شمس

٣٧

#شمس٣٧
شهد السلمان

كل موقف امر بي ويا شمس يوصلني لنفس النقطة دائما ويخليني اتاكد منها وهي انه اختياري الها جان دائما بمحلة برغم هي خطفت كلبي ومن دون ما اكون بارادتي سلبت كل تفكيري
وروحي صارت مرتبطة بروحها
يوم اللي اشوفها فرحانة كأنما اني فرحان واذا عيونها ذبلت من زعلها كلبي يزعل قبلها
وصلت لمرحلة ما اعتقد راح اكدر احب بعد او اشوف غيرها او مثلها تكدر تتحكم بية وبكل جوارحي من دون متكون مسيطرة ولا متسلطة  كل شي بالحب و الحنية ..

ما كدرت اقنعها بزاوجنا بعد ما حاولت بكل الطرق وحتى لام نور رحت وحجيت وياها على امل انه تأثر عليها و تخليها تغير رأيها
بس الموضوع بالنسبة لشمس مبدأ مو شغلة شكليات و منو موافق ومنو لا
كلامها صح هي مشافت اي شي من حياتها ومكدرت تحقق اي حلم جان ببالها عكسي اني حققت كل شي اريدة واكثر وهي متريد تحس بهذا النقص ولا احد يحملها منية انه تزوجتها و يكول اني اللي رفعتها

صحيح اني رجعت مقهور منها بذاك اليوم من كالتلي نتفارك بس ممقهور من رفضها لان اني مستحيل اخليها لوحدها وحتى اثبتلها محبتي مثل ما هي تثبت محبتها الي بفعل مو بس كلام  راح اسندها بكل شي مادي معنوي نفسي اي شي ممكن اقدمة حسوي ممستعد اخسرها ابدا واكدر اتحمل لحد ما هي تقبل ويمكن اكدر اقنع اهلي مع انه ما مهتم كلش لقبولهم