شمس

٣١

#شمس٣١
شهد السلمان

مو مجبور انه احجي ماضي راح و مات لكن حتى كل واحد يعرف شنو الة و شنو علي لازم احجي كل شي حتى تعرفون الصار واذا اني علية حق مستعد ادفعة و بالثمن اللي يريدة اكرم حتى لو جانت حياتي بس مو باللي تريدة انت يا هاشم ..

جنت شاب باول طلعتي حبيت بنت جيرانة  بالمنطقة حسيت هي كل دنيتي ومو لان جنت شاب وطايش لا بس فعلا حبيتها براءتها و اخلاقها وادبها وحتى جمالها و برغم اعرف بيها تحبني وجان واضح من عيونها لكن ولا مرة كالتلي او قبلت نتلاكى لوحدنا
جنت بعدني ممخلص كليتي العسكرية و ردت اتقدم بعد ما اتخرج
بس امي كالت البنية دتنخطب ونكدر نروح ونحجي بيها نحجزها الك و محد يكدر بعد يفك حلكة وفعلا هذا الصار رحنا و تقدمنا و كل شي ماشي مثل ما مخطط وانخطبنا بقراية فاتحة بس بدون حتى حلقات واتفقنا بعد ما اكمل مباشرة الزواج وهالكلمة اخذتها من ابوها ،

مرت شهور وايام واحنا نتراسل بمراسيل ورقية نكتب بيها كل مشاعرنا و احلامنا و اشتياقنا لحد ما  كملت و بديت اداوم واتعينت
بيوم اللي رحنا حتى نحجي بتفاصيل العرس
تفاجئنا بردة فعل اهلها لمن رفضو يكملون هالخطبة والسبب احنا منوالمهم والبنية متريد تكمل ،
انصدمت بس عرفت بعدين منها برسالة دزتها بيد بنت عمتها انه اكو شخص جان يحوم حواليها كل هالفترة وهي فكرها يتحرش او يريد منها شي لهذا محجتلي شي عنة اعتبرت القصة مو مهمة بس هو تقدم لاهلها
وبسبب نفوذة و فلوسة اهلها قبلو لان حالتة المادية حتخلي بنتهم عايشة بوضع ممتاز و كذلك هم حيرتاحون و يصعدون بفلوس زوجها المستقبلي لان وعدهم بوظايف و بيوت و فلوس خلاهم يجبرون بنتهم على الزواج منة برغم كل محاولاتها انه ترفض و متتزوجة ..