شمس

٢٠

#شمس٢٠
شهد السلمان

قررت اكطع اتصالي بيها كم يوم واشوف يمكن هالرسالة من صديقتها واني ظالمها بين قوسين هذا الجنت اتمناه اكون ظالم
ويمكن فعلا هي جان عدها امتحان ودينتظروها البنات حتى تدرس وياهم لان هم بالعادة يدرسون سوية
ومرت ٤ ايام وماكو اي سؤال منها عني ولا اي رسالة عتب مثل قبل من جنت ما ادز شي وتحسسني اني ما احبها وممهتم و تزعل مني ولا حتى اتصال بالغلط ..

دكيت عليها الظهر من رجعت من الدوام و خطها مشغول اكثر من مرة بس يطلعلي انتظار رجعت دكتلي هي وكالتلي جانت تحجي ويا خالتها حاولت ابينلها اني زعلان بس ما اهتمت وتركتني بحجة تعبانة من الدوام وتريد تنام وانه اني ادور سوالف ما بيها معنى
كمت احس بمشاعر غريبة و اريد اعرف اسباب بعدها بس خايف من الشك البداخلي اريد ابقى احبها بس كرامتي مدتسمحلي يعني صرت احس بصراع بين كلبي وعقلي
واحسن شي توصلت الة انه اراقبها واشوف بعيني بلا ما اسمع من احد او اطلب نصيحة من الناس
- و شلكيت ؟
- ماكو اي شي يومها عادي تروح للدوام الصبح وترجع الظهر واشوفها تحضر محاضرات وتضحك ويا كروبها وكلش عادية
بس من جنت اتصل جانت ملامح وجهها تتغير وكأنما متريد تحجي وياية واكثر من مرة تنطيني رفض ومرات تجاوب وتكلي بعد شوي عندي محاضرة بس تبقى كاعدة برة وبيدها التلفون
- كم يوم بقيت تراقبها ؟
- تقريبا ٣ اسابيع
- محست عليك
- لا مدرت ابد مخليتها تشك بشي وبعدين هي بالها اساسا مو يمي حتى تفكر اني شدا اسوي