أمل حياتي

أمل حياتي ١٢

#أمل_حياتي_١٢

ما إن عادت أمل لمنزلها بصحبة شقيقتها وابنتها حتي استأذنت منهما حتي تدخل غرفتها وتنام معللة ذلك بارهقاها طوال اليوم. تابعتها رغدة بنظراتها حتي اختفت أمل داخل غرفتها لتلتفت الي خالتها وتبدأ حديثها متسائلة

- هو أنا غلطت في ايه يا خالتو؟
- مغلطتيش في حاجة يا روح خالتو، وهو ايه اللي حصل؟ ليه بتقولي كدة؟
- ايه اللي حصل؟ انا مش صغيرة يا خالتو عشان اصدق انها صدعت فجأة عشان كدة موودها اتغير علي الغدا. ماما وشها اتغير تماما اول ما جبت سيرة بابا، هو مش الطبيعي يبقي معانا في موقف زي ده؟ ليه مصرة تحرمني منه؟

رفعت كاميليا رأسها لتنظر لابنة شقيقتها نظرة لم ترها من قبل فهي لم تعتاد أن تكون نظرات خالتها بتلك الحدة. رفعت كاميليا يدها في وجه رغدة لتتوقف الأخيرة عن حديثها في دهشة قبل أن تجيبها خالتها

- تحرمك منه؟؟ لا يا رغدة، انا طول عمري فاهمة موقفك ومعاكي بس مش هسمح ابدا انك تيجي علي أمك كدة ولو في ساعة عصبية حتي. لا يا بنتي متخليش الشيطان يعميكي عن اللي بيحصل ويقسي قلبك علي عليها بعد كل ده.

خفضت رغدة رأسها في خجل لا تدري ماذا تقول بعد أن شعرت أنها أخطأت بحق أمها لتمسك خالتها بيدها لتقربها إليها قائلة

- اوعي تزعلي من كلامي ولا تتكسفي

لم تستطع رغدة التماسك أكثر من ذلك فأطلقت لدموعها العنان لتدخل في نوبة بكاء فاجأت خالتها التي ضمتها بحنان الي صدرها وهي تربت علي كتفها قائلة

- اهدي يا رغدة عشان خاطري، بتعيطي ليه دلوقتي بس؟ والله ما حصل حاجة لكل ده، استغفر الله العظيم ياربي هو احنا بس لحقنا نفرح للنكد ده؟!

رفعت رغدة وجهها تنظر الي خالتها لترد بصوت يكاد لا يسمع قائلة

- والله يا خالتو مش بقسي عليها ولا أقدر، انا اكتر واحدة شايفة هي تعبت ازاي عشاني بس انتي عارفة أنا مستنية اليوم ده بقالي اد ايه يا خالتو وعارفة انا بحب عادل ازاي فكان نفسي فرحتي بس تكمل في اليوم ده بوجود بابا مكنتش فاكرة اني هزعلها بكلامي ولا كنت عايزة اضايقها.

- عارفة والله يا حبيبتي وبعدين انتي مين قالك انها اتضايقت ولا زعلت بس كل الموضوع أنهم منفصلين بقالهم سنين يا رغدة فطبيعي انها متحسش براحة لما يبقي موجود فجأة كدة وفي حاجة مصيرية. مش بقول أن أبوكي وحش بس ده احساس طبيعي يابنتي، بكرة تكبري وتفهمي كلامي بس يارب ما يحكم عليكي تحسيه ابدا.

هدأت رغدة واستكانت في حضن خالتها التي أكملت

- طيب تصدقي شوفي انا كنت بحب عمك ابراهيم ازاي ومكنتش اتخيل اني هعيش بعده يوم، والله لو قام من موته دلوقتي بعد ما اتعودت علي غيابه هبقي برضو مش مرتاحة. اتعودت علي وحدتي يا رغدة وعدم وجود راجل في حياتي يا بنتي