شمس

١١

#شمس١١
شهد السلمان

كطع ابوية صفنتي وانتظاري من فتح باب السرداب واتسرب الضوة الخارجي مباشرة وصار بعيني غطيتها بيدي كامت تاذيني وفتحت شوي شوي واني اسمع خطواتة البطيئة باتجاهي
شفتة بمنظر مخيف كلش عيونة حمر وعصبي وشايل بيدة صوندة يطلع طولها اقل المترة تقريبا وثخينة
كمت من مكاني وكفت بلا حيل ولا طاقة بس اريد ابقى اقاومة او ادافع عن نفسي
اول شغلة سواها لزمني من ايدي وجرني باتجاه الزاوية جان مكان  فارغ ودفعني وبدة يضربني بكل قوة يملكها حسيت باول كم ضربة جان المها يعادل شي ديتكطع من جسمي بعدها كانما تخدرت مكمت احس بشي بس واعية لحركتة وعصبيتة ولشدة الضرب
واسمعة يسبني ويلعن اليوم الاجيت بي للدنيا  ويتمنى يتخلص مني بأي طريقة جانت مثل ما خلص من اختي الجبيرة
تعب او اكتفى ما اعرف بس وكف الضرب و راح يم الباب وحذرني اذا انهزمت منة مرة لوخ او فكرت مجرد تفكير مرة ثانية بهيج شي
- وبقيتي محبوسة هناك بالسرداب ؟
- تقريبا اسبوع او اكثر وبعدين طلعوني منة
- شسويتي بعدها ؟
- زاد اصراري حتى اتخلص منهم وكمت افهم ليش امي جانت تريد تعوفة وتنهرم هي همين وطول الوكت هي حزينة مشفتها  يوم تضحك وياه او حتى مرتاحة مع انه يحاول يرضيها بكل الطرق
- اكيد زيد الحراسة على البيت حتى مترجعين تنهزمين !؟
- لا هو نفس الشي يعني الحراسة هيج هيج جانت زينة وقوية بس هو كالي مسموح الي انظف البيت واطبخ وارجع لغرفتي حتى تلفزيون منعوني عنة
- يعني صار الوضع اصعب من قبل ؟
- بهواية فوك متتخيل اني داختصرلك التعذيب البطيء لان ما اريد اتذكرة واظل افكر بي اكثر ولا ذنبك تسمعة ..
المهم  بيوم  صار عندي الم بظهري وخاصرتي قوي بحيث نفس اذا يطلع مني احسة ما يرجع و اذا رجع اشهك منة و حسيت بغثيان  واتخربطت واخذوني للمستشفى على اثره وتبين بعد الفحص السريري والاشعة والتحاليل عندي كم حصوة بالكلة وانطوني علاج وكتبلي الدكتور على مبيت مستشفى لحد ميحاول يفتتهم
- وانت جنتي تعانين منة ؟ يعني قبل صاير هيج شي وياج !؟
- الصدك ما ادري بس جانت عندي نغزات بسيطة تروح وتجي واكيد  ماراح انتبه الها بهوسة اللي ديصيرلي مخليت بالي يمها وحتى لو خليت اذا كتلهم حيكلولي طبج مرض ههههههه ..
اي على كلٍ اكملك اكو ممرضة دائما تجي وتتطمن علية يعني هي مسؤولة عني وتنطيني الدوة بمواعيدة امنت بيها وحجيتلها اللي صار وياية بس مكتلها اهلي تجار مخدرات كتلها قاسيين علية وحابسيني ويريدون يزوجوني لشخص اكبر مني بالعمر غصب عني وشوفتها اثار الضرب الموجود بجسمي حتى اخليها تصدكني
وقررت تساعدني و تهزمني من المستشفى وطبعا هالشي صار بعد توسلات وترجي واكثر من مرة الح عليها لان هي خافت من اهلي خاصة من يجون وتشوف الحراس و شكلهم والموضوع مو هين بالنسبة الها
بعد كم يوم اجتني بالليل كالتلي محضرتلي رجال  برة منتظرني بسيارتة تكسي وكالتلي بعد ما اعرفج ولا تعرفيني من لحظة اللي تنهزمين تشكرت منها واخذتني طلعتني من باب الحمام الرئيسي للمستشفى  ومنها لباب الطوارىء والمخرج بلا ما احد يشوفني وقبل لا ترجع لمكانها انطتني فلوس بستها و حضنتها كتلها هاي دين بركبتي كالتلي روحي وابد لا تظل ببالج خنكتني العبرة ومعرفت شكول اشرتلي حتى اروح ونزلت ع الدرج كوة امشي من الالم بس حاولت استعجل خفت لا يجون وتلكاني الرجال اللي كالتلي عنة اخذني بسيارتة بس حسيت بي مو مريح وما اعرف شسوي لا اكدر ارجع ولا اكدر اكمل وياه سالتة وين ماخذني كالي يمة كم يوم ويطلعني لغير مكان
- يعني وداج لبيتة ؟
- هيج جنت اتصور بس طلع عندة غرفة فوك سطح عمارة مثل البيتونة شوية اكبر وكعدني بيها كم يوم يجيبلي اكل و علاجي يمر علية كل كم ساعة لحد ما تعافيت قريب الاسبوع اكثر هالحوالي
اجى للبيت وطلبت منة التلفون انطانيا ونفذت خطتي وبلغت عليهم لمكان بيتنا وطلبت من الضابط يتاكد بنفسة ويراقب البيت لان اني ما عندي اي معلومة عن عملية جديدة بس كل الاعرفة هم يشتغلون بهذا المجال
- يعني ما جزتي منهم ؟؟
- لا بلغت وسمعت اخبار بعد فترة قليلة من الرجال انه عمي الجبير وابوية واخوية انسجنو ولازميهم وهم يصرفون البضاعة لشباب بالبيت والظاهر هم دازيهم او زارعيهم مثل كمين الهم
- يعني ابوج محبوس من ذاك الوكت !!
- اي بقو بالحبس بس ما اعرف تفاصيل محاكمتهم ولا ادري شي عنهم اللي جان يهمني انه ينسجن
- وبقيتي ببيت هذا الرجال او بالغرفة مثل مكلتي ؟
- لا تعاركت وياه وطلعت من الغرفة ظليت من مكان لمكان وما عندي فلوس حتى اكعد واستاجر ومحد يقبل يشغلني والناس اللي تشوفني هيج وضعي تحاول تساعدني بأي شي
- ليش تعاركتي وياه ؟ شنو السبب ؟
- امممم ما عندي فلوس ادفعلة ايجار
-ما عندج فلوس لو راد منج شي ثاني ؟
... -
- خلص فهمتج كملي ورة  مطلعتي من يمة وين رحتي ؟ لذاك البيت !؟
- لا اني مرحت للبيت ذاك ابد مو بهاي الفترة بس اللي صار مرية شافتني بالسوك ادور على شغل يم محل هي جانت واكفة بي كزبونة ما قبل يشغلني وطلعت صاحتني هي كالت  تعالي اشغلج عندي بالبيت واني وحدانية بس بنات عندي ومتزوجات وما اكدر لشغل البيت واللي تشتغل عندي اتزوجت و ملكيت بعد غيرها
كلت الحمدلله اجاني الفرج
و رحت وياها نمشي نمشي ومنوصل مكان بعيد كلش وبدينا نفوت بدرابين ضيقة وكمت اشوف وجوه شباب مدري شلونهم حتى نظراتهم تخوف
سالتها للمرية شوكت حنوصل وكالت مبقى شي هنا وصلنا اشرتلي على بيت قديم بابة خشب وجبير شوي
فوتتني وياها جان البيت مفتوح نظامة شرقي بلا سكف ونافورة بنصة وتارستة زرعات وشتلات بس حلو ومرتب
جابتلي مي وطلبت مني اروح وياها لغرفتي ارتاح وصدك نمت مرتاحة بوقتها ورة ساعتين او تلاثة هيج كعدتني حتى اكل وياها وبدت تحجيلي على شغل البيت
- باعي عيني شمس
- اي خالة
- خالة شنو صيحيني باسمي عبير
- صار
- شوفي البيت اريدة كل يوم يلمع ويتنظف وما ينقصة شي الادوات والمنظفات كلها يمج بهذا الديلاب
الطبخ علية لان ما اعرف اكل من غير ايد
يجوني جماعة معارفي نسهر بالليل ونتعلل ومرات نشرب اريدج تصيرين شاطرة وتحضرين الطاولة والنركيلة كل يوم المغربية بينما يجون اريد كل شي جاهز
وشطلب منج تنفذين بدون نقاش وتشلعين كلبي