ليالي الغريب

الفصل الثالث والعشرون

جف حلق نسرين بعدما وجدت ملامح كرم تتغير ويضغط علي كتفيها بعنف لتقول بارتجاف: ككرم انت بتحبني.

نهض كرم قائلا بعنف: روحتي لدكتور لوحدك ازاي يا هانم من غير ما تقولي لجوزك ولا انا مليش لازمة في البيت بتخرجي من ورايا.

قطبت نسرين جبينها قائلة بصدمة: ده اللي همك من الموضوع يا كرم.

نظر لها كرم قائلا بغضب حاول السيطرة عليه: روحتي مع مين وامتي.

أردفت نسرين بألم ظنا منها أنه سينهي تلك العلاقة لا محالة ندمت علي عدم تنفيذ كلام والدتها لتقول بحزن: روحت مع ماما النهاردة الصبح.

أردف كرم: ومجاش علي بال الهانم تتصل بيا تقولي ليه ولا انتي ملكيش راجل تاخدي رأيه.

نهضت نسرين مقتربة منه بتوتر: كنت عايزة اعملك مفاجأة يا كرم قولت يمكن اطلع حامل بس .. أدمعت عينيها لتغلقها بقوة قائلة بحزن: عمري ما هكون ام ولا هعرف اخليك تكون اب.

هدأ كرم من حدة عصبيته قليلا ليقول بهدوء: سبق وقولتلك يا نسرين انك انتي اللي تهميني أنا متجوزك علشان بحبك ومش هتخلي عنك ونروح ياستي لكذا دكتورة ونطمن ونعمل تحاليل الدكتورة ديه كان كشف مبدأي.

قاطعته نسرين بحزن: لا ما أنا عملت تحاليل واكدتلي اني مستحيل اخلف.

حاول كرم التحكم في عصبيته فهي لم تخبره بكل ذلك أردف بحزم: روحي نامي يا نسرين وخلي ليلتك تعدي علي خير.

نظرت له نسرين بأعين دامعة: يعني انت مش هتطلقني.

فتح فاهه بدهشة قائلا: أنتِ شايفاني ندل اوي كدة علشان اسيبك في اول عقبة في حياتنا وبعدين قولتلك كفاية أن انت جنبي مش عايز حاجة تاني.

أردفت نسرين بسرعة بسعادة: طب أنا كنت بفكر نتبني طفل و ..

قاطعها كرم بحدة: مستحيل متفكريش في الموضوع ده تاني.

عبست نسرين قائلة: اسمعني بس يا كرم ا..

أوقفها كرم قائلا بحدة: الكلام انتهي يا نسرين مش عايزك تفتحي الموضوع ده تاني اولا التبني حرام اسمها نتكفل بتربية طفل وانا مش مستعد لخطوة زي ديه احترمي رغبتي ارجوك.

تركها وعاد للفراش مرة اخري مغلقا ضوء الغرفة بينما هي ظلت واقفة تنظر له بألم متمتمة بسرها: وانت ليه متحترمش رغبتي في اني اكون ام ..

شعر كرم بالحزن من ذلك الخبر لم يرد ان يبين لها وقرر بداخله أنه لن يتخلى عنها فهو ليس بندل لتلك الدرجة وفكر إذا تبدلت الأدوار هل كانت ستتركه بالطبع لا لن يتركها ابدا ولكن لن يتبني طفل أيضا ..

في صباح اليوم التالي جلس كل من نائل وشاكر وشريف مع صاحب المصنع الذي يريد بيعه ليقول الأخير بابتسامة: ها ايه رأيكم في السعر ده علشان خاطرك بس يا شريف والله انت صاحبي من ايام الجامعة ولولا أني مستعجل في السفر مكنتش بعت المصنع اصلا.