شمس

٦

#شمس٦
شهد السلمان

الدنيا عبارة عن قرية صغيرة يعني ممكن نتعرف على ناس جدد و ممكن تتلاكى بيها وجوه قديمة
سامع بهاي الجملة هواية من جماعتي واهلي بس مجنت اتوقع حتصير فعلا وياية بيوم من الايام برغم جنت اعرف حلكاها لكن مو هنا ولا بهذا المكان ولا بعد كل هالفترة
ميزت شكلها من عيونها جنت شاك بيها قبل لا تكشف عن وجهها و تخبطت عندي ذاكرتي بالوجوه لان ممصدك هذي نفسها بيداء
بنت الليل اللي جبتها من بيت مشبوه تكون هيج مسترة ولابسة كل شي بالمضبوط العباية و الشيلة والكلابية الطويلة عكس ذيج البنية اللي جانت عليها .. مكياج ولبس فاضح وشعر طويل مسرح
قررت بيني وبين نفسي ما اطلعلها ولا احجي وياها وراح ابدي اتابعها لحد ما اوصل مكانها واتاكد بنفسي منها والزمها واخذ منها اللي اخذتة مني هالحرامية
غطت وجهها وتركت عيونها ورجعت كملت شغلها تسحبت شوي شوي بالمي على ملابسي لبست وهي راحت بعيد شوية خليت العدة بمكان وظليت امشي وراها
انتبهت هي دخلت ببيت طين بابة لونة احمرطوخ شايلة حطب على ظهرها و سطل حليب بيدها اليمنى
فاتت طفلة دتلعب ويا صديقاتها من يمي وسالتها بيت منو هذا كالتلي بيت خالة ام عمار يعني نفس اللي كالت عليها حجية ام ابتسام اللي تسوي اكل وغيرها من هالشغلات
رجعت لمكان العدة مالتي اخذتها ورحت للموقع وببالي الف فكرة ودا احسب السنين هي اختفت سنتين منين صار عدها طفل عمرة ٣سنوات
زين معقول تزوجت او جانت متزوجة وكالتلي اني بنية و ممتزوجة  وتابت من هالشغلة 
ما اعتقد تابت لان هي مو بس بت ليل هي حرامية باب اول
رجعت افكر واكول هي شوصلها لهنا وليش جاية بهيج مكان محافظ لدرجة المرية اذا طلع صوتها اعتبروها مو زينة و مو متربية يعني يقدسون تقاليد وعادات معينة وكلش محافظين من ناحية المرة حتى يخافون على بناتهم من اي بنية مو متربية او شوية مختلفة عنهم ؛
الليل مكدرت انامة ردت اسوي خطة الها حتى الزمها بدون ما تنهزم او تفكر تسوي شي هيج وحدة اكيد داهية وتعرف شلون تخلص نفسها من هالمواقف واقل شي ممكن تسوي تصيح وتلم المنطقة وتطلعني حرامي واوكع بيها وتفلت هي منها ..