أمل حياتي

أمل حياتي ١٩

#أمل_حياتي_١٩

عقد عادل حاجبيه باستغراب وهو يكرر ما قاله أباه لتوه

- طنط أمل؟! مش فاهم يا بابا من ناحية ايه يعني؟ هو في حاجة ولا ايه

لم يشك عادل للحظة أن يكون سؤال أبيه لأمر يخصه هو لذا كان كل ما يخشاه أن يكون قد لاحظ شيئا من المحتمل أن يؤثر علي ارتباطه برغدة فاندفع يجيب عن سؤال أبيه بينما ظل الاخير صامتا ليقول

- حضرتك عارف، بحبها جدا وست محترمة أو زي ما حضرتك كنت دائما تقول ست زي الفل مفيش عليها خلاف.

اطمأن قلب فريد لإجابة عادل وابتسم في هدوء قبل أن يعتدل في مقعده وينظر في عيني وحيده كمن يوشك علي الاعلان عن أمر هام ليقول بعدها دون تردد

- طيب بص يا عادل، بما اننا طول عمرنا أصحاب وأنت بقيت راجل دلوقتي فأكيد هتفهمني.

دق قلب عادل بقوة وتضاعف قلقه وهو ينظر لأبيه الذي أكمل قائلا

- أنت عارف مامتك اتوفت بقالها سنين ومش هقولك انا حرمت نفسي من حاجات كتير عشانك وضيعت عمري والكلام الفارغ ده عشان انا معملتش حاجة غير اني قمت بدوري كأب طبيعي لولد كبر وبقي شاب زي الفل يفرح ربنا يحميه، فأوعي تفتكر اللي هقوله ده عشان الأسطوانة اللي ناس كتير بتقولها دي.
- قلقتني يا بابا، خير في ايه؟
- متقلقش يا حبيبي مفيش حاجة ان شاء الله خير

ظهرت علامات الارتياح علي وجه عادل وهو يستمع لأبيه الذي أكمل

- ده لو وافقت انت
- لو انا وافقت؟!! اوافق علي ايه يا سيادة اللوا؟
- دلوقتي بما انك هتتجوز انت ورغدة ان شاء الله وتسيبوني انا ومامتها نعيش لوحدنا، فأنا بفكر اتجوز طنط أمل يا عادل

فتح عادل عينيه عن اخرهما في دهشة وهو ينظر لأبيه في دهشة قبل ان يبتسم مكررا ما قاله أباه

- تتجوز طنط أمل؟! حضرتك عايز تتجوز طنط أمل؟

ظل فريد صامتا ينظر لوحيده لا يدري إذا ما كانت ابتسامته سخرية مما قال ام ترحيب وقبول بقراره حتي أنهي عادل حيرة ابيه قائلا

- أنا أكيد عمري ما هرفض حاجة زي دي يا بابا ومش عشان انا ابن حضرتك أو عشان حضرتك ضحيت عشاني كتير وآن الآوان تعيش شوية لنفسك ولو أن ده حقيقي بس عشان ايه المانع فعلا؟ ماما اتوفت بقالها سنين وحضرتك كنت احسن اب في الدنيا ليا عمري ما حسيت اني ناقصني حاجة وسبت شغلك عشان تفضالي ودلوقتي زي ما حضرتك قلت خلاص هتجوز هتبقي أنانية مني لو اعترضت أو رفضت جوازك.

دمعت عينا فريد من كلمات عادل وما اوضحته من تفهمه لنضحية أبيه وحبه الشديد له قبل أن يكمل

- وطبعا انا معنديش اي اعتراض علي طنط أمل، اولا ظروفها مناسبة جدا لحضرتك وهي ست محترمة وتشرف اي بيت فعلا وثانيا عشان حضرتك نعم الاب لرغدة وانا متأكد أن حضرتك عندك القدرة تعوضها حنان الاب اللي اتحرمت منه طول عمرها.