خرج كرم من حجرته يبحث عن نسرين بارجاء المنزل وجدها تجلس أمام التلفاز تحرك قدميها بعصبية تقدم منها وجلس بجوارها قائلا بهدوء بينما يسند مؤخرة رأسه علي المنضدة: مالك قاعدة كدة علي الصبح ليه.
نظرت له نسرين بحنق ثم أدارت وجهها عنه قائلة بصوت حاولت جعله طبيعي قدر الإمكان: مفيش يا حبيبي مش يلا ننزل نفطر تحت عند اهلك.
نظر لها كرم بطرف عينيه قائلا: ده ايه الرضا ده كله.
نظرت له نسرين بغيظ: خلاص انا غلطانة يا كرم اني بقولك.
نهض كرم قائلا بابتسامة: لا غلطانة ولا حاجة يلا ننزل أنا اهلي وحشوني اوي اصلا نغير وننزل قومي يلا.
نسرين بابتسامة خبيثة: حاضر يا حبيبي.
كانت فاتن تضع اخر صحن علي الطاولة استمعت لطرقات علي باب المنزل كادت أن تتوجه لفتحه أوقفها ابراهيم قائلا: خليكي انتي يا فاتن هفتح أنا.
جلست علي مقعدها وجدت ابراهيم يدلف وخلفه كرم وزوجته، تقدم منها مقبلا رأسها قائلا بحب واضح بعينيه: ايه يا تونة وحشني أكلك.
فاتن بشوق: والله طالما وحشك مكنتش بتيجي ليه كل الفترة ديه تسأل.
كرم بحزن: خلاص بقي يا تونة اللي فات مات، وجه نظره لوالده قائلا: ولا ايه يا حاج.
جلس ابراهيم علي مقعده قائلا بهدوء: اقعد يا كرم قبل ما الفطار يبرد.
جلس كرم وجلست نسرين بجواره قائلة بود مصطنع: صباح الخير يا طنط صباح الخير ياعمو.
نظرا لها ابراهيم ولم يرد عليها لترد فاتن بحنق: صباح الخير يا حبيبتي يلا كلوا قبل الاكل ما يبرد.
بدأوا بتناول الطعام ليقول كرم بتساؤل: ايه مش سامع صوت لغريب هو مش هيجي هنا زي كل يوم ينزل معانا الشغل.
صبت نسرين كل حواسها فهي يأكلها الفضول الي اين توجها في الصباح الباكر لتجذ علي أسنانها بحقد عندما قال إبراهيم: خد مراته وطلعوا شرم الشيخ يقضوا اسبوعين مع نفسهم من ساعة ما اتجوزت مخرجوش غير مرتين تلاتة بس.
كرم بابتسامة: ربنا يكرمه غريب يستاهل كل خير.
نظر له ابراهيم قائلا بقصد: هو ربنا كرمه ببنت الحلال المحترمة عقبال الباقي.
نظرت له نسرين قائلة بغيظ: قصدك ايه يا عمو.
كرم بحزم: نسرين.
نهضت قائلة بحنق: شبعت عن اذنكم.
ذهبت لينهض كرم قائلا: ثواني يا حاج وهاجي علشان نروح الشغل مع بعض.
اومأ له ابراهيم بلا مبالاة ليذهب كرم خلف زوجته بينما لامت فاتن زوجها قائلة: يا حاج براحه علي كرم.
ابراهيم: لازم اعمل كدة معاه يا فاتن انتي مش شايفة مراته ولبسها وتصرفاتها ده كرم ده اللي مبيسبش فرض يسيب مراته تمشي باللبس ده وطريقتها البجحة ديه.
أنت تقرأ
ليالي الغريب
Romanceانتظر سنوات عديدة علي أمل أن تأت من تحتل فؤاده إلي أن مل من الانتظار لينشغل بأعمال العائلة ومشاكلها .. كانت مثل العديد من الفتيات تحلم بفارس احلامها وضعت مقاييس معينة تختاره علي أساسها لكن للنصيب رأي آخر سنتعرف عليه من خلال الأحداث ..
