Let's Race

Chapter 10

Chapter 10

Night Talk with Him

***

Natapos ang sampung minuto at lumabas na si Jens sa kusina. Nakabuka pa ang kanyang mga kamay at inilalahad ang kanyang matipunong dibdib. Nakasuot naman siya ng shirt pero bakat lang 'yong pagkalalaki niya sa itaas. Lumalaki pa ang butas ng kanyang ilong dahil parang nakalanghap siya ng isang sariwang hangin.

Heto naman ako, nakaupo at nakasalumbaba rito sa may isang round table habang nakangiwi at nakataas ang kilay sa posturang ginawa niya. Ito 'yong oras para puwede akong mag-"ngi".

Wala na rin namang tao rito sa cafeteria. Pumanhik na sa kani-kanilang kuwarto ang mga trainees dahil tapos na ang lunch, mahigit isang oras na rin ang lumipas.

"Oh, ito na ang can-we-talk-baby moment natin, Binibining Gold?" Umupo na siya sa isang silya rito sa round table pero nakaharap ang sandalan niyon at nakapatong ang kanyang braso roon.

"Tigil-tigilan mo nga ako sa mga kadiri at non-sense mong pinagsasasabi, Mr. Ermino."

"Jens na lang."

"Okay, Jens. May mga itatanong lang ako sa 'yo."

"Go ahead." Umaangat-angat pa ang kanyang ulo at ang yabang-yabang ng kanyang awra. Ang sarap mong pisatin!

"Nabalitaan ko na may isang trainee ang napatalsik dito few days ago at belong ka sa mga—"

Nawala ang ngiti sa kanyang labi at kanyang kilay ay unti-unting nagtatagpo.

"Kanino mo nalaman 'yan?" malamig at nakatitindig balahibo niyang tanong.

Tila umatras at natakot ang aking mga laway kaya nagtago sila sa loob ng aking esophagus. Nanigas at nanlamig din ang aking mga daliri at hindi na mapakalma ang aking puso. Ano ba ang nagyayari sa akin? Natatakot ba ako rito sa demonyong 'to?

"Ms. Guinto, sino ang nagsabi sa 'yo niyon?"

"Wala."

"No one?" Bigla na lang siyang tumayo mula sa kinauupuan niya at lumapit sa akin. "Sabihin mo kung hindi baka ito na ang maging huling araw mo rito."

"May karapatan ka ba?" matapang kong tanong habang nakatingala sa kanyang nanggagalaiti at seryosong mukha. Ang mga salita namang nakapila na sa aking lalamunan ay nagtutulakan kung ano ang dapat na lumabas.

"Wala. Pero I can ask Miss Idda to expel you," saglit siyang huminto at mahigpit na hinawakan ang aking braso. Malamig at mamasa-masa ang kanyang palad. "Ako naman ang magtatanong kung ayaw mong sabihin kung sino ang nagbigay impormasyon sa 'yo tungkol sa nangyari few days ago. Are you a Half?"

Bahagya akong napapikit. Anong half?

"Answer me, Ms. Guinto. Are you a Half?"

"Ano'ng sinasabi mo? Anong kalahati ba 'yan?" Nagpupumiglas na rin ako dahil humihigpit ang kanyang pagkapit sa aking braso. Napipipi na iyon at napapadaing na rin ako. "Ano ba Jens?" hiyaw ko.

Nakarinig na lang ako ng isang pagtawag mula kay Miss Idda mula sa entrance ng cafeteria na ito.

"JENS ERMINO!" sigaw nito. Bago pa man tanggalin ni Jens ang kanyang palad sa aking braso, ang dating mamasa-masa ay tila naging disyerto. Nanuyo ito bigla saka na niya tinanggal ang kanyang palad.

Mabilis ang paglalakad ni Miss Idda papunta sa aming puwesto. Kinukurot pa niya ang kanyang itim na gown para maiangat ito.

Kinapa-kapa ko naman ang braso ko kung saan parang pipigain na ni Jens ang laman-loob nito. Masakit ha. Pagkapa ko naman, nawala na nga ang tila mamasa-masang pakiramdam. Napapaisip ako kung guni-guni ko lang ba 'yong pakiramdam na iyon o hindi.