل منها غصب عنها
اكلت شوي من الاكل الموجود بالصينية وتوسلت بيها حتى تاكل مقبلت كامت على الشباج وظلت تتفرج فجاة شهكت ورجعت ليورة خطوة جبيرة صارت يمي وهي تلطم
- شبيج ؟؟؟
- هذ.. هذولة هنا
- منو ؟؟؟
- هنا هنا لكوني