شمس

٢١

#شمس٢١
شهد السلمان

ما كدرت انسى تفاصيل اللي صار وياية طعم الخيانة مر ومعناها جبير ومؤذي لشخص جربها وعاشها من بعد ثقة جبيرة بأعز اثنين بحياتة
جنت اكول لنفسي محد يخون وهالشي مبالغ بي وماكو شي اسمة غدر لان الناس اللي انت تكون زين وياها لازم تردلك الزين
وما جزاء الاحسان الا الاحسان ماخذ الدنيا بطيبتي وما متوقع مقابل مو زين ابد..
بس اني اتجازيت بطعنة بظهري ما انساها طول عمري
حبيتها الها بكل احساسي واخلصت وياها وابد ما خنتها
وما قصرت وياه هو بشي جنت الة سند واخ لان هو ما عندة اخ وصرتلة مثل مرايتة
اجي اشكي يمة نار حبها واطلب نصيحتة وشتصرف وياها وليش سوت فلان شي وليش زعلت وليش وليش ...
وكل ليش جنت الكة الها اجابة و حل الا سؤالي الة
( ليش غدرتني يا خويا ؟ ) 

- اكتفيت بسكوتك معقولة !؟
- شتتوقعين مني واني منهار وادور مكان انهزم منة من اسئلة اهلي واهلها وليش فسخت خطبتنا وليش تركتها وشلون صار هالشي وكم من الاسئلة والفضول من المحيطين ميخلص
- يعني مكتلهم شي !؟ محجيت ع السوتة بيك !؟
- كتلهم ما اكدر اكمل وياها وعندي مشاريع ببالي واحتمال اسافر وهي متريد تسافر وتكدر تدور اللي يسعدها
- بس هذا سبب مو مقنع اكيد حيبقون وراك
- وبعدهم باقين وراية وابوية علاقتي بي شبه منقطعة حاليا لان هو يعتبر هالشي تنزيل راس الة كدام صديق عمرة كسرت كلمتة و كلمتي كدامهم
- وليش محجيت ؟؟ ليش تتحمل ذنب هي سوتة !
- مكدرت افضحها ..
بيوم من الايام جانت هي حبيبتي و حتصير ام بيتي وجهالي شون احجي هالشي الموضوع ميمسها وحدها معناها اني ما عندي كرامة واني جنت نصبة الها ولصديقي و مستحيل اتقبل على كرامتي احد يكول اي كلمة تحسسني بشفقة من المقابل وتطلع هي الموزينة واني المظلوم شي صعب علية حتى لو هي هاي الحقيقة ..