أمل حياتي

أمل حياتي ١٥

#أمل_حياتي_١٥

انتظر عادل حتي ابتعدت أمل بسيارتها بعد أن ودعها علي وعد باتصال قريب لتحديد موعد لزيارته لها بصحبة والده، ليستقل بعدها سيارته قبل أن يمسك هاتفه ليطلب رقم حبيبته التي طال انتظارها له.

جاء صوت رغدة علي الهاتف مرحبا بمزيج من اللهفة والتوتر

- أيوة يا عادل
- أيوة يا حبيبة عادل

ابتسمت رغدة في خجل وكأن صوته وحده يكفي ليطمئنها ليكمل هو في خبث

- وحشتيني
- وانت كمان جدا، انت فين يا عادل مختفي؟ من ساعة ما قابلت ماما وانت فيك حاجة متغيرة

وكأنه كان ينتظر سؤالها ليبدأ تنفيذ خطته التي أعدها لتبرير غيابه

- أنا؟! لا خالص والله، انا بس كلمت طنط يومها زي ما اتفقت معاها وهي مردتش فبصراحة اتكسفت أسألك وقلت يمكن تكون مش موافقة مثلا ومش عارفة تقولي ايه
- مش موافقة؟! لا خالص والله بس هي يومها كانت تعبانة شوية عشان خرجنا كلنا بعد شغلها فنامت بدري وهي اصلا  بتتخنق من الموبايلات فتلاقيها مشافتش مكالمتك. بس أنا هخلي خالتو تلمحلها من بعيد.

ابتسم عادل لبراءة محبوبته قبل أن يرد قائلا
- طيب الحمد لله، يعني أنا مش مرفوض؟
- لا طبعا خالص
- طمنتيني يا رغدة، خلاص ارجع البيت بس واشوف ظروف بابا واكلمها علي طول.
- تمام، طمني لما ترجع
- حاضر يا حبيبتي. خلي انتي بس بالك من نفسك
- من عنيا، يلا باي دلوقتي
- باي

ما أن رأي فريد أمل من شرفته وهي توقف سيارتها حتي ايقن أن وصول وحيده قد بات وشيكا لينهض ويتجه الي الداخل ويبدأ في إعداد طعامهما وهو يدعو الله ألا تضطره معرفته لما قالت أمل لابنه في العدول عن مباركته لهذه الزيجة.

أغلق عادل باب منزله خلفه وهو يصيح مناديا

- بابا
ليأتيه صوت أبيه من المطبخ مجيبا

- أيوة يا عادل انا هنا

ليظهر بعدها عادل ويقف مستندا علي باب المطبخ قائلا
- سلام عليكم يا سيادة اللوا، عامل ايه
- وعليكم السلام يا حبيبي، حمدالله علي السلامة
- الله يسلمك، الله الله علي الدلع وكمان بتحضر الاكل قبل ما ارجع
- عيب عليك ده الاستطلاع ده شغلتي، انا شفت حماتك بتركن عرفت انك قربت انت كمان فقلت اقوم اجهز الاكل علي ما توصل

ضحك عادل قائلا

- حلوة حماتي دي، حضرتك لبست الدبل وانا برة ولا ايه؟

ضحك فريد قبل أن يلتفت لولده وقد ظهرت علي وجهه علامات الجدية قبل أن يسأله
- طمني، ايه اللي حصل؟
- زي ما توقعت بالظبط، كانت عايزاني عشان تحكيلي علي والد رغدة وبصراحة فجأتني بثقتها فيا يا بابا
- مش قولتلك انها ست محترمة ودوغري
- ايوة بس هي قالتلي السبب الحقيقي في بعدها عن جوزها بعد حادثة ابنها
- سبب ايه يا عادل، خير؟
- الراجل مدمن كحول وكان سكران لما نزل بابنه البحر وطبعا غير أنه قدرها وعمر الولد بس هو معرفش يلحقه عشان طبعا مكنش في وعيه