شمس

٨

#شمس٨
شهد السلمان

عفتها و طلعت برة اريد ارجع للموقع وبعد اسد هالموضوع نهائي ومراح ارجع ولا اريد الفلوس خلص لهنا ويكفي حسيت عقلي كلش صغيربذيج اللحظة ومو من الرجولة مهما كانت هي اسوي بيها هيج واساومها واخوفها
وصلت لعتبة بابها المكسور دا افتحة ومال بايدي اكثر انخلع من فوك شوي سحبتة حتى افتحة
سمعت صوتها المخنوك بالبجي وراية 
- دقيقة لا تروح الله يخليك
- شتريدين ؟؟
- ساعدني .. ساعدني و وصلني لطريق ولمكان بعيد اذا تعرف
- شلون اساعدج ؟؟ ليش تريدين تبليني انت ؟؟ شمعرفني شنو وراج !
- ما ابليك والله العظيم ما عندي شي بس محتاجة لمساعدتك ما اكدر اطلع لوحدي بالليل
- استغفرك ربي شون ليلة سودة هاي
يمعودة بس فهميني شنو صاير وياج ؟
- احجيلك والله بس بالاول خلي اروح منا لان حيصير قريب الفجر واندلو مكاني اريد اروح وما اعرف وين
- ماشي لمي هدومج والتريدي وامشي وياية
- الله يوفقك يا رب هسة اجي لا تروح عليك الله ما عندي غيرك بهالوكت
- مرايح استعجلي واني واكفلج هنا

ربع ساعة او اقل وطلعتلي واني بهاي الاثناء معرفت وين ممكن اوديها بس اتصلت بأيهاب وكتلة اكو جماعة كرايبي من طرف امي جاية من سفر واريد احطها ببيت عندك مكان بالاول كالي ماكو بعدين خابرلي جماعة ودلاني على بيت بالطرف الثاني من القرية  وانطاني اسم الناس اللي يريدون ياجرو كتبت العنوان بملاحظة التلفون وسجلت رقم الرجال حتى بس اوصل اتصل علي و يدخلني يمة لان ايهاب فهمة على الوضع واتوسطلي عندة ؛
اجتي شايلة جنطة صغيرة ومبدلة هدومها ولابسة عباية راس ومغطية وجهها عدا عيونها واتعذرت مني ع التاخير
فهمتها وين راح اوديها وكتلها تحفظ الطريق حتى اذا صار شي تندل وتعرف شلون ترجعلي للموقع مالتي او حتى لبيتها
مشينا لحد ما لكينا سيارة وهي طول الطريق تتلفت وتفز من اي ضوة سيارة يتقرب منا راسا تلزم رداني وتروح للجهة البعيدة تتحامى بية
وصلنا بعد ساعتين للمكان المطلوب ونزلنا من السيارة وبعدها تتلفت يمنى ويسرى و مرات تندار تتاكد اكثر اذا اكو احد ورانا
عطت بيها وكتلها ماكو احد حتموتين من الخوف انت وشلشتيني وياج ؛ حاولت تتصنع الهدوء وشفتها تعبت هواية
فتنا البيت بعد ما اجة الرجال وحجيت وياه وشوفنا داخلة جانت اكو غرفة صغيرة وبيها ممر يودي للحمام ووراه المطبخ يعني غرفة متواضعة كلش حتى بالاثاث وجان اكو سرير واحد نفرين
تشكرت منة ونطاني المفاتيح و راح
كعدت هي على الفراش وتتامل الغرفة والاغراض وراها حطت راسها بين ايديها
- بيج شي ؟
- لا بس تعبت راسي دياذيني كلش
- نامي هنا ارتاحي
- وانت ؟ وين حتنام
- اني راجع لل..
- شنووو ؟؟ لا عفية ابقى هنا بس هالليلة
- شبقى هنا وين انام !؟
خلص امنتج بمكان وهاهية بعد مو هذا اللي ردتي !؟
- مو .. زين .. خلص .. الله وياك
مراح انسالك هالمعروف ابد الله يستر عليك وعلى اهلك