شمس

٥

#شمس٥
شهد السلمان

بساطة هالقرية واضحة على وجوه اهلها واحسهم يتشابهون مو بس بالصفات وحتى بالشكل مرات اخربط بينهم بس يمكن لان ممتعود عليهم
من ضمن الناس اللي تعرفت عليها من خلال المواقع اللي سويت بيهم مسح مرية جبيرة بالعمر  كل يوم تروح تملي مي واساعدها بشيلتها ومتقبل لان هي متعودة ودائما تصيح علية
اكعد اسولف وياها بيها من امي هواية وخاصة من تحجي وياية ع الزواج اضحك من كلبي لان تسويلي خطة حياة كاملة وتخوفني شلون اذا فات عمري واني بدون جهال وسند وخاصة من تريد خلفتي ولد لان هي عدها بس بنات فتحس مالها سند
شفتها جاية وشايلة الدبات مالتها ورحت شلتها عنها حتى نترسها سوية
- صباح الخير يوم
- هلا امي صباح العافية شلونك
- الحمدلله انت شلونج
- نشكر الله
شلون بيك كل يوم متعب نفسك وياي
- تعبج راحة هسة انت متكيفين ابنج يساعدج
- والنعم منك يمة الله يحفظك لشبابك يا رب
- الله يطول عمرج يوم
اليوم شطابخين
- طابخين يبعد امك يابسة وتمن عنبر وخبز مخبوز بتنور الحطب يلوك لحلكك بس غير انت ما تقبل تاكل
- هههههه عوافي اني مو ما اقبل بس لازم ارجع لشغلي قبل الظهر وما الحك اكل من ايدج الطيبة
- انت جنك مشتهي على اكل بيت مو
- اي والله حيل
- دوامك مو بالشارع الورا هالمنطقة
- اي حجية
- تاهت ولكيناها
- هي شنية
- اكل بيت وخبز تازة وشرابت واللي يحبة كلبك موجود يمك
- شلون هاي مصباح علاء الدين
- شنهي هذا المصباح يمة
- ههههههه هذا شي مثل السحر
- اسم الله الحافظ من السحر
لا يمة مو اكو يمكم مرة تسوي هالاكلات يسموها ام عمار توصيها التريدة وتاخذة منها ثاني يوم وتنطيها اجرتها وشغل ايدها ونظيفة امانة الله و رسولة يعني خاف تكول
- صدك والله اليوم اشوفها
- اسال عليها اسمها ام عمار والعصر تطلع قريب البستان ع الشط تلم كم حطبة حتى تداري تنورها
- هذا هو لعد اليوم اشوفها باذن الله
- حتى خياطة تخيط كل شي هدوم جراجف اشكال اللي يعجبك ومرات نسوان المنطقة والعرايس يرحن يمها يتزوگن يحبنها جي شغلها نظيف واخلاقها حلوة
- سبع صنايع هاي ممخلية شي ما مشتغلة بي 
- اي بس على كولة اهلنا سبع صنايع والبخت ضايع
- ليش ؟
- كل هالسباعية و الحيل و رجلها خطية مفگود محد يعرفلة اثر وهي كاعدة وحدها
- وابنها عمار ؟ مو تكولين اسمها ام عمار
- اي صحيح عدها وعمرة ٣ سنوات واتوفى بذاك المرض الله يحفظنا بعيد الشر
- خطية الله يعينها تلكيها تريد تعيش
- اي العيشة صعبة وكلها مريودة يا يمة
- الله كريم ويستر عليها مدام تشتغل بالحلال
- ان شاء الله
دناوشني الدبات دشيلهم
- شون بيج يوم ما تعلمتي اشيلهن اني
- والله ما يهلي كلبي عليك يا يمة واشوفك تعبان والشمس فوك راسك
- ميخالف فدوة الج
- اسم الله عليك حبيبي ربي ينطيك الى ان يرضيك